Məndi ɓərtanti Haman tə tsəm
7
Dzəghwa kar mazə ghəshi lə Haman mbaʼ ghəshi tsəhəshi ta zəmə shiy va Ashəter kwajən mazə ki. 2 Fəca kwa bakə vici va ghəshi mbə kərni zəmə shiy lə sa shiy ki na, zhəghwa mazə ka ɗuw va Ashəter, ma kə na: «A kuma ɗi gha ɗuw shəkaa kwajənee Ashəter? ɗuw kuma gha, ta məntəŋa dzee. A shi ɗi gha yən məntəŋaa? “Ya təhəvəri hiɗi gha ni bakə mbə a gha ndara bəla kutiŋ” nə ghay, ta ndaŋashi dzee,» kə. 3 Ma kə Ashəter kwajən mazə ki na: «Mbaʼ pə gha gar məntəɗa wəzə hur, gha gar zləɓavəy maziy, mbaʼ gha zlara tə ghuməra, zhini mbaʼ gha zlashi mbəzli mbə huləfee tə ghuməshi, ghənzə na kuma ɗuwee, ghənzə na kuma ɗee ghaa məntəra. 4 Sa nzanay, a məndi ɗəlantəra ghiy lə mbəzli mbə hulfee. Ta bəkuŋiy dza məndi, kərəp dza məndi ta zantəŋiy. Mbaʼ kə məndi niy ɗəlantəŋiy ta nza ghiy ka mevivi gwaʼa tsəgha nzay, ta nziyra dzee guŋəra nza. Sa nzanay, gəla nava kuma na ka dza naa mənta gar gagay mazə nzaw,» kə. 5 Ma kə mazə kaa kwajən ci Ashəter ki na: «A ntsaa pəhəti məni gəla nava kumaa? Kuma na tsava ndəa?» kə. 6 Ma kə Ashəter na: «Avanay ghəci Haman, ntsa gəmgəm tsa tsa. Ghəci na ntsaa ɗima mətsə ghiy va, ghəci na ndə mbəzə tsa ghiy,» kə. War sa gəzəkə Ashəter tsəgha ki na, war ə Haman gurəgurə va hazləni tiɓa kwa kuma kar mazə lə kwajən ci. 7 Dzəghwa nəfə tsa mazə mbaʼ satiy tərəŋu, mbərəkə zlay tay tsa ci, ka dzay dzəghwa pitsa ka naa məni makwaghwa kwa. Ma Haman na ci ki na, war ə ghəciy pəraʼu dəvə kaa Ashəter, kwajən mazə əntaa məndi paslanti. Sa nzanay, a Haman niy nay a mazə pəhəti kəranti kuma ci, kə. 8 Dza na mbaʼ ndəɓatəvay tə pi həni tsa nza mali va va ti. Ghalaɓa ki na, mbaʼ mazə zhəghəkəvay kwa tsa, mbaʼ zhay zhimbə ciki zəmə shiy tsa va. Ma kə mazə zlaŋ zlaŋ sa nay na na: «Əə zhini ntsaa ɗi zləghu həni lə malee kiy ghyi tsee kwa kumee shəkəna?» kə. War ghula mazə kərə lə gəzə kuma va na, ndaʼa juw ka sləni ci səəkəə mbəkway kumaª Haman lə kəjer. 9 Dzəghwa ma kə Harəbuna tsahuti ntsa tsəʼu tsəʼu tsa ghəra sləni kwa dəgha mazə kaa mazə na: «A Haman niy kəsliti tsəm mbaʼ laghwa kwa hiɗi ta ɓərti Mardushe tsaa mbəlantəŋa piy tsa gha va. Kiy ghyi tsa Haman na tsəm tsa va, metər bakəmətsəkə cifəti na biti tsa ci,» kə. «Ə kə məndi ɓərətanti Haman ti,» kə mazə. 10 Dzəghwa məndi ki, mbaʼ məndi ɓərtanti Haman tə tsəm tsaa niy laghwa na va kwa hiɗi ta ɓərti Mardushe. Mbaʼ nəfə tsa mazə dzəghway ki.