Mazə fati dikə tə Mardushe
6
Ma tə virɗi va ki na, kala dza ma hiy dzəti mətsə mazə. Dza na mbaʼ ɗuwvə zliya tsaslaghwa məndi shi dza məndiy zama ghən ti shi. Kwa zliya va tsaslaghwa məndi shiy mənəhuvashi tə hiɗi va. Dza məndi ka jangancishi ki. 2 Məndi mbə jangə shi va na, mbaʼ məndi jangəkə pi tsaa niy cikəvəri Mardushe va kumaa niy pəhəti kar Bigətaŋ lə Tereshə va ta pəəsli mazə Zerkəses. Mbəzli vay, mbəzli tsəʼu tsəʼu ni, ka ndəghu miy ceker kiy ghyi tsa mazə niy nza ghəshi. 3 Ma kə mazə ki na: «Aa dikə tsaa niy fati məndi tə Mardushea? A shiy niy mananati məndi kaa ngəci ta kuma mənti na vaa?» kə. Ma kə ka sləni mazə na: «Shiy tiɓa məndiy mananatiw» kə ghəshi. 4 Ma kə mazə ki na: «A ntsa pəriɓa kwa tipəa?» kə. Ghala vəghu tsa va ki na, mbaʼ Haman niy tsahuy pərikə kwa tipə mazə, ta ɗuw va mazə a məndi ɓərtanti Mardushe tə tsəm tsaa niy liy na va ta ɓərti ci. 5 Ma kə ka sləni mazə ki na: «Haman na sa pərikə kwa tipə,» kə ghəshi. «Səmbə ghəci,» kə mazə. 6 Dza Haman ki, mbaʼ dzəmbiy. Ma kə mazə kaa ngəci na: «A shiy təɓə məndiy mananati kaa ntsa ɗi mazə fə dikəə dzətia?» kə. Ma kə Haman mbə ghən ci ki na: «A tsava ntsa dza mazə vaa fə dikəə dzəti dzəghwa kənee kiyaa?» kə. 7 Ma kə kaa mazə ki na: «Mbaʼ pə ghaa di fə dikəə dzəti ndiy maziy, 8 ə kə məndi ɓəvə kubaŋ tsa səəkə ghaa pakən, mbaʼ məndi kəsəvə gəduw tsa səəkə gha mə, mbaʼ məgapa pəərə ghən gha mbə kuma ci. 9 Ka gha dza ki na, mbaʼ gha gəzanci kaa ntsa dikə tsa mbə ka sləni gha a ghəci səranakən kubaŋ tsa gha va, mbaʼ famə mə gəduw tsa va, nza məndi tuwrə li dzar kwa kwal tsa dikə tsa mbə məlmə. Ma kə məndi dzaa ni mbə ʼwanci kuma na: “Avanay njasa mənti mazə lə ntsa sa ɗi na fə dikəə dzəti,” kə məndi dzaa ni,» kə.10 Ma kə mazə kaa Haman ki na: «Mbala kiyaŋukiyaŋu a gha dzaa ɓəvə kubaŋ tsa va, mbaʼ gha kəsəvə gəduw tsa va, nza gha dzaa mananati kaa Mardushe ndə ka zhəwifə tsaa ghəra sləni va kwa dəgha njasa gəzəkə gha va. Əntaa gha tərəmbiy nahuti kuma ya kutiŋ mbə kuma gəzəkə gha va ma,» kə. 11 Dza Haman ki, mbaʼ dzaa ɓəvə kubaŋ tsa va, mbaʼ kəsəvə gəduw tsa va. Səəkə na kaa kubaŋ tsa va sərə səranakən kaa Mardushe, ɗal famə mə gəduw tsa va. Dza na ka tuwrə li dzar kwa kwal tsa dikə tsa mbə məlmə kala zlapə kwa kuma ci. Ma kə na : «Avanay njasa mənti mazə lə ntsa sa ɗi na fə dikəə dzəti,» kə.
Haman gəzə haʼu tsa kən kiy ghyi tsa ci
12 Liy hum ki na, mbaʼ Mardushe zhikəə nziyiy tə pi sləni tsa ci kwa dəgha mazə. Ma Haman na ci ki na, ka dzay lə divaa jighyi, mbaʼ nzəŋuy va haʼu. 13 Dza na mbaʼ slanakə kumaa kəsay va kaa kar mali ci Zereshə lə madigahiy ka canci kuma gwanashi. Ma kə mbəzli va kaa ngəci na: «Ndata ndə ka zhəwifə na Mardushe tsa ghati haʼu va dzay dzəkən gha kwa kuma ciy, shiy tiɓa gha dzaa mbay mananati ghulaw. Sənay tə gha, war va gha dza kuma ta kəray, kwa jipə ghuy li,» kə ghəshi. 14 war ghəshi ghulashi mbə gəzə kuma ki na, vaŋ ka kwal mazə tsahushi, mbaʼ ghəshi pəməhu Haman kiyaŋukiyaŋu ta zəmə zhi zəmə tati Ashəter va.