<<    <     Nehəmiy     12     >    >> 
Ka ta Hiyala lə mbəzli mbə takə tsa Levi niy zhəghəkəvashi
12
A ka ta Hiyala mbaʼ mbəzli mbə takə tsa Levi niy zhəghəkəvashi kwasəbə kar Zurubabel zəghu Shaltiyel ghəshi lə Zhuzəwe. Avanashi sləneɗemer shi: Seraya, mbaʼ Zheremiy, mbaʼ Ezəra, 2 mbaʼ Amariya, mbaʼ Malukə, mbaʼ Hatush, 3 mbaʼ Shekaniya, mbaʼ Rehum, mbaʼ Meremutə, 4 mbaʼ Idu, mbaʼ Ginetuy, mbaʼ Aviya, 5 mbaʼ Miyamin, mbaʼ Maadiya, mbaʼ Bilga, 6 mbaʼ Shemaya, mbaʼ Yuyariv, mbaʼ Yedaya, 7 mbaʼ Salu, mbaʼ Amuk, mbaʼ Hilkiya, mbaʼ Yedaya. Ghala vəghu tsa Zhuzəweyiy, mbəzli va niy nza mbəzli dikə dikə ni mbə ka ta Hiyala lə mbə takə tsa Levi. 8 Mbə mbəzli mbə takə tsa Leviy, kar Zhuzəwe, mbaʼ Binuy, mbaʼ Kadəmiyel, mbaʼ Shereviya, mbaʼ Yehuda, mbaʼ Mataniya lə ngwardəhiy, ghəshi niy nza ka ʼwa cemer ghala vəghu tsa ka məndiy fal Hiyala. 9 Ma kar Bakəbukiya, ghəshi lə Uni mbəzli mbə takə tsa shi na, mbaʼ ni va kwa kuma shi ka zləɓa cemer.
 
10 Zhuzəwe niy yakə na Yuyakim, mbaʼ Yuyakim yakə Eliyashivə, baw Eliyashivə yakə Yuyada. 11 Dzəghwa Yuyada baw yakə Yunatan, dzəghwa Yunatan baw yakə Yaduwa.
12 Ghala vəghu tsaa niy nza Yuyakim dikə tsa ka ta Hiyalay, avanashi mbəzliy niy sləkə mbəzli kwa miy dəghahi ka ta Hiyala: Meraya niy nza dikə tsa mbəzli kwa miy dəgha Seraya. Ma Hananiya na dikə tsa mbəzli kwa miy dəgha Yirmeya. 13 Mashulam na, dikə tsa mbəzli kwa miy dəgha Ezəra. Yuhanan na, dikə tsa mbəzli kwa miy dəgha Amariya. 14 Yunatan na, dikə tsa mbəzli kwa miy dəgha Meliku. Zhuzef na, dikə tsa mbəzli kwa miy dəgha Shebaniya, 15 Adana na, tsa kwa miy dəgha Harim, Helkay na, tsa kwa miy dəgha Merayutə, 16 Zakari na, tsa kwa miy dəgha Idu, Meshulam na, tsa kwa miy dəgha Ginetuŋ, 17 Zikiri na, tsa kwa miy dəgha Abiya, a tsahuti ndə niy nza tiɓay, ghəci niy nza dikə tsa kwa miy dəgha Minyamin, Piltay na dikə tsa mbəzli kwa miy dəgha Muwadiya, 18 Shamuwa na dikə tsa mbəzli kwa miy dəgha Bilga, Yunatan na, tsa kwa miy dəgha Shemaya, 19 Matenay na, tsa kwa miy dəgha Yuyariv, Uzi na, tsa kwa miy dəgha Yedaya, 20 Kalay na, tsa kwa miy dəgha Salay, Eber na, tsa kwa miy dəgha Amuk, 21 Hashabiya na, tsa kwa miy dəgha Hilkiya, Netanel ki na, dikə tsa kwa miy dəgha Yedaya.
22 Sa ghava na tə vəghu tsaa niy məni Eliyashivə dikə tsa ka ta Hiyala ka sar dzəti vəghu tsa Yuyada paʼa tə vəghu tsa Yuhanan, paʼa tə vəghu tsa Yaduway, a məndi niy tsaslaghwa sləneɗemer mbəzliy mənəhu dikə kwa miy dəghahi mbə takə tsa Levi kwa zliya. Tsəgha məndi niy tsaslaghwa ni ka ta Hiyala sləneɗemer kwa zliya kuraku, paʼa va vəghu tsaa niy məni Dariyusə mazə tə hiɗi ka Persə.
23 Ya kwa zliya tsasliti məndi va kuma mənəhu məndi dikə dikə nay, a məndi niy tsaslaghwa sləneɗemer mbəzliy sləkə mbəzli kwa miy dəghahi mbəzli mbə takə tsa Levi. Ə na na nza nay, kwataka mbəzliy mənəhu dikə paʼa va vəghu tsa Yuhanan zəghu Eliyashib na shiy niy tsaslaghwa məndi sləneɗemer shi kwa zliya va.
24 Mbəzliy niy sləkə mbəzli mbə takə tsa Levi ghalaɓay, kar Hashaviya, mbaʼ Shereviya, mbaʼ Yeshuwa zəghu Kadəmiyel niy nza ghəshi. Ghəshi niy garə na kwa kuma ngwardəhishi ta fal Hiyala kwa cəm. Ghəshi niy hə na səɗa ta garə ta fə shəndəkəə dzəti Hiyala lə ta mananta usa kwa cəm. Mazə Davitə, ntsa Hiyala niy gəzəkə na: Tsəgha kə məndi dzaa məni, kə.
25 Kar Mataniya, mbaʼ Bakəbukiya, mbaʼ Uvadiya, mbaʼ Meshulam, mbaʼ Talmuŋ, mbaʼ Akuv, niy nza ka ndəghu ceker ka məndiy fə shiy mbə shi vəgha gəzli miy dəghaa dzakə kiy ghyi tsa Hiyala. 26 Ghəshi niy ghəra na sləni va ghala vəghu tsaa niy nza Yuyakim zəghu Zhuzəwe jijiy Yutsadak dikə tsa ka ta Hiyala. Ghalaɓay, Nehemiy niy nza naa nguməna, ma Esdəras na, ndə ta Hiyala, ntsaa kurahəhu kuma kwa zliya kuma pəhəti Hiyala.
Məndiy məni makwaghwa sa kaʼwanti məndi kələm
27 Sa kəɗanti məndi kaʼu kələm tsaa dəzlay məlmə Zheruzalem ki na, dzəghwa məndi ɓasə ɓasə məndi dzaa ɓasəkə mbəzli mbə takə tsa Levi tə pi tsa nza ghəshi gwanashi dzəmbə məlmə Zheruzalem ta məni makwaghwa lə vəshi, sa kiriy kaʼu kələm tsa va. Ta mbə mbə məndiy ha cemer, ka fal Hiyala lə gəzhəpipir, lə viy shiy, lə tsa shiy. 28-29 Dza ka ha cemer mbaʼ ghəshi ɓasəkəvashi səəkə dzar mbə məlməhiy niy lalati ghəshi dzar vəgha məlmə Zheruzalem lə dzar vəgha məlmə Netufa, mbaʼ niy səəkə mbə məlmə Bet-Gilgal, mbaʼ niy səəkə mbə məlməhi dzar vəgha məlmə Geba, lə niy səəkə mbə məlmə Azəmawətə. 30 Dzəghwa ka ta Hiyala ghəshi lə mbəzli mbə takə tsa Levi mbaʼ ghəshi mənti shi ka məndiy məni ta nza ɗewɗew kwa kuma Hiyala. Dza ghəshi mbaʼ ghəshi gəzanshi kaa mbəzli gwanashi a ghəshi mənti ghən tsa shi ɗewɗew kwa kuma Hiyala. Dzəghwa ghəshi diɓa mbaʼ ghəshi mənti kələm ɗewɗew kwa kuma Hiyala, tsəgha ghəshi mənti lə gizligizli miy dəghahiy dzəmbə məlmə Zheruzalem.
31 Liy hum sa mənti məndi tsəgha ki na, dzəghwee yən Nehemiy mbaʼee gəzanshi kaa mbəzli dikə dikə ni mbə takə tsa ka Zhuda a ghəshi dzəmə kələm. Sa dzəməshi ghəshi na, mbaʼee gəzanshi a ghəshi mənti zərə ka ha cəm bakə. Ɗaŋ ɗaŋ niy nza ghəshi kwa zərə va. kwa taŋa zəriy, dza kwa bəla kwa bəzəmə niy nza ghəshi njasaa dza kwa miy dəgha har məndi vaa miy dəgha məlɓə. 32 Ma kar Hushaya lə nahuti kwa bakə bəla mbəzli dikə dikə ni mbə takə tsa Zhuda na, ka nu shi. 33 Zhini ka nu niva mbəzli kar Azariya mbaʼ Ezəra mbaʼ Meshulam, 34 mbaʼ yehuda, mbaʼ Benzhameŋ, mbaʼ Shemaya, mbaʼ Zheremiy. 35 Liy hum niva mbəzli ki na, ka ta Hiyala ka viy təlimə, kar Zekariya zəghu Zhunataŋ ntsa yakə Shemaya, zəghu Mataniya, ntsa yakə Mikaya, zəghu Zakur, ntsa Yakə Asafə. 36 Zhini mbaʼ nihuti ngwardəshi liy hum shi, kar Shemeya mbaʼ Azarel, mbaʼ Milalay, mbaʼ Gilalay, mbaʼ Maʼay, mbaʼ Netanel, mbaʼ Yehuda, mbaʼ Hanani. Lə shi ka məndiy viy, mbaʼ shi ka məndiy tsa kwasəbə cemer dzar ta dəvə shi. Shi vay, mazə Davitə ntsa Hiyala niy gəzanshi na kaa mbəzli mbaʼ məndi niy mananatishi. Nava zəərə kiy, Esdəras ntsaa kurahəhu kuma kwa zliya kuma pəhəti Hiyala niy ʼwanshi na kuma. 37 Ma sa tsəhəshi ghəshi miy dəgha har məndi vaa miy dəghaa dzəghwa həl tsa nza mətsə yam kwa na, dza ghəshi ka dzəmə tə shi nja taŋa ni va ka məndiy dzəmə ghyi tsa mazə Davitə va ka məndiy har Məlmə Davitə, kwa kwal tsaa dzəmə kələm tsa tə ghən ghyi tsa Davitə, zhini ghəshi ka dza paʼa vəgha miy dəgha har məndi vaa miy dəgha yam, njasaa dzəghwa ghumə va məlmə Zheruzalem.
38 Dzəghwa kwa bakə zərə ka ha cemer va ka dzashi dza kwa bəla kwa zleɓi. Yən dəʼu ghən tsee mbaʼ kwa baka nahuti bəla mbəzli dikə dikə niy, mbə nushi niy nza ghiy dzar tə kələm tsa tə ghən ciki tsa dikə tsa va ka məndiy ta peŋ mbə, paʼa tə pi tsa gura kələm vaa məni buŋ. 39 Dza ghiy ka dza dzar tə ghən gəzli har məndi vaa gəzli Efrayim, ka dzar tə ghən gəzli har məndi vaa gəzli Yashana, zhini ka dzar tə ghən gəzli har məndi vaa gəzli Kirpi. Dza ghiy ka dzar tə pi tsa bitə tsa va har məndiy Hananeyel, ka dzar tə tsahuti pi tsa bitə tsa va har məndiy Bələku, paʼa va gəzli har məndi vaa gəzli Teŋkesli. Dzəghwa ghiy mbaʼ ghiy garəŋiy tə ghən gəzli ka ka ndəghu məlməə nziy miy. 40 Dza zərə ka ha cemer va bakanata ki, mbaʼ ghəshi dzaa garəshi kiy ghyi tsa Hiyala. Dzəghwee kuraku ki garə yən garəɗa ghiy lə nihuti mbəzli dikə dikə ni va niy nza kwasəbee. 41 Dzəghwa ka ta Hiyala, kar Eliyakim, mbaʼ Maseya, mbaʼ Minyamin, mbaʼ Mikaya, mbaʼ Elyuwenay, mbaʼ Zekariya, mbaʼ Hananiya ka viy təlimə. 42 Ma ka ha cemer, kar Maseya, mbaʼ Shemaya, mbaʼ Eliyazar, mbaʼ Uzi, mbaʼ Yehuhanaŋ, mbaʼ Malkiya, mbaʼ Elam, mbaʼ Ezer na, ka ha cemer. Yizərahiya niy nza dikə tsa shi.
43 Fəcavay, tərəŋw niy sləsliy məndi shiy kaa Hiyala. Təruŋ niy vəshishi məndi, sa nza na təruŋ Hiyala niy təhay nefer mbəzli lə vəshi. Təruŋ niy vəshishi miʼi lə ndərazhi. Ya paʼa tə pi tsa kərakə tsay, mbə favə gaka vəshi mbə məlmə Zheruzalem niy nza məndi.
Shiy niy məni məndi lə shi ka məndiy vəlanta kaa Hyala
44 Dza məndi fəcava ki, mbaʼ məndi təravə mbəzli ta ndəghu ceker dza məndiy fə shi ɓaɓasəti məndi shi vəliti məndi kaa Hiyala mbə shi. Shiy nja kar ya fəə ghaa təhə mbə fəhi, mbaʼ shiy kutiŋ səvəri mbə shiy məŋ. Mbəzli va niy ɓasə na shi ɓəkə məndi dzar mbə məlməhiy dzar vəgha məlmə Zheruzalem ta ɓəshi kaa ka ta Hiyala lə mbəzli mbə takə tsa Levi njasa gəzəkə kuma pəhə pəhə na. Təruŋ niy vəshishi ka Zhuda ta sləni ka ta Hiyala lə mbəzli mbə takə tsa Levi. 45 Sa nza nay, lə kwal tsa nzə niy ghəranta ghəshi sləni kaa Hiyala shi, ka məni shi ka məndiy məni ta nza ya shiy, ya ke ngəri ɗewɗew kwa kuma Hiyala. Ya ka ha cemer lə ka ndəghu dəghahiy, war njasa niy gəzəkə kar mazə Davitə ghəshi lə zəghu ci Saləmuŋ niy məni ghəshi kuma. 46 Niy nza kwataŋa ghala vəghu tsa mazə Davitə ghəshi lə Asafiy, a mbəzliy sləkə ka ha cemer niy nza tiɓa, ta ha cemeriy fal Hiyala lə niy mananta usa. 47 Ghala vəghu tsa Zurubabel ghəshi lə Nehemiyiy, njasa səəkə vici niy ɓanshi ka Izərayel na shi bəla shiy kaa ka ha cemer lə kaa ka ndəghu miy dəghahi. Səvəri mbə vəli ka məndi vaa vəli kaa Hiyalay, mbə ɓanshi nashi bəla niy nza ghəshi kaa mbəzli mbə takə tsa Levi diɓa. Sa ka mbəzli mbə takə tsa Leviy dza kuraku na, ka ɓanshi na shi bəla kaa ka ta Hiyala, jijihiy Aruŋ.