Ester 8

Fəcavata na, dza mazə Zerkəses mbaʼ ɓanavə gwanashi tsa shi Haman ndə mbəzə tsa ka Zhəwifə kaa kwajən ci Ashəter. Dzəghwa Ashəter mbaʼ gəzanci kaa mazə, mani nza ghiy lə Mardushe, kə. Dza mazə ki, mbaʼ haray Mardushe. 2 Sa səəkiy na na, dza mazə mbaʼ ɓəvə jaʼwa ci va niy sərəhu na tə dəvə Haman, mbaʼ səranati tə dəvə ci. Zhini Ashəter, mbaʼ fanambə shi Haman gwanashi mbə dəvə Mardushe diɓa.

Məndi pəhəti yəwun kuma ta kəəti ka zhəwifə

3 Zhəghwa Ashəter tapə ta gəzə kuma kaa mazə diɓa. Kərip ndəɓəyvata kwa səɗa ci, ka cəʼwə, kala wahə, nza ghəci mbəə bashanti kuma ndərəm tsaa niy pəhəti Haman ntsaa səvəri kwa miy dəgha Agagə vaa dzəkən ka zhəwifə ta bəkushi. 4 Dzəghwa mazə ki mbaʼ canati gəta ci va məntim tə tsahi mbəzə kaa Ashəter. Dza Ashəter ki mbaʼ satitaa garəta kwa kuma mazə. 5 Ma kə kaa ngəci na: «A mazə tsee, əə cəʼuŋee, sa nzanay, a Haman zəghu Hamedata ntsaa səvəri kwa miy dəgha Agagə tsasliti zliyahi ta bəku ka zhəwifə tə hiɗi gha gwanashi. Mbaʼ pə ghaa ɗi mənɗa wəzə hur, hur tsa gha kəə zhəŋa tə ya, kuma lə kwal pə gha nata kuma ɗee na ɗuw, ka təɓaŋa ghənziy, gəziy a məndi tsasliti nihuti zliyahi ta bashanti məni kuma tsasliti na va. 6 Njaa njaa dzee mbay səʼwati nighə ngəraʼwə ghəci mbə dzəkən mbəzli mbə hulfee kiya? Njaa njaa dzee mbay səʼwati nighə məndi zanti manəhira kwa kumee kiya?» kə.

7 Ma kə mazə Zerkəses kaa kar kwajən ci Ashəter ghəshi lə Mardushe ndə ka Zhəwifə ki na: «Avee gəzanshi kaa mbəzli mbaʼ ghəshi ɓərtanti Haman tə tsəm sa ɗi na bakwanti ka Zhəwifə. Mbaʼee ndaŋa shi ci gwanashi kaa ngəŋa gha Ashəter. 8 Mbaʼ kə məndi tsasliti zliya lə slən tsa mazə, mbaʼ məndi ʼiyaslati jaʼwa tə dəvə ci tiy, kwal tiɓa ta zhini məndiy bashamti məni kuma gəzati məndi va tə zliya va ghulaw. Nana kiy, ghuy kəə tsasli zliyahi dəʼwə ghən tsa ghuy kaa ka zhəwifə, nza ghuy gəzati kumaa təɓaŋuy ti lə slən tsee, mbaʼ ghuy ʼiyaslati jaʼwa tə devee ti,» kə.

9 Dzəghwa məndi fəcavata, tə hi bakəmətsəkə mahəkanti tə kwa mahəkana tir tsa har məndi vaa tir Shiwan, mbaʼ məndi ɓasəti ka tsasli shiy mazə ki. Dzəghwa Mardushe mbaʼ gəzanshi a ghəshi tsasli shiy kaa ka zhəwifə, lə kaa mbəzliy gura dikə dikə tə hiɗi va, mbaʼ kaa ngwamənahi, mbaʼ kaa nihuti mbəzli dikə dikə ni tə bəlahi tə hiɗi va va bələku mbaʼ bakəmətsəkə mbərfəŋəti ni. ʼWava na tə hiɗi Eŋəndə paʼa tə hiɗi Nwəbi. Ya nimaɓa hiɗiy, njasa ka ghəshiy tsasli shiy, ya namaɓa hulfə na, lə ghani ka naa gəzə. Kaa ka zhəwifə kuraku na, njasa ka ghəshiy tsasli shiy, lə ghani ka ghəshiy gəzə. 10 Lə slən tsa Mazə Zerkəses niy tsasliti məndi zliyahi va, mbaʼ məndi ʼiyaslati jaʼwa tə dəvə ci ti shi. Dza məndi ki, mbaʼ məndi ghunashi mbəzli ta vəli zliyahi va mə gədewesli tərati məndi ta dza ta ɗuw kuma mazə. 11 Ma kə məndi kaa kuma tsaslati məndi tə zliyahi va na: «A mazə ɓanavəshi kwal kaa ka zhəwifə mbə məlməhi tə hiɗi ci gwanashi ta ɓasəva ghəshi ta mbəli piy tsa shi. Ya hulfə nima mbəzli dza naa ɓasəshi ta pəsli ti shi lə shi mbəzə, ya tə nama bəla tə hiɗi ciy, Aa ɓanavəshi kwal kaa ka zhəwifə ta irəshi, ka bəkushi, ka zantishi. A kwal və shi ta bəku ya miʼi shi, ya ndərazhi shi, ya ka pahu shi shi gwaʼa. 12 Kuma vay, ta vici kutiŋ na tə pi tsa kəray hiɗi Zerkəses gwanashi. Tə kwa məŋ lə bakə tir tsa har məndiy, tir Adar, tə kwa məŋ lə mahəkanə vici ci. 13 Ya tə nama bəla tə hiɗi vay, kuma pəhəti mazə ta məni kə məndi taa ɓəti kuma va, ka gəzə kaa mbəzli tə hiɗi va gwanashi. Ghalaɓa kiy, sa ka vici va səəkəta na, nza ka zhəwifə gumatəvashi ta ndəghu ghən tsa shi va ka mbəzə shi,» kə məndi tə zliyahi va. 14 War sa ɓanavəshi mazə kwal ki na, dza ka zlərə gədewesli taram taram dzashiy dzəmə gədewesli ka məndiy dza ta ɗuw kuma mazə li shi, ka dzashi lə bali ta vəli zliyahi va. Dzəghwa məndi zlapə zlapə məndi zlapanti kuma va mbə məlmə Suzə nza mazə va mbə diɓa.

15 Dzəghwa Mardushe ki, mbaʼ səvəriy kiy ghyi tsa mazə lə kubaŋ mazə tsa ghəwə tsa mbaʼ sa pay tsa kən ghən ci. Zhini kirip kaa tsahuti kubaŋ tsa dikə tsa payiy, mbaʼ sa ghəm tsa diɓa. Gaʼ daghuba tsa bitə tsa məntim tə tsahi mbəzə mbə ghən ci. Ma mbəzli mbə məlmə Suzə ki na, war ka ngwəmə lala, ka vəshi. 16 Va ka zhəwifiy vici wahə, ka vəshi tərəŋu, ka tərə kushəl, ka garəgarə niy nza vici va. 17 Ya tə nama bəla tə hiɗi va, ya mbə nama məlmə, ya kuma tsəhiy nuwur tsa kuma pəhəti mazə va ta məni məndiy, war ə niy zli ka zhəwifəə dzəta ghumə, ka vəshi, ka tata shi zəmə, ka məni makwaghwa. Ya mbə nihuti mbəzliy kamaa ka zhəwifiy, ɗaŋ na mbəzliy niy fiy ghən tsa shi ka ka Zhəwifə, sa niy hazləni ghəshi va ka zhəwifə.