Nehemiy
Məndi gəzanci nuwur dzəkən Zheruzalem kaa Nehemiy
1
Avanta zliya tsaslitee yən Nehemiy zəghu Hakaliya dzəkən kuma mənəhuee: Mazə Artaserses mbə məni kwa bakəmətsəkə piya ci mbə mazə tə hidi ka Pərsə, geʼi lə tir tsa har məndi vaa Kislewiy, mbə məlmə Suzə, məlmə dikə na ka mazə nziy mbə niy nzee lə nziy tsee ghalaɓa. 2 Ghala vəghu tsa vay, mbaʼ Hanani tsahuti zədirə səəkiy ghəshi lə nihuti mbəzli tə hiɗi ka Zhuda. Dzee ka ɗuw kuma və shiy dzəkən niy tərə tə ghuməshi ni mbə ka Zhwifəə zhəghəkəvashi va sa niy kəəsəhushi məndiy dzəti hiɗi ka Babilunə, ka ɗuw kumaa dzəkən məlmə Zheruzalem diɓa. 3 Ma kə ghəshi kaa ngəra na: «Mbəzliy zhəghəkəvashi vay, tə hiɗi ka Zhuda na ghəshi lə nziy tsa shi. A na nza nay, təruŋwiy na haʼu lə ngəraʼu kən shi. Ngazla-ngazla na kələm tsa məlmə Zheruzalem tə nihuti bəlahi, gəzligəzli miy dəghahiy dzəmbə na, mbaʼ məndi ndandantishi,» kə ghəshi kaa ngəra.Nehemiy cəʼu Hiyala ta ka Zhəwifə
4 War sa favee kuma va na, dasə yən nziyra ka wahə. Vici ɗaŋ yən mənti nja ta mbəri, ka məni sumay, ka cəʼu Hiyala ta ghumə. 5 Ma pən kaa ngəta na: «A Kwa sləkəpə Hiyala ta ghumə, Hiyala dikə na hazləni məndi və. Hiyalaa fə ghən ta sla kiri tsa slati na lə mbəzliy ɗi fəti ta kuma pəhəti na nza gha, ka zhəghə hum gha kaa mbəzliy ɗiŋaw. 6 Titihu əə ɗee ghaa fa cəʼu cəʼuŋee na ndatsə yən ndə sləni tsa gha, əə ɗee ghaa fə ghən ti. Kwa kuma gha nzee havəghu lə həvir ta cəʼu dzəkən ghiy, ghiy ka Izərayel, ka sləni gha. Ee sənay a ghiy məntəŋa kuma jikir na ghiy ka Izərayel. Ta na navay, a ghiy məntəŋa kuma jikir na, ghiy lə jijihira. 7 Dalalata məntəŋa ghiy kuma jikir na kataŋ. Kumaa niy pəhəti gha va mbaʼ gha ɓanavə kaa ndə sləni tsa gha Muyizə ta nuw ghiyiy, nuti kuma va ghiyuw, mənti kuma gəzanci gha ta məni ghiyuw, nziyti nziy ghiy njasa niy cinti gha ta nziy ghiyuw. 8 Ya tsəgha nzə kiy, titihu zəzətiy dzəkən kumaa niy gəzanakə gha va kaa ndə sləni tsa gha Muyizə ta gəzaŋiy, saa niy nə gha va: “Mbaʼ pə ghuy dzaa dzəghwaŋuy kən kuma pəhəti yay, ta ndanivəriŋuy dzee dzar mbə nihuti hulfəhi mbəzli tə hiɗi. 9 Ma mbaʼ pə ghuy dzaa zhiniy zhəghəkəvaŋuy zhimbə hur tsee, mbaʼ ghuy kəsəvə kuma pəhətee, ka nu njasa gəzəkə na diɓay, ya tə pi tsa kərkə hiɗi dza ghuy nza sa dza ghuy ndaniŋuyiy, ta dza dzee ɓasəkəŋuy mbaʼee zhinikəŋuy dzəti pi tsa təravee va ta ci ghən tsee ti,” pə gha niy ni. 10 Ghiy kiy Kwa sləkəpiy, ka sləni gha nza ghiy, na gha hulfə nza ghiy. Ghiy na shi mbəlanti gha va lə bərci gha va təruŋ ni, mbaʼ dəvə kwa bərci gha va. 11 Titihu Kwa sləkəpə, əə cəʼuŋee a gha fə ghən wuzə ta fa cəʼu ndə sləni tsa gha lə cəʼu nihuti ka sləni gha ɗi hazləni va gha. Kuma ɗee na dza ta məniy, kətitəra a ghənzə mənta. Pəlay kwal nza mazə mbəə zləɓatəra kumee va lə wuzə hur,» pən kaa cəʼuee kwa kuma Hiyala ta ghumə. Ghalaɓay, yən ka naa tanci shiy kaa mazə dzəghwa hupər ta sashi ghəci.