2 Mazə 8

Mazə ka Izərayel slanati nguvə uzə kaa mali ka Shunem

A Elize niy gəzanta kaa maliy niy zhanambə na va piy mbə zəghu nzə: «Kafə, a gha təɗanti ghyi tsa gha tikə, ghuy lə mbəzli kiy ghyi tsa gha. Mbalam nziyŋuyim tə tsahuti pi tsa dza ghuy nza gar nziŋuy. Sa nza nay, ta ɓə ma dza Kwa sləkəpə dzəti hiɗi ka Izərayel. Ta piya mbərfəŋ dza na ta səəkə dzəti hiɗi va,» kə niy ni kaa ngəta. 2 Dzəghwa mbaʼ mali va niy mənti njasa niy gəzanakə ndə gəzə kuma Hiyala va. Mbaʼ niy təɗəhu ghyi tsa nzə lə mbəzli kiy ghyi tsa nzə. Mbaʼ dzaa nziyta ka kwa səəkə səəkə piya mbərfəŋ tə hiɗi ka Filisteŋ. 3 Liy hum piya mbərfəŋ na va ki na, mbaʼ ghəshi zhəghəkəvashi tə hiɗi ka Filisteŋ. Dza na mbaʼ tsəhəta va mazə ta ɗuw kar ghyi tsa nzə lə za nzə.

4 Geʼi lə vəghu tsa vay, mbə sla kuma niy nza mazə ghəshi lə Gehazi ntsa ta səɗa Elize ndə gəzə kuma Hiyala. Ma kə mazə niy ni kaa ngəci na: «Ɓəlakəra shi maɗaŋa maɗaŋa ni mənəhu Elize gwanashi,» kə. 5 Ma Gehazi mbə slanci njasa niy zhanambə Elize piy mbə ntsaa niy mətiy na, mbaʼ maliy niy zhanambə Elize va piy mbə zəghu nzə səəkəta ta ɗuw kar ghyi tsa nzə lə vəhə tsa nzə va mazə. Ma kə Gehazi na: «A mazə tsaa sləkəra, avanta mali va, avanay zəghu zhanakati na va mbə məti,» kə. 6 Dza mazə ka ɗuw kuma va va mali va, mbaʼ slanakə kumaa mənita gwanata. Ma kə mazə kaa tsahuti ntsa ta səɗa ci ki na: «Mbala nighəə dzəkən kuma mali na, nza məndi zhananavə shi nzə gwanashi, mbaʼ məndi wanati shi mənivə məndi tə za nzə kafə na tə vici dzata na va paʼa va vici ndatsə,» kə.

Hazayel kumay lə Elize ndə gəzə kuma Hiyala

7 Geʼi lə tsahuti vəghu na, mbaʼ Elize niy dzay dzəmbə məlmə Damasə. Ghala vəghu tsa vay mbaʼ Ben-Hadadə mazə ka Shiri təriy gurapiy. Ma kə məndi kaa ngəci na: «Tiɓa na ndə gəzə kuma Hiyala,» kə məndi kaa ngəci. 8 Ma kə mazə kaa Hazayel ki na: «Mbala ɓəvə shiy a gha dzaa ɓanavəshi kaa Elize ndə gəzə kuma Hiyala, nza gha gəzanci ghəci ɗutəra va Kwa sləkəpə nda ta mbəlira dzee va zəlghu tsa,» kə.

9 Dza Hazayel mbaʼ ɓəvə shiy gura wuzə mbə məlmə Damasə tə hum ngalubahi faɗəmətsəkə, ta ɓancishi kaa Elize. Ma kə kaa ngəci sa tsəhiy na kwa kuma ci na: «Ben-Hadadə mazə ka Shiri, ntsaa ɓətəŋa nja diy ghunara na va gha: “Ta mbəlira dzee va zəlghu tsaa kəvəra tsa na?” kə» kə. 10 Ma kə Elize kaa ngəci na: «Mbala gəzanci: “Ta mbəliŋa dza gha, kə”, pə gha kaa ngəci”. Ya tsəgha dza na mbəliy va zəlghu tsa vay, a Kwa sləkəpə citəra, ta mətiy dza na, kə,» kə.

11 Ghavə Elize tsəgha ki, mbaʼ fati mətsə ci tə Hazayel war ə ghəciy nighə kwa ha mətsə ci, paʼ ka ghəranci Haʼu kaa Hazayel. Dza ndə gəzə kuma Hiyala tsa va ka wahə ki. 12 Ma kə Hazayel kaa ngəci na: «Tawa wahə gha kiya ndə sləkəra?» kə. Ma kə Elize kaa ngəci na: «Sa sənayee ngəraʼu tsa dza gha ta sanshi kaa ka Izərayel, va tsəgha wahee. Ta ndanti məlməhi ghiy dikə dikə ni dza gha. Ta bakwanti ka sawjihi ghiy dza gha lə kafaʼi mbə mbəzə. Ta zləzləranti ghən dza gha tə ndərazhi ghiy juw juw ni. Ta ʼya ʼyambə hwa dza gha dzar mbə hur miʼi lə hur,» kə. 13 Ma kə Hazayel kaa ngəci na: «A ndə nzee yən ndə sləni tsa gha gar mənti gəla ni gəzə gha ni shiyaa?» Kə. Ma kə Elize kaa ngəci na: «A Kwa sləkəpə citəra, gha dza na ta məni mazə dzəkən hiɗi ka Shiri kə,» kə.

14 Dzəghwa Hazayel mbaʼ kafiy vəgha Elize, mbaʼ dzaa kəsay mazə ka Shiri, ntsa ci dikə tsa. Ma kə mazə kaa ngəci na: «Njaa nə ndə gəzə kuma Hiyala tsa kaa ngəŋaa?» kə. «Ta mbəliŋa dza gha kə,» kə Hazayel. 15 Ma tə həzlimə na, laŋ Hazayel ɓəvə kumtə, mbaʼ yəkwambə mbə yam. Səəkə na mbaʼ fambə mbə kuma mazə, mbaʼ ɓərtanti. Mbaʼ mbərəhu məni mazə kwa pi tsa ci.

Zhuram məni mazə dzəkən ka Zhuwda

( 2 NəMezh 21.2-20)

16 Ma Yuram zəghu Akab mbə məni kwa cafa piya ci mbə mazə dzəkən ka Izərayel na, mbaʼ məndi pərəti Zhuram, zəghu Zhuzafat ka mazə ka Zhuda. 17 Piya mahəkanəmətsəkə bakəti niy nza sa ci ghala pəərə məndi va. Dzəghwa na mbaʼ mənti piya dəghəsə mbə məni mazə. Mbə məlmə Zheruzalem niy nza na lə nziy tsa ci. 18 Zha Akab niy nza mali ci. Njasa niy məni mezhizhi ka Izərayel va kuma gəmgəm nay, tsəgha niy məni Zhuram tsa va, njasa niy məni mbəzli kwa miy dəgha Akab va diɓa. Kuma gəmgəm na niy məni na kwa kuma Kwa sləkəpə. 19 Ya tsəgha nzə kiy, niy ɗi zanti ka Zhuda Kwa sləkəpə tə mbərkə Davitə ndə sləni tsa nzuw. Sa nza nay, aa niy gəzanakə: «Ya humɓay, mbəzli kwa miy dəgha gha dza naa məni mazə,» kə niy ni kaa ngəci.

20 Ghala vəghu tsaa niy nza Zhuram mbə maziy, a ka Edum niy pəla zləghu ghən tsa shi mbə dəvə ka Zhuda, mbaʼ ghəshi pərəvə tsa shi mazə. 21 Sa dza Zhuram lə ka sawji ci na, mbaʼ kafiy lə mutiti gədewesli ka naa dza ta mbəzə li shi gwanashiy dzəmbə məlmə Sayir ta mbəzə la ka Edum. Dza ka Edum mbaʼ ghəshi makayshi. Mbaʼ kafiy mbə yam virɗi ghəshi lə mbəzliy sləkə mutiti gədewesli ka ghəshiy dza ta mbəzə li shi, mbaʼ ushantishi. Ma ni gwanashi ni ka Sawji na, mbaʼ ghəshi huhushiy jighi. 22 Ghava na tə vəghu tsa va paʼa ndatsiy, mbə zhananshi ghən na ka Edum kaa ka Zhuda. Geʼi lə vəghu tsa va na, dza mbəzli mbə məlmə Livəna ka pəla zləghu ghən tsa shi mbə dəvə ka Zhuda kuraku.

23 Nahuti kumaa tərmbəə dzəkən mazə Zhuramiy, kwa zliya: “Kuma mənəhu mezhizhi ka Zhuda,” tsaslaghwa məndi. 24 Sa mətiy nay, mbaʼ məndi dzaa lanti kwa kuli jijihiy, mbə məlmə mazə Davitə. Dza zəghu ci Akaziyas mbaʼ mbərəhu məni mazə kwa pi tsa ci.

Akaziyas məni mazə dzəkən ka Zhuda

( 2 NəMezh 22.1-6)

25 Ma Yuram zəghu Akab mbə məni kwa məŋ lə baka piya ci mbə mazə dzəkən ka Izərayel na, mbaʼ məndi pəərəti Akaziyas zəghu Zhuram ka mazə tsaa sləkə ka Zhuda. 26 Piya bakəmətsəkə bakəti niy nza sa Akaziyas ghala vəghu tsa pəərə məndi ka mazə. Piya kutiŋ niy mənti na mbə mazə, mbə məlmə Zheruzalem niy nza na lə nziy tsa ci. Atali zha Uməri mazə ka Izərayel niy nza mbəghiy. 27 Njasa niy məni mbəzli kwa miy dəgha Akab va kuma gəmgəm nay, tsəgha niy məni Akaziyas tsa va. Kuma gəmgəm na niy məni na kwa kuma Kwa sləkəpə nja ghəshi. Meshishi ci niy nza mbəzli kwa miy dəgha Akab tala.

28 A kar Akaziyas niy jakəshi ghəshi lə Yuram zəghu Akab ta dza ta mbəzə lə Hazayel mazə ka Shiri mbə məlmə Ramut tə hiɗi Galaad. Ghəshi mbə mbəzə tsa va na, mbaʼ ka Shiri niy manati zhi tə mazə Yuram 29 Dzəghwa Mazə Yuram mbaʼ niy zhəghəghəvay dzəmbə məlmə Zhizərel ta zəlghu ghən tsa ci va zheheriy niy mananati ka Shiri va mbə mbəzə. Mbaʼ Akaziyas mazə ka Zhuda niy tsəhiy ta səku ci mbə məlmə va, va zheher ci.