4
Sa favə kar Sambalat, ghəshi lə kar Tubiya, mbaʼ ka Arabə, mbaʼ ka Amun mbaʼ ka Asdudə, mbə dzava na sləni kaʼu kələm tsaa dəzlay məlmə Zheruzalem va, mbə nənəʼuva na kweleriy niy nza va dzar tə kələm tsa va, kə məndi na, mbaʼ nefer shi satishi təruŋ.2 Dza ghəshi jakə ghəshi jakəti miy tsa shi gwanashi ta səəkə ta pəsli ta mbəzli mbə məlmə Zheruzalem nza ghəshi səəvərishi.3 Sa favə ghiy tsəgha na, dza ghiy cəʼu ghiy cəʼuti Hiyala ghiy, mbaʼ ghiy fə fiy mbəzli ta ndəghu məlmə havəghu lə həvir və shi ya ə dza ghəshiy səəkə ta pəsli tə ghiy.4 Ya tsəgha nzə kiy, war mbə ɓəəli miy niy nza ka Zhuda. Ma kə ghəshi niy ni na: «A ka pa shiy tashi, təruŋta na rəɗaa dzavəɗita na lə hərezli ni, ka dza ghummə mbay kaʼuanti kələm tsaw,» kə ghəshi niy ni.
5 Ma kə ka mbəzə ghiy niy ni na shi ki na: «Ka dza ghəshiy sənay njasa dza ghumməə dzamməə dzəkən shiw, ka dza ghəshiy fəti ghən tə ghummuw, war vətəghə dza ghumməə pəslambə mbə shi mbaʼ ghummə bakwantishi, nza ghummə garəti sləni shi va tsəgha ki,» kə ghəshi niy ni.
Nehemiy ɓanavəshi shi mbəzə kaa ka sləni
6 A ka Zhəwifə niy nza ndəku ndəku lə ka mbəzə ghiy va. Gar məŋ səɗa niy zhənti ghəshi səəkə ta gəzaŋiy kuma pəhəti ghəshi tə ghiy: «Ya dza kwamaɓa dza ghuy dzay, ta pəsli dza ghəshi tə ghuy»ª kə ghəshi niy ni kaa ngəŋiy. 7 Sa gəzaŋiy ghəshi tsəgha ki na, mbaʼee pəlavə pihi gar mbəmbəshi mbəzli ti shi dzar ta kələm tsa va, mbaʼee fəfiy ka sawji. Mbəzli mbə takə tsa kutiŋ tsa niy fəfiyee kwa zərə kwa zərə ya wa ndə na lə kafaʼi mbaʼ gwapa, mbaʼ rigi. 8 Ma sa nuwantee mbəzli va dzar tə pi tsa fəfiyshee va ki, ma pən kaa mbəzliy sləkə məlmə ghəshi lə mbəzli dikə dikə ni, mbaʼ nihuti mbəzli gwanashi ni na: «Ka hazləni ghuy va ka mbəzə ghuy ma. Sənay tə ghuy dikə na Kwa sləkəpə, ka hazləni məndi və təruŋ. Ə pə ghuy mbəzə ta ngwardəhiŋwiy, lə ta ndərazhiy zhər ghuy, lə ghehi ghuy, mbaʼ ta miʼi ghuy, lə ta ghyeghyer ghuy,» pən kaa ngəshi.
9 Dzəghwa mbaʼ ka mbəzə ghiy va favə a kuma pəhəti ghəshi va məniŋiy tsəhəta kwa sləmə ghiy, mbaʼ Hiyala biyɗanti kuma shi va, kə ghəshi. Sa nighəti ghiy tsəgha na, mbaʼ ghiy zhaŋiy gwanaŋiy ta kaʼu kələm, ya wa ndə na ka ghəra dzəghwa tə pi tsaa niy nza na. 10 Ya tsəgha nzə ki, ghala fəcavay, kwataka reeta ka slənee niy ghəra na sləni. Nihuti reeta mbəzliy, pəhə pəhə niy nza ghəshi, ya wa ndə na lə gwapa ci, mbaʼ gal tsa ci, mbaʼ rigi tsa ci, mbaʼ shi ka məndi vaa pəhəə dzəghwa hati ta mbəzə. Mezhizhiy, liy hum ka Zhuwda gwanashi niy nza ghəshi. 11 Mbəzliy niy kaʼu kələm lə mbəzliy vəlanshi shiyiy, lə dəvə kutiŋ niy ghəra ghəshi sləni, sa nza nay, lə shi mbəzə niy nza ghəshi mbə nahuti dəvə shi. 12 Ya wa ndə mbə ka ndəɓə shiyiy, lə kafaʼi ci titi ci niy ghəra na sləni. Ndə viy təlimiy, vəghee niy nza tsa va. 13 Dzəghwa ki, ma pən kaa mbəzliy sləkə məlmə lə mbəzli dikə dikə ni, mbaʼ nihuti mbəzli gwanashi ni na: «Sləni ghəra ghummə nay, sləni dikə na, zhini ɓuŋ ghənzə. Sanay, ndani ndani nza ghummə mbə ndəɓə kələm tsa, kərakə kərakəmmə nza ghummə kwa jipə ghummə. 14 Va tsəgha ki, favə ma ghuy viy təlimə, ya dzəghwa tima nza ghuy mbə sləniy, ɓasəva tə ghuy səəkəə dzəti pi tsa nza ghiy tsa. Hiyala ghummə dza na ta mbəzə tə ghummə,» Pən kaa ngəshi.
15 War tsəgha niy ghəra ghiy sləni va njasa səəkə vici, nahuti bəla mbəzli ghiy va, sa təhərivaŋiy ghiy bakə mbə na, lə gwapa ta dəvə lə gwapa ta dəvə, ghala pətə mekəshi paʼa va vərɗi. 16 Ma pən kaa mbəzli ghala vəghu tsa va diɓa ki na: «Ya wa ndiy, mbə məlmə Zheruzalem kə dzaa hi ghəshi lə mbəzli ghəra na sləni li shi. Nza ghummə mbəə ndəghu məlmə ghummə həvir, ma havəghu na, nza ghəshi ghəra sləni» pən kaa ngəshi. 17 Ya yən, ya ngwardirə, ya ka slənee, ya ka sawjiy niy nza kwasəbee ta ndəghuray, niy sərə kubeŋer ghiy kən ghən kala war ta pi gwaʼa tsəghaw. Ya wa ndiy, lə shi mbəzə ci niy nza na ta dəvə.