2 Mazə 13

Yuwakazə məni mazə dzəkən ka Izərayel

Ma Zhuwas zəghu Akaziyas mazə ka Zhuda mbə məni kwa bakəmətsəkə mahəkanti piya ci mbə mazə ki na, mbaʼ məndi pəərəti Yuwakazə zəghu Zhehu ka mazə tsa ka Izərayel. Mbə məlmə Samari niy nza na lə nziy tsa ci. Piya məŋ lə mbərfəŋ niy mənti na mbə məni mazə. 2 Kuma gəmgəm na niy məni na kwa kuma Kwa sləkəpə. Aa niy fambə ka Izərayel dzəmbə məni kuma jikir na njasa niy fambəshi Zherubuwam zəghu Nevat va. Niy zlata məni kumaa niy məni Zherubuwam va naw. 3 Dzəghwa Kwa sləkəpə ki, mbaʼ ɓakən nəfə dzəkən ka Izərayel. Mbaʼ zlashi ta nza ghəshi ya humɓa tə dəvə Hazayel mazə ka Shiri, mbaʼ tə dəvə zəghu ci Ben-Hadadə sa mbərəhu na mazə.

4 Dzəghwa Yuwakaz ki, ka cəʼu Kwa sləkəpə ta mbə nəfə tsa nzəə dzəghway. Sa nay Kwa sləkəpə ngəraʼu tsa sanshi mazə ka Shiri kaa ka Izərayel ki na, mbaʼ zləɓavə cəʼu ci va. 5 Dzəghwa na, mbaʼ ɓanakəshi ndə kaa ka Izərayel ta mbəlishi, mbaʼ ntsa va mbəlantishi mbə dəvə ka Shiri. Ghalaɓa ki na, mbaʼ ghəshi nziyshi lə zərkə njasa niy nza ghəshi kwataŋa. 6 Ya tsəgha nzə kiy, niy zlata məni kuma jikir na va niy fambə mbəzli kwa miy dəgha Zherubuwam va ka Izərayel mbə ghəshiw. War mbə məni kuma va niy nza ghəshi. Ya Shiy niy vasəti məndi va ta tsəfəku kwa kuma shi har məndiy hiyala Akeray, ghulashi niy nza ghəshi gəraŋə mbə məlmə Samari.

7 A mazə ka Shiri niy bakwanti ni ɗaŋ ni ka sawji mazə Yuwakaz. Njasa ka məndi vaa dza dzar tə hiɗiy, tsəgha niy dzati na dza ti shi. War kwataka ka sawji ka zlərə gədewesli lə gədewesli shi cifəmətsəkə, mbaʼ mutiti gədewesli məŋ, mbaʼ ka sawji ka dza lə səɗa bələku bələku, bələku, niy tərə na və.

8 Nahuti kumaa tərmbəə dzəkən mazə Yuwakaziy, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən zal tsa mənəhu na lə nihuti shi mənəhu na gwanashi. 9 Sa mətiy na na, mbaʼ məndi lanti mbə məlmə Samari, mbaʼ məndi pəərəti zəghu ci Yuwas kwa pi tsa ci.

Yuwas məni mazə dzəkən ka Izərayel

10 Zhuwas mbə məni kwa mahəkanəmətsəkə mbərfəŋ ti piya ci mbə sləkə ka zhuda na, mbaʼ məndi pəərəti Yuwas zəghu Yuwakaz ka mazə ka Izərayel. Mbə məlmə Samari niy nza na lə nziy tsa ci. Piya məŋ lə kwaŋ niy mənti na mbə mazə. 11 Kuma gəmgəm na niy məni na kwa kuma Kwa sləkəpə. Kuma jikir na va niy məni Zherubuwam zəghu Nevat va gwanata, mbaʼ niy fambə ka Izərayel mbə məni nziy, niy zlata məni nzə mazə Yuwasuw. War mbə məni kuma va niy nza na. 12 Nahuti kumaa tərmbəə dzəkən mazə Yuwasiy, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən zal tsa mənəhu na mbə mbəzə tsa shi lə Amasiya mazə ka Zhuda. 13 Sa mətiy na na, mbaʼ məndi lanti mbə məlmə Samari kwa kuli mezhizhi ka Izərayel, mbaʼ məndi pəərəti Zherubuwam kwa pi tsa ci.

Məti Elize

14 Mazə Yuwas ghula ta mətiy, a zəlghu tsa dza na ta məti və niy kəsəvə Elize ndə gəzə kuma Hiyala. Sa niy dza Yuwas mazə ka Izərayeliy, mbaʼ dzaa kəsay. Dza na gələɓə gələɓiy, bəghə faghwa wahə. Ma kə na: «A di, a di, a gha taŋəti mutiti gədewesli ka Izərayel gwanashi lə ka sawji ka zlərə gədewesli ka Izərayel gwanashi,» kə. 15 Ma kə Elize niy ni kaa ngəci na: «Mbala ɓəvə rigi mbaʼ hevivi,» kə niy ni, mbaʼ mazə Yuwas niy dzaa ɓəvə shi va. 16-17 Ma kə kaa ngəci na: «ghunanti mergi tsaa dzəghwa ghumə,» kə. Dza mazə tsa va ɓəŋ ghunanti. Ma kə kaa ngəci diɓa na: «Ɓəvə rigi tsa va a gha faghwa havə nza gha təɗi lə dəvə gha,» kə. Dza mazə laŋ ɓəvə rigi, bəm faghwa havə ka təɗi lə dəvə ci. Dzəghwa Elize bəm fati divədivi ciy dzəti ni mazə: «Pəli havə va,» kə. Dza na mbaʼ pəlata. Ma kə Elize kaa ngəci ki na: «Havə vay, havəə ciŋa njasa dza Kwa sləkəpə ta ndaŋa mbashi mbəzli na. Ta mbashi ka Shiri dza gha mbə məlmə Afekə, ta zantishi dza gha,» kə. 18 Zhini ma kə Elize kaa ngəci diɓa na: «Ɓəvə nihuti hevivi va,» kə. Dza mazə tsa va mbaʼ ɓəvəshi. «Ləkəshi dzəti hiɗi,» kə Elize ndə gəzə kuma Hiyala. Dza mazə mahəkanə səɗa ghəci ləkatishi tə hiɗi mbaʼ garəti ləkəshi. 19 Dza nəfə tsa ndə gəzə kuma Hiyala mbaʼ satiy dzəkən. Ma kə kaa ngəci na: «Gar cifə səɗa, ya kwaŋ səɗa ka gha ləkatishi tə hiɗi nza, ghalaɓay, ta kwa ndimndim niy dza ghaa mbashi ka Shiri nza. Sanay, mahəkanə səɗa dza ghaa mbashi gwaʼa tsəgha,» kə.

20 Liy hum ki na, ɓəlahə Elize mətiy, mbaʼ məndi lanti.

Njasa səəkə piya, ghənzəə ghavay, war mbə səəkə ka ka ghəliy nza səəkə tə hiɗi ka Muwabə dzəti hiɗi ka Izərayel. 21 Ma nihuti mbəzli mbə dza ta la mbəri tə nahuti vici na, vətəghə ghəshi nashi ka ghəli va. Dza ghəshi fiyikə ghəshi ndəghaghwa mbəri tsa va kwa kuli Elize ka hushi. War sa dapashi mbəri tsa va esler Elize na, mbaʼ zhakatiy mbə məti. Kafə kafiy, mbaʼ gariy.

Ka Izərayel mbəzə lə ka Shiri

22 Ghala vəghu tsaa niy məni Yuwakazə maziy, təruŋ niy gagashi Hazayel mazə ka Shiri ka Izərayel. 23 Dzəghwa hur tsa Kwa sləkəpə mbaʼ slanati ti shi, mbaʼ manatishi wuzə hur, mbaʼ pəlata kuma shi jikir na tə mbərkə sla kiri tsa slati na kwa jipə shi lə kar Abəraham, lə Izakə, mbaʼ Zhakubə. Niy ɗi zantishi naw. Paʼa va vəghu tsa vay, niy ndəghantishi na kərakə liw.

24 Dzəghwa Hazayel mazə ka Shiri ɓəlahə mətiy, mbaʼ məndi pəərəti zəghu ci Ben-Hadad kwa pi tsa ci. 25 Dza Yuwas zəghu Yuwakaz mbaʼ zləghuhu məlməhi ka Izərayeləə niy nza va mbə dəvə Ben-Hadadə, zəghu Hazayel. Məlməhi vay, Hazayel niy zləghuhushi na va Yuwakaz diy Zhuwas ghəshi mbə mbəzə lə ka Izərayel. Mahəkanə səɗa niy səvəriy Zhuwas lə ka sawji ci ta mbəzə lə kar Ben-Hadadə lə ka sawji ci, mbaʼ niy mbashi, ghalaɓa niy zhinəhu na məlməhi ka Izərayel va.