Nehəmiy 13

Nehemiy zhəghanti shiy ɗaŋ

Ghala vəghu tsa va, məndi mbə jangə shi kwa zliya Muyizə va kwa kuma ka Izərayeliy, mbaʼ məndi kəsay pi tsa nə məndi va: «Ka Amun lə ka Muwabiy, əntaa məndi zləɓa ghəshiy dzəmbə jakəva tsa mbəzli Hiyala ma,» kə məndi dzəghwa tiɓa. 2 Sa wa na niy tsasliti məndi tsəghay, sa nza na, niy nzay, niy kaʼuti ka Izərayel ghəshi lə shi zəmə, mbaʼ shi saw. A ka Muwabə niy nganavə shiy kaa Balam ta mbə ghəciy bazla ka Izərayel. Sa dza Hiyala ghiy ghiy ka Izərayel ki na, mbaʼ niy zhəghanti bəzla ci va ka təfə miy. 3 Sa favə ghəshi kuma va tsəgha ki na, dzəghwa ghəshi mbaʼ ghəshi ɓəkəvəri mbəzliy kamaa ka Izərayel gwanashi mbə shi.

4 Shi va ghula ta məniva ki na, Eliyashiv ndə ta Hiyala, maniy Tuviya niy nza dikə tsaa nighəə dzəkən ceker kiy ghyi tsa Hiyala ghiy. 5 Dza na mbaʼ ɓanavə ciki dikə kaa maniy tsa va, mbə ciki tsa va niy fə məndi shi zəmə vəlanta məndi kaa Kwa sləkəpə. Mbəɓa niy fə məndi shiy zən nja urdi, mbaʼ kwekwer ka məndi ta shiy lə shi kiy ghyi tsa Hiyala. Mbəɓa niy fə məndi shiy kutiŋ mbə shiy məŋ mbə Alkamari zakə məndi, mbaʼ tay tsa wuzə tsa lə in, ta ɓanshi na shi bəla kaa mbəzli mbə takə tsa Levi, mbaʼ kaa ka ha cemer, mbaʼ kaa ka ndəghu miy dəghahi diɓa. Mbəɓa niy fə məndi na shi bəla shi dza məndiy ɓanshi kaa ka ta Hiyala diɓa.

6 Ghala vəghu tsa məniva shi vay, mbə məlmə Zheruzalem niy nzee yən Nehemiyuw. Ee niy zhəghəghəvaraa zhəvəgha mazə Artaserses tə kwa mahəkanəmətsəkə bakəti piya ci mbə mazə tə hiɗi ka Babilunə. Ma liy hum Juw ki na, mbaʼee cəʼuvə kwal va mazə, 7 ta zharaa zhimbə məlmə Zheruzalem diɓa. Sa zhəghəkəvaree na, mbaʼee nay jikir tsa mənti Eliyashiv. Jikir tsa vay, ciki tsa ɓanavə na va kaa Tubiya kwa hur tipə kiy ghyi tsa Hiyala. 8 Təruŋ nəfə tsee satiy, dzəghwee cəkeʼ yən pakəvəri shi Tubiya mbə ciki tsa va. 9 Dzəghwee mbaʼee gəzanshi kaa mbəzli a ghəshi mənti shi ka məndiy məni ta nza ciki tsa va ɗewɗew kwa kuma Hiyala. Dzee mbaʼee zhanambə kwekwer ka məndiy ghəra sləni li shi mbə ciki Hiyala, mbaʼ vəli vəlanta məndi, mbaʼ shiy zən nja urdi ni mbə ciki tsa va.

10 Mbaʼee favə diɓa: Niy ɓanshi na shi bəla dza məndiy ɓanshi məndi kaa mbəzli mbə takə tsa Leviw, kə məndi. Va tsəgha ki na, mbaʼ mbəzli mbə takə tsa Levi lə ka ha cemer niy huhushi. Ya wa ndə na, mbaʼ dzay dzəmbə məlmə ci. 11 Sa favee tsəgha ki na, dzee ka naɓə mbəzli dikə dikə ni. Ma pən kaa ngəshi na: «Tawa zlay ghuy ghyi tsa Hiyala kala nighə maa dzəkənaa?» pən kaa ngəshi. Dzəghwee ɓasə yən ɓasəti mbəzli mbə takə tsa Levi, mbaʼ ka ha cemer, mbaʼee zhanambəshi mbə sləni shi. 12 Sa məntee tsəgha ki na, dzəghwa ka Zhəwifə gwanashi ka ɓə shiy kutiŋ mbə shiy məŋ mbə alkamari zakə ghəshi, mbaʼ mbə tay tsa wuzə tsa, mbaʼ in ta dzəmbə ceker ka məndiy fə shi va mbə shi. 13 Dzee bəm yən fambə ceker va mbə dəvə kar Shelemiya ndə ta Hiyala, mbaʼ Saduk ndə tsasli shiy, mbaʼ Pedaya ntsa mbə takə tsa Levi, mbaʼ Hanan zəghu Zakur, jijiy Mataniya ta kəəti ci. Mbəzli vay, mbəzli slar ni niy nza ghəshi. Ghəshi niy təhə na shi ka məndi vaa ɓəkə kaa ngwardəshi.

14 Dzəghuee ki, ka cəʼu Hiyala, ma pən na: «A Hiyalee, titihu zəzəti tə ghaa dzəkən sləni mənəhwee. Əntaa gha zanti ghən ta sləni mənuhwee na ta ghyi tsa gha, lə ta ghəraŋa sləni məndi mbəɓa ma,» pən.

15 Geʼi lə vəghu tsa va ki na, mbaʼee niy nashi nihuti mbəzli tə hiɗi ka Zhuda fəca vici dəkəva mbə ɓəsə məli mbə ya fə har məndi vaa reziŋ kwa pi tsa ka məndiy ɓəsə shiy. Ma nihuti na, ka ɓasə alkamari, nihuti na, ka ɓə tay, ka ɓə shi har məndi vaa reziŋ, ka ɓə ya bəzakə lə nihuti shiy ghənghən ghənghən tə kwantəmcahi ta dzəmbə məlmə Zheruzalem. Dzəghuee ki mbaʼee naɓətishi fəca ɗəl ghəshi shi va. 16 A mbəzliy səəkə tə hiɗi ka Tir niy nza mbə məlmə Zheruzalem lə nziy tsa shi. Mbə ɓə kirpi lə nihuti shi səkəm ghənghən ghənghən niy nza ghəshiy səəkə ta ɗəlshi kaa mbəzli tə hiɗi ka Zhuda lə kaa mbəzli mbə məlmə Zheruzalem fəca vici dəkəva. 17 Dzee mbaʼee naɓəti mbəzli dikə dikə ni tə hiɗi ka Zhuda. Ma pən kaa ngəshi na: «Ta wa zlashi ghuy mbəzliy məni kuma jikir na tsəghaa? Tawa sawa ghuy vici dəkəva tsəghaa? 18 Tsəgha niy məni jijihiŋuy shiy, va tsəgha ɓəkə Hiyala ghummə ngəreʼuer ni gwanashiy dzəkən ghummə lə dzəkən məlmə Zheruzalem. Sa fə ma ghuy tsa shəndəkəə dzəti vici dəkəva sana kiy, əə zhini ghuy pəhə ghu kaa nəfə tsa Hiyalaa dzəkən mbəzli mbə hulfə ka Izərayel,» pən kaa ngəshi.

19 Ghala fəcava ki na, mbaʼee gəzanshi kaa mbəzli ta kalay miy dəghahiy dzəmbə məlmə Zheruzalem ka pi zhəmbəli, vici dəkəva ghula ta ghava, nza məndi ghunishi sa ka vici dəkəva kəɗita. Dzee ki mbaʼee fəfiy ka slənee dzar miy dəghahiy dzəmbə məlmə Zheruzalem əntaa məndi ɓə shi səkəm dzəmbə məlmə Zheruzalem fəca vici dəkəva. 20 Sa məntee tsəgha ki na, mbaʼ ka zhəghə dəvə lə ka ɗəl shiy ghənghən ghənghən hihu hi fəca vici dəkəva gar kutiŋ ya gar bakə səɗa pərikə tə ngula, dzar ta kələm tsa məlmə Zheruzalem. 21 Dzee mbaʼee naɓətishi. Ma pən kaa ngəshi na: «Tawa hi ghuy dzar ta kələm tsa məlmə Zheruzalem fəca vici dəkəvaa? fəca dza ghuy zhintiy, ta kasantəŋuy dzee» pən kaa ngəshi. Ghala fəcava ki na, kala zhini ghəshiy zhikə fəca vici dəkəva. 22 Dzee ki mbaʼee gəzanshi kaa mbəzli mbə takə tsa Levi a ghəshi mənti shi ka məndiy məni ta nza ɗewɗew kwa kuma Hiyala, nza ghəshi dza ta ndəghu miy dəghahiy dzəmbə məlmə, nza mbəzli mbəə fə bamaa dzəti vici dəkəva, na Hiyala vici.

Dzee mbaʼee cəʼuti Hiyala, ma pən na: «A Hiyalee, təruŋ na hur tsa gha wuzə. Zəzə tə ghaa dzəkənee ta kuma məntee na, Zhəhur tə gha tə ya,» pən.

23 Ghala vəghu tsa va diɓay, mbaʼee nashi nihuti ka Zhəwifə ɓəɓəvə ghiyehi ka Asədud lə ghiyehi ka Amun, mbaʼ ghiyehi ka Muwabə. 24 Bakə mbə ndərazhi shi təhəvərivashi, nihuti na ka gəzə ghani ka Asdud, nihuti na ka gəzə ghani nihuti hulfəhi mbəzli ghənghən ghənghən, tərəhə niy mbata gəzə kuma ka Zhəwifə. 25 Dzee mbaʼee naɓətishi, ka bazlashi lə gəzə kuma. Dzee diɓa ka dəʼu nihuti zhər mbə shi, ka tiɗi shiti dzar mbə ghən shi. Dzee mbaʼee gəzanshi a ghəshi zəməkə fəla kwa kuma Hiyala va nəghətaa ghəshi zhiniy ɓə ghiyehi shi kaa mbəzli va lə va nəghətaa ghəshi zhiniy ɓə miʼi kaa ndərazhi shi mbə ghiyehi shi, kala ɓəshi ma ghəshi ya ghəshi dəʼu ghən tsa shi. 26 Ma pən kaa ngəshi na: «Əə sənay ma ghuy ɓə gəla miʼi tsəgha ni va niy fambə na Saləmuŋ mazə ka Izərayel dzəmbə məni kuma jikir na, pə ghuy shəkəna?» pən kaa ngəshi. Ma pən kaa ngəshi diɓa na: «Mbə mezhizhiy niy məni mazə dzəkən hulfəhi mbəzli gwaʼ gwaʼay, niy nza mazə tiɓa nja ghəciw. A Hiyala ci niy ɗiti, mbaʼ niy mənti ka mazə tsaa sləkə ka Izərayel gwanashi. Ya tsəgha nzə ki na, mbaʼ miʼiy kamaa ka Zhəwifə niy ngaɗambə mbə kuma jikir na. 27 Ya ghuy sana kiy, ə dza naa nza wəzə məndiy favə mbə məni gəla kuma jikir na va təruŋta na nza ghuy, ka zhəghanavə hum kaa Hiyala ghummə, kə məndi, sa ɓə ghuy va miʼiy kamaa ka Zhəwifə na?» pən kaa ngəshi.

28 Tsahuti zəghu Yuyada zəghu Eliyashiv dikə tsa ka ta Hiyalay, aa niy ɓəvə zha Sambalat ndə ka Hurun, dzee mbaʼee tahanti mbə məlmə Zheruzalem.

29 Dzəghwee ka cəʼu Hiyala, ma pən na: «A Hiyalee, əntaa gha zanti ghən ta kuma shi va jikir na ma, sa nza nay, a ghəshi sawanti sləni ka ta Hiyala, mbaʼ sla kiri tsa slati gha lə ka ta Hiyala, ghəshi lə mbəzli mbə takə tsa Levi,» pən.

30 Dzəghwee, mbaʼee təhəvəri ka Izərayel lə slən nihuti hulfəhi. Mbaʼee zhanambə ka ta Hiyala lə mbəzli mbə takə tsa Levi mbə sləni shi, ya wa ndə na, ka məni na gəzanakə Hiyala məni nzə. 31 Mbaʼee gəzanshi kaa mbəzli a ghəshi zhiniy ɓə shighu kaa Hiyala geʼi lə vəghuhiy niy va məndiy ɓəshi səəkə, ka ɓə shiy gha ya mbə shi zati məndiy səəkə diɓa.

Zhəghwee diɓa ka cəʼu Hiyala, ma pən na: «A Hiyalee zəzə tə ghaa dzəkənee, məntəɗa tə gha wuzə hur,» pən.