Atali mbəghiy mazə Akaziyas ɓəhu mazə tə hiɗi ka Zhuda
(2 NəMezh 22.10—23.21)
11
Sa nay Atali mbəghiy Akaziyas mazə ka Zhuda zəghu nzə mətiy na, mbaʼ pəhəti zanti ndərazhiy zhər kwa miy dəgha mazə gwanashi. 2 Ma məndi mbə bəkushi na, dza Yehusheva zha mazə Yuram, zhambəghiy Akaziyas mbaʼ ghəlanti Zhuwas, tsahuti zəghu kutiŋ mbə ndərazhi mazə va. Mbaʼ dzaa mbəliy ghəshi lə maliy nighəə dzəkən mbə tsahuti ciki tsa ka məndiy hi mbə kiy ghyi tsa Hiyala. Kalaa niy pəəsliti ma tsava məndi, sa niy sənay ma Atali. 3 Piya kwaŋ niy mənti ghəshi lə maliy nighə vaa dzəkən tə mbə kiy ghyi tsa Kwa sləkəpə. Ghala vəghu tsa vay, Atali niy məni na mazə tə hiɗi ka Zhuda.Məndi pəərəti Zhuwas ka mazə
( 2 NəMezh 23.1-21)
4 Ma tə kwa mbərfaŋa piya na, dza Yehuyada ndə ta Hiyala, mbaʼ harashi mbəzliy sləkə ka sawji Pakə məndi tə hiɗi ka Kiri ghəshi lə nihuti ka sawjiy sləkə ka sawjiy ndəghu ghyi tsa mazə, mbaʼ ciki Hiyala. Dza na pəm pəməvəshiy dzakə ghyi tsa Hiyala mbaʼ pəhəti kuma li shi, zəməʼ ghəshi zəmanakə fəla kiy ghyi tsa Hiyala va. Dza na ki, mbaʼ canatishi zəghu mazə va. 5 Ma kə kaa ngəshi na: «Avanta kuma dza ghuy ta məni: Sa ka ghuy dzay, mbaʼ ghuy təhəvəri ka sawji ghuy mahəkanə mbə. Ka ghuy dza diɓay, mbaʼ ghuy təhəvəri kwa taŋa bəla va mahəkanə mbə, ta ghəra sləni niva fəca vici dəkəvaa sar na. Kwa taŋa mbəzli mbə shiy, nza ghəshi ndəghu ghyi tsa mazə. 6 Kwa baka mbəzli na, ka ndəghu miy pi tsa har məndi vaa Sur. Ma kwa mahəkana mbəzli na, ka ndəghu miy pi tsa liy hum ka ndəghu mazə. Mbəzli va gwanashiy, nza ghəshi mbəərəva ta ndəghu pi tsaa dzar ta ghyi tsa mazə. 7 Ma niy tərə va bəlahi ka sawji ghuy bakə ni ghəra ma sləni fəca vici dəkəvay, nza ghəshi ndəghu ghyi tsa Kwa sləkəpə va nza zəghu mazə kiy. 8 Dəzlətsəɓə kə ka sawji ghuy dzaa dəzlay mazə tsa ɗi ghummə va pəərə. Ya wa ndiy lə shi mbəzə ci ta dəvə kə dzaa nza. Ya kwama dza maziy, kwasəbə kə ghəshi dzaa nza. Ya a ntsaa dzaa kətivaa dzəvəgha ghuyiy, mbaʼ ghuy paslanti,» kə kaa ngəshi.
9 Dza mbəzliy sləkə ka sawji va, ka dzashi ta məni njasa gəzanakəshi Yehuyada ndə ta Hiyala va. Ya wa ndə mbə shi na, mbaʼ ɓasəvə ni ci ka sawji sləkə na, ka sawjiy dzaa ɓə sləni fəca vici dəkəva lə niy kəranti na shi sləni fəca va. Dza ghəshi mbaʼ ghəshi dzaa kəsay ndə ta Hiyala tsa va. 10 Dzəghwa na mbaʼ ɓaɓanavəshi guepipi lə gelerhi mazə Davitə niy nza kwataŋa. Kiy ghyi tsa Kwa sləkəpə niy fiyshi məndi. 11 Dza ka sawjiy ndəghu mazə ki, ya wa ndə na, mbaʼ gariy lə shi mbəzə ci ta dəvə, ghava na dza kwa bəla kwa bəzəmə ghyi tsa Hiyala va paʼ tar bəla kwa zleɓi ci, ndəku vəgha pi tsa ka məndiy vəlanta shiy kaa Kwa sləkəpə ti. Dəzlətsəɓə ghəshi dəzlay mazə tsa ɗi məndi va pəərə tsəgha ki. 12 Dzəghwa Yehuyada ndə ta Hiyala ki, mbaʼ ɓəkəvəri Zhuwas zəghu mazə va. Dza na mbaʼ fanambə daghuba mazə mbə ghən ci, mbaʼ ɓanavə nihuti shiy cikəvəri mazə na kə ghəshi. Dzəghwa pəərə məndi pəərəti ka mazə ki, mbaʼ məndi shəkambə in dzəghwa mbə ghən ci. Dza mbəzli tiɓa gwanashi tsəgha ki, ka pəraʼu divədivi, ka ngumə lala: «Bitə kə piy tsa mazə, bitə kə piy tsa mazə» kə ghəshi.
13 Ma sa favə Atali gaka ka sawji ka ndəghu mazə lə gaka mbəzli na, mbaʼ səvərita dzaa kəsashi mbəzli kiy ghyi tsa Kwa sləkəpə. 14 Nighə kə na: Ava yəwun mazə məgarə mə pi tsa ɗal tsa va ndəɓəti məndi ka mezhizhə nza mə njasa səəkə na va jiji. Gəraŋ gəraŋ gəraŋ, mbəzliy sləkə ka sawji vəgha, tsəgha ka viy təlimə kwasəbə. War ə mbəzli gwanashiy vəshi, ka viy shiy, ka viy təlimə. Sa nashi Atali shiva tsəgha ki na, kuyahə kuyahə slakwanti kubeŋer kən ghən nzə. Dza na ka ngumə lala: «Kuma pəhə pəhə na, kuma pəhə pəhə na, a kuma pəhəta təya» kə.
15 Ma kə Yehuyada ndə ta Hiyala kaa mbəzliy sləkə ka sawji, sa ɗi ma na məndiy pəəsli kiy ghyi tsa Kwa sləkəpə ki na: «Kəsəkəvərim səvəri mbə mbəzli, ntsaa dzaa nuwiy, mbaʼ ghuy pasalanti,» kə. 16 Dza məndi baŋ məndi kəsəvə ka dzashi liy dzakə ghyi mazə dza kwa miy dəgha ka gədewesliy dzakə, mbaʼ məndi paslanti tiɓa.
17 Dza Yehuyada ki, mbaʼ slati kiri kwa jipə kar Kwa sləkəpə lə mazə mbaʼ mbəzli tə hiɗi va, ta mbə ghəshiy nza ka mbəzli Kwa sləkəpə. Dza na diɓa mbaʼ slati kiri kwa jipə kar mazə lə mbəzli sləkə na. 18 Liy hum ki na, mbaʼ mbəzli tə hiɗi va gwanashi dzashiy dzəmbə ciki tsa hiyala har məndi vaa Baal. Dza ghəshi mbaʼ ghəshi babaʼuanti. Puw, puw ghəshi pəpəslivəri pihi ka məndiy vəlanta shiy ti lə shi məmənti məndi nja pa nzə. Dza ghəshi mbaʼ ghəshi paslanti Mataŋ ndə ta hiyala Baal vəgha pihi ka məndi va vəlanta shiy. Dza Yehuyada ndə ta Hiyala ki, mbaʼ təravə mbəzli ta nighəə dzəkən ghyi tsa Kwa sləkəpə. 19 Dza na diɓa, mbaʼ ɓasəti mbəzliy sləkə ka sawji, mbaʼ mbəzliy sləkə ka sawji Pakə məndi tə hiɗi ka Kiri ghəshi lə nihuti ka sawjiy sləkə ka sawjiy ndəghu ghyi tsa mazə, mbaʼ ciki Hiyala, mbaʼ mbəzli tə hiɗi va gwanashi, pəhə ghəshi pəhay mazə, kafə kiy ghyi tsa Kwa sləkəpə paʼa kiy ghyi mazə. Dza kwa miy dəgha ka ka ndəghu mazə dzakə niy dza ghəshi. Dzəghwa Zhuwas dərasə nziyiy kwa gəzli mazə ki. 20 War ə mbəzli gwanashiy vəshi, wuzə mbəzli mbə məlmə favə vəgha shi.
Ta na Atali nanzə kiy, a məndi niy paslanti lə kafaʼi kiy ghyi mazə.