Zhuwas məni mazə dzəkən ka Zhuda
12
Piya mbərfəŋ niy nza sa Zhuwas ghala vəghu tsaa pəərə məndi ka mazə ka Zhuda. 2 Ghalaɓay, Zhehu mbə kwa mbərfaŋa piya ci mbə məni mazə dzəkən ka Izərayel niy nza na. Piya faɗəmətsəkə niy mənti Zhuwas mbə mazə. Mbə məlmə Zheruzalem niy nza na lə nziy tsa ci. Civəya niy nza slən tsa mbəghiy, zha ka Ber-Sheva niy nza na. 3 Kuma wuzə na niy məni Zhuwas mbə nziy tsa ci gwanay kwa kuma Kwa sləkəpə. Sa nza nay, mbə canci kuma niy nza Yehuyada ndə ta Hiyala. 4 Ə na na nza nay, war ghulashi niy nza pihiy niy gugumati məndi va ta ta hiyalahi dzar ti shi. War ghulashi niy nza mbəzli mbə vəli shiy kaa Hiyala, ka ndanta shiy zən nja ʼurdi dzar ti shi.Zhuwas gəzanshi guma ghyi tsa Kwa sləkəpə kaa ka ta Hiyala
( 2 NəMezh 24.4-14)
5 Ma kə Zhuwas kaa ka ta Hiyala tə nahuti vici na: «Ya nama gəna dza məndiy ɓəə dzakə ghyi tsa Kwa sləkəpə: Ya gəna ka məndi vaa tsəhə ghən li na, ya gənaa niy gəzəkə ndə vəlanta kaa Kwa sləkəpə ta mananta usa ta kuma mananati na na, ya vəli tarəvə ndə vəli mbə nəfə tsa ci nay, 6 ə kə ka ɓasə gəna dza ɓasəti. Sa ka ghəshi ɓasəviy, nza ghəshi ndaŋuy ghuy ka ta Hiyala nza ghənzə nza va ghuy, nza ghuy guma ghyi tsa Kwa sləkəpə li dzəghwa tə pi tsa dza naa nza gar guma,» kə.
7 Ya tsəgha nzə kiy, paʼ tə kwa bakəmətsəkə mahəkanə ti piya Zhuwas mbə məni mazə na, niy gumanti ghyi tsa Kwa sləkəpə ka ta Hiyala diw. 8 Sa nighəti mazə Zhuwas tsəgha na, dza na daʼa haray Yehuyada ndə ta Hiyala ghəshi lə nihuti ka ta Hiyala. Ma kə kaa ngəshi na: «A shiy mənishi gumanti ma ghuy ghyi tsa Kwa sləkəpəa? Ghənzə tsəghay, ka dza ghuy ɓə gəna va ka ɓasə gəna ghuy ta nza ghənzə va ghuy ghulaw. Tsər ta guma ghyi tsa Kwa sləkəpə pə ghuy dzaa ɓə,» kə. 9 Sa gəzəkə na tsəgha ki na, mbaʼ ka ta Hiyala va zləɓavə, kala dza ghəshiy ɓə ma gəna va mbəzli ta fə və shi ghula, kala dza ghəshiy zhar kwa kuma guma ghyi tsa Kwa sləkəpə ghula.
10 Dzəghwa Yehuyada ndə ta Hiyala laŋ ɓəvə sərndəkə, mbaʼ tsahwati kwal dzəti sa kalay məndi li. Bəm fiy sərndəkə tsa va vəgha pi tsa ka məndiy vəlanta shiy kaa Hiyala ti. Tə dəvə kwa bəzəmə ghaa dzakə ghyi tsa Kwa sləkəpə niy fiy na. Ka ka ta Hiyalaa ndəghu miy dəghaa dzakə ghyi tsa Kwa Sləkəpəə dza ki na, ka fə gəna ka məndiy ɓəə səəkəə dzakə ghyi tsa Kwa sləkəpə gwanataa dzəghwa. 11 Ma sa ka ghəshiy nata gəna ɓasəta ɗaŋ kwa sərndəkə tsa vay, daʼa ka ghəshiy haray ndə tsasli shiy tsa mazə ghəshi lə dikə tsa ka ta Hiyala. Ka mbəzli va dza na, mbaʼ ghəshi səəkəə ɓəvə gəna kiy ghyi tsa Kwa sləkəpə va, mbəraʼ ghəshi mbərati. 12 Sa ka ghəshi mbəratiy, laŋ ghəshi ɓəvə, mbaʼ ghəshi ɓanavə kaa mbəzliy nighəə dzəkən sləni kiy ghyi tsa Kwa sləkəpə. Ka mbəzli va dza ki na, ka wa kaa mbəzliy ghəra sləni guma ghyi tsa Kwa sləkəpə: Kaa mbəzliy ghəra sləni shighu, mbaʼ kaa nihuti mbəzliy guguma nihuti shiy kiyɓa, 13 mbaʼ kaa ka nga shiy, mbaʼ kaa ka fəɗi hərezli. Lə gəna va ka ghəshiy pa shighu lə hərezli baʼu baʼu ni ta guma ghyi tsa Kwa sləkəpə dzəghwa tə pi tsa yiɗiy na diɓa. Ka pa pa nihuti shi ɗi məndi guma ghyi tsa va li shi.
14 Ə na na nza nay, niy ɓə gənaa niy ɓəkə məndi vaa dzakə ghyi tsa kwa sləkəpə məndi ta məni nihuti shiy nja kar ceʼuer tə tsahi gəna, ya shiy slasla shiy, ya hupehuperiy ti shiy məsə shiy kwa shi, ya shiy viy, ya nihuti shi tə mbəzə kwa shamshama, ya tə tsahi gənaw. 15 Gwanata tsa gəna ka məndiy ɓəkəə dzakə ghyi tsa Kwa sləkəpiy, kaa mbəzliy nighəə dzəkən sləni kiy ghyi tsa va ka məndiy ɓanavəshi, nza ghəshi guma ghyi tsa Kwa sləkəpə va li. 16 Niy pəla sənay məndi njasa ghərati mbəzli va sləni lə gəna vaw, sa nza nay, lə kwal tsa nzə niy məni ghəshi sləni li.
17 A na gəna ka məndiy ɓəkəə ka məjəʼa shiy niy dza məndiy slanta kaa Kwa sləkəpə ta dzəti shiy niy dza məndiy slanta, kalaa niy sləniyshi məndi, mbaʼ gəna ka məndiy ɓəkə ka məjəʼa shiy niy dza məndiy slanta ta pəli kuma jikir nay, niy fə nava məndiy dzəghwa sərndəkə tsa kiy ghyi tsa Kwa sləkəpə vaw. Kaa ka ta Hiyala niy ɓanshi məndi nava.
Njasa kərkəva məni mazə tsa Zhuwas
( 2 NəMezh 24.23-27)
18 Geʼi lə vəghu tsa va ki na, dza Hazayel mazə ka Shiri mbaʼ dzaa pəsliy ta mbəzli mbə məlmə Gad, mbaʼ zləghuhu məlmə va. Dzəghwa na ka ɗi pəsli ghəci ta mbəzli mbə məlmə Zheruzalem. 19 Sa nighəti Zhuwas mazə ka Zhuda tsəgha na, dza na cəkeʼ ɓasəvə shi nza dimə ti shi niy ɓanavə na kaa Kwa sləkəpə, mbaʼ niy niy ɓanavə jijihiy, niy mənəhu mazə tə hiɗi ka Zhuda: Kar mazə Zhuzafat, mbaʼ mazə Yuram, mbaʼ mazə Akaziyas. Zhini na diɓa mbaʼ ɓasəhu mbəzə kwa shamshamaa niy fiy məndi mbə ciki tsa ka məndiy mbə shiy kiy ghyi tsa Kwa sləkəpə, mbaʼ na kiy ghyi tsa mazə. Dza na kaa shi va gwanashi mbaʼ vəlanavəshi kaa mazə Hazayel. Mbaʼ mazə tsa va bashanti dza ta pəsli ta mbəzli mbə məlmə Zheruzalem.
20 Nahuti kumaa tərmbəə dzəkən mazə Zhuwasiy, kwa zliya: “Kuma mənəhu mezhizhi ka Zhuda,” tsaslaghwa məndi. 21 Liy hum kuma mənti mazə Zhuwas vay, dza ka sləni ci dikə dikə ni, mbaʼ ghəshi zhəghəshi ka ka mbəzə ci, mbaʼ ghəshi pəhəti kuma tiy paslanti, tə pi tsa har məndi vaa Bet-Milu ghəci mbə dzəghwa vəgha bahwaa dzəghwa pi tsa har məndi vaa Shila. 22 Kar Yuzavad zəghu Shimeyat ghəshi lə Yəhuzavad zəghu Shumer mbəzli mbə ka sləni ci dikə dikə ni niy pəsli na mazə Zhuwas. Dza mbaʼ məndi lanti kwa kuli kutiŋ na lə jijihiy mbə məlmə Davitə. Mbaʼ məndi pəərəti zəghu ci Amasiya ka mazə kwa pi tsa ci.