Ka Zhəwifə zhiniy nga kələm tsa məlmə Zheruzalem
3
Liy hum kuma va ki na, dzəghwa kar Eliyashivə dikə tsa ka ta Hiyala ghəshi lə nihuti ka ta Hiyala, mbaʼ ghəshi kafəshi, ngaʼ ghəshi ngakati miy dəgha nə məndi va, miy dəgha teŋkesli, kə məndi. Dza ghəshi mbaʼ ghəshi fambə mbə dəvə Hiyala. Dzəghwa ghəshi ki laʼ ghəshi lamiy gizlgizl miyɓa. Dza ghəshi mbaʼ ghəshi kaʼuti kələm tsa va kafə na tiɓa paʼa tə pi tsa bitə tsa va ka məndiy ndəghu məlmə mə, sa har məndi vaa Meyaª. Dza ghəshi mbaʼ ghəshi fambə kələm tsa va mbə dəvə Hiyala. Zha ghəshi diɓa mbaʼ ghəshi zhiniy kaʼughə paʼ vəgha tsahuti pi tsa bitə tsa va har məndiy Hananeyel. 2 Dzəghwa mbəzli mbə məlmə Zheriku mbaʼ ghəshi kəsəvə kaʼu kələm tsa va vəgha shi. Ma Zakur zəghu Imri na, ka kaʼu vəgha mbəzli mbə məlmə Zheriku. 3 Mbəzliy səvəri kwa miy dəgha Ha-Senaa nashi ki na, mbaʼ ghəshi ngakati miy dəgha har məndi vaa miy dəgha kərpi, dəʼu ghəshi dəʼuti gəzliy dzəmiy, mbaʼ ghəshi lamiy, mbaʼ ghəshi manati shi ka məndiy i tsahi dzar mbə shi ta kəli gəzli va, mbaʼ tsahi ka məndiy kəəli gəzli va li shi kiyɓa kiyɓa. 4 Vəgha ni va mbəzli na, ka kaʼu kələm Meremut zəghu Uriya jijiy Hakuk, vəgha tsava na Meshulam zəghu Berekiya jijiy Meshazavel, vəgha tsava na Saduk zəghu Baana. 5 Vəgha tsavay ka Tekwa niy kaʼu na kələm. Mbəzli dikə dikə ni mbə shiy, niy ɗi fəti ghəshi va mbəzliy sləkə sləni vaw.6 Dzəghwa kar Yuyada zəghu Paseya ghəshi lə Meshulam zəghu Besudiya mbaʼ ghəshi ngakati miy dəgha har məndi vaa miy dəgha mafəzə naª. Dza ghəshi dəʼu ghəshi dəʼuti gəzliy dzəmiy, mbaʼ ghəshi lamiy, mbaʼ ghəshi manati shi ka məndiy i tsahi dzar mbə shi ta kəli gəzli va, mbaʼ tsahi ka məndiy kəəli gəzli va li shi kiyɓa kiyɓa. 7 Vəgha shiy, kar Melatiya ndə ka Gabawuŋ, mbaʼ Yaduŋ ndə ka Merunutə, mbaʼ nihuti ka Gabawuŋ lə ka Misəpa niy kaʼu na kələm, paʼa vəgha ghyi tsa nguməna tsaa sləkə hiɗi dza kwa mirkwi va həl Əfəratə. 8 Vəgha shi na, ka kaʼu Uziyel ndə vasə shiy, zəghu Haraya. Vəgha Uziyel na, Hananiya ndə ta urdi. Ma sa tsəhəshi ghəshi tə pi tsa məniva kələm tsa va va bəŋw na, mbaʼ nashi sləni kərəta mbə məlmə Zheruzalem tsəgha. 9 Vəgha shiy, Refaya zəghu Hur niy kaʼu na kələm tsa va. Ghəci niy sləkə na nahuti bəla məlmə Zheruzalem sa təhəvəri məndi bakə mbə. 10 Vəgha na, ka kaʼu Yedaya zəghu Harumaf, kələm tsa kwa kuma ghyi tsa ci niy nza sa kaʼu na. Vəgha na ka kaʼu Hatush zəghu Hashavneya. 11 Ma kar Malkiya zəghu Harim, ghəshi lə Hashuv zəghu Pahat-Muwabə na, mbaʼ ghəshi kaʼuti kwa baka bəla, mbaʼ ciki tsaa dikə tsa va ka məndiy ta peŋ mbə. 12 Vəgha shi na, ka kaʼu kələm tsa va Shalum zəghu Ha-Luhesh ntsaa sləkə nahuti bəla məlmə Zheruzalem sa təhəvəri məndi bakə mbə. Ghəshi lə ghehi ci niy ghəra na sləni va. 13 Kar Hanun ghəshi lə mbəzli mbə məlmə Zanuway, miy dəgha teʼu pi niy guma ghəshi. Mbaʼ ghəshi nganti, laʼ ghəshi lamiy gəzli miy dəgha va, mən ghəshi manati shi ka məndiy i shiy dzar mbə shi ta kəli gəzli va, mbaʼ ghəshi mənti tsahi ka məndiy kəli li shi kiyɓa kiyɓa. Dza ghəshi diɓa mbaʼ ghəshi kaʼughə kələm tsa va basa diwi diwi bakə mbaʼ cifəmətsəkə ghən kən paʼa vəgha miy dəgha har məndi vaa miy dəgha məlɓə. 14 Dzəghwa Malkiya zəghu Rekab mbaʼ kaʼuti miy dəgha har məndi vaa miy dəgha məlɓə. Sa kaʼuanti na na, mbaʼ famiy gəzli, fəʼ fati shi ka məndiy i shiy kəli gəzli dzar mbə shi, mbaʼ tsahi ka məndiy kəli gəzli va kiyɓa kiyɓa. Ghəci niy sləkə na hiɗi Bet-Kerem.
15 Dzəghwa Shalum zəghu Kul-huze mbaʼ kaʼuti miy dəgha har məndi vaa miy dəghaa dzəghwa həl. Sa kaʼuanti na na, mbaʼ manakən gaska kən, mbaʼ famiy gəzli, mbaʼ manati shi ka məndiy i shiy kəəli gəzli dzar mbə shi, mbaʼ tsahiy kəəli gəzli va kiyɓa kiyɓa. Ghəci niy sləkə na hiɗi Misəpa. Dzəghwa na diɓa mbaʼ kaʼuti kələm tsa ndəku tsa va vəgha pi tsa ka yam vaa hu dziy kwa ta dzəghwa həl Shilwe, kwa jipə kar tsa mazə ghəshi lə kwal tsa ka məndi vaa dzəmə ti nja taŋa ta dzəmə pi tsa har məndi vaa məlmə mazə Davitə. 16 Vəgha ci ki na, ka kaʼu kələm tsa va Nehemiy zəghu Azbuk. Paʼa vəgha kuli mazə Davitə va, ka dzar paʼa tar kufa lati məndi va, paʼa va ghyi tsa ka mbəzliy ndəghu mazə vaa nziy mbə. Nehemiy tsa vay, ghəci sləkə na nahuti bəla hiɗi Bet-Sur sa təhəvərishi məndi bakə mbə. 17 Kəətə kwa kuma ciy, mbəzli mbə takə tsa Levi niy kaʼu na kələm tsa va: Rehum zəghu Bani tə tsahuti pi, vəgha na Hashaviya mazə tsaa sləkə nahuti bəla Keyla sa təhəvərim bakə mbə. Ta ni ci hiɗi niy ghəra na sləni. 18 Vəgha tsava ɓa na, ka kaʼu Binuy zəghu Hedad mazə tsaa sləkə nahuti bəla hiɗi ka Keyla sa təhəvərishi məndi bakə mbə. 19 Vəgha tsava na, ka kaʼu Ezer zəghu Yeshuwa, ntsaa sləkə hiɗi ka Misəpa. Ghəci niy kaʼu na kələm tsa kwa kuma pi tsaa dzəmə va vəgha ciki tsaa fə shi mbəzə, dzəghwa tə pi tsa zhəghəva kələm tsa va va. 20 Vəgha tsa va ndə diɓa na, təruŋ Baruk zəghu Zabay jahambəvay mbə sləni kaʼu kələm tsa va, kafə na tə pi tsa zhəghəva kələm tsa va va paʼa tə miy dəghaa dzakə ghyi tsa Eliyashiv dikə tsa ka ta Hiyala. 21 Kwa kuma ci ɓa na, ka kaʼu Meremut zəghu Uriya jijiy Hakus. Kafə na tə miy dəghaa dzakə ghyi tsa Eliyashiv paʼa tə pi tsa kərkəva ghyi tsa va. 22 Kwa kuma ci na, ka kaʼu ka ta Hiyalahi dzar mbə məlməhi vəgha Zheruzalem. 23 Kwa kuma shi na, ka kaʼu kar Benzhameŋ ghəshi lə Hashuv kwa kuma ghiyeghiyer shi. Ma Azariya zəghu Maseya jijiy Ananiya na, ka kaʼu kələm tsa va vəgha ghyi tsa ci. 24 Kar Binuy zəghu Henadad na, ka kaʼu nahuti bəla vəgha shi. Kafə na tə ghyi tsa Azariya paʼa tə pi tsa zhəghəva kələm va. 25 Kafə na tə pi tsa zhəghəva kələm va paʼa tə pi tsa bitə tsa va ngati məndi ta ndəghu fərshəna kwa kuma ghyi tsa mazə na, ka kaʼu Palal zəghu Uzay. Kəətə kwa kuma ci na, ka kaʼu Pedaya zəghu Parewush. 26 Ma mbəzliy ghəra sləni kiy ghyi tsa Kwa sləkəpə, shiy niy nza tə giwa mə hum pi tsa har məndi vaa Ufel na, ka kaʼu paʼa kwa miy dəghaa dzəghwa həl njasaa dzəghwa ghumə kwa kuma pi tsa bitə tsa va mənti məndi mbə kələm ta ndəghu məlmə. 27 Kwa kuma shi na, ka kaʼu nahuti bəla mbəzli mbə məlmə Tekuwa kwa kuma pi tsa bitə tsa va mbə kələm paʼa vəgha kələm tsa mə hum pi tsa har məndi vaa Ufel.
28 Kafə na tə miy dəgha har məndi vaa miy dəgha gədewesliy, ka ta Hiyala niy kaʼu na kələm tsa va, ya wa ndə na ka kaʼu miy dəgha ci. 29 kwa kuma shi na, ka kaʼu Saduk zəghu Imer miy dəgha ci. Kwa kuma ci na, ka kaʼu Shimeya ntsaa ndəghu miy dəghaa dzəghwa ghumə, zəghu Shekaniya niy nza na. 30 Kwa kuma shi na ka kaʼu kwa baka bəla kar Hananiya zəghu Shelemiya ghəshi lə Hanun kwa kwaŋa zəghu Salaf. Kwa kuma shi na, ka kaʼu Meshulam zəghu Berekiya kwa kuma ghyi tsa ci. 31 Kwa kuma ci na, ka kaʼu Malkiya ndə vasə shiy paʼa vəgha ghyi tsa mbəzliy ghəra sləni juw juw na kiy ghyi tsa Kwa sləkəpə, mbaʼ ghyi tsa ka zhəghə dəvə, kwa kuma ghyi tsa Mifkad, paʼa va pi tsa ngati məndi va bitə tsa ta ndəghu məlmə tə pi tsa zhəghəva kələm va. 32 Ma nihuti ka vasə shiy lə nihuti ka zhəghə dəvə na, ka kaʼu kələm tsa va kwa jipə kar pi tsa bitə tsa va tə pi tsa zhəghəva kələm va paʼa miy dəgha har məndi vaa miy dəgha teŋkesli.
Mbəzliy ɗima kuma ka Zhəwifə mbə pəla kwal tsaa bashanti kaʼu kələm
33 Ma sa favə Sambalat mbə kaʼu kələm tsaa dəzlay məlmə Zheruzalem va nza ghiy, ghiy ka Zhəwifə kə məndi na, dza nəfə tsa ci ka zhanci, təruŋ nəfə tsa ci satiy. Dza na ka ushiŋiy. 34 Ma kə kwa kuma mbəzli tə hiɗi ci lə kwa kuma ka sawji ka Samari na: «A shi ɗi ka Zhəwifə daw daw bərci ni ni məni shəka? Ta zlashi dza məndi ta məni kuma ɗi ghəshi va, ka slaslanta shiy kaa Hiyala shi va nə ghəshi na? Ta kərkanti nga shi nga ghəshi va dza ghəshi lə hərezli pəpəleɗi ghəshi ni dzar mbə hiɗi, mbə pi tsa ndi ndi tsa va ya hum nə ghəshi na?» kə. 35 Ghala vəghu tsa vay, vəgha niy nza Tubiya ndə ka Amun. Ma kə kuraku na: «Zlashi a ghəshi ngaa sati. Ya kwataka keŋkiɗi dza naa dzəməshi tə tsava kələm hərezliy, ta ngangazlay dza na,» kə.
36 Ma sa favee kuma va, ma pən na: «A Kwa sləkəpə Hiyala ghiy, fa njasa sawaŋiy ka mbəzə ghiy? Titihu zhəkən shi pə gha zhəghakən sawa sawaŋiy ghəshi va. Fambəshi mbə dəvə ka mbəzə shi a ghəshi panti shi shi, mbaʼ ghəshi kəəsəhushi ka mevivi dzəti hiɗiy kamaa shi shi. 37 Ka pəli kuma shi va jikir na gha mbə nəfə tsa gha ma. Ka za ghən gha ta kuma jikir na va mənti ghəshi ma. Sa nza nay, a ghəshi tsəərətəŋiy dzəti sa kaʼu ghiy kələm tsaa dəzlay məlmə Zheruzalem,» Pən.
38 Dza ghiy ki, mbaʼ ghiy kakaʼuanti kələm tsa va gwanay, paʼa mbə reta bitə tsa ciy dzəta ghumə, sa nza na ya wa ndiy, lə nəfə tsa ci kutiŋ niy ghəra na sləni va.