Azariyas məni mazə dzəkən Zhuda
( 2 NəMezh 26.3-4, 21-23)
15
Ma Zherubuwam mazə ka Izərayel mbə məni kwa bakəmətsəkə mbərfəŋti piya ci mbə mazə na, mbaʼ məndi pəərəti Azariyas zəghu Amashiyas ka mazə ka Zhuda. 2 Piya məŋ lə kwaŋ niy nza sa ci ghala vəghu tsa pəərə məndi va. Dzəghwa na mbaʼ mənti piya cifəmətsəkə bakəti mbə mazə. Mbə məlmə Zheruzalem niy nza na lə nziy tsa ci. Yekuliyahu niy nza slən tsa mbəghiy. Zha ka Zheruzalem niy nza na. 3 Kumaa təɓanta kaa Kwa sləkəpə niy məni Azariyas, njasa niy məni Amashiyas diy va. 4 Ya tsəgha nziy, war ghulashi niy nza pihiy niy gumati məndi va ta ta hiyalahi ti shi. Ghulashi niy nza mbəzli mbə vəlanta shiy, ka ndanta shiy zən nja urdi kaa Hiyala dzar ti shi.5 Dza Kwa sləkəpə ki mbaʼ ɓanavə zəlghu dərna kaa mazə, ghəci lə dərna va məti na. Niy dzəmbə mbəzli na va zəlghu tsa vaw, Vəgha bəla niy nza na kutiy lə nziy tsa ci. Ghalaɓay, Zəghu ci Yutam ntsaa sləkə ghyi tsa mazə niy sləkə na ka Zhuda.
6 Nahuti kumaa tərmbəə dzəkən mazə Azariyashiy, kwa zliya: “Kuma mənəhu mezhizhi ka Zhuda” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na gwanashi. 7 Sa mətiy na na, mbaʼ məndi lanti kwa kuli jijihiy mbə məlmə Davitə. Mbaʼ məndi pəərəti zəghu ci Yutam ka mazə kwa pi tsa ci.
Zakari məni mazə dzəkən ka Izərayel
8 Ma Azariyas mazə ka Zhuda mbə məni kwa mahəkanəmətsəkə dəghəsti piya ci mbə mazə na, mbaʼ məndi pəərəti Zakari zəghu Zherubuwam ka mazə tsa sləkə ka Izərayel. Mbə məlmə Samari niy nza na lə nziy tsa ci. Tir kwaŋ niy mənti na mbə mazə. 9 Shi gəmgəm ni niy məni na kwa kuma Kwa sləkəpə njasa niy məni jijihiy va. Niy zlata məni kuma jikir na va niy məni Zherubuwam zəghu Nebat va niy fambə ka Izərayel dzəmbə məni kuma jikir na naw. 10 Sa dza Shalum zəghu Yavesh na, mbaʼ pəhəti pəəsli ci. Dza na mbaʼ paslanti kwa kuma mbəzli, mbaʼ mbərəhu məni mazə kwa pi tsa ci.
11 Nahuti kumaa tərmbəə dzəkən mazə Zakariy, kwa zliya: “Kuma mənəhu mezhizhi ka Izərayel” tsaslaghwa məndi.
12 Ava tsəgha dzəghwata kumaa niy gəzanakə Kwa sləkəpə va kaa Zhehu. Saa niy nə na va: «Paʼa tə kwa faɗa jiji dza jijihiŋaa nza mbə məni mazə tə hiɗi ka Izərayel,» kə niy ni kaa ngəci.
Shalum məni mazə tə hiɗi ka Izərayel
13 Ma mazə ka Zhuda mbə kwa mahəkanəmətsəkə məsliɗə piya ci mbə mazə na, mbaʼ məndi pəərəti Shalum, zəghu Yavesh ka mazə ka Izərayel. Mbə məlmə Samari niy nza na lə nziy tsa ci. Tir kutiŋ niy mənti na mbə mazə. 14 Dzəghwa Menahem zəghu Gadi kafə kafiy mbə məlmə Tirsa dzəmbə məlmə Samari. Mbaʼ dzaa paslanti Shalum zəghu Yavesh, mbəərə mbəərəhu məni mazə kwa pi tsa ci.
15 Nahuti kumaa tərmbəə dzəkən mazə Shalumiy, kwa zliya: “Kuma mənəhu mezhizhi ka Izərayel” tsaslaghwa məndi. Kwaɓa tsasliti məndi njasa pəhəti na pəəsli Zakari.
16 Sa ɓəvə Menahem mazə tə hiɗi ka Izərayel ki na, dza na mbaʼ pəsliy ta məlmə Tifəsa, mbaʼ bakwanti mbəzli mbəɓa gwanashi, mbaʼ nihuti mbəzli dzar tə hiɗi sləkə məlmə va, ghava na tə hiɗi vəgha məlmə Tirsa, paʼa mbə məlmə Tifəsa. Sa niy ghunanci ma mbəzli mbə məlmə va miy dəgha ta dzəmbə ghəci, va tsəgha niy pəsliy na ti shi, dza na mbaʼ həhənivəri hur tə miʼi lə hur gwanashi.
Menahem məni mazə dzəkən ka Izərayel
17 Ma Azariyas mazə ka Zhuda mbə məni kwa mahəkanəmətsəkə məsliɗiti piya ci mbə mazə ki na, mbaʼ məndi pəərəti Menahem zəghu Gadi ka mazə tsaa sləkə ka Izərayel. Mbə məlmə Samari niy nza na lə nziy tsa ci. Piya mən niy mənti na mbə mazə. 18 Kuma gəmgəm na niy məni na kwa kuma Kwa sləkəpə. Mbə məni mazə tsa ci gwanayiy, niy zlata məni kuma jikir na va niy məni Zherubuwam zəghu Nebat va niy fambə ka Izərayel dzəmbə məni kuma jikir na naw.
19 Dzəghwa Pul mazə ka Ashiri mbaʼ səəkiy dzəti hiɗi ka Izərayel, ta zləghushi. Dza mazə Menahem mbaʼ ɓanavə gəna tunə mahəkanəmətsəkə, ta mbə ghəciy kəətiti, ta kumavə bərci ghəci wuzə wuzə mbə məni mazə tsa ci. 20 Ta mbə ghəciy kumavə gəna va tsəgha, ta ɓanci kaa mazə ka Ashiriy, ghən niy tsəhəvə Menahem va mbəzli nza shiy və shi tə hiɗi ka Izərayel gwanashi. Ya wa ndiy, gəna kwa tsahi cifəmətsəkə niy tsəhəti na ghən. Sa ɓanavə na gəna va tsəgha kaa mazə tsa va ki na, mbaʼ ɓarvay tə hiɗi ka Izərayel ka dzay dzəti hiɗi ci.
21 Nahuti kumaa tərmbəə dzəkən mazə Menahemiy kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na gwanashi. 22 Ma sa mətiy mazə Menahem na, mbaʼ məndi pəərəti zəghu ci Pekahiya ka mazə kwa pi tsa ci.
Pekahiya məni mazə dzəkən ka Izərayel
23 Ma Azariyas mazə ka Zhuda mbə məni kwa cifəmətsəkə piya ci mbə mazə na, mbaʼ məndi pəərəti Pekahiya zəghu Menahem ka mazə tsaa sləkə ka Izərayel. Mbə məlmə Samari niy nza na lə nziy tsa ci. Piya bakə niy mənti na mbə mazə. 24 Kuma gəmgəm na niy məni na kwa kuma Kwa sləkəpə. Niy zlata məni kuma jikir na va niy fambə Zherubuwam zəghu Nebat ka Izərayel mbə məni nzə naw. 25 Dzəghwa Peka ntsaa ɓə shi mbəzə ci zəghu Remaliyahu, mbaʼ pəhəti kuma ta pəəsli ci. Dza na ghəshi lə mbəzli ka Galad cifəmətsəkə kwasəbə, mbaʼ pəsliy ti mbə tsahuti ciki kiy ghyi tsa mazə, mbaʼ ghəshi paslanti, mbaʼ mbərəhu məni mazə kwa pi tsa ci.
26 Nahuti kumaa tərmbəə dzəkən mazə Pekahiyay, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na gwanashi.
Peka məni mazə dzəkən ka Izərayel
27 Ma Azariyas mazə ka Zhuda mbə məni kwa cifəmətsəkə bakəti piya ci mbə mazə na, mbaʼ məndi pəərəti Peka zəghu Remaliyahu ka mazə ka Izərayel. Mbə məlmə Samari niy nza na lə nziy tsa ci. Piya bakəmətsəkə niy mənti na mbə mazə. 28 Kuma gəmgəm na niy məni na kwa kuma kwa sləkəpə. Niy zlata məni kuma jikir na va niy fambə Zherubuwam zəghu Nebat ka Izərayel mbə məni nzə naw.
29 Ghala vəghu tsaa niy nza Peka mbə məni mazə dzəkən ka Izərayeliy, dzəghwa Tiglat-Pileser mazə ka Ashiri mbaʼ səvəriy ta mbəzə lə ka Izərayel. Dza na mbaʼ zləghuhu məlmə Iyuŋ, mbaʼ məlmə Avel-Bet-Meka, mbaʼ məlmə Yanuwa, mbaʼ məlmə Kadesh, mbaʼ məlmə Hasur, mbaʼ hiɗi ka Galad, mbaʼ hiɗi ka Galile, mbaʼ hiɗi Neftali gwanashi. Dza na mbaʼ kəəsəhu mbəzli shi ka meviviy dzəti hiɗi ka Ashiri. 30 Dzəghwa Uze zəghu Ela mbaʼ pəhəti kuma ta pəəsli mazə Peka zəghu Remaliyahu, mbaʼ paslanti, mbərə mbərəhu məni mazə kwa pi tsa ci. Yutam mazə ka Zhuda zəghu Azariyas mbə məni kwa bakəmətsəkə piya ci mbə mazə niy nza na ghalaɓa.
31 Nahuti kumaa tərmbəə dzəkən mazə Pekay, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na gwanashi.
Yutam məni mazə dzəkən ka Zhuda
( 2 NəMezh 27.1-3,7-9)
32 Ma Peka zəghu Remaliyahu mbə məni kwa baka piya ci mbə mazə dzəkən ka Izərayel na, mbaʼ məndi pəərəti Yutam zəghu Azariyas ka mazə tsaa sləkə ka Zhuda. 33 Ghala vəghu tsa pəərə məndiy, piya bakəmətsəkə cifəti niy nza sa ci. Dzəghwa na mbaʼ mənti piya məŋ lə kwaŋ mbə mazə. Mbə məlmə Zheruzalem niy nza na lə nziy tsa ci. Yerusha niy nza slən tsa mbəghiy, zha Saduk niy nza na. 34 Kuma wəzə na niy məni Yutam kwa kuma Kwa sləkəpə. Nja Azariyas diy tsa va niy məni na kuma. 35 Ya tsəgha nzə kiy, war ghulashi niy nza pihiy niy gumati məndi va ta ta hiyalahi ti shi. War mbə dza niy nza mbəzli dzəti shi ta vəlanta shiy lə ta ndanta shiy zən nja urdi kaa Hiyala.
Yuram tsa va ngati na gəzli məɓa məɓa va tə ghən miy ghyi tsa Kwa sləkəpə.
36 Nahuti kumaa tərmbəə dzəkən mazə Yutamiy, kwa zliya: “Kuma mənəhu mezhizhi ka Zhuda” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na. 37 Ghala vəghu tsaa məni Yutam maziy, mbaʼ Kwa sləkəpə ghati ghuni kar Reshin mazə ka Shiri ghəshi lə Peka mazə ka Izərayel ta mbəzə lə ka Zhuda. 38 Ma sa mətiy mazə Yutam na, mbaʼ məndi dzaa lanti kwa kuli jijihiy, mbə məlmə Davitə. Mbaʼ zəghu ci Akaz mbərəhu məni mazə kwa pi tsa ci.