2 Mazə 10

Zhehu zanti mbəzli kwa miy dəgha Akab

Mbərfəŋmətsəkə niy nza ndərazhi kwa miy dəgha Akab mbə məlmə Samari. Dzəghwa Zhehu mbaʼ tsasləghə zliyahi dzəmbə məlmə Samari kaa mbəzliy sləkə ka sawji mbə məlmə Izərel, mbaʼ kaa nihuti mbəzli dikə dikə ni mbəɓa, mbaʼ kaa mbəzliy ɓananshi kuma kaa ndərazhi kwa miy dəgha Akab. Ma kə kwa zliyahi va na: 2 «Ghuy na lə ndərazhi mazə, dikə tsa ghuy. A mutiti gədewesli, lə gədewesli, mbaʼ shi mbəzə va ghuy, zhini mbə məlmə kwa kələm ghuy. Ghənzə tsəgha ki, sa ka zliya na tsəhəta mbə dəvə ghuyiy, 3 Nza ghuy nighəvə ntsa nay ghuy guranti ta məni mazə, ntsaa nu kuma lə kwal tsa nzə mbə mbəzli kwa miy dəgha dikə tsa ghuy va, mbaʼ ghuy pəərəti ka mazə, nza ghuy mbəzə ti, nəghətaa məndi zləghuhu mazə tsa ci,» kə.

4 Sa jangəti mbəzli va zliya va na, mbaʼ hazləni kəəsəvəshi təruŋ. Ma kə ghəshi kwa jipə shi na: «Daw bərci mezhizhi bakə və na, ghummə na shiy dzaa mbay na ghummə na?» kə ghəshi. 5 Dzəghwa kar ntsa dikə tsa kiy ghyi tsa mazə, ghəshi lə kar ntsaa sləkə ka sawji mbə məlmə, mbaʼ mbəzli dikə dikə ni, mbaʼ mbəzliy ɓananshi kuma kaa mbəzli kwa miy dəgha Akab, mbaʼ ghəshi ghunay ndə va Zhehu: «Ka sləni gha nza ghiy. Slən shi gəzaŋiy gha mənishiy, ta mənishi dza ghiy. Ta na maziy, ka ti mazə ghiyuw. Kumaa təɓətəŋa pə ghaa məni, kə mbəzli va, pə gha kaa Zhehu» kə ghəshi kaa ntsa va.

6 Sa favə Zhehu tsəgha na, mbaʼ zhiniy tsasliti kwa baka zliya, mbaʼ vəlanavəshi. Ma kə kaa ngəshi kwa zliya va na: «Mbəzli kwasəbee pə ghuy ka ɗi fəti ta kuma yay, mbalam kəəsəvəm zhəriy səvəri kwa miy dəgha ntsa ghuy va dikə tsa gwanashi, mbaʼ ghuy slaslahu ghəneɗemer ti shi, nza ghuy səəkə kəsara lə ghəneɗemer va mbə məlmə Izərel həzlimə kwaghutsa tsətsə,» kə. Mbərfəŋəmətsəkə niy nza ndərazhiy zhər kwa miy dəgha mazə. Ndərazhi vay, dzar kiy ghiyeghiyer mbəzli dikə dikə ni va mbə məlmə Samari ɓananshi kuma niy nza ghəshi lə nziy tsa shi. 7 War sa ɓanavəshi məndi zliya va, mbaʼ ghəshi jangəti na, mbaʼ ghəshi dzaa kəəsəvə ndərazhiy zhər kwa miy dəgha mazə va, mbaʼ ghəshi slaslahu ghəneɗemer ti shi, mbaʼ ghəshi fafaghwashi kwa ghwanihi. Vəliʼ ghəshi vəlanaghəshi kaa Zhehu dzəmbə məlmə Izərel. 8 Mbaʼ ndə, sa ghunay məndi dzaa gəzanci: «A məndi ɓəkə ghəneɗemer ndərazhiy zhər kwa miy dəgha mazə va,» kə kaa Zhehu. «Mbalam ɓasiyshim ləngum bakə miy dəghaa dzəmbə məlmə, paʼa va həzlimə mekəshi,» kə Zhehu.

9 Ma tə həzlimə mekəshi na, mbaʼ Zhehu səvəriy, garə gariy kwa kuma mbəzli gwanashi. Ma kə kaa ngəshi na: «Na na ghuyiy, kuma ghuy mbə kuma naw. Yən pəhəti na pəəsli Yuram ntsee dikə tsa, mbaʼee paslanti. Ya nini mbəzli gwanashi kiy, a ntsaa bakwantishi kiya? 10 Va tsəgha ɗee ghuy sənay: Kwa sləkəpə məni na shiy niy gəzəkə na gwanashiy dzəkən mbəzli kwa miy dəgha Akab, səvəri kwa miy Eli, ndə sləni tsa nzə, pə ghuy. Nahuti kuma tiɓa ya kutiŋ mbaʼ dzaa tərə kala dzaa mənita mbə kumaa niy gəzəkə na vaa dzəkən shiw,» kə. 11 Dzəghwa Zhehu cəkeʼ bakwanti mbəzliy niy tərə tə ghuməshi mbə mbəzli kwa miy dəgha Akab mbə məlmə Izərel. Cəkeʼ bakwanti mbəzliy niy məni dikə kwasəbə, lə manhiy, mbaʼ ka ta Hiyalahi ci. Niy tərmbiy ndə na mbə shi ya kutiŋuw.

Zhehu bakwanti manhiy mazə Akaziyas

( 2 NəMezh 22.8)

12 Liy hum ki na, mbaʼ Zhehu kafiy ta dzəmbə məlmə Samari. Ma ghəci mbə kwal, sa tsəhiy na tə pi tsa har məndi vaa Bet-Eked bəghə ka makə shiy na, 13 mbaʼ kumay lə manhiy Akaziyas mazə ka Zhuda. Ma kə kaa ngəshi na: «A mbəzli nza ghuyaa?» kə kaa ngəshi. «Manhiy mazə Akaziyas nza ghiy. Ta səku ndərazhi mazə lə ndərazhi Zhezabel mbəghiy mazə dza ghiy,» kə ghəshi. 14 «Kəəsəshim,» kə Zhehu. Dza mbəzli kwasəbə mbaʼ ghəshi kasantishi, mbaʼ ghəshi bakwaghwashi kwa yam tə pi tsa har məndi vaa Bet-Eked. Faɗəmətsəkə bakəti niy nza mbəzli va. Niy tərə ndə mbə shi ya kutiŋuw

Kar Zhehu kumay ghəshi lə Yunadab

15 Dza Zhehu mbaʼ kafiy tiɓa ka dzay. Ghəci mbə kwal na, mbaʼ kumay ghəshi lə Yunadab zəghu Rekab. Səəkə dza kwa kuma ci niy səəkə na. Dza Zhehu ka səku, ma kə kaa ngəci na: «ka ɗi kumee gha njasa ɗee kuma gha na?» kə. «Yə,» kə Yunadab. «Ghənzə tsəghay, ndara dəvə gha,» kə Zhehu kaa ngəci. Dza Yunadab mbaʼ ɓanavə dəvə, mbahə Zhehu mbahəghə dzəmə muwta gəduw ci. 16 Ma kə kaa ngəci ghəci mbə mbahə na: «Ndi, dzam a gha dzaa nay ma njasa jihəkəvaree ta mbəzə ta Kwa sləkəpə,» kə. Ka dzashi ghəshi li kwa muwta gəduw ci ki. 17 Tsəhə tsa tsəhə Zhehu mbə məlmə Samari ki na, mbaʼ bakwanti mbəzliy niy tərmbə tə ghuməshi mbə mbəzli kwa miy dəgha Akab, mbə məlmə va. Kərəp niy zantishi na, njasa niy gəzəkə Kwa sləkəpə va kwa miy tsa Eli, ndə gəzə kuma Hiyala.

Zhehu zanti kuma tsəfəku kwa kuma hiyala har məndiy Baal

18 Liy hum ki na, mbaʼ Zhehu ɓasəti mbəzli gwanashi. Ma kə kaa ngəshi na: «Dawə niy tsəfəku mazə Akab kwa kuma hiyala har məndi vaa Baal. Ta na tsee ghəniy, kwa pi tsa kəray na dzee ta tsəfəku kwa kuma nzə. 19 Mbalam harashiɗam ka gəzə kuma hiyala Baal va gwanashi ghəshi lə mbəzliy tsəfəku va kwa kuma hiyala va gwanashi, mbaʼ mbəzliy ghəra sləni va mbə ciki tsa nzə gwanashi. Nəghətaa ndə tərə mbə shi ya kutiŋ ma. Sa nza nay, ee ɗi vəlanta shiy təruŋ kaa hiyala va. Ntsaa dzaa səəkiy may, ta paslanti dza məndi,» kə. Tsəhuli na sava niy pəlavə Zhehu ta mbəə zanti mbəzliy tsəfəku kwa kuma Baal. 20 «Ə kə məndi ɓasəshi ta makwaghwaa fə shəndəkəə dzəti Baal,» kə. Dza məndi ki, mbaʼ məndi zlapiy zlapə tsəgha. 21 Dza Zhehu mbaʼ ghunashi mbəzli dzar tə hiɗi ka Izərayel gwanashi. Dzəghwa mbəzliy tsəfəku kwa kuma Baal gwanashi mbaʼ ghəshi səəkəshi, niy tərə ndə ya kutiŋuw. Tesleʼ ghəshi dzəmɓəə ɓasəshi mbə cikə tsa Baal, paf ghəshi təhay pi tsa mbəɓa. 22 Ma kə Zhehu kaa ntsaa nighəə dzəkən kubeŋer ka məndiy pa ta tsəfəku kwa kuma Baal ki na: «Tahanavəshi kubeŋer kaa mbəzliy tsəfəku va kwa kuma Baal gwanashi,» kə. Dza ntsa va mbaʼ tahanavəshi. 23 Dzəghwa kar Zhehu ghəshi lə Yunadab zəghu Rekab mbaʼ ghəshi dzashiy dzəmbə ciki tsa Baal va. Ma kə Zhehu kaa mbəzliy tsəfəku va kwa kuma hiyala va na: «Nəwantəvaŋuyim wəzə, nda ghuy na shi tikə jaʼ jaʼ ghuy mbəzliy tsəfəku kwa kuma Baal, nəghətaa ntsaa tsəfəku kwa kuma Kwa sləkəpə nza mbə jipə ghuy ya kutiŋ,» kə. 24 Kwatsəmətay, a Zhehu niy fiy ka sawji dəghəsəmətsəkə pərikə tə ngula, mbaʼ niy gəzanshi: «Ə ɗee ghuy bakwantəra mbəzli va gwanashi, ya ndə kutiŋ dza naa mbəliy huy va ndə mbə ghuyiy, ta pəəsliti dza məndi kwa pi tsaa ntsaa dza vaa mbəliy,» kə niy ni kaa ngəshi. Mbə ciki tsa va niy nza kar Zhehu lə Yunadabə ta vəlanta shiy lə ta ndi shiy kaa Baal. 25 Ma sa kəɗanti məndi ndi shiy kaa hiyala ki, ma kə Zhehu kaa mbəzliy sləkə ka sawji lə kaa ka sawjihi shi na: «Səmbəm a ghuy bakwanti mbəzli va gwanashi. Əntaa ndə tərə mbə shi ya Kutiŋ ma,» kə. Dza ka sawji va mbaʼ ghəshi dzəmbəə bakwanti mbəzli va lə kafaʼihi. Mbaʼ ghəshi pakəvəri mbəreketi shi mbə məlmə. Sa pakəvərishi ghəshi na, mbaʼ ghəshi zhikəshiy zhimbə məlmə nza ciki tsa ka məndi vaa tsəfəku kwa kuma Baal mbə. 26 Dza ghəshi mbaʼ ghəshi dzaa ɓəkəvəri hərezliy niy gariy məndi va mbə ciki tsa Baal, mbaʼ ghəshi pəhakən ghu kən shi. 27 Dza ghəshi baʼu ghəshi baʼuanti haku tsaa niy gariy məndi va mbəɓa ka məjəʼa hiyala Baal. Zhini baʼu ghəshi baʼuanti ciki hiyala tsa va dəʼu ghən tsa ci, mbaʼ ghəshi zhəghəti ka pi tsa ka məndiy ci kushi ti. Ya paʼa ndatsiy, kushi ka məndiy ci tə pi tsa va.

Zhehu məni mazə tə hiɗi ka Izərayel

28 Ava tsəgha zanti Zhehu kuma tsəfəku kwa kuma hiyala Baal tə hiɗi ka Izərayel. 29 Ya tsəgha nzə kiy, niy zlata məni kuma jikir na va niy fambə Zherubuwam zəghu Nebat ka Izərayel mbə məni nzə naw. Njasa niy fambə Zherubuwam va ka Izərayel mbə məni kuma jikir na, ka tsəfəku kwa kuma məcerihi vasəti məndi tə mbəzə kwa shamshama mbə məlmə Betel, mbaʼ mbə məlmə Daŋiy, tsəgha niy fambəshi na.

30 Ma kə Kwa sləkəpə kaa Zhehu ki na: «Wuzə mənti gha kuma, ka təɓara. Sa nza nay, a gha mənti kumaa niy tarəkee məni lə mbəzli kwa miy dəgha Akab. Va tsəgha kiy, paʼa tə kwa faɗa jiji dza jijihiŋaa nza mbə məni mazə tə hiɗi ka Izərayel.

31 Ya tsəgha nzə kiy, niy nuw kuma pəhəti Kwa sləkəpə Hiyala ka Izərayel Zhehu lə nəfə tsa ci kutiŋuw. Niy zlata məni kuma jikir na va niy fambə Zherubuwam ka Izərayel mbə məni nzə naw.

32 Geʼi ghala vəghu tsa va ki na, mbaʼ Kwa sləkəpə zlashi mbəzli ta slaslahu hiɗi ka Izərayel ghəshi. Dzəghwa Hazayel mazə ka Shiri mbaʼ mbashi ka Izərayel dzar tə ghalahi tə hiɗi shi gwanashi. 33 Mbaʼ məndi zləghwanti hiɗiy dza kwa ghumə va həl Zhurdeŋ və shi tsəgha ki, mbaʼ hiɗi ka Galaad gwanashi, hiɗi nza mbəzli mbə takə tsa Gad, lə takə tsa Ruben, mbaʼ takə tsa Manase ti shi, ghava na mbə məlmə dzati kwa teʼu pi tsa har məndi vaa teʼu pi Arənuŋ, paʼa tə hiɗi Galaad lə hiɗi Bashaŋ.

34 Nahuti kumaa tərmbəə dzəkən mazə Zhehuy, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən zal tsa mənəhu na lə dzəkən nihuti shi mənəhu na gwanashi. 35 Ma sa mətiy Zhehu ki na, mbaʼ məndi lanti mbə məlmə Samari. Mbaʼ zəghu ci Yuwakaz mbərəhu məni mazə kwa pi tsa ci. 36 Piya bakəmətsəkə dəghəsəti niy mənti Zhehu mbə məni mazə dzəkən ka Izərayel. Mbə məlmə Samari niy nza na lə nziy tsa ci.