7
Ma kə Elize na: «Favə tə ghuy kuma gəzəkə Kwa sləkəpə, ma kiy “Həzlimə kwaghutsa tsətsiy, gəna kwa tsahi kutiŋ dza məndi ta pa kiluw ghupə məŋ lə bakə miy dəghaa dzəmbə məlmə Samari, tsəgha məndi ta pa kiluw urzhə bakəmətsəkə faɗəti diɓa,” kə Kwa sləkəpə,» kə.
2 Dza ntsa ka mazə jihəva ti, ntsaa ɓanci shi bəzə ci ka gəzə kuma. Ma kə kaa Elize na: «Ya əə ghunanti Kwa sləkəpə mergihi mə ghum na, nza kuma gəzəkə gha va mənita na?» kə. Ma kə Elize kaa ngəci na: «Tsəgha na, ta nashi shiva dza gha lə mətsə gha. Nanzə kiy, ka dza ghaa zəməhu shi vaw,» kə.
Ka dərna sənti ka Shiri tiɓaw kə ghəshi
3 A ka dərna niy nza tiɓa faɗə pərikə tə ngula vəgha miy dəghaa dzəmbə məlmə. Ma kə ghəshi kwa jipə shi na: «Tawa nziyimmə ghummə tikə ka ndəghə məti tay? 4 A ghummə dzammə dzəmbə məlmə pə ghummiy, mbə ma nza məndi mbəɓa, ta bəku dza ghummə. Nziyimmə ghummə tikə pə ghummə na, war ta bəku ghummə dza diɓa. Wəzəɓa haghə ghumməə ghən tsa ghummə kaa ka Shiri tə pi tsa ɓasəshi ghəshi va na. “Əə zlaŋuy ghiy ka bəkuŋuy ghiyuw,” kə ghəshi dzaa ni na, nza ghummə nza tə ghuməmə. “Əə bəkuŋuy ghiy,” kə ghəshi dzaa ni na, mbaʼ ghəshi bakwantəmmə, gwaʼa nava kuma tsəgha,» kə ghəshi. 5 Ma viciy dza ta pəku na, mbaʼ ghəshi kafəshi ta dzaa dzəti pi tsa ɓasəshi ka Shiri va. Sa tsəhəshi ghəshi mbaʼ ghəshi dəzlanti pi tsa va paʼ tə pi tsa kəray na na, kala kəsay ma ndə ghəshi ya kutiŋ.
6 Gha shivaa mənishi tsəghay, ə niy faghwa Kwa sləkəpə gaka mutiti gədewesli mbaʼ gaka gədewesli, mbaʼ gaka mbəzli təruŋ dalala kwa slimim ka Shiri. Ma kə ghəshi kwa jipə shi na: «Ya njaaɓay, ə dza mazə ka Izərayel pavə ka sawji va kar mazə ka Hit lə mazə ka Ezhiptə ta mbəzə lə ghummə,» kə ghəshi. 7 Dza ghəshi Hetihwer va ki, kuy ghəshi huhushi nəghətaa məndi dzaa bakwantishi. Cəkeʼ ghəshi zlazlashi ceker gamtaʼwalhi shi, lə gədewesli shi, mbaʼ kwantəmcahi shi tə pi tsaa niy nza ghəshi va.
8 Ma sa dəzlanti ka dərna va pi tsaa niy nza mbəzli va va ti paʼ tə pi tsa kəray na kala nay ma ndə ghəshi na, dza ghəshi irətsə ghəshi dzashi dzəmbə tsahuti ciki gamtaʼwal, zəməʼ ghəshi zəməvə shiy, saʼ kaa shiy. Dzəghwa ghəshi mbaʼ ghəshi pahu kar gəna lə tsahi mbəzə kwa shamshama, mbaʼ kubeŋer mbəɓa, mbaʼ ghəshi dzaa mbəliyshi. Zhikə ghəshi mbaʼ ghəshi zhashi zhimbə tsahuti ciki gamtaʼwal diɓa, meʼ ghəshi pahu shi mbəɓa, mbaʼ ghəshi zhaa mbəliyshi.
Kuma gəzəkə Elize ndə gəzə kuma Hiyala va dzəghwata kwa
9 Ma kə ka dərna va kwa jipə shi ki na: «Kuma lə kwal tsa nzə na kuma məni ghummə naw. Vici ndatsə nay, vici nuwur tsa wəzə tsa na, mbaʼ pə ghummə nziyimmə guŋəmmə ka ndəghə həzlimə mekəshi ta gəzə kuma na kaa mbəzliy, ta kəsammə dza kuma. Dzamməə dzəmbə məlmə a ghummə dzaa gəziy kuma na kaa mbəzli kiy ghyi tsa mazə,» kə ghəshi. 10 Dza ghəshi mbaʼ ghəshi səəkəə harvə mbəzliy ndəghu miy dəghaa dzəmbə məlmə. Ma kə ghəshi kaa ngəshi na: «Tə pi tsa nza ka sawji ka Shiri va səəkə ghiy. Kəsay ndə ghiy tiɓa ya kutiŋuw, ya gaka məli ndiy, ghənzə tiɓaw. War kwataka gədewesli, mbaʼ kwantəmcahi pəhə pəhə, mbaʼ ceker gamtaʼwalhi zlashi məndi na shi dzar tə pi tsa va,» kə ghəshi. 11 Dzəghwa mbəzliy ndəghu miy dəghaa dzəmbə məlmə va, daʼa ghəshi haray ndə, mbaʼ ghəshi ghunay ta dza ghəciy gəziy kuma va kaa mbəzli kiy ghyi tsa mazə.
12 Sa favə mazə kuma va na, kafə kafiy mbə yam virɗi, ma kə kaa mbəzli ta səɗa ci na: «Ee gəzaŋuy kuma pəhəti ka Shiri tə ghummə na: A ghəshi sənay gwaʼa nza ghummə va ma, kə ghəshi, va tsəgha səvərishi ghəshiy mbəmbəshi mbə gamba. Mbə zəzə kuma shiy: “Sa ka ka Izərayel səvərishi mbə məlmə Samariy, nza ghummə kasantishi, ma nza ghummə dzəmbə məlmə shi va,” nə ghəshi kaa kuma zəzəti ghəshi,» kə. 13 Ma kə tsahuti ndə kutiŋ mbə mbəzliy sləkə ka sawji va na: «Ghənzə tsəghay, tivə gədewesli ghummə cifə mbə niy tərəmbə ni gədewesli tikə mbə məlmə, mbaʼ ghummə ghunashi mbəzli li shi. nza ghummə nighə kumaa dzaa məniva. Ya a kumaa dzaa məniva li shiy nahuti tiɓa darətəmmuw. Kumaa dza vaa kəsashiy, tsəgha dza na ta kəsashi nihuti ka Izərayel gwanashi ni va tərə mbə məlmə, ka ndəghə kərkəva tsa kuma shi,» kə. 14 Dza məndi ki mbaʼ məndi ɓəvə mutiti gədewesli bakə mbaʼ gədewesli. Dzəghwa mazə mbaʼ ghunashi ta nuw səəbə ka sawji ka Shiri nza ghəshi nighəti shiy mənishi. 15 Dza mbəzli va ka nuw səəbə ka sawji ka Shiri paʼ miy həl Zhurdeŋ. Ghəshi mbə kwal na, mbaʼ ghəshi nashi kubeŋer ɗaŋ lə nihuti shiy ghənghən ghənghən ɗaŋ sa shakantishi ka sawji va ghəshi mbə hu lə bali. Sa zhəghəkəvashi mbəzli va na, mbaʼ ghəshi gəziy shi nashi ghəshi kaa mazə.
16 Dza mbəzli mbə məlmə ki mbaʼ ghəshi səvəriy panti shiy tə pi tsaa niy nza ka sawji ka Shiri va. Dzəghwa məndi ka ɗəl kiluw ghupə məŋ lə bakə tə gəna kwa tsahi kutiŋ, tsəgha məndi ɗəl kiluw urzhə bakəmətsəkə faɗəti diɓa, njasa niy gəzəkə Kwa sləkəpə va. 17 Ntsaa ɓə shi mbəzə ci, ntsa ka na vaa jihəva ti niy fiy mazə ta ndəghu miy dəghaa dzəmbə məlmə. Sa tsətsəkuva məndi na, mbaʼ məndi tsəkwati tə piy dzəməshi ti, mbaʼ mətiy, njasa niy gəzəkə Elize ndə gəzə kuma Hiyala va, ghala pi tsaa niy səəkə mazə va ta pəəsli ci.
18 Kuma vay, a Elize niy gəzanakə kaa mazə: «Həzlimə kwaghutsa tsətsiy, gəna kwa tsahi kutiŋ dza məndi ta pa kiluw ghupə məŋ lə bakə, tsəgha kiluw urzhə bakə mətsəkə faɗəti miy dəghaa dzəmbə məlmə Samari,» kə niy ni. 19 Ma kə ntsaa ɓə shi mbəzə mazə va niy ni na: «Ya əə ghunanti Kwa sləkəpə mergihi mə ghumə na, nza kuma gəzəkə gha va mənita na?» kə niy ni. Ma kə Elize niy ni kaa ngəci na: «Tsəgha na, ta nashi shiva dza gha lə mətsə gha. Nanzə kiy, ka dza ghaa zəməhu shi vaw,» kə niy ni kaa ngəci. 20 War tsəgha kuma va niy mənita. Mbaʼ mbəzli dzəməshi tə ntsaa ɓə shi mbəzə mazə va miy dəghaa dzəmbə məlmə mbaʼ mətiy.