2 Mazə 14

Amashiya məni mazə dzəkən ka Zhuda

( 2 NəMezh 25.1-4, 11-12,17-28; 26.1-2)

Ma Yuwas zəghu Yuwakaz mbə məni kwa baka piya ci mbə mazə dzəkən ka Izərayel na, mbaʼ məndi pəərəti Amashiyas ka mazə ka Zhuda kwa pi tsa Zhuwas diy. 2 Piya bakəmətsəkə cifəti niy nza sa ci ghala pi tsa pəərə məndi va. Dzəghwa na, mbaʼ mənəhu piya bakəmətsəkə məsliɗəti mbə mazə. Mbə məlmə Zheruzalem niy nza na lə nziy tsa ci. Zha ka Zheruzalem niy nza mbəghiy, Yehuwadiŋ, kə məndi kaa slən tsa nzə. 3 Kumaa təɓanta kaa kwa sləkəpə niy məni Amashiyas. Ə na na nza nay, njasa niy məni mazə Davitə jijiy va kuma niy məni naw. War njasa niy məni diy Zhuwas va niy məni na kuma. 4 Ya tsəgha nzə diɓay, pihiy niy gugumati məndi va ta ta hiyalahi ti shiy, ghulashi niy nza ghəshi. War ghulashi niy nza mbəzli mbə dza ta vəlanta shiy kaa Hiyala, lə dza ta ndanta shiy zən nja urdi dzar tə pihi va.

5 Ma sa nziyiy mazə tsa Amashiyas wəzə wəzə, mbaʼ kumavə bərci ki na, dza na mbaʼ bakwanti ka sləni dikə dikə ni va niy paslanti diy, mazə Zhuwas. 6 A na ndərazhi mbəzli va na shiy, niy bakwantishi naw. Ta mbəə nuti kuma gəzəkə məndi va kwa zliya Muyizə niy mənti na tsəgha. Sa nza nay, a Kwa sləkəpə niy gəzəkə: «Ka dza məndiy bəku mbəzliy yakə zəghu tə mbərkə kuma jikir na mənti ndərazhi shiw. Ya ndərazhiy, ka dza məndiy bəkushi tə mbərkə kuma jikir na mənti mbəzliy yakəshiw. Ya wa ndiy, ta na ci kuma mənti na jikir na kə məndi dzaa pəəsli,» kə niy ni kwa zliya va. 7 A Amashiyas tsa va niy bakwanti ka sawji ka Edum bələku bələku, bələku mbə mbəzə dziy kwa teʼu pi tsa har məndi vaa təʼu pi ghuni, dza na mbaʼ ɓəhu məlmə Shela, mbaʼ fanati slən Yukətel kaa məlmə va, lə slən tsa va ka məndiy har məlmə va paʼ ndatsə.

8 Zhəkən sa va ki na, dza mazə Amashiyas mbaʼ ghunashi mbəzli kaa Yuwas mazə ka Izərayel, zəghu Yuwakaz, jijiy Zhehu: « Mbalam gəzancim kaa Yuwas mazə ka Izərayel: “Səvərim lə ni gha ka sawji, ee dzəvəri lə ni ya, a ghummə dzəghantəvammə” kə mazə Amashiyas, pə ghuy kaa ngəci,» kə. 9 Ma kə Yuwas mazə ka Izərayel kaa kuma ghunashi na mbəzli ta zləɓanci na kaa Amashiyas mazə ka Zhuda kwa fir na: «A nahuti fə kwa tekesli juw na, kama bərci və mbə mə dəlagwa Libaŋ niy ghunəghə miy kaa fə har məndiy Sedər, fəə guranti tə bərci ka təɓə ghənzə təruŋ mə dəlagwa Libaŋ. Ma kə niy ni kaa ngətay: “Ndara zha gha va kaa zəghuee,” kə niy ni kaa ngəta. Sa dza shi mbə gamba mə dəlagwa Libaŋ na, mbaʼ ghəshi dzahu dza dzar tə pi tsa nza fə juw na va, mbaʼ ghəshi ɓəɓəlivəri. 10 Sa nza na va mbaʼ gha mbashi ka Edum va tsəgha vəshi gha ɓay? Lə nava kuma pə ghaa vəshi, ka kəli ghən tsa gha, mbaʼ gha nziyŋa guŋaa tə hiɗi gha. Ta wa ɗi gha pəla dzəmbə kumaa dzaa ɓəkəŋa bəzəa? bətə dza ghaa nza ghuy lə ka Zhuda gwanashi,» kə mazə Yuwas kaa mazə Amashiyas. 11 Ya tsəgha ki na, kala ɗi ma fa kuma va ghəci.

Dza Zhuwas mazə ka Izərayel ki, mbaʼ səvəriy lə ka sawji ci, ta mbəzə lə mazə Amashiyas ghəshi lə ni ci ka sawji. Mbaʼ ghəshi kuməshi tə pi tsa har məndi vaa Bet-Shema tə hiɗi ka Zhuda. 12 Mbaʼ ka sawji ka Izərayel mbashi ka sawji ka Zhuda. Kurec ka sawji ka Zhuda huhushi jighi. 13 Dzəghwa Yuwas mazə ka Izərayel mbaʼ kəsəhu Amashiyas mazə ka Zhuda, zəghu mazə Zhuwas, jijiy mazə Akaziyas tiɓa tə pi tsa har məndi vaa Bət-Shema. Sa kafə na li tiɓa na, ka dzay ta dzəmbə məlmə Zheruzalem, mbaʼ dzaa baʼuanti kələm tsaa dəzlay məlmə va gar basa bələku ta dzəmbə ghəci kwa. Ghava na tə gəzli har məndi vaa gəzli Efrayim paʼa tə gəzli har məndi vaa Gəzli kərkəva nahuti bəla kələm ti. 14 Sa tsəhiy na mbəɓa na, mbaʼ dzay dzakə ghyi tsa Hiyala, mbaʼ pahu mbəzə kwa shamshama kiyɓa gwanata, mbaʼ gəna kiyɓa gwanata, mbaʼ shi wuzə wuzə ni kiyɓa gwanashi. Tsəgha ghəci zhaa pahushi mbə cikə tsa ka məndiy fə shi gaga ni kiy ghyi tsa mazə. Dza na diɓa, mbaʼ kəəsəvə mevivi, ka dzay li shiy dzəmbə məlmə Samari.

15 Nahuti kumaa tərmbəə dzəkən mazə Yuwaziy, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kuma dzəkən shi mənəhu na, lə dzəkən zal tsa mənəhu na, lə dzəkən mbəzəhi mbəzəhu ghəshi lə Amashiyas mazə ka Zhuda. 16 Liy hum sa mətiy na na, mbaʼ məndi lanti mbə məlmə Samari kwa kuli mezhizhi ka Izərayel, mbaʼ məndi pəərəti zəghu ci Zherubuwam ka mazə kwa pi tsa ci.

17 Piya məŋ lə cifə niy mənti Amashiyas mazə ka Zhuda tə ghumə liy hum Yuwas mazə ka Izərayel. 18 Nahuti kumaa tərmbəə dzəkən mazə Amashiyashiy, kwa zliya: “Kuma mənəhu mezhizhi ka Zhuda” tsaslaghwa məndi.

19 Mbə məlmə Zheruzalem niy pəhəti məndi kuma ta pəəsli ci, mbaʼ niy huy dzəmbə məlmə Lakish, mbaʼ məndi nughə dzəmbə, pəsl məndi paslanti mbəɓa. 20 Sa dza məndi ki na, mbaʼ məndi ɓəghə mbəri tsa ciy dzəmbə məlmə Zheruzalem mə gəduw, mbaʼ gədewesli ɗaŋ kwasəbə. Laʼa məndi lanti kwa kuli jijihiy mbə məlmə Davitə. 21 Dzəghwa mbəzli ka Zhuda gwanashi mbaʼ ghəshi ɓəvə Azariyas ghəci lə piya məŋ lə kwaŋ, mbaʼ ghəshi pəərəti ka mazə kwa pi tsa diy Amashiyas. 22 Ghəci niy zhinəhu na məlmə Eyilat ta nza ghənzə ka sa ka Zhuda, liy hum sa mətiy Amashiyas diy tsa va. Dza na mbaʼ zhiniy lati məlmə va.

Tsahuti kwa baka Zherubuwam məni mazə dzəkən ka Izərayel

23 Ma Amashiyas zəghu Zhuwas mbə məni kwa məŋ lə cifə piya ci mbə mazə dzəkən ka Zhuda na, mbaʼ məndi pəərəti Zherubuwam zəghu Yuwas ka mazə ka Izərayel. Mbə məlmə Samari niy nza na lə nziy tsa ci. Piya faɗəmətsəkə tanti niy mənti na mbə mazə 24 Kuma gəmgəm na niy məni na kwa kuma Kwa sləkəpə. Niy zlata məni kuma jikir na va niy məni Zherubuwam zəghu Nebat va niy fambə ka Izərayel dzəmbə məni kuma jikir na naw. 25 Ghəci niy zhiniti na Hiɗi ka Izərayel gwanashi njasa niy nza ghəshi kwataŋa. Ghava na tə məlmə Lebu-Hamat njasaa dzəghwa mu paʼ va kufa ka məndi vaa ni “kufa məti məti na”, kə məndi njasaa dzəghwa həci. Tsəgha niy gəzəkə Kwa sləkəpə Hiyala ka Izərayel lə miy tsa ndə sləni tsa nzə Zhunas ndə gəzə kuma Hiyala, ndə ka Gat- Hefer, zəghu Amitay. 26 Dalalay niy nay Kwa sləkəpə ngəraʼu kən ka Izərayel, va tsəgha niy mənti na tsəgha. Sa nza nay, niy nza ndə tiɓa ghula gar kəti ka Izərayel ya kutiŋ, ya ntsa njayay tsa naw. 27 Zhini diɓay, niy tarəkə zanti ka Izərayel Kwa sləkəpə tə hiɗiw, va tsəgha mbəlantishi na dza kwa mazə Zherubuwam zəghu Yuwas.

28 Nahuti kumaa tərmbəə dzəkən kwa baka mazə Zherubuwamiy, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kuma dzəkən shi mənəhu na gwanashi, lə dzəkən zal tsa mənəhu na mbə mbəzəhi, lə dzəkən njasa zhananavəshi na kar məlmə Damas lə məlmə Hamat kaa ka Izərayel sa niy zləghuhushi ka Zhuda. 29 Sa mətiy na na, mbaʼ məndi lanti mbə məlmə Samari kwa kuli mezhizhi ka Izərayel, mbaʼ məndi pəərəti zəghu ci Zakari kwa pi tsa ci.