Nehəmiy 2

Mazə ka Persə ɓanavə kwal kaa Nehemiy ta zhəghəvaa dzəmbə Zheruzalem

Ma Artaserses mazə ka Pərsə mbə zəmə shiy tə nahuti vici, ghəci mbə məni kwa bakəmətsəkə piya ci mbə mazə, tə tir tsa har məndi vaa Nisaŋ ki na, dzee laŋ yən ɓəvə tay kwa kuma ci ka tanci. Tifəmmə niy nzee, səəkee nza tsəgha kwa kuma ci ghala kee nzaw. 2 Dzəghwa na ka ɗuw kuma vəya ki, ma kə na: «A shiy mənishi nza gha tifəmmə ndatsaa? Ndəə nighəŋay, gurapəŋa nza gha nanzuw, ya njaɓay, a kuma tiɓa ka gagaŋa mbə nəfə gha,» kə. Sa gəzəkə na tsəgha na, mbaʼ heree dzashi təruŋ. 3 Ma pən kaa ngəci ya tsəgha nzə ki na: «Bitə kə piy tsa gha ta kwa ndimndim mazə. Njaa kee kama tifəmmə ngazla ngazla məlmə nza kulihi jijihira mbə, zhini ndindi gizlgizl miy dəghahi dzəmbə nzə kiya?» pən. 4 Ma kə kaa ngəra na: «A shi ɗi gha yən məntəŋa sanaa?» kə. Dzee mbaʼee cəʼuti Hiyala ta ghumə. 5 Ma pən kaa ngəci na: «Mbaʼ kəə təɓətəŋa, Zhini mbaʼ gha nara wuzə yən ndə sləni tsa ghay maziy, titihu əə cəʼuŋee, ndara kwal ee dzəti hiɗi ka Zhuda dzəmbə məlmə nza kulihi jijihira ee dza ta zhiniy ngati,» pən kaa ngəci. 6 Ma kə mazə kaa ngəra diɓa na: «Paʼ hum dza ghaa nza mbə dza gha vaa? Hum dza gha ta zhəghəvaa zhəkaa?» kə. Tiɓa niy nza mali ci vəgha mənziy ghala pi tsa ɗu na kuma va viya.

Mbaʼ təɓanati kaa mazə, ta ndara kwal ghəci, mbaʼee gəzanci vəghu tsa dzee ta zhəghəvaa zhəkə ti. 7 Ma pən kaa ngəci diɓa na: «Mbaʼ kə wuzə va ghay maziy, titihu tsaslavəra zliyahi kaa ngumənahiy sləkə hiɗi dza kwa mirkwi va həl Efərata nza ghəshi mbəə zlara ta taŋəə dzəti hiɗi ka Zhuda. 8 Mbaʼ nahuti zliya diɓa kaa Asaf ntsaa sləkə gambahi mazə, nza ghəci mbəə ndara kwal ta kəsli shighu ta məni gəzligəzli dzəmiy ghyi tsaa fə shi mbəzə tsa ndəku tsa va vəgha ghyi tsa Kwa sləkəpə, mbaʼ ta məni gizligilz dzəghwa miy pihi kələm tsaa dəzlay məlmə va, mbaʼ ta kuma kən ghyi tsa dzee ta nziy mbə,» pən kaa mazə.

Dza mazə ki, mbaʼ ndara zliyahi va, sa nza na kwasəbee Hiyalee niy nza lə dəvə nzə va wuzə na. 9 Dzee ki, mbaʼee dzaa kəsashi ngumənahiy sləkə hiɗiy dza kwa mirkwi va həl Əfəratə, mbaʼee ɓanavəshi zliyahi va. A mazə niy ghunashi mbəzli dikə dikə ni sləkə ka sawji, mbaʼ ka zlərə gədewesli kwasəbee. 10 Dzəghwa mbaʼ kar Sambalat ndə ka Hurun ghəshi lə Tubiya ndə ka Amun ntsa ta səɗa ci favə ee səəkəra, kə məndi. Ma sa favə ghəshi a ndə tsahuy ta pəla wuzə tsa ka Izərayel kə ghəshi na, mbaʼ nəfə tsa shi satiy təruŋ.

Nehemiy ɓanshi bərci kaa mbəzli ta kaʼu kələm tsaa dəzlay Zheruzalem

11 Dzəghwe ki, ndəs yən tsəhəra mbə məlmə Zheruzalem, vici mahəkanə yən mənti mbəɓa guŋəra. 12 Niy cinti kuma fambəra Hiyalayee mbə nəfə tsee ta məni mbə məlmə Zheruzalem kaa ndə ya kutiŋuw. Dzee kafə yən kafəra həvir, ghiy lə mbəzli ɓəla ɓəlashi. Niy nza tsahuti dəmbəkə viya kala war kwantəmcaa niy dzee muw. 13 Dzee həvir ki mbaʼee səvəriɗa mbə məlmə dza kwa miy dəgha ka məndi vaa səvəri kwa ta dziy kwa teʼu pi, ka nu kwal tsaa dzəghwa yam har məndi vaa yam Dəraguŋ, njasaa dzar miy dəgha ka məndi vaa pa məlɓə səvəri kwa. Dzee ka nighə kələm tsaa dəzlay məlmə Zheruzalem wuzə wuzə njasa nza na. Mbaʼee nay ngazla- ngazla dzar tə nahuti bəla . Ya gizlgizl kwa miy dəghahiy dzəmbə məlmə va diɓa na, ndindi ghəshi. 14 Dzee ka nuw lə dzee va dzar vəgha miy dəghaa dzəghwa həl tsa nza mətsə yam va kwa, ka dzar vəgha kufa mazə. Ma sa tsəhəree tə tsahuti piy, kala kwal tiɓa ta taŋəta kwantəmca nzee va mə ghula. 15 War tə virɗi va ki na, dzee ka dzati kwa teʼu pi tsa har məndi vaa Sedruŋ, ka nighə kələm tsa va wuzə njasa nza na. Dzee ki, tərəɗə zhəghətəvara ka dzaraa jighi dza kwa miy dəgha ka məndiy səvəri kwa ta dziy kwa teʼu pi.

16 Niy sənay mbəzliy sləkə məlmə va nda dzəma niy dzaree, nda a shi mənikə yaw. Paʼa va vəghu tsa vay, niy gəzanshee ya wa kaa ka Zhəwifə, ya kaa ka ta Hiyala, ya kaa mbəzli dikə dikə ni mbə məlmə va, ya kaa mbəzliy sləkə məlmə va, ya kaa nihuti mbəzliy nighəə dzəkən nahuti sləni mbə məlmə vaw.

17 Liy hum ki, ma pən kaa ngəshi na: «Ava ghuy nay haʼu tsa kən ghummə, tə mbərkə sa nza məlmə Zheruzalem ngazlangazla lə sa nza gizlgizl miy dəghahiy dzakə ndindi. Dzammə ta zhiniy ngakati kələm tsa məlmə Zheruzalem nza ghummə mbəə panti haʼu tsa kən ghummə tsa,» pən kaa ngəshi. 18 Dzəghuee ki, mbaʼee slanakəshi njasa niy nza Hiyalee kwasəbee lə dəvə nzə va wuzə na. Mbaʼee gəzanakəshi kuma gəzəkəra mazə va diɓa. Ma kə ghəshi ki na: «Dzaməm ta sləni. Ə pə ghummə zhiniy ngakati məlmə ghummə,» kə ghəshi. Dza ghəshi mbaʼ ghəshi kumavə bərci ta məni sləni wuzə na va.

19 Dza kuma va mbaʼ tsəhəta kwa sləmə kar Sambalat ndə ka Hurun ghəshi lə ntsa ta səɗa ci Tubiya ndə ka Amun, mbaʼ Gueshem ndə ka Arabə. Tap ghəshi məshi mbə ushiŋiy, ka sawaŋiy. A kə ghəshi na: «A shi ɗi ghuy ni məni shiki? Əə ɗi ghuy zləghu ghən tsa ghuy mbə dəvə mazə ka Pərsə ɓay?» kə ghəshi. 20 Ma pən kaa zləɓanshi na: «Hiyala ta ghumə dəʼu ghən tsa nzə dza na ta kətitəŋiy ta mbata sləni na ghiy. Ghiy ghiy ka sləni nziy, ta kafə dza ghiy ta sləni, ta nganti məlmə na dza ghiy. Ta na tsa ghuy ghəniy, kuma ghuy tiɓa mbə kuma məlmə Zheruzalemuw, ka sləkəvə pi tsa mbəɓa ghuyiw, kumaa shashaŋuy tiɓa ta zəzə məndiy dzəkən ghuy mbə məlmə naw,» pən kaa ngəshi.