Zliya
Esdəras
Kuma pəhəti mazə Shirus ta zhini məndiy nga ghyi tsa Hiyala
1
Ma tə kwa taŋa piya Shirus mazə ka Pərsə mbə sləkə hiɗi mbə dəvə ka Pərsə gwanashiyª, dzəghwa kwa sləkəpə mbaʼ tarəkə məni kumaa niy gəzəkə na va məni nzə lə miy tsa Zheremiy ndə gəzə kuma Hiyalaª. Dza na ki, mbaʼ fanambə mbə nəfə Shirus mazə ka Persə tsa va. Dza Shirus mbaʼ ghunashi mbəzli ta zlapə tə hiɗi ci gwanashi, zhini tsasl məndi tsaslati tə zliya ta vəlanshi. Ma kə məndi kaa kuma va na: 2 «Avanta kuma gəzəkee yən Shirus mazə tsaa sləkə hiɗi ka Persə gwanashi: A Hiyala ta ghumə kwa sləkəpə fambəra hidi mezhizhi gwanashi mbə dəvee, mbaʼ ghunara ta nganta ghyi mbə məlmə Zheruzalem tə hiɗi ka Zhuda. 3 Ya wa ntsa mbə hulfə mbəzli nzə mbə ghuy, ghuy mbəzli tə hiɗi yay, ə kəə kafə ta dzəmbə məlmə Zheruzalem tə hiɗi Zhuda. Mbalam a ghuy dza ta nganati ghyi kaa Kwa Sləkəpə, Hiyala ka Izərayel. Hiyala tsəfəku məndi va kwa kuma nzə mbə məlmə Zheruzalem. Nza Hiyala ghuy kəətiŋuy. 4 Ya dzəghwa tima tərə slən ndə ka Izərayeliy, ə kə mbəzli tə pi tsa vaa tsəhanshi gəna, mbaʼ mbəzə kwa shamshama. Ə kə ghəshiy tsəhanshi nihuti shi wuzə ni, ka kasanshi dəmbeker, ka ɓanshi nihuti shiy ghənghən ghənghən njasa dza ghəshiy tarəkə mbə nefer shi, ta kuma kən ghyi tsa Hiyala va mbə məlmə Zheruzalem,» kə Shirus mazə ka Persə, kə məndi.5 Sa gəzəkə mazə tsəgha ki na, dza mbəzliy sləkə mbəzli kwa miy dəghahi mbə takə tsa Zhuda mbaʼ shi mbə takə tsa Benzhameŋ, lə ka ta Hiyala, mbaʼ mbəzli mbə takə tsa Levi, lə nihuti mbəzliy niy fanambəshi Hiyala vəshi ta nga ghyi tsa va mbə nefer shi gwanashi, kafə ghəshi kafəshi ta dza ta nga ghyi kaa kwa sləkəpə mbə məlmə Zheruzalem. 6 Dza ka ghalahi shi gwanashi mbaʼ ghəshi kəətitishi lə shi vasəti məndi tə mbəzə kwa shamshama, mbaʼ tə tsahi gəna, mbaʼ nihuti shi wuzə ni, mbaʼ dəmbəkə, mbaʼ shi nza dimə ti shi, mbərəkəshi nihuti shi vəlanatishi ghəshi ghənghən ghənghən njasa ɗi ghəshi mbə nefer shi ta nga ghyi tsa Hiyala va. 7 A Nabukudunuzur mazə ka Babilunə niy ɓasəhu shiy niy ghəra məndi sləni li shi kiy ghyi tsa kwa Sləkəpə mbə məlmə Zheruzalem, mbaʼ niy fambəshi mbə ciki ta mbəreketi ci. Dza mazə Shirus mbaʼ ɓasəkəvəri shi va. 8 Mitredat ntsa ka məndiy fə shiy və niy ghunay Shirus mazə ka Pərsə, mbaʼ ntsa va dzaa ɓəkəvəri shi va, mbaʼ mbəranavəshi kaa Sheshəbatsar dikə tsa ka Zhuda. 9 Avanashi njasa niy nza shi va: kwekwer ɓəlaʼi ɓəlaʼi ni mənti məndi tə tsahi mbəzə kwa shamshama mahəkanəmətsəkə, mbaʼ ni mənti məndi tə tsahi gəna bələku məŋ, mbaʼ hwashəɗiɗi bakəmətsəkə məsliɗiti, 10 mbaʼ tseʼuer mənti məndi tə tsahi mbəzə kwa shamshama mahəkanəmətsəkə, mbaʼ ni mənti məndi tə tsahi gəna diwiy diwiy faɗə mbaʼ məŋ ghən kən shi, mbaʼ nihuti shiy ghənghən ghənghən diwiy məŋ. 11 Gwanashi tsa shi mənti məndi tə tsahi mbəzə kwa shamshama lə ni mənti məndi tə tsahi gənay, shiy diwiy diwiy cifəmətsəkə faɗəti niy nza ghəshi. Dzəghwa Sheshəbatsar mbaʼ ɓasəvə shi va gwanashi ghəciy kafə mbə məlmə Babilunə ta dzəmbə məlmə Zheruzalem ghəshi lə nihuti mbəzliy niy kəəsəkə məndi.