2 Mazə 9

Zhehu məni mazə dzəkən ka Izərayel

Dzəghwa Elize ndə gəzə kuma Hiyala tə nahuti vici, daʼa haray tsahuti məgəla mbə ka gəzə kuma Hiyalaa nuva kwa zərə kutiŋ na. Ma kə kaa ngəci na: «Mbala pəhantəvaŋa, nza gha ɓəvə hupər tsa nza in tsa kwa, a gha dzaa dzəmbə məlmə Ramutə tə hiɗi ka Galad. 2 Sa ka gha tsəhəŋay, nza gha dzaa kəsay Zhehu zəghu Zhuzafat, jijiy Nimshi. Ka gha dzay, mbaʼ gha harəvə kutiy səvəri mbə jipə ka sawji nza na va mbə shi, nza ghuy dzaŋuy li bakəŋuy dzəmbə ciki tsa mbəmbə tsa. 3 Ka gha dzay, mbaʼ gha ɓəvə hupər in tsa, nza gha shəkambə dzəghwa mbə ghən ci. Ma pə gha dzaa niy: “Avanata kuma gəzəkə Kwa sləkəpə: Lə in tsaa dzəghwa tsa mbə ghən ghay, ee pəərətəŋa ka mazə ka Izərayel, kə Kwa sləkəpə,” pə gha dzaa ni. Sa ka gha mənti tsəghay, nza gha ghunanti ciki tiɓata ka huŋa,» kə Elize kaa ngəci.

4 Dzəghwa məgəla ndə gəzə kuma Hiyala tsa va, ka dzay dzəmbə məlmə Ramutə tə hiɗi ka Galad ki. 5 Tsəhə na na, mbəzliy sləkə ka sawji ka Izərayel ɓasə ɓasə. Ma kə na: «Ta gəzəŋa kuma səəkee mazə,» kə. Ma kə Zhehu kaa ngəci na: «Kaa tsama ndə mbə ghiy ɗi gha gəzanci kumaa?» kə. «Kaa ngəŋa mazə,» kə ndə gəzə kuma Hiyala tsa va.

6 Dza Zhehu kafə kafiy, mbaʼ dzay dzəmbə ciki ghəshi li. Dzəghwa ndə gəzə kuma Hiyala tsa va mbaʼ shəkanambə in dzəghwa mbə ghən ci, ma kə kaa ngəci na: «Avanata kuma gəzəkə Kwa sləkəpə Hiyala ka Izərayel: “Lə in tsaa dzəghwa tsa mbə ghən ghay, ee pərətəŋa ka mazə ka Izərayel, mbəzli Kwa sləkəpə. 7 Gha dza na ta bəku mbəzli kwa miy dəgha Akab ntsa gha dikə tsa, ta mbee wati bəku tsa bakwanti Zhezabel va ka slənee ka gəzə kuma Hiyala, lə nihuti ka slənee gwanashi. 8 Dzaʼ dza miy dəgha Akabəə nza. Slən zal tsaa səvəri kwa miy dəgha ci, lə mbə mevivi ci gwaʼay, ta zantishi dzee tə hiɗi ka Izərayel. 9 Njasa məntee va lə mbəzli kwa miy dəgha Zherubuwam zəghu Nevat, mbaʼ mbəzli kwa miy dəgha Basha zəghu Ahiyay, tsəgha dzee ta mənti lə mbəzli kwa miy dəgha Akab. 10 Ta na Zhezabeliy, ka dza məndiy lahuw, Kireketi dza na ta pərə mbəri tsa nzə mbə za Izərel,” kə Kwa sləkəpə,» kə ndə gəzə kuma Hiyala tsa va. War sa gəzanti na kuma va ki na, ɓəŋəʼi ghunanti ciki ka huy dzay.

11 Liy hum ki na, mbaʼ Zhehu səvəriy kəsashi nihuti mbəzliy sləkə ka sawji mazə. Ma kə ghəshi kaa ngəci na: «Aa nza kuma tiɓa na? A shi ɗi ndə gazlaka tsa va lə gha shiki?» kə ghəshi. Ma kə kaa ngəshi na: «Shiyəw, ya ghuyiy a ghuy sənashi gəla ka gəzə kuma Hiyala va, lə shi ka ghəshiy pəpəʼu kuraku ɓay mbəzli ni,» kə. 12 Ma kə ghəshi kaa ngəci na: «Dzərvəə sla gha, ə pə gha gəzaŋiy shiy mənishi,» kə ghəshi. Ma kə ki na: «Aa gəzəkəra kuma ghənghən ghənghən, Ma kə kaa ngəra diɓa na: “Avanta kuma gəzəkə Kwa sləkəpə: Lə in tsaa dzəghwa tsa mbə ghən ghay, ee pərətəŋa ka mazə ka Izərayel, kə Kwa sləkəpə,” kə kaa ngəra,» kə. 13 War sa favə mbəzliy sləkə ka sawji va kuma va ki na, dza ghəshi ya wa ndə ka diva ta pəli kubeŋer shi dzar tə pi tsa dza na ta dza, ta dzəmə ciki. Dza ghəshi ka viy Təlimə, ka gəzə zlaŋzlaŋ: «Mazə na Zhehu, mazə na Zhehu,» kə ghəshi.

Zhehu pəhəti pəəsli Yuram mazə ka Izərayel

14 Dzəghwa Zhehu zəghu Zhuzafat, jijiy Nimshi mbaʼ pəhəti dza ta pəəsli Yuram mazə ka Izərayel ki. Ghala vəghu tsa vay, mbə ndəghu məlmə Ramut tə hiɗi ka Galad niy nza Yuram ghəshi lə ka sawji ka Izərayel gwanashi va Hazayel mazə ka Shiri. 15 Ma mazə Yuram lə ka sawji ci mbə mbəzə lə Hazayel mazə ka Shiri ghəshi lə ni ci ka sawji ki na, mbaʼ məndi mananti, mbaʼ niy dzay dzəmbə məlmə Izərel ta zəlghu ghən tsa ci. Dzəghwa Zhehu ka pəhə dza ta pəsli ci ki, ma kə kaa nihuti mbəzliy sləkə ka sawji kwasəbə va na: «Mbaʼ pə ghuy mbəzli kwasəbə yay, nəghətaa ndə ya kutiŋ mbə ghuy kafə mbə məlmə na ta dzaa dzəmbə məlmə Izərel ta gəzə kumaa mənita na ma,» kə. 16 Liy hum ki na, mbaʼ dzay dzəmə muwta gəduw ci, ka dzay dzəmbə məlmə Izərel. Mbə məlmə va niy nza mazə Yuram gurapiy məhəni tə pi həni tsa ci, mbaʼ Ahaziyas mazə ka Zhuda niy tsəhiy vəgha ta nighə.

17 Kar məndiy ngati pi biti ta nziy ndə məɓa, ta nighə shiy dzaa səəkəə dzəmbə məlmə ghəshi kərakəshi. Sa nə ntsa fiy məndi mə gəla pi tsa tsa va mbə məlmə Izərel nighə, kə na, mbaʼ nashi kar Zhehu mbə səəkə lə mbəzli kwasəbə. Dza na mbaʼ ghunay ndə «Ava mbəzli ɗaŋ mbə səəkə, kə ndə ndəghu məlmə, pə gha kaa mazə,» kə kaa ngəci. Ma kə mazə Yuram kaa ntsa ghunay məndi va na: «Ghunay ndə lə gəduw a ghəci dzaa ɗuwti və shi, nda ta wuzə səəkə ghəshi, kə mazə, pə gha kaa ngəci,» kə kaa ntsa va. 18 Mbaʼ ghunay ndə lə gəduw ki. Mbaʼ dzaa kumay lə mbəzli va, ma kə kaa ngəshi na: «Ta wəzə səəkə ghuy na, kə mazə,» kə kaa ngəshi. «Na gha mbə ya ta wa səəkə ghiy na ghaw. Zhəghəva nura gha kəə ɗi kuma,» kə Zhehu kaa ngəci. Sa nay ndə ndəghu məlmə tsa va kala zhəghəva ma ntsa va na, mbaʼ ghunay ndə va mazə ta gəzə: A ntsa ghunayee va tsəhiy vəgha shi kala zhəghəva ma ghəciy zhikə, kə. 19 Sa favə mazə Yuram tsəgha na, mbaʼ ghunay kwa baka ndə lə gəduw, mbaʼ dzaa kumay li shi, ma kə kaa ngəshi na: «Ta wəzə səəkə ghuy na? kə mazə,» kə kaa ngəshi. «Na gha mbə ya ta wa səəkə ghiy na ghaw. Zhəghəva nura gha kəə ɗi kuma,» kə Zhehu kaa ngəci. 20 Sa nighəti ndə ndəghu məlmə tsa va tsəgha diɓa na, mbaʼ zhiniy ghunay ndə ta gəzə kaa mazə: A kwa baka ntsa va tsəhiy vəgha shi kala zhəghəva ma ghəciy zhikə. Yən nighə ntsa nza mbəzli va tə səəbə ciy, nja Zhehu jijiy Nimshi na tə zlərə muwta gəduw ci. Sa nza nay, nja ndə gazlaka ka naa zlərə shiy, kə. 21 Sa favə mazə Yuram tsəgha ki, ma kə na: «Pəhəram shiy dzəti muwta Gəduwee,» kə. Dza məndi mbaʼ məndi pəhati shiy tə muwta gəduw ci. Dza kar Yuram mazə ka Izərayel ghəshi lə Akaziyas mazə ka Zhuda, mbaʼ ghəshi səvərishi ta dza ta kumə lə Zhehu, ya wa ndə na, mə na ci muwta gəduw, mbaʼ ghəshi dzaa kuməshi li vəgha za Nabut ndə ka Izərel va.

Zhehu pəəsliti Yuram, mazə ka Izərayel

22 Ma kə mazə Yuram kaa Zhehu war sa nay na na: «Ta wəzə səəkə gha na Zhehu?» kə. «Kuma dza wəzəə səəkə kama na war ghulata məŋa Zhezabel mbə tsəfəku kwa kuma hiyalahiy kama vaa Hiyala kataŋ na, ka ghəra sləni nzə va ghənghən ghənghən lə hiyeleraa?» Kə. 23 Sa favə Yuram tsəgha na, papaʼi zhəghətəvay ka huy, kala gəzanci kuma kaa mazə Akaziyas zlaŋzlaŋ: «Kuma pəhə pəhə na na sava, hum ghum Akaziyas» kə. 24 A Zhehu niy fambə rigi tsa ci mbə dəvə ki, dza na huaa tsəhəkəmə havə, mbaʼ hataa dzəti Yuram. Səəkə havə slaʼi məta kwa hum ci, ka dzəvəri mbə nəfə tsa ci, fərəku tsahuta kwa hati ci. Girip təriy dzəghwa muwta gəduw ci, mbaʼ mətiy. 25 Ma kə Zhehu kaa Bidkar, ntsaa ɓə shi mbəzə ci na: «Mbala ɓəvə mbəri tsa ci a gha ndəghambə mbə za Nabut ndə ka Izərel va. Zay ghən tsa gha ta kumaa niy gəzəkə Kwa sləkəpə vaa dzəkən mazə Akab diy tsa va na. Fəca vay, kwa muwta gəduw kutiŋ na niy nza ghum lə gha kwasəbə diy tsa va. Ma kə Kwa sləkəpə niy niy: 26 “Mbəray, ee nashi njasa bəku məndi kar Nabut lə ndərazhi ci. Gha ghunashi na mbəzli ta mbə məndiy bakwantishi gha Akab. Va tsəgha kiy, yən gəzə na yən Kwa sləkəpə: Ta wati kuma mananatishi gha va dzee tə gha mbə za na,” kə Kwa sləkəpə niy ni. Va tsəgha kiy, mbala ɓəvə Yuram tsaa mətiy va a gha ndəghambə mbə za va njasa niy gəzəkə Kwa sləkəpə va,» kə Zhehu.

Ka sawji Zhehu paslanti Ezekiyas mazə ka Zhuda

(2 NəMezh 22.6-9)

27 Sa nashi Ezekiyas mazə ka Zhuda shi məntim va kaa mazə Yuram ki na, dza na ka huy kwa kwal tsaa dzəmbə məlmə Bet-Gan. Dza Zhehu ka nuw, «Pəəslim ya ghəci», kə kaa ka sawji kwasəbə va, mbaʼ ghəshi mananati zhi ghəci mbə dzəmə vəgha bahua Gur lə muwta gəduw ci, ndəku lə məlmə Yivəlyam. Ya tsəgha nzə ki na, mbaʼ Akaziyas mbəlavə huy dzəmbə məlmə Megidu, mbaʼ mətiy mbəɓa. 28 Dza mbəzliy ghəranci sləni, mbaʼ ghəshi ɓəghə mbəri tsa ciy dzəmbə məlmə Zheruzalem, mbaʼ məndi lanti kwa kuli jijihiy mbə məlmə mazə Davitə. 29 Yuram zəghu Akab mbə kwa məŋ lə tan piya ci mbə mazə dzəkən ka Izərayel niy pəərəti məndi Akaziyas ka mazə tsaa sləkə ka Zhuda.

Məndi pəəsliti Zhezabel

30 Ma Zhehu dza ta dzəmbə məlmə Izərel ki na, mbaʼ məndi gəzanta kaa Zhezabel. Dza na mbaʼ huay pi tsa dzar ta mətsəhi nzə lə shi ghaslə, mbaʼ ghaslanti pi tsa mbə ghən nzə, ka kəɗaŋə pi səvəri kwa mergi. 31 War Zhehu mbə taŋə miy dəghaa dzəmbə məlmə va ki na, dza mali va ka zlapanci kuma. Ma kə na: «Ta wuzə səəkə gha na tsahuti Zimri tsaa paslanti dikə tsa ci tsa?» kə. 32 Dza Zhehu mbaʼ kafata kuma ci ka nighə pi tsaa dzəmə mərgi tsa va. Ma kə na: «A ntsa məɓa mbə ciki tsa va dza kwa bəla yaa? A ndə mbə ghuya,» kə. Dza mbəzli nda bakə, nda mahəkanə məɓa, mbə mbəzliy ghəra sləni kiy ghyi tsa mazə ka kəɗaŋə səvəri kwa mergi tsa va. 33 «Ndəghakəghwam dzəti hiɗi,» kə kaa ngəshi. Dza mbəzli va baŋ ghəshi kəsəvə, fiyikə ghəshi ndəghakəghwa. Sa mə na tə hiɗi na, mbaʼ miymiy nzə pəriŋəshi dzəvəgha kələm lə dzəti gədewesli. Dza Zhehu mbaʼ kəəɗivəri. 34 Liy hum ki na, mbaʼ Zhehu dzay dzakə ghyi mazə, dzakə na ka zəmə shiy, ka sa shiy. Ma kə kaa mbəzli kwasəbə va ki na: «Mbalam məntim kuma kən mbəri tsa mali bazla bazla na va a ghuy lanti, sa nza nay, zha mazə na,» kə. 35 Dza mbəzli va mbaʼ ghəshi səvərishi ta dza ta la nzə, tsəhə ghəshi na, kwataka ghən tsa nzə, lə shiɗəshiɗə nzə, mbaʼ pi tsa mbə hur dəvə nzə shi kəsashi ghəshi gwaʼa tsəgha. 36 Dza ghəshi tərəɗ ghəshi zhəghətəvashi, mbaʼ ghəshi səəkəə gəzanci kuma va kaa Zhehu. Ma kə Zhehu na: «Kumaa niy gəzəkə Kwa sləkəpə vaa dzəkən mali va kwa miy tsa Eli ndə ka Tishəbe, ndə gəzə kuma Hiyala na sava mənita na: “Kireketi dza na ta pərə mbəri tsa Zhezabel mbə vəhə tsa mbə məlmə Izərel va. 37 Naa dzaa təra bəla tə mbəri tsa nziy, dzar tə vəhə tsa va dza naa nza ndani ndani nja məlɓə, kala gar dza məndiy mbay gəzə :Zhezabel na sana, kə məndi kə Kwa sləkəpə,” kə Eli niy ni,» kə Zhehu.