25
Ma Sedeshiyas mbə məni kwa məsleɗa piya ci mbə mazə, tə kwa maŋa tir, kwa maŋa vici na, mbaʼ Nabukudunuzur mazə ka Babilunə kafiy lə ka sawji ci gwanashi ta pəsli ta mbəzli mbə məlmə Zheruzalem. Dza na mbaʼ ɓasiy ka sawji ci kwa kuma məlmə va ta dəzlay, dza ghəshi ka ɓasə hiɗi dzəta kələm tsaa dəzlay məlmə va ta mbəə pəsli ti.2 Dəzlətsəɓə ghəshi dəzlay məlmə va. Paʼa tə kwa məŋ lə tan piya Sedeshiyas mbə mazə.
3 Ghala vəghu tsa va ki na, mba ma mənita təruŋ mbə məlmə va, kala shiy tiɓa ta zəməshi mbəzli mbəɓa. Ma tə kwa faɗa tir, tə kwa məsleɗa vici ci ki na, 4 mbaʼ ka Babilunə bətəkuvə kwal dzəvəri mbə kələm tsaa dəzlay məlmə va. Ya tsəgha niy dəzlay ka Babilunə məlmə va na, mbaʼ ka sawji ka Zhuda gwanashi huhushi dzar vəgha tsa mazə səvərishi mbə məlmə həvir kwa miy dəgha kwa jipə kəlemer bakə ni va. Dza mazə Sedeshiyas lə na ci bali, mbaʼ nuvə kwal tsa ka məndi vaa dziy kwa teʼu pi Zhurdeŋ kwa. 5 Ya tsəgha nzə ki na, mbaʼ ka sawji ka Babilunə nuvə, mbaʼ ghəshi dzaa kəsay dzar tə ngula Zheriku, mbaʼ ka sawji ci huhushi gwanashiy zlay. 6 Dza ka sawji ka Babilunə ki mbaʼ ghəshi kəsəti, mbaʼ ghəshi kəsəghə kaa mazə tsa shi. Mbə məlmə Rivəla niy nza mazə tsa va. Dzəghwa ka Babilunə ki, ka ɓasə nguvəə dzəkən mazə Sedeshiyas tiɓa. 7 Dza ghəshi piyəŋ piyəŋ ghəshi slaslanti ndərazhi ci kwa kuma ci, mbaʼ ghəshi yahwanti micic kwa ghən ci. Dza ghəshi kaa celel tsa mənti məndi tə mbəzə ghəm na mbaʼ ghəshi jakəti bakə, tsaʼ ghəshi tsaghwa kwa, mbaʼ ghəshi ɓəghə dzəti hiɗi ka Babilunə.
ka Babilunə zhini kəəsəhu mbəzli mbə məlmə Zheruzalem
( 2 NuMezh 36.17-21; Zher 39.8-10; 52.12-30)
8 Ma tə kwa məŋ lə məsleɗa piya Nabukudunuzur mbə mazə tə hiɗi ka Babilunə, tə kwa mbərfaŋa vici, kwa cafa tir na, dza Nebuzaradaŋ ntsaa sləkə ka sawjiy ndəghu mazə, ntsaa ghəranci sləni ci kaa mazə ka Babilunə mbaʼ dzay dzəmbə məlmə Zheruzalem. 9 Dzəmbə na takəɗ ndanti ghyi tsa Kwa sləkəpə, mbaʼ ghyi tsa mazə, mbaʼ ghiyeghiyer mbə məlmə Zheruzalem gwanashi, mbaʼ ghiyeghiyer mbəzli dikə dikə ni mbəɓa. 10 Dzəghwa ka sawji ka Babilunəə niy nza kwasəbə dikə tsa ka sawjiy ndəghu mazə va, baʼu baʼu ghəshi babaʼuanti kələm tsaa niy dəzlay məlmə Zheruzalem va. 11 Zhini Nebuzaradaŋ dikə tsa ka sawjiy ndəghu mazə va kaʼ kahu niy niy tərə va mbəzli mbə məlmə va, ka dzay li shi. Mbəzliy niy ɓanavə ghən tsa shi kaa mazə ka Babilunə mbaʼ nihuti mbəzliy niy tərəmbəshi. 12 Ya tsəgha kiy, aa niy zlashi nihuti ka daw bərci mbə məlmə va ta nighə ghəshiy dzəkən fəhi ka məndiy ta tay tə ya shi, ka za nihuti shiy tə vəher tiɓa.
13 Dzəghwa ka Babilunə diɓa mbaʼ ghəshi jaʼwanti shəlhiy niy mənti məndi va tə mbəzə ghəm na kiy ghyi tsa Kwa sləkəpə. Zhini tsəgha ghəshi jaʼwanti mutiti gədewesliy niy vasəti məndi va tə mbəzə ghəm na, mbaʼ tsəʼu tsa dikə tsa va niy nza kwa tipə kiy ghyi tsa Kwa sləkəpə, niy vasəti məndi tə mbəzə ghəm na. Meʼ ghəshi pahu mbəzə ghəm na va niy mənti məndi shi va ti, ka dzashi liy dzəti hiɗi ka Babilunə. 14 Dza ghəshi diɓa meʼ ghəshi pahu kar kwekwer ka məndi vaa pa pəsər li shi lə shi ka məndi vaa hənzə shiy li shi, mbaʼ hwashiɗiɗi ka məndiy sla bərəzlahi li shi, mbaʼ shi ka məndiy sa shiy kwa shi, mbaʼ nihuti shi mənti məndi tə mbəzə ghəm na gwanashi, shi ka məndiy ghəra sləni li shi kiy ghyi tsa Kwa sləkəpə. 15 Dza dikə tsa ka sawjiy ndəghu mazə va diɓa cəkeʼ ɓasəhu slən shi mənti məndi tə mbəzə kwa shamshama lə ni mənti məndi tə tsahi gəna, shiy nja kar shi ka məndiy ndi shiy zən nja ʼurdi ti shi, mbaʼ hupehuper ka məndiy shəkə miymiy dzəghwa shi ta məsəshi. 16 Tə mbəzə ghəm na ɗaŋ təruŋ niy mənti mazə Saləmuŋ Shəlhi bakə ni va, mbaʼ tsəʼu tsa dikə tsa va, mbaʼ mutiti gədewesli va, ta dzəmbə ghyi tsa Kwa sləkəpə. Mbəzə vay, ka bərkəva shəndəkə tsa nzuw. 17 Basa faɗə mbaʼ bazli kutiŋ niy nza bitə tsa shəl kutiŋ, mbaʼ məndi niy vasəti shiy tə mbəzə ghəm na, sərə məndi səraghwashi kwa ghən ci, vəli dəvə mahəkanə bitə tsa shi, mbaʼ məndi ghasləti shiva lə shiy mbərə mbərə nja zəʼu, mbaʼ shiy nja məkirshi. Tə mbəzə ghəm na niy nza shiva gwanashi. Shi kutiŋ ni niy nza shəlhi va lə shi ghaslətishi məndi va li shi bakanashi.
18 Dzəghwa ntsaa sləkə ka sawjiy ndəghu mazə va diɓa mbaʼ kəəsəhu kar Seraya dikə tsa ka ta Hiyala ghəshi lə Sefaniyahu, ntsaa nuw, mbaʼ ka ta Hiyalaa ndəghu miy dəgha ghyi tsa Kwa sləkəpə va mahəkanə ni. 19 Zhini na mbə məlmə Zheruzalem mbaʼ kəsəhu tsahuti ndə sləni tsa dikə tsa, saa nighəə dzəkən ka sawji ka mbəzə, mbaʼ mbəzli cifə mbə mbəzliy ci kuma kaa mazə, shiy nza mbə məlmə, mbaʼ ndə tsasli shiy, ntsa dikə tsa mbə ka sawji, ntsaa təra mbəzli ta dzəmbə sawji tə hiɗi ka Zhuda, mbaʼ nihuti mbəzli gəmshi ni kwaŋəmətsəkə. 20 Sa kəəsəvəshi Nebuzaradaŋ ntsaa sləkə ka sawji ndəghu maziy, mbaʼ ɓəghəshi dzəmbə məlmə Rivəla kaa mazə ka Babilunə. 21 Dzəghwa mazə mbaʼ gəzanshi kaa mbəzli, mbaʼ məndi bakwantishi tiɓa mbə məlmə Rivəla tə hiɗi Hamat. Ava tsəgha ɓanti məndi ka Zhuda kərakə lə hiɗi shi.
Gedaliya məni nguməna tə hiɗi ka Zhuda
( Zher 40.7–41.18)
22 Dzəghwa Nabukudunuzur mazə ka Babilunə ki, mbaʼ ɓəvə Gedaliya zəghu Ashikam jijiy Shafam, bəm fiy ka nguməna ta sləkə niy tərmbə mbəzli tə hiɗi ka Zhuda. 23 Mbaʼ mbəzliy sləkə ka sawji ka Zhuda gwanashi ghəshi lə ka sawjihi shi, niy niy zlatanavə ma ghən tsa shi kaa mazə ka Babilunə favə kuma va. Dza ghəshi ki, mbaʼ ghəshi dzaa kəsay Gedaliya mbə məlmə Misəpa. Mbəzliy sləkə ka sawji vay, kar Yishəmayel zəghu Netaniya, mbaʼ Yuhanan zəghu Kareya, mbaʼ Seraya zəghu Tanəhumet ndə ka Netufa, mbaʼ Yazaniyahu zəghu ndə ka Maaka niy nza ghəshi. ghəshi lə ka sawji sləkə ghəshi va niy tsəhəshi na. 24 Ma kə Gedaliya kaa ngəshi lə mbəzli sləkə ghəshi na: «Ka ghəraŋuy hazləni va ka Babilunə ma. Ə pə ghuy nziyŋuy tə hiɗi ghummə, ka fa kuma va mazə ka Babilunə, kuma tiɓa dzaa gagaŋuyiw,» kə kaa ngəshi, mbaʼ zəmanakəshi fəla.
25 Ya tsəgha nzə ki, tə kwa mbərfaŋa tir, tə piya va na, dza Yishəmayel zəghu Netaniya jijiy Elishama, ndə mazə tsa mbə ka Zhuda, mbaʼ tsəhiy mbə məlmə Misəpa ghəshi lə mbəzli məŋ, mbəh ghəshiy paslanti Gedaliya, bəku ghəshi bakwanti ka zhuda lə ka Babilunəə niy nza kwasəbə mbə məlmə va. 26 Dza ka zhuda gwanashi ki, sa hazlənishi ghəshi va ka Babilunə, mbaʼ ghəshi kafəshiy dzashi dzəti hiɗi ka Ezhiptə. Ghava na tə ndərazhi lə mbəzli dikə dikə, mbaʼ mbəzliy sləkə ka sawji.
Mazə ka Babilunə mananati wuzə kaa mazə Yuyakinə
( Zher 52.31-34)
27 Dzəghwa mbaʼ məndi pəərəti Evel-Merudak ka mazə tsaa sləkə ka Babilunə. Tə piya pəərə məndi vay, kwa mahəkanəmətsəkə mbərfəŋti niy nza piya ghala kəsəhu məndi Yuyakinə mazə ka Zhudaa dzashi li. Ma tə kwa baka tir, tə kwa mbərəfaŋa vici ci, tə piya va ki na, mbaʼ mazə ka Babilunə tsa va mananati wuzə hur kaa Yuyakinə, mbaʼ pəlay səəmə kwa fərshəna. 28 Dzəghwa na ka mananci kuma wəzə na. Mbaʼ fiy ka mazə tsaa taŋəti nihuti mezheriy niy kəəsəkə məndiy dzəti hiɗi ka Babilunə nja ghəci. 29 Mbaʼ gəzanshi kaa mbəzli a məndi səranti kubeŋer ka fərshina kən ghən ci. Njasa səəkə vici ki na, war mbə zəmə shiy Yuyakinə niy nza kwasəbə mazə ka Babilunə mbə nziy tsa ci gwanay. 30 Mbə fə ghən niy nza mazə ka Babilunə ta nighəə dzəkən, ta mbə ghəciy nza wuzə njasa səəkə vici, mbə kwa tərə nziy tsa ci gwanay.