Nehemiy sləkati kuma kwa jipə ka Zhəwifə
5
Ma tə nahuti vici na, dza nihuti zhər lə nihuti miʼi, ka wahə təruŋ va kuma mənanshi nihuti mbəzli shi ka Zhəwifə. 2 Ma kə nihuti mbə shi niy ni na: «Ghiy lə ndərazhiy zhər ghiy mbaʼ ghyehi ghiyiy, ɗaŋ nza ghiy. A ghiy ɗi məndiy tiŋiy alkamari ta zəmə ta mbə ghiy nza tə ghuməŋiy,» kə ghəshi niy ni. 3 Ma kə nihuti ɓa na: «Sa ka maa səkwatay, ya veher ghiy, ya za viŋəhi ghiy, ya ghyeghyer ghiy ka ghiy fəniyshi kaa mbəzli ta mbərəshi kwa kuma, ta mbə ghəshi taŋiy alkamari,» kə ni va. 4 Ma kə nihuti diɓa na: «Ta tsəhə ghən kaa maziy, təm ka ghiy ɓəvə mbaʼ ghiy fambə ya veher ghiy, ya za viŋəhi ghiy mbə dəvə ndəə dzəti təm tsa va. 5 Hulfə kutiŋ ghiy li shi ngar ki. Ndərazhi kutiŋ ni shi ghiy li shi. Ka gha nighə na, ghiy məŋiy mbə ɗəl ndərazhi ghiy ka mevivi ɗi ghiy lə ɗi ma ghi. Nihuti ghyehi ghiy sanay mevivi na ghəshi, sa sənata ma ghiy nahuti kuma ka ghiy məni. Sa nza nay, mbə dəvə nihuti mbəzli na veher ghiy lə za viŋəhi ghiy,» kə ni va.6 Sa favee wahə shi va lə kuma gəzəkə ghəshi va na, mbaʼ nəfə tsee satiy təruŋ. 7 Dzee ki mbaʼee tarəkə naɓə mbəzli dikə dikə ni ghəshi lə mbəzliy sləkə məlmə, ma pən kaa ngəshi na: «Shəndəkəta na kuma mananshi ghuy va kaa nihuti mbəzli dzar kwa jipə ghuy,» pən. Dzee mbaʼee harashi ta ɓasəva tsa dikə tsa. 8 Ma pən kaa ngəshi sa ɓasəshi ghəshi na: «Geʼi lə shi va ghummiy, a ghummə mbərəkə ngwardəhimmə ka Zhəwifə va mbəzliy kamaa ka Zhəwifə sa niy ɗəlanti ghəshi ghən tsa shi ta nza ka mevivi. Dzəghwa ghuy sana kiy, mbaʼ ghuy zhaŋuy zhimbə ɗəl ngwardəhiŋuy ka Zhəwifə kaa nihuti ngwardəhiŋuy.Tawa məni ghuy tsəgha kiya?» pən kaa ngəshi. Sa gəzanakəshee tsəgha na, hashi ghəshi hashishi, kala sənata ma kuma ka ghəshi zləɓara. 9 Ma pən kaa ngəshi diɓa na: «Shiy wuzə na shi məni ghuy vaw. Wuzəɓa hazləni ghuy na va Hiyala, nəghətaa ka mbəzə ghummə ushəmmə. 10 Ya yən ghiy lə ngwardəhira, mbaʼ ka sləni yay, a ghiy ɓəhu təm alkamari lə təm gəna kaa ngəshi. A pə ghummə zlashi ɗuw yam kən temer ghummmə va və shi. 11 Əə cəʼuŋuyee, ndatsə ndatsiy zlatanavəshim ya veher shi, ya za viŋəhi shi, ya ulivəhi shi, ya ghyeghyer shi kaa mbəzliy niy nza shi shi mbə dəvə ghuy. Mbaʼ kə ndə niy ɓəvə ya təm gəna, ya təm alkamari, ya təm tay, ya təm in va ghuy ta waŋuy ghəci lə yam kəniy, ka zləɓa ghuy ghəciy waŋuy yam kən va ma,» pən kaa ngəshi. 12 Ma kə ghəshi kaa ngəra na: «Ta zhananavəshi shi shi dza ghiy, ka ɗuw ghiy ya nimaɓa shiy və shi ghulaw. War njasa gəzəkə gha va dza ghiy ta məni,» kə ghəshi.
Dzəghwee daʼ yən harashi ka ta Hiyala nza ghəshi nza ka ka ndəgha fəti. Ma pən kaa mbəzli ɓəvə məndi va təm vəshi na: «Zəməkəm fəla ta məni kuma gəzəkə ghuy va,» pən kaa ngəshi, mbaʼ ghəshi zəməkə. 13 Ma pən kala bati pi tsa ta mətsəni kuɓaŋ tsee ki na: «Ya wa ntsaa dzaa dzəghway kən fəla zəməkə na vay, war tsətsə njasa batee tsa kuɓaŋ tsee kə Hiyala dzaa batanti, Mbaʼ zanti ghyi tsa ci lə shi və gwaʼa, nza ghəci nza kala kama shiy və,» pən. Ma kə mbəzli tiɓa gwanashi na: «Tsəgha kə dzaa məniva,» kə ghəshi. Dza ghəshi ka fal Kwa sləkəpə. Ya wa ndə na, mbaʼ gariy tə kuma gəzəkə na va məni.
Njasa niy məni Nehemiy nguməna tə hiɗi Zhuda
14 Mazə Artaserses mbə məni kwa bakəmətsəkə piya ci mbə maziy, yən niy fiy na ka nguməna tsaa sləkə hiɗi ka Zhuwda, paʼa tə kwa mahəkanəmətsəkə bakəti piya ci mbə mazə. Mbə piya məŋ lə bakə na va mənəhuee ngumənay, səəkee ɓəhu ghən tsa ka məndi vaa tsəhə kaa nguməna ta kuma ghəzli kən ghiy, ghiy lə ngwardəhiraw. 15 A na mbəzliy mənəhu nguməna pərɓa ghəshi kaa ngəra tə hiɗi vay, ə niy ʼyapə ghəshi mbəzli. Ka tsəhə ghən va mbəzli: Shi zəmə lə tay, mbaʼ gəna kwa tsahi faɗəmətsəkə. Ya mbəzli ta səɗa ngumənay, war mbə sanshi ngəraʼu niy nza ghəshi kaa mbəzli. A na nee nee kiy, mənəhu gəla shi tsəgha ni vee sa nza na mbə hazlənee niy nza va Hiyalaw. 16 Yən dəʼu ghən tseyiy, ee ndəɓəhu kələm tsaa dəzlay məlmə Zheruzalem va. Səəkee pahu za va nduw, ya mbəzli ta səɗee va niy ndəɓə kələm kwasəbəyay, səəkə ghəshiy pahu zaw. 17 Ya tsəgha nzə kiy, mbəzli dikə dikə ni mbə ka Zhəwifə lə nihuti ka Zhəwifə bələku mbaʼ cifəmətsəkə ghən kən niy zəmə na shiy kwasəbee, mbərəkəshi ka məlməə niy səsəəkə dzar tə hiɗi məni ghiy ghala li shi. 18 Njasa səəkə viciy, məcar kutiŋ mbaʼ teŋkesli təra təra ni kwaŋ, mbaʼ kukwir niy bəku məndi ta zəməshi ghiy lə mbəzli va. Mənti ma məndi vici məŋiy, kar məndiy takəra tay ɗaŋ ta sa. Ya tsəgha nzə kiy, niy ɗuw shi ka məndiy ɓanci kaa nguməna yaw. Sa nza nay, shəndəkəta niy natee sləni kən mbəzli.
19 «A Hiyalee, titihu zəzəti tə ghaa dzəkən shi mənəhwee gwanashi ta hulfə ka Zhəwifə, məntəra tə gha wuzə hur tsa gha,›› pən kaa Hiyala tə nahuti vici.