24
Ma Yuyakim mbə mazə ki na, mbaʼ Nabukudunuzur mazə ka Babilunə səvəriy lə ka sawji ci ta dza ta mbəzə li. Mbaʼ mazə tsa va mbay. Piya mahəkanə Yuyakim mənti tə dəvə ci. Liy hum diɓa na mbaʼ kafiy ta zhananci ghən, ka pəla zləghu ghən tsa ci mbə dəvə ci.2 Dzəghwa Kwa sləkəpə mbaʼ ghunashi ka zləghu ɗaŋ ɗaŋ kwa zərə shi ta Yuyakim lə mbəzli tə hiɗi ci. Ka zləghu vay, Tə hiɗi ka Babilunə niy səəkə nihuti kwa zərə shi, nihuti na, tə hiɗi ka Shiri ghəshi səəkə kwa na shi zəərə, nihuti diɓa na tə hiɗi ka Muwabə ghəshi səəkə kwa na shi zəərə, ma nihuti na tə hiɗi ka Amun ghəshi səəkə kwa na shi zəərə. Kwa sləkəpə niy ghunashi na ta zanti hiɗi ka Zhuda lə mbəzli ti shi, njasa niy gəzə na va lə miy tsa ka sləni nzə, ka gəzə kuma nzə.3 Shiy mənishi va tsəgha ni gwanashiy, Kwa sləkəpə gəzəkə na tsəgha kə ghəshiy məniva, kə, ta mbəə katanti mbəzli tə hiɗi ka Zhuda kwa mətsə nzə. Tə mbərkə jikir tsaa niy mənəhu Manase va təruŋ tsa.4 Ɗaŋshi niy bəkuhu na mbəzli kama fəti və shi, paʼa ka təhay pi tsa mbə məlmə Zheruzalem miymiy shi. Niy zləɓa pəlay jikir tsa va Kwa sləkəpə mbə nəfə tsa nzuw.5 Nahuti kumaa tərmbəə dzəkən mazə Yuyakimiy, kwa zliy mezher ka Zhuda tsasliti məndi.6 Sa mətiy nay, mbaʼ zəghu ci Yuyakinə mbərəhu məni mazə kwa pi tsa ci.
7 A na mazə ka Ezhipətiy, niy zhini na səvəri lə ka sawji ci səvəri mbə hiɗi ci ghulaw. Sa nza nay, a mazə ka Babilunə niy ɓəɓəhu hiɗiy niy nza va tə dəvə ci gwanashi, ghava na tə həl tsa kəray hiɗi ka Ezhiptə ti njasaa dzati muw, paʼa tə həl Əfəratə.
Məndi kəəsəhu ka Zhudaa dzəti hiɗi ka Babilunə Yuyakinə mbə mazə
( 2 NuMezh 36.9-10)
8 Piya məŋ lə dəghəsə niy nza sa Yuyakinə ghala vəghu tsaa pəərə məndi ka mazə. Tir mahəkanə niy mənti na mbə mazə, mbə məlmə Zheruzalem niy nza na lə nziy tsa ci. Nehushəta niy nza slən tsa mbəghiy, zha Elnataŋ ndə ka Zheruzalem niy nza na. 9 Kuma gəmgəm na niy məni na kwa kuma Kwa sləkəpə, war njasa niy məni diy va. 10 Ghala vəghu tsa va ghəci mbə mazə ki na, mbaʼ mbəzli dikə dikə ni mbə ka sawji Nabukudunuzur mazə ka Babilunə səvərishi lə ka sawji shi ta mbəzə lə mbəzli mbə məlmə Zheruzalem. Dəzlətsəɓə ghəshi dəzlay məlmə va. 11 Ma sa dəzlay ka sawji məlmə va ki na, mbaʼ Nabukudunuzur səəkəə dzəmbiy dəʼu ghən tsa ci lə nihuti ka sawji, mbaʼ pəsliy ta mbəzli mbəɓa. 12 Dzəghwa Yuyakinə mazə ka Zhuda ghəshi lə mbəghiy, mbaʼ mbəzli dikə dikə ni mbə ka sawji ci, mbaʼ ka sləni ci dikə dikə ni, mbaʼ nihuti mbəzli dikə dikə ni tə hiɗi ci, haʼ ghəshi haghə ghən tsa shi kaa mazə ka Babilunə ki. Dza mazə tsa va mbaʼ kəəsəhushiy dzəghwa fərshina. Kwa dəghasa piya Nabukudunuzur niy nza na mbə mazə tə hiɗi ka Babilunə ghalaɓa. 13 Dzəghwa Nabukudunuzur ki, mbaʼ jajaʼwanti shiy niy mənti Saləmuŋ mazə ka Izərayel va tə mbəzə kwa shamshama, ta ghəra sləni li shi kiy ghyi tsa Kwa sləkəpə. Dza na meʼ pahu slən shi tə dimə kiy ghyi tsa kwa sləkəpə lə kiy ghyi tsa mazə, njasa niy gəzəkə Kwa sləkəpə va. 14 Dza na diɓa mbaʼ kavə mbəzli mbə məlmə Zheruzalem gwanashi ka dzay li shi. Mbəzli vay, ka bərci mbə məlmə va gwanashi lə mbəzliy sləkə ka sawji gwanashi niy nza ghəshi. Ɗaŋ tsa shiy, mbəzli diwiy diwiy diwiy, mbərəkəshi nihuti mbəzli nza məcaŋa vəshi ta məni shiy ghənghən ghənghən, mbaʼ ka pəsli shiy. Kwataka ka daw bərci na shiy niy zlashi na. 15 Dza na mbaʼ dzay dzəti hiɗi ka Babilunə lə mazə Yuyakinə, mbaʼ mbəghiy, mbaʼ miʼi ci, mbaʼ ka sləni ci dikə dikə ni, mbaʼ mbəzliy sləkə ka sawji ci. 16 Kwasəbə mbəzli va diɓa na, mbaʼ kavə ka bərci tə hiɗi ka Zhuda, mbəzli diwiy diwiy mbərfəŋmətsəkə, mbaʼ mbəzli nza məcaŋa və shi ta məni shiy ghənghən ghənghən, mbaʼ ka pəsli diwiy məŋ, mbaʼ mbəzliy mbay mbəzə gwanashi ka dzay li shiy dzəti hiɗi ka Babilunə. 17 Liy hum ki na, dzəghwa Nabukudunuzur mazə ka Babilunə mbaʼ tivə Mataniya zəmbəghiy diy Yuyakinə ta məni mazə ghəci tə hiɗi ka Zhuda, mbaʼ fanati tsahuti slən, Sedeshiyas, kə kaa har ci.
Sedeshiyas məni mazə dzəkən ka Zhuda.
(2 NuMezh 36.11-12; Zher 52.1-3)
18 Piya bakəmətsəkə niy nza sa Sedeshiyas ghala vəghu tsaa pəərə məndi ka mazə. piya məŋ lə tan niy mənti na mbə mazə, mbə məlmə Zheruzalem niy nza na lə nziy tsa ci. Hamuwtal niy nza slən tsa mbəghiy, zha Yirmiyahu ndə ka Livəna niy nza na. 19 Kuma gəmgəm na niy məni na kwa kuma Kwa sləkəpə, war njasa niy məni Yuyakim va. 20 Sa niy satiy nəfə tsa Kwa sləkəpə, va tsəgha niy mənishi shiva tsəgha lə mbəzli mbə məlmə Zheruzalem, mbaʼ ka Zhuda gwanashi, paʼ ka katanti mbəzli nzə va kərakə li.
Nabukudunuzur dəzlay məlmə Zheruzalem lə ka sawji ci
( Zher 39.1-7; 52.3-11)
Ya tsəgha nzə ki na, mbaʼ Sedeshiyas kafiy ta zhananci ghən kaa Nabukudunuzur mazə Babilunə, ka pəla zləghu ghən tsa ci səvəri mbə dəvə ci.