2 Mazə 16

Akaz məni mazə dzəkən ka Zhuda

( 2 NəMezh 28.1-27)

Ma Peka zəghu Remaliyahu mbə məni kwa məŋ lə mbərfaŋa piya ci mbə mazə dzəkən ka Izərayel na, mbaʼ məndi pəərəti Akaz zəghu Yutam ka mazə tsaa sləkə ka Zhuda. 2 Piya bakəmətsəkə niy nza sa ci ghala vəghu tsa pəərə məndi. Piya məŋ lə kwaŋ niy mənti na mbə mazə. Mbə məlmə Zheruzalem niy nza na lə nziy tsa ci. Kuma gəmgəm na niy məni na. Niy məni kuma na wuzə kwa Kuma Hiyala ci Kwa sləkəpə njasa niy məni jijiy Davitə vaw. 3 Na gəmgəm na va kuma niy məməni mezhizhi ka Izərayeliy, ghənzə niy məni na. Paʼ lə zəghu ci ta niy ndəhu na kaa hiyalaa kama ka Hiyala kataŋ na. Kuma vay, kuma jikikir na niy nza na kwa kuma Kwa sləkəpə. Kumaa niy məməni hulfəhi mbəzliy niy tahanti Kwa sləkəpə va tə hiɗi shi, ta nziy ka Izərayel ti shi niy nza sava. 4 A mazə Akaz niy slaslahu shiy, ka ndi shiy zən nja urdi kaa hiyalahi dzar tə pəhiy niy gugumati məndi va ta ta hiyalahi dzar ti shi, mbaʼ dzar mə hum pihi, mbaʼ dzar tə pi tsa nza fəhi ghuvə ghuvə ni.

5 Dza kar Reshin mazə ka Shiri ghəshi lə Peka mazə ka Izərayel zəghu Remaliyahu mbaʼ ghəshi kafəshi lə ka sawjihi shi ta mbəzə lə Akaz mazə ka Zhuda lə ni ci ka sawji. Mbaʼ ghəshi dzəməə dəzlay məlmə zhəruzalem pəslishi ti shi. Shaŋ ghəshi ta mbashi. 6 Geʼi lə vəghu tsa va diɓay, dzəghwa Reshin mazə ka Shiri mbaʼ zhinəhu məlmə Eyilat ta nza ghənzə mbə dəvə ka Shiri. Mbaʼ tahanti mbəzli ka Zhuda mbə məlmə va, mbaʼ mbəzli ci ka Edum, zhikəə nziyshi mbəɓa paʼa va vəghu tsa ndatsə.

7 Dzəghwa Akaz mazə ka Zhuda mbaʼ ghunashi mbəzli va Tiglat-Pileser mazə ka Ashiri ta gəzanci kuma. Ma kə kaa ngəshi na: «Mbalam kəsayim mazə ka Ashiri, ma pə ghuy kaa ngəciy: “Ndə sləni tsa gha nzee, zhini zəghu ghee. Avanashi kar mazə ka Shiri lə mazə ka Izərayel pəslishi tə ya. Səəkə a gha mbəlantəra mbə dəvə shi, kə Akaz mazə Ka Zhuda,”pə ghuy kaa ngəci,» kə kaa ngəshi. 8 Dza na kaa mbəzə kwa shamshama lə gənaa niy nza kiy ghyi tsa Kwa sləkəpə, mbaʼ mbə ciki tsa ka məndiy fə shi gaga ni kiy ghyi tsa mazə, laŋ ɓəvəshi, mbaʼ vəlanati vəli li shi kaa mazə ka Ashiri. 9 Dza mazə tsa va mbaʼ zləɓavə kuma ci va, mbaʼ dzaa pəsliy ta məlmə Damas, zləghuʼ zləghuhu, mbaʼ kəəsəhu mbəzli mbəɓa ka mevivi dzay li shi dzəmbə məlmə Kir. Ma Reshin mazə ka Shiri na, mbaʼ paslanti.

10 Liy hum ki na, mbaʼ Akaz mazə ka Zhuda tsəhiy mbə məlmə Damas ta kumə ghəshi lə Tiglat-Pileser mazə ka Ashiri. Sa tsəhiy na na, mbaʼ nay pi tsa ka məndi vəlanta shiy kaa hiyalaa kamaa Hiyala kataŋ na mbə məlmə Damas. Dza na mbaʼ tsaslati pa pi tsa va tə zliya lə njasa ngati məndi gwanay tsa ci. Dza na mbaʼ vəlanaghə dzəmbə məlmə Zheruzalem kaa Uriya ndə ta Hiyala nza ghəci ngati pi tsa dza məndiy vəlanta shiy kaa Kwa sləkəpə war tsəgha. 11 Dza Uriya ki, mbaʼ ngati tsahuti pi tsaa vəli shiy kaa kwa sləkəpə, njasaa niy tsaslanakə mazə Akaz va mbə məlmə Damas. Zhəghəva mazə Akaz səəkə mbə məlmə Damasiy, ghəci kəranti ngaci niy nza na. 12 Sa zhəghəkəvay mazə mbə məlmə Damas na, mbaʼ nay pi tsa va, dza na kəətə kətəghəvay dzəvəgha, ɗal dzəmiy dzəmə pi tsa va. 13 Dza na dəʼu ghən tsa ci ndiʼ ndanati shiy kaa Kwa sləkəpə ti, vəliʼ kaa ghupə mbaʼ tay. Mbaʼ sliy shiy ta zərkə, mbaʼ məsiy miymiy shi slanti na va dzar tə pi tsa ka məndi vaa vəlanta shiy kaa Kwa sləkəpə. 14 Dza na diɓa, mbaʼ gəzanshi kaa mbəzli, mbaʼ məndi ɓanti pi slasla shiy tsa mənti məndi va tə mbəzə ghəm na niy nza kwa kuma Kwa sləkəpə. Kwa miy pi tsaa dzəmbə ciki Hiyala, kwa jipə kar yəwun pi tsa ngati məndi va ta vəlanta shiy kaa Kwa sləkəpə ti lə ghyi tsa Kwa sləkəpə niy nza na. Sa ɓanti məndi tiɓa ki na, mbaʼ məndi fiy liy hum yəwun pi tsa va dza kwa bəlaa dzati muw. 15 Liy hum ki, ma kə mazə Akaz kaa Uriya ndə ta Hiyala na: «Nanay tə tsa dikə tsa va pi pə gha dzaa vəlanta shiy kaa Kwa sləkəpə. Ti pə gha dzaa ndanta shi ka məndi vaa ndanta mekəshi lə shi ka məndiy vəlanta hetihuer. Ti pə gha dzaa ndi shi ka mazə ndanta lə shi ka naa vəlanta. Ti pə gha dzaa ndi shi ka mbəzli ndanta lə shi ka ghəshiy vəlanta, mbaʼ tay tsa ka ghəshiy vəlanta diɓa. Dzəti pə gha dzaa shəkati miymiy dəmbəkə tsa dza məndiy ndanta lə shi nihuti shi dza məndiy slaslanta gwanashi diɓa. Ta na pi vəli shiy tsa mənti məndi va tə mbəzə ghəm nay, yən dza naa nighəə dzəkən shi dza məndiy məni li,» kə.

16 Dzəghwa Uriya ndə ta Hiyala ki, mbaʼ mənti kuma gəzanakə mazə Akaz va gwanata. 17 Zhini mazə Akaz diɓa mbaʼ gəzanshi kaa mbəzli, mbaʼ məndi ndananti kadərhi mutiti gədewesliy niy mənti məndi va kiy ghyi tsa Kwa sləkəpə. Mbaʼ məndi ɓanti ceʼueriy niy nza kwa mutiti gədewesli va. Ɓəʼ məndi ɓəkəghwa tsəʼu tsa dikə tsa va niy fati məndi tə shi vasəti məndi va tə mbəzə ghəm na məŋ lə bakə ni, nja pa slay, bəm məndi fatiy dzəti hərezli ndəɓəti məndi. 18 Dza na diɓa, kiy ghyi tsa Kwa sləkəpə mbaʼ mbaranti ciki vici dəkəva tsaa niy ngati məndi va kiyɓa, mbaʼ mbaranti miy dəgha ka mazə vaa dzakə ghyi tsa Kwa sləkəpə kwa. Va mazə ka Ashiri niy mənti na tsəgha. 19 Nahuti kumaa tərmbəə dzəkən mazə Akaziy, kwa zliya: “Kuma mənəhu mezhizhi ka Zhuda” tsaslaghwa məndi. 20 Sa mətiy na na, mbaʼ məndi dzaa lanti kwa kuli jijihiy mbə məlmə mazə Davitə. Dza zəghu ci Ezekiyas mbaʼ mbərəhu məni mazə kwa pi tsa ci.