Ester 9

Ka zhəwifə bakwanti ka mbəzə shi

Dzəghwa ki, mbaʼ kwa məŋ lə mahakana vici tə kwa məŋ lə bakə tir tsa har məndiy Adar səəkəta. Vici vay, ghənzə na sa niy slati mazə, ta məni kuma pəhəti na va. Fəcava niy bərkəti ka mbəzə ka zhəwifə bəkushi. Ma ki na, mbaʼ kumaa bərkəti ghəshi va zhəghətaa dzəkən shi, pərɓa ka zhəwifə mbashi ka mbəzə shi va. 2 Dzəghwa ka zhəwifə mbaʼ ghəshi ɓaɓasəshi dzar mbə məlməhi nza ghəshi tə hiɗi sləkə Zerkəses ta mbəzə lə mbəzliy niy ɗi mananshi jikir va. Ndə tiɓa niy zhananatishi ghən ya kutiŋəw, sa nzanay, a ghəshi niy dzanti her mbəzli gwanashi. 3 Mbəzliy sləkə hiɗi kwasəbə mazə, lə mbəzliy gura dikə dikə tə hiɗi va lə ngwamənahi, mbaʼ nihuti ka sləni kwa dəgha maziy, war ta ka zhəwifə niy yəpə ghəshi. Sa nzana mbə hazləni ghəshi niy nza va Mardushe. 4 Ta na navay, ndə dikə niy nza Mardushe tsa va kiy ghyi tsa mazə. Gwaʼa gwaʼa niy dzantəvay slən tsa ci tə hiɗi va, war kwa kuma kwa kuma niy dza kuma ci.

5 Dzəghwa ka zhəwifə ki mbaʼ ghəshi mənti kuma ɗi ghəshi lə ka mbəzə shi gwanashi. Ka nzərəshiy dzəti kafaʼihi, ka bəkushi, kərəp ghəshi zantishi. 6 Kwataka mbə məlmə Suzə nza mazə va mbə kiy, a ka zhəwifə niy bəkuvə ka mbəzə shi va zhər diwiy diwiy cifə, kərəp niva mbəzli. 7 Mbaʼ ghəshi bakwanti kar Parshandata, mbaʼ Daləfwəŋ, mbaʼ Asəpata, 8 mbaʼ Pwərata, mbaʼ Adaliya, mbaʼ Aridata, 9 mbaʼ Parəmashəta, mbaʼ Arishay, mbaʼ Wayzata, 10 mbaʼ ndərazhi Haman va məŋ ni. Haman tsa vay, ghəci na zəghu Hamedata va niy ɗima kuma ka zhəwifə. Ma na shi shiy, niy ndəŋwashi məndiw.

11 Fəcavata ki na, mbaʼ məndi dzaa gəzanci ɗaŋ tsa mbəzli bakwanti məndi mbə məlmə Suzə nza mazə va kaa mazə. 12 Sa favə mazə kuma va ki, ma kə kaa kwajən ci Ashəter na: «Zhər diwiy diwiy cifə mbaʼ ndərazhi Haman va məŋ ni na mbəzli bəkuvə ka Zhəwifə kwataka mbə məlmə Suzə nzee na mbə. Njaa na ni dza ghəshiy bəkuvə mbə nihuti məlməhi kiya! Ya tsəgha kiy, a shi ɗi gha gha ɗuwaa? ɗuwshi, ta kumavəshi dza gha. A shi ɗi gha yən məntəŋa diɓaa? Ta məntəŋashi dzee,» kə. 13 Ma kə Ashəter na: «Mbaʼ pə gha gar zləɓavəy maziy, zhini ɓanavəshi kwal kaa ka Zhəwifə mbə məlmə Suzə ta məni həzlimə njasa mənti ghəshi tsa ndatsə, mbaʼ məndi papahati ndərazhi Haman va məŋ ni bakwamti məndi tə tsəm,» kə. 14 «Məntim tsəgha,» kə mazə. Mbaʼ məndi zhiniy zlapəy kuma va mbə məlmə Suzə. Dza məndi mbaʼ məndi pəhati mbəreketi ndərazhi Haman va məŋ ni tə cemesli. 15 Dza ka Zhəwifə mbə məlmə Suzə ki, ɓasə ghəshi zhiniy ɓasəshi tə kwa məŋ lə faɗa vici tə tir tsa har məndiy vaa Adar, mbaʼ ghəshi bakwamti zhər bələku bələku mahəkanə mbə məlmə Suzə. Na na shi shiy, niy dapashi ghəshiw.

16 Nihuti ka Zhəwifəə dzar mbə nihuti məlməhi kurakuy, a ghəshi niy ɓaɓasəshi ta ndəghu piy tsa shi. Mbaʼ ghəshi bakwamti ka ghəra shi diwiy diwiy məŋ mbərfəŋ mətsəkə cifə ti ghən kən, kala ndə tiɓa gar zhiniy gagashi ghula. Nanzə ki na, ɓə shi mbəzli va ghəshiw. 17 Tə kwa məŋə lə mahəkana vici tə tir tsa har məndiy Adar məniva shi va. Ma tə kwa məŋ lə faɗa vici na, dza ghəshi mbaʼ ghəshi dəkətəvashi, mbaʼ ghəshi mənti makwaghwa dikə, ka vəshi ghəshi. 18 Ta na na ka Zhəwifə mbə məlmə Suzəy, tə kwa məŋ lə mahəkanə mbaʼ kwa məŋ lə faɗə vici niy ɓasəshi ghəshi tə tir Adar tsa va. Dza ghəshi mbaʼ ghəshi dəkətəvashi tə kwa məŋ lə cafa vici, mbaʼ ghəshi mənti makwaghwa dikə, ka vəshi ghəshi. 19 Va tsəgha zhəghəti ka Zhəwifə mbə gamba, niy kama mbə məlməhi kwa kələm kwa məŋ lə faɗa vici tir tsa har məndi vaa tir Adar ka vici makwaghwa, ka zəmə shiy, ka vəshi, ka vəvəli shi zəmə dzar kwa jipə shi.

Njasa ʼwava makwaghwa Pwərim

20 Dzəghwa Mardushe ki, mbaʼ tsaslati kumaa mənta va gwanataa dzəti zliya. Dza na mbaʼ vəlanaghə zliyahi kaa ka zhəwifə tə hiɗi mazə Zerkəses gwanashi, ni ndəku ni lə ni kərakə ni gwaʼa, 21 nza ghəshi mbəə fə ghən ta məni makwaghwa njasa səəkə piya, tə kwa məŋ lə faɗə vici, mbaʼ kwa məŋ lə cifə, tə tir Adar. 22 Fəca vici bakə na va niy mbəlishi ka zhəwifə va ka mbəzə shi. Tə tir Adar niy zhəghiy ngəraʼwə tsaa niy dzaa dzəkən shi ka wahə. Ma wahəshi na, mbaʼ zhəghəta ka vəshi. Va tsəgha dza ghəshiy fə ghən ta zəzəə dzəkən kuma va, ka məni makwaghwa lə vəshi, ka vəli kwa jipə shi, ka ɓanshi shiy kaa ka ndərma. 23 Dzəghwa ka Zhəwifə ki, ka nuw kuma gəzanakəshi Mardushe va, mbaʼ ghəshi fiy kuma ghati ghəshi va məni, ka kuma dza ghəshiy məni ya paʼa humɓa.

24 Ma kə Mardushe niy ni kaa ngəshiy: A Haman zəghu Hamedata, ntsaa səvəri kwa miy dəgha Agagə, ndə mbəzə tsa ka zhəwifə niy pəhəti kuma ta bəkushi. Dza na mbaʼ dzaa ngakə zləra har məndiy Pwər, ta mbəə sənata vici dza məndiy səəvərishi mbaʼ məndi zantishi gwanashi. 25 Sa dza Ashəter na, mbaʼ dzaa kəsay mazə, ta cəʼwə kəəti. Dzəghwa mazə ki, mbaʼ tsasliti shiy ta gəzə kaa mbəzli ta mbə kumaa niy pəhəti Haman va jikir naa dzəkən ka zhəwifə zhəghakənvata kən. Dzəghwa ki, mbaʼ məndi ɓərtanti tə tsəm ghəshi lə ndərazhi ci. 26 Va tsəgha har məndi vicihi makwaghwa va «Pwərim», tə mbərkə slən tsa zləra har məndi vaa Pwər.

Sa nzana tsəgha Mardushe niy gəziy kwa zliyaa niy tsasliti na va, zhini tsəgha kuma va niy mənita li shi , mbaʼ ghəshi niy nata lə mətsə shi ki na, 27 dzəghwa ka zhəwifə ki, mbaʼ ghəshi fiy nava kuma ka kuma jiji shi, ta nuw ghəshi dəʼwə ghən tsa shi, nza ndərazhi dza ghəshiy ya nuw, zhini ka nuw mbəzliy dzaa zhəghəshi ka zhəwifə. Kuma jiji vay: Njasa səəkə piya dza məndiy fə ghən ta məni makwaghwa mbə vici bakə na va. Geʼi lə vəghu tsa slati məndi, njasaa niy gəzəkə Mardushe va. 28 War mbə zəzə dza məndiy nzaa dzəkən vicihi bakə ni va, ya paʼa humɓa kiy ghyeghyer ka zhəwifə, ya tə nama bəla tə hiɗi va, ya mbə nama məlmə. Ya humbay, əntaa ka zhəwifəə bashi məni makwaghwa Pwərim va ma, əntaa jijihi shi za ghən ti ma.

29 Zhini kar Ashəter kwajən mazə zha Avihayil ghəshi lə Mardushe ndə ka Zhəwifə tsa va tsasl ghəshi tsasliti kwa baka zliya, səvəri mbə dikə tsa məni ghəshi ta mbəə ɓə bərci kaa kwa taŋa zliyaa niy tsasliti məndi vaa dzəkən makwaghwa va. 30 Dzəghwa mbaʼ məndi vələghə zliyahi va kaa ka zhəwifə gwanashi tə bəlahi bələku mbaʼ bakəmətsəkə mbərfəŋ ti ni va tə hiɗi mazə Zerkəses. Lə gəzə kuma zərkə, mbaʼ kuma gar dza ma her shi kwa zliya va. 31 Ka gəzanshi kaa ka zhəwifə nza ghəshi mbəə fə ghən ta məni makwaghwa Pwərim va geʼi lə vəghu tsa va, njasa gəzəkə kar Ashəter kwajən mazə va ghəshi lə Mardushe ndə ka Zhəwifə tsa va. Zhini tsəgha ghəshi niy pəhəti məni nzə ghəshi ka zhəwifə kuraku, ta nuw ghəshi lə ta nuw ndərazhi dza ghəshiy ya. Njasa niy pəhəti ghəshi va məni sumay, lə tihuni. 32 Kuma gəzəkə Ashəter va ta məni məndi ki na, mbaʼ ɓanavə bərci kaa makwaghwa Pwərim va, ta məni məndi ya humɓa, mbaʼ məndi tsaslaghwa kwa zliyahi.