Nehəmiy 6

Ka jaka Nehemiy pəhə mananci jikir

Dzəghwa ki, mbaʼ məndi dzaa gəzanshi kaa kar Sanbalat, mbaʼ Tubiya, mbaʼ Geshem ndə ka Arabə, mbaʼ nihuti ka jaka ghiy, gwaʼa kaʼuantee kələm tsaa dəzlay məlmə Zheruzalem va, tərə pi tsa ngəzla ngəzla tsa ghulaw, kə məndi kaa ngəshi. Ghalaɓay niy fafamiy gəzligəzlee miy dəghahi məlmə va diw. Sa favə ghəshi tsəgha ki na, 2 dza kar Sanbalat ghəshi lə Geshem mbaʼ ghəshi ghunikə ndə ta harɗa, ta kumə ghiy li shi tə pi tsa har məndi vaa Kefirim dzati kwa teʼu pi tsa har məndi vaa Unu. A ghəshi niy pəhanti məniɗa jikir. 3 Dzəghwee nee ki, mbaʼee ghunashi mbəzli ta gəzanshi: «Mbalam gəzanshim: “Təruŋta na sləniy vəya, ka mbee kafəra ta dzəghwa ta kumə lə ghuyiw. Sa wa na dzee garəti sləni ta dza ta kumə lə ghuy kiya? kə” pə ghuy kaa ngəshi,» pən kaa mbəzli va. 4 Faɗə səɗa niy zhinti ghəshi ghuni mbəzli səəkə ta gəzəra kuma va tsəgha. War tsəgha yən zləɓanshi kuma va kuraku.

5 Ma tə kwa cafa səɗa ki na, mbaʼ Sanbalat ghunikəra ndə sləni tsa ci lə zliya ta dəvə ci garə jangəvə ya wa ndə, sa kama na nahə nahə. 6 Avanata kumaa niy tsaslati na tə zliya va: «Ma kə mbəzliy kamaa ka Zhəwifiy: “Ghuy lə ka Zhəwifiy, a ghuy pəhəti kuma ta zləghu ghən tsa ghuy mbə dəvə mazə ka Persə, va tsəgha kaʼu ghuy kələm tsa kaʼu ghuy va” kə ghəshi. zhini tsəgha Gashəmu gəzəkə diɓa. «Əə ɗi gha məniŋa ka mazə tsa shi,» kə məndi. 7 Ma kə məndi diɓay: «Lə ka ta gəzə kuma Hiyalahita tivə gha mbə məlmə Zheruzalem ta gəzə ghəshi: “Gha na mazə tə hiɗi ka Zhuwda,” kə ghəshi. Kwa kuma juwiy, ta tsəhəta dza kuma va kwa sləmə mazə ka Persə. Va tsəgha ni ya, ndi a ghummə sləkahu kuma, pən» kə kaa kuma tsaslaghwa na kwa zliya va. 8 Ma sa jangətee zliya va na, mbaʼee ghunay ndə ta zləɓanci: «A pə gha kaa ngəciy: “Ndə tiɓaa gəzəkə kwemer gəəzə gha vaw, gha pəghəvə na kuma gha kə,”pə gha kaa ngəci,» pən kaa ntsa va. 9 Ka mbəzə ghiy va gwanashiy, ə niy ɗi ghəshi dzantəŋiy her ghiy. Mbə zəzə kuma shiy: «A ghiy dzaa taŋiy va kuma shi va, mbaʼ ghiy zlata sləni ghiy va,» niy nə ghəshi.

«A Kwa sləkəpə, titihu ə cəʼuŋee, mətsəhəra bərci mbə slənee na» pən liy hum kuma va.

10 Dzee tə nahuti vici mbaʼee dzaa kəsay Shemaya zəghu Delaya jijiy Mehetavel, sa niy mbə ma naa səəkə viya. Ma kə kaa ngəra na: «Dzam dzakə ghyi tsa Hiyala a ghumə dzaa nziyim liy dapa kiyɓa va, nza ghum kalakən ciki tsa va kən ghən ghum. Sa nza nay, ta səəkə dza ka mbəzə gha va həvir ta pəsliŋa,» kə kaa ngəra. 11 Ma pən kaa ngəci na: «Ndə gar hu va mbəzli nara gha na? Talay, ndə ta Hiyala nzee kee dzəmbə cikə tsa Hiyala va mbəɓa mbəɓa tsa shəkəna? Tə ghuməra dzee nza yən kə dzəmbəra bərkə gha na? Ka dzəmbə tsava ciki Hiyalee na neyew,» pən kaa ngəci. 12 Kuma gəzəra na va tsəgha nay, cəkeʼ niy sənayee Hiyala ghunay na ta gəzəraw pən. Kar Tubiya lə Sanbalat niy ɓanavə na gəna, ta mbə ghəciy gəzəra kuma va tsəgha. 13 Ta mbə heree dzashi, mbaʼee mənti kuma njasa gəzəkəra Shemeya va, ma nzee mənti kuma jikir na. Ka ghəshi dza ki na, mbaʼ ghəshi sawanti slən tsee tsəgha, nza haʼu mbəə nza kənee niy nə ghəshi. Va tsəgha niy wanati ghəshi gəna kaa ngəci ta gəzəra kuma va ghəci tsəgha.

14 «A Hiyalee, əntaa gha za ghən ta kuma jikir na va mənti kar Tubiya ghəshi lə Sanbalat ma. Əntaa gha za ghən ta kar Nudiya nahuti maliy gəzə kumaa səəkə va va gha ghəshi lə nihuti ka gəzə kuma gha va niy pəla dzanti heree diɓa ma,» pən kaa Hiyala tə nahuti vici.

15 Tə kwa bakəmətsəkə cifəti vici, tə tir tsa har məndi vaa Elul niy kərə ghiy lə kaʼu kələm tsa va. Vici cifəmətsəkə bakə ti niy mənti ghiy mbə sləni va. 16 Ma sa favə ka mbəzə ghiy va gwanashi gwaʼa kaʼuanti ghiy kələm tsa va kə məndi, mbaʼ nihuti hulfəhi mbəzli dzar vəgha ghiy va gwanashi nay tsəgha na, mbaʼ her shi dzashi təruŋ, mbaʼ haʼu kəəsəvəshi. Mbaʼ ghəshi sənay Hiyala kətitəŋiy na mbə sləni va, kə ghəshi. 17 Ghala vəghu tsa va diɓay, war mbə tsaslanci zliyahi niy nza nihuti mbəzli dikə dikə ni tə hiɗi ka Zhuwda kaa Tubiya. Ghəci kuraku na mbə tsaslanshi ghəci niy nza. 18 Ta na navay, ɗaŋ na mbəzliy niy jakayshi kuma li tə hiɗi ka Zhuda. Sa nza nay, mashi niy nza ghəshi lə Shekaniya tsahuti ndə ka Zhəwifə, zəghu Ara. Zhini diɓay, a Yehuhanan zəghu ci niy ɓəhu zha Meshulam zəghu Berekiya. 19 Ka mbəzliy dzay, ka fal kwa kumee, ka dzaa zhananci kuma kee gəzə. Ya Tubiyay, war mbə tsaslira zliyahi niy nza na ta mbə heree dza.