1 Mazə 1

Kwa taŋa zliya

Mezhizhi

Kuma mananci məndi kaa Davitə sa haliy na

Nanay, a mazə Davitə niy haliy, ɗaŋ niy nza piya ci. Ya njaa niy pəlanakən məndi shiyiy, war mbə mananci niy nza tasli. 2 Va tsəgha ki, ma kə mbəzliy ghəranci sləni kaa ngəci na: «A mazə ndə sləkəŋiy, wəzəɓa dza məndiy pəlakəŋa zhaa səəkə maa sənay zal na, nza ghənzə nza vəgha gha, ka nighəə dzəkən gha, nza ghənzə həni mbə hur gha. Ghalaɓay, dzəkə dzəkə dza ghaa favə vəgha gha,» kə ghəshi. 3 Dza məndi ki, ka dza ta pəla zhaa təɓə tə hiɗi ka Izərayel gwanashi. Mbaʼ məndi kumavə Avishag zha ka Shunem, mbaʼ məndi pəmanakə kaa mazə. 4 Zha vay, zha kiyas niy nza na. Dza na mbaʼ nziyta ghəshi lə mazə, ka nighə ghənzəə dzəkən ki. Ə na na nza nay, niy həni mazə liw.

Aduniyas zəghu Davitə ɗi mbərəhu mazə tsa diy

5 Aduniyas, kə məndi niy ni kaa slən tsa tsahuti zəghu Davitə, kwa Hagitə niy yavə na. Dza na mbaʼ məntəvay nja ntsaa dzaa mbərə mazə tsa diy, ma kə na: «Yən dza naa nzaa mazə,» kə. Dza na mbaʼ pəlavə muwta gəduw ci, mbaʼ gədewesli, mbaʼ mbəzli cifəmətsəkə ta kəsli bali kwa kuma muwta gəduw ci va. 6 Zəghu ka təɓə təruŋ niy nza Aduniyas tsa va. Liy hum məndi yakə Abəsaluŋ niy yakə na ci mbəghiy. Ghala yakə məndiy, səəkə diy naɓəhuw. Səəkə naa gəzanakə «Tawa mənti gha shi tsaʼ ni vaa?» kə kaa ngəciw. 7 Dza na ki, ka dzəghə pəhə kuma ghəshi lə kar Zhəwabə dikə tsa ka sawji, zəghu Seruya, mbaʼ Abiyatar ndə ta Hiyala. Mbaʼ mbəzli va zləɓavə nza kwasəbə ci. 8 Ma na kar Saduk tsahuti ndə ta Hiyala, mbaʼ Benayahu zəghu Yehuyada, mbaʼ Natan ndə gəzə kuma Hiyala, mbaʼ Shimeya, mbaʼ Reyi, mbaʼ ka sawjiy ndəghu Davitiy, niy nza niva mbəzli kwasəbə Aduniyasuw.

9 Dzəghwa Aduniyas tə nahuti vici ki, mbaʼ mənti makwagha dikə na vəgha kəlɓa ka səɗa mbəzli vaa fəlaɗi ghəshi mbə dzar ti, vəgha yam har məndi vaa Eyin-Ruguwel. Dza na mbaʼ sləsliy shiy kaa Hiyala, tembekesli lə kəɓəhi, mbaʼ nihuti dəmbeker kəli kəli ni. Mbaʼ harashi ngwardiy, njasa yakəshi mazə gwanashi, mbaʼ mbəzli dikə dikə ni ghəra sləni kaa mazə mbə takə tsa Zhuda gwanashi. 10 Ma kar Natan ndə gəzə kuma Hiyala mbaʼ Benayahu, mbaʼ ka sawjiy ndəghu mazə, mbaʼ Saləmuŋ zədiy na, kala har ma niva ghəci.

Natan Kəsata Batəsheba ta canta tsəhuli

11 Dzəghwa Natan ndə gəzə kuma Hiyala mbaʼ dzaa kəsata Batəsheba mbəghiy Saləmuŋ. Ma kə kaa ngəta na: «Favə gha a Aduniyas zəghu Hagitə fiy ghən tsa ci ka mazə kala sənay ma ndə sləkəŋiy mazə Davitə pə gha sa? 12 Avee dza ciŋa kuma, ta mbə ghaa mbəlanti piy tsa gha lə sa zəghu gha Saləmuŋ. 13 Mbala kəsay mazə Davitə. A pə gha dzaa niy kaa ngəciy: “A mazə ndə sləkəra, niy gəzəkəra gha yən kwa sləni gha zəməʼ kaa fəla, zəghuee Saləmuŋ dzaa naa məni mazə liy hum gha, ghəci dza na ta nziy kwa gəzli mazə gha, pə gha niy ni sa? Njaa zhini Aduniyas məni mazə diɓa kiyaa?” pə gha dzaa ni kaa ngəci. 14 war gha ghulaŋa mbə gəzə kuma va kaa maziy, ta tsəhəra dzee tə səəbə gha, mbaʼee mətsahanavə bərci kaa kuma gha va,» kə.

15 Dza Batəsheba mbaʼ dzaa kəsay mazə ki. Mbə cikə tsa ci niy nza na, sa niy nza na təruŋ ghəci niy haliy. Avishag zha ka Shunem niy nighə naa dzəkən. 16 Dza Batəsheba tsəfəku tsəfəkuta kwa kuma mazə, gaʼ kuma nzə mbə hiɗi. Ma kə mazə kaa ngəta na: «A shi ɗi ghaa?» kə. 17 Ma kə na: «A ndə sləkəra, a gha niy zəməkəra fəla yən kwa sləni gha lə slən tsa Kwa sləkəpə Hiyala gha, zəghuee Saləmuŋ dzaa naa məni mazə liy hum gha, ghəci dza na ta nziy kwa gəzli mazə gha, pə gha niy ni. 18 Avanay sana kiy, a Aduniyas məniy ka mazə, kala sənay ma gha, gha mazə ndə sləkəra. 19 Ava ci mənti makwaghwa təruŋ, mbaʼ sləsliy kəɓəhi ɗaŋ, mbaʼ nihuti dəmbeker kəli kəli ni, mbaʼ tembekesli. Dza na mbaʼ harashi ndərazhi gha gwanashi, ghəshi lə kar Abiyatar ndə ta Hiyala, mbaʼ Zhəwabə dikə tsa ka sawji. Ma ndə sləni tsa gha Saləmuŋiy, har na ta makwaghwa vaw. 20 Sana kiy mazə ndə sləkəray, ntsa dza ghaa gəzanakəshi “Zana dza na ta nziy kwa gəzli mazə liy humee,” pə gha, na sa ndəghə ka Izərayel gwanashi. 21 Kala tsəgha, sa dza ghaa kalay mətsə ghay mazə ndə sləkəray, njasa ka məndiy məni lə ka rəɗa dza məndiy mənti lə ghiy, ghiy lə zəghuee Saləmuŋ» kə.

22 War ghənzə ghulata mbə gəzə kuma lə mazə ki na, mbaʼ Natan ndə gəzə kuma Hiyala tsəhiy. 23 Mbaʼ məndi gəzanci: «Ava Natan ndə gəzə kuma Hiyala səəkiy,» kə məndi kaa mazə. Dza Natan mbaʼ tsəhiy kwa kuma mazə, gələɓə gəlɓiy gaʼ kuma ci mbə hiɗi. 24 Ma kə ki na: «Ana mazə ndə sləkəra, gha nə na: “Aduniyas dzaa naa məni mazə liy humee, ghəci dza naa nziy kwa gəzli mazee,” pə gha na? 25 Aa dzəghway dzəghwa haku tsa har məndi vaa Ayin-Ruguwel ndatsə. Mbaʼ sləsliy kəɓəhi, mbaʼ nihuti dəmbeker kəli kəli ni, mbaʼ tembekesli ɗaŋ. Mbaʼ harashi ndərazhi gha gwanashi, mbaʼ ka sləkə ka sawji, mbaʼ Abiyatar ndə ta Hiyala. Ava shi mbə zəmə shiy, ka sa shiy kwa kuma ci. “Bitə kə piy tsa mazə Aduniyas, bitə kə piy tsa mazə Aduniyas,” kə ghəshi. 26 Ma yən ndə sləni tsa gha, mbaʼ Saduk ndə ta Hiyala, mbaʼ Benayahu zəghu Yehuyada, mbaʼ zəghu gha Saləmuŋiy, harŋiy naw. 27 Səəkə va mazə ndə sləkəra səəkə məni kuma va tsəgha kataŋ na? Sa wa na gəzara ma gha yən ndə sləni tsa gha: Zana dza na nziy kwa gəzli mazee liy hum tsee, pə gha kiya?» kə

Mazə Davitə tivə Saləmuŋ ta məni mazə kwa səɗa ci

28 Ma kə mazə Davitə ki na: «Zhəghəkəram Batəsheba,» kə. Mbaʼ məndi dzaa zhəghəkə, mbaʼ zhəkətaa dzəghwa kuma mazə. 29 Dzəghwa na hwaʼ zəmanakə fəla. Ma kə kaa ngəta na: «Ava Kwa sləkəpəə mbəlantəra va mbə ngəreʼuer ɗaŋ tiɓa ka favə. 30 Yən gəzəŋa na, njasa niy zəməkəŋee va fəla kwa kuma Kwa sləkəpə Hiyala ka Izərayel: “Zəghu gha Saləmuŋ dza naa məni mazə liy humee, ghəci dza na ta nziy kwa gəzli mazee” pən niy niy, ta mənti kuma va dzee ndatsə ndatsə vici,» kə. 31 Sa gəzəkə mazə kuma va tsəgha ki na, dza Batəsheba tsəfəku tsəfəkuta tə shinin nzə, gaʼa kuma nzə mbə hiɗi kwa kuma ci. Ma kə na: «Bitə kə piy tsa ndə sləkəra mazə Davitə ya paʼa humɓa,» kə.

32 Zhəghwa ma kə mazə Davitə ki na: «Mbalam harashiɗam kar Saduk ndə ta Hiyala lə Natan ndə gəzə kuma Hiyala, mbaʼ Benayahu zəghu Yehuyada,» kə. Mbaʼ məndi dzaa haranakəshi. 33 Ma kə kaa ngəshi ki na: «Mbalam ɓasətim mbəzliy ghəraɗa sləni, nza ghuy famə zəghue Saləmuŋ mə alfadari kee vaa dza mə, nza ghuy dza liy dzəghwa pi tsa har məndi vaa Gishuŋ. 34 Sa ka ghuy tsəhəŋuyiy, nza kar Saduk ndə ta Hiyala ghəshi lə Natan ndə gəzə kuma Hiyala shəkambə in dzəghwa mbə ghən ci, ta pəərə ci ka mazə tsaa sləkə ka Izərayel. Ma nza ghuy viyata təlimə, ka ngumə lala, ka gəzə zlaŋzlaŋ: “Bitə kə piy tsa mazə Saləmuŋ, bitə kə piy tsa mazə Saləmuŋ,” pə ghuy dzaa ni. 35 Sa ka ghuy dzay, ka zhikəməŋuy kwasəbə, nza ghəci səəkəə nziyiy kwa gəzli mazee. Ghəci dza naa məni mazə kwa səɗee. Ghəci na sa fiyee ka mazə tsa ka Izərayel lə ka Zhuwda,» kə. 36 Ma kə Benayahu zəghu Yehuyada kaa mazə na: «Tsəgha dza na ta məniva! Hiyala gha Kwa sləkəpə faghwa na kuma va kwa miy tsa gha mazə ndə sləkəra. 37 Njasa niy nza na va lə ghay, tsəgha kə dzaa nziyta lə Saləmuŋ. Tərəŋuɓa tə mazə tsa ci kə dzaa fati shəndəkə kən tsa gha Davitə mazə ndə sləkəra,» kə.

( 1 NəMezh 29.21-25)

38 Dzəghwa kar Saduk ndə ta Hiyala ghəshi lə Natan ndə gəzə kuma Hiyala, mbaʼ Benayahu zəghu Yehuyada, mbaʼ ka kəretə lə ka Peletəə ndəghu mazə va, mbaʼ ghəshi dzaa kəsay Saləmuŋ. Dza ghəshi ɗal ghəshi famə mə alfadari ka mazə Davitəə dza mə, mbaʼ ghəshi dzəghwashi liy dzəghwa pi tsa har məndi vaa Gishuŋ. 39 A Saduk ndə ta Hiyala niy ɓəvə in kwa təlimə mbə ciki gamtaʼwal tsa Kwa sləkəpə. Dza na naʼi shəkambə dzəghwa mbə ghən Saləmuŋ ta pərə ci ka mazə. Dza məndi mbaʼ məndi viyata təlimə. Ma kə mbəzliy niy nza tiɓa gwanashi zlaŋ zlaŋ na: «Bitə kə piy tsa mazə Saləmuŋ, bitə kə piy tsa mazə Saləmuŋ,» kə ghəshi. 40 Dza mbəzli gwanashi ki, ka zhiməə dzəmbə məlmə kwasəbə Saləmuŋ. War ə mbəzliy viy sherey ka vəshi təruŋ, paʼ ka gərəgərə hiɗi va lala shi.

Saləmuŋ pəlay zəmbəghiy Aduniyas mbə nəfə ta ci

41 Ma kar Aduniyas lə mbəzli harashi na ta makwaghwa mbə kərni zəmə shiy ki na, mbaʼ ghəshi favə gaka lala va. Mbaʼ Zhəwabə favə ya gəla gaka viy təlimə va. Ma kə na: «A shiy mənishi nza gaka tsəgha mbə məlmaa?» kə.

42 War ghəci ghulay mbə ɗuw kuma va na, mbaʼ Yunatan zəghu Abiyatar ndə ta Hiyala səəkiy. Ma kə Aduniyas kaa ngəci na: «Ndi, ndə ka haʼu məndi ti nza gha. Ya njaɓay, bar tsa wəzə tsa na sa ɓəkə gha,» kə. 43 Ma kə Yunatan kaa ngəci na: «Tiɓaw, Saləmuŋ pəərəti Davitə mazə ndə sləkəmmə ka mazə kwa səɗa ci. 44 Aa ghunashi kar Saduk ndə ta Hiyala lə Natan ndə gəzə kuma Hiyala, mbaʼ Benayahu zəghu Yehuyada, mbaʼ ka kəretə lə ka Peletə kwasəbə, mbaʼ ghəshi famə mə alfadari ka mazə vaa dza mə. 45 Dzəghwa kar Saduk ndə ta Hiyala ghəshi lə Natan ndə gəzə kuma Hiyala mbaʼ ghəshi shəkambə in dzəghwa mbə ghən ci kwa Gishuŋ ta nza ghəci ka mazə. Liy hum ki na, dza mbəzli ka zhəkəməshi lə ngumə lalaa dzəmbə məlmə. War ə mbəzli mbə məlmə gwanashiy vəshi. Ghənzə na gaka favə ghuy va. 46 Mənziy na Saləmuŋ kwa gəzli mazə sana. 47 Zhini diɓa ki na, mbaʼ mbəzliy ghəra sləni kaa mazə səəkəshi ta fal Davitə mazə tsa ghummə. Ma kə ghəshi kaa ngəci na: “Nza Hiyala gha fati dikə tə Saləmuŋ taŋ kaa tsa gha va, mbaʼ Fati shəndəkə tə mazə tsa ci ka taŋəti tsa gha,” kə ghəshi. Mbaʼ mazə tsəfəkuy ghəci tə pi həni tsa ci. 48 Ma kə na: “ʼWəsa nə ya kaa Kwa sləkəpə Hiyala ka Izərayel, sa nza na mbaʼ ghənzə tivə ndə ta mbərə nziy ghəci kwa gəzli mazee ndatsə, mbaʼee nay lə mətsee” kə,» kə.

49 Sa favə mbəzli harashi Aduniyas va kuma va ki na, mbaʼ her shi dzashi. Mbaʼ ghəshi kafəshiy ndanishi, ya wa ndə na, ka dzay kwa tsa ci kwal. 50 Ya Aduniyas dəʼu ghən tsa ci na, mbaʼ her ci dzashi va Saləmuŋ, va tsəgha ki na, mbaʼ dzaa mbiy vəgha pi tsa ka məndi vəlanta shiy kaa Hiyala, baŋ kəsəvə shi manati məndi va ti nja təlimim ni. 51 Dza tsahuti ndə mbaʼ səəkəə gəzanci kaa Saləmuŋ. Ma kə na: «A Mazə saləmuŋ, ava Aduniyas dzaa kəsəvə shi nja təlimim ni va tə pi tsa ka məndiy vəlanta shiy kaa Kwa sləkəpə sa hazləniy na va gha. Ma kiy: “Kala gəzəkəra kə mazə Saləmuŋ ndatsə, yən ndə sləni tsa ci: ka pəəsliŋa yaw, kiy, ka ɓarvee tə pi tsaw,” kə,» kə ntsa va. 52 Ma kə Saləmuŋ na: «Mbaʼ kə dzaa məni kuma nja ntsa wəzə tsay, ka dza məndiy ngati ya lə pəlaw. Ma mbaʼ kə dzaa məni kuma gəmgəm na ya juwiy, ta pəsliti dza məndi,» kə.

53 Liy hum ki na, dza mazə Saləmuŋ mbaʼ ghunay ndə ta dzaa kəsəkəghwa Aduniyas mə pi tsa ka məndiy vəli shiy kaa Kwa sləkəpə. Dza na mbaʼ səəkəə tsəfəkuy kwa kuma mazə. Ma kə mazə Saləmuŋ kaa ngəci ki na: «Mbalaa jighi,» kə kaa ngəci.