1 Mazə 2

Davitə gəzanci kuma dza Saləmuŋ məni liy hum ci

Sa favə mazə Davitə va vəgha ci tərə vəcee ɗaŋ tə ghumuw, kə na, dza na ka gəzanci kwa kərni kuma ci kaa zəghu ci Saləmuŋ. Ma kə na: 2 «Ɗaŋ tərə vicee tə ghumuw, əntaa her gha dza va kuma ma, nja zal pə gha dzaa məni kuma. 3 Əntaa gha zhəghanavə hum kaa kuma gəzəkə Kwa sləkəpə Hiyala gha ma, kwal tsa nzə pə gha dzaa nuw, ka nuw kuma pəhəti na, lə kuma gəzə na məni nzə, ka nziy njasa gəzəkə na, ka nuw kuma ɓəniŋa na, njasa tsasliti məndi va kwa zliya kuma pəhəti Muyizə. Ghalaɓay, ta dzava dza kuma məni gha gwanata, ya dza kwa namaɓa bəla. 4 Ma nza Kwa sləkəpə məni kuma gəzəkəra na va niy nə na: “Mbaʼ kə ndərazhi gha dzaa məni məhərliy dzəkən nziy tsa shi, ka məni kuma wəzə na kwa kumee lə nəfə tsa shi gwanay, lə məhərli shi gwanatay, war ntsa kwa miy dəgha gha dza naa məni mazə dzəkən ka Izərayel liy hum gha” kə. 5 Zhini diɓay, a gha sənata kuma məntəra Zhəwabə zəghu Seruya, ghəci bakwanti na kar Avəner zəghu Ner ghəshi lə Amasa zəghu Yeter mbəzliy niy sləkə ka sawji ka Izərayel. Məndi mbə zərkə niy bakwantishi na, njasa nza məndi mbə mbəzə. Kən ghən tsa ci kutiy na kuma bəku mbəzli bakə ni va. 6 Nza gha sənay njasa dza ghaa məni li, əntaa gha zlay haliy, ka məti lə zərkə ma. 7 A na ndərazhi Barzilay ndə ka Galad na shiy, kuma wəzə na pə gha dzaa mananshi. Mbə mbəzliy dzaa zəmə shiy lə gha kə ghəshi dzaa nza. Sa nza nay, a ghəshi niy məntəra kuma wəzə na ghala vəghu tsaa niy hwee va va zədəŋa Abəsaluŋ. 8 Ava Shimeya zəghu Gera, ntsa mbə takə tsa Bənjameŋ ndə ka Bahurim tsa vəgha gha va na tsahuti ɗiɓa. Aa niy tsəərətəra jikirkirkir fəcaa niy hwee vaa dzəmbə məlmə Mahanayim. Ma yən mbə zhəghəvaa zhikiy, mbaʼ niy səəkiy dzəmiy həl Zhurdeŋ ta kaʼura. Mbaʼee niy gəzanakə: “ka pəəsliŋa yaw” pən kaa ngəci kwa kuma Kwa sləkəpə. 9 Nanay, əntaa gha ɓəti nja ntsa kama fəti və ma, ee sənay, ndə ka sənata kuma nza gha, nza gha sənay njasa dza ghaa məni li. Ya tsəgha naa pəhaliy, pəəsliti tə gha» kə Davitə kaa Saləmuŋ.

Davitə mətiy, mbaʼ Saləmuŋ mbərəhu mazə

( 1 NəMezh 29.26-28)

10 Dzəghwa ki, mbaʼ Davitə mətiy, mbaʼ məndi lanti mbə Məlmə Davitə. 11 Piya faɗəmətsəkə niy mənti na mbə sləkə ka Izərayel. Piya mbərfəŋ niy mənti na mbə məlmə Hebruŋ lə nziy tsa ci, piya mahəkanəmətsəkə mahəkanti mbə məlmə Zheruzalem. 12 Liy hum ci ki na, mbaʼ zəghu ci Saləmuŋ mbərəhu mazə, mbaʼ mazə tsa ci nziyiy lə bərci mbə təruŋ.

Məti Aduniyas

13 Dzəghwa Aduniyas zəghu Davitə va yanakə Hagitə mbaʼ səəkəə kəsata Batəsheba mbəghiy Saləmuŋ tə nahuti vici. Ma kə mali va kaa ngəci na: «Kuma wəzə na ɓəkəŋa na viya na?» kə. «Yə,» kə Aduniyas. 14 Ma kə diɓa na: «Ta ɗuw kuma səəkee va gha» kə. «Tsəgha na, ɗuw kuma gha» kə mali va. 15 Ma kə ki na: «A gha sənay ya gha, see niy nza mazə, pə gha. Gwanashi tsa ka Izərayeliy, yən dza məndi ta pəərə niy nə ghəshi. Dza məni mazə mbaʼ waslantəvay viya, mbaʼ dzay va zədirə, sa nza na tsəgha Kwa sləkəpə tarəkə. 16 Sana kiy, kuma kutiŋ na sa ɗee gha məntəra, titihu əntaa gha ni aw pə gha ma,» kə. «Gəzə kuma ɗi gha va,» kə mali va kaa ngəci. 17 Ma kə na: «Ə cəʼuŋee a gha dzaa gəzanci kaa Mazə Saləmuŋ a ghəci ndara Avishag zha ka Shunam va, ta nza ghənzə ka malee, ka dza naa ni, aw kə kaa ngəŋaw,» kə. 18 Ma kə Batəsheba kaa ngəci na: «Wəzaa nava, ta tsəhəra dzee dəʼu ghən tsee va mazə, ta gəzanci kuma gha va,» kə.

19 Liy hum ki na, mbaʼ Batəsheba dzataa dzakə ghyi tsa mazə Saləmuŋ ta gəzanci kuma Aduniyas va. Sa tsəhəta na na, mbaʼ mazə kafiy ta kumə li, tsəfəku tsəfəkuy kwa kuma nzə. Mbaʼ nziyiy kwa gəzli mazə ci, mbaʼ fəniy na nzə gəzli kaa mbəghiy va tar kwa bəzəmə ci, mbaʼ nziyta kwa. 20 Ma kə kaa ngəci ki na: «Kuma jiwu na sa səəkee va ta ɗuw a gha məntəra. Titihu əntaa gha ni aw pə gha ma,» kə. «Ɗuw kuma gha, ta məntəŋa dzee mə,» kə mazə. 21 Ma kə kaa ngəci ki na: «Nza ghaa nza gar ɓanavə Avishag zha ka Shunam va kaa zədəŋa Aduniyas ta nza ghənzə ka mali ci na?» kə. 22 Ma kə Saləmuŋ kaa mbəghiy na: «Tawa ɗuw gha kwataka Avishag zha ka Shunam kaa Aduniyas kiya? Əə gha dzaa ɗuwanci lə mazə ta njana nza na ghəci sa dikə tsa kənee fələghən sa. Mazə ka gha ɗewanshi ghəshi lə kar Abiyatar ndə ta Hiyala mbaʼ Zhəwabə zəghu Seruya,» kə. 23 Dzəghwa na mbaʼ zəməkə fəla lə slən tsa Kwa sləkəpə, ma kə na: «Nza Kwa sləkəpə slakənɗa nguvəə gura jikir na Aduniyas kə kala jighiy mbə gəla kuma ɗuw na na. 24 Ava Kwa sləkəpə tiɓa ka favə. Ghənzə faghwara na kwa gəzli mazə dirə Davitə, mbaʼ fambə məni mazə mbə dəvə mbəzli kwa miy dəghee, njasa niy gəzəkə na va. Ndatsə ndatsiy, mbəri dza Aduniyas nza,» kə 25 Dza na mbaʼ ghunay Benayahu zəghu Yehuyada ta məni kuma gəzəkə na va. Mbaʼ Benayahu dzaa paslanti Aduniyas.

Saləmuŋ tahanti Abiyatar mbə məlmə Zheruzalem

26 Liy hum ki, ma kə Mazə Saləmuŋ kaa Abiyatar ndə ta Hiyala na ci ki na: «Mbala dzəti hiɗi gha Anatut. Ndə gar pəəsli nza gha kuraku, ə na nzanay, ka ɗi pəəsliŋee ndatsəw. Sa nza nay, gha niy dza na lə sərndəkə sla kiri tsa Hiyala Kwa sləkəpə kwa kuma dirə Davitə, mbaʼ gha sahu ngəreʼuer sahu na gwanashi kwasəbə,» kə. 27 Dza Saləmuŋ ki, mbaʼ ɓanti Abiyatar mbə sləni ta Hiyala. Mbaʼ kumaa niy gəzəkə kwa Sləkəpə vaa dzəkən miy dəgha Eli mbə məlmə Silu dzəghwata kwa tsəgha ki. 28 Mbaʼ məndi dza gəzanci kuma mənti məndi va kaa kar Aduniyas lə Abiyatar kaa Zhəwabə. Sa sənay na ntsa kwasəbə Aduniyas niy nza na, niy nza na kwasəbə Saləmuŋuw, kə na, dza na mbaʼ huy dzəmbə gaska Kwa sləkəpə mbaʼ dzaa kəsəvə shi mənti məndi va nja təlimim ni mə pi tsa ka məndiy vəlanta shiy kaa Hiyala. 29 Mbaʼ məndi dzaa gəzanci kaa mazə Saləmuŋ: «Ava Zhəwabə huy dzəmbə gaska Kwa sləkəpə mbaʼ nziyiy vəgha pi tsa ka məndiy vəlanta shiy ti kaa Hiyala,» kə məndi. Dza na mbaʼ ghunay Benayahu zəghu Yehuyada ta dza ghəciy pəəsliti. 30 Dza Benayahu mbaʼ tsəhiy mbə gaska Kwa sləkəpə. Ma kə kaa Zhəwabə na: «Səvəri mbəkə, kə mazə,», kə kaa ngəci. Ma kə na: «Ka dzəvəri yaw, tikə dzee məti,» kə. Dza Benayahu mbaʼ dzaa gəzanci kuma gəzəkə Zhəwabə va kaa mazə. 31 «Mbala paslanti njasa gəzəkə na va, nza gha lanti. Ghalaɓay ka dza nguvə məti mbəzli bakə ni va bakwanti na tə gəm nza kənee ghiy lə mbəzli kwa miy dəgha dirəw. 32 Dzəkən dza Kwa sləkəpəə ɓasakən nguvə məti mbəzli va, kar Avəner zəghu Ner ntsa niy sləkə ka sawji ka Izərayel ghəshi lə Amasa zəghu Yitəra ntsaa niy sləkə ka sawji ka Zhuda. Sa nza na ghəci bakwantishi lə kafaʼi kala sənay ma dirə. Zhini mbəzliy nuw kuma lə kwal, wəzəɓa ghəshi kaa ngəci mbəzli va niy nza. 33 Kən kar Zhəwabə lə mbəzli kwa miy dəgha ci kə nguvə ta kuma mbəzli va ya paʼa humɓa. Ta na na kar Davitə lə mbəzli kiy ghyi tsa ci, lə mbəzli kwa miy dəgha ci, mbaʼ mbəzliy dzaa nuw lə zəmə ghyi ta mazə tsa ciy, ta mananatishi wəzə dza Kwa sləkəpə ya paʼa humɓa,» kə. 34 Dza Benayahu mbaʼ zhaa kəsay Zhəwabə mbaʼ ndəghakənvay kən pəəsliti. Mbaʼ məndi dzaa lanti kiy ghyi tsa ci mbə gamba. 35 Dza mazə ki, mbaʼ mbaranavə sləkə ka sawji kaa Benayahu zəghu Yehuyada kwa pi tsa ci. Ma Saduk na, ndə ta Hiyala kwa pi tsa Abiyatar.

Saləmuŋ paslanti Shimey

36 Liy hum ki na, mbaʼ mazə Saləmuŋ ghunashi mbəzli ta haranci Shimey. Ma kə kaa ngəci sa səəkiy na na: «Səəkə lati ghyi tsa gha tikə mbə məlmə Zheruzalem. Tikə ɗee ghaa nziy, ka dzee ɗi ghaa dza ya kwamaɓaw. 37 Avee gəzaŋa kwatsəməta: Fəca dza ghaa səvəriŋa mbə məlmə na, mbaʼ gha taŋəti həl Sedruŋuy, mbəri dza ghaa nza. Ghalaɓay, gha dza naa pəlanavə məti kaa ghən tsa gha. 38 «Wəzaa nava mazə. Njasa gəzəkə gha va dzee ta mənti yən ndə sləni tsa gha,» kə. Mbaʼ Shimey dzaa təɗikə ghyi tsa ci mbaʼ hiy mbə məlmə Zheruzalem ki. 39 Liy hum piya mahəkanə ki na, dza ka sləni Shimey bakə tə nahuti vici mbaʼ ghəshi hushiy dzashi va Akishə mazə ka Gad, zəghu Maaka. Mbaʼ məndi səəkəə gəzanci: «Mbə məlmə Gad na ka sləni gha,» kə məndi kaa ngəci. 40 Sa favə na tsəgha na, ɓiyakə pəhamə ləfəriw mə kwantəmca ci, ka dzay ta zhini ka sləni ci va, va Akishə. Mbaʼ dzaa pəməkəshi zhimbə məlmə Zheruzaləm. 41 Mbaʼ məndi dzaa zhananavə kuma mənti Shimey va kaa mazə Saləmuŋ: «A Shimey niy dzay dzəmbə Gad, mbaʼ zhikiy dzəmbə Zheruzalem,» kə məndi kaa ngəci. 42 Mbaʼ mazə ghunashi mbəzli ta haranci Shimey. Ma kə kaa ngəci sa səəkiy na na: «Niy gəzaŋee, mbaʼee zəməkaa fəla lə slən tsa Kwa sləkəpə: “Fəca dza ghaa səvəriŋa mbə məlmə na, mbaʼ gha dzaŋa ya dza kwamaɓay, mbəri dza ghaa nza,” pən niy ni kaa ngəŋa, wəzaa kuma gha va, ee favə mazə, pə gha niy ni kaa ngəra sa? 43 Tawa fati ma gha bamaa dzəti fəla zəməkee va kwa Kuma Kwa sləkəpaa? Tawa dzəghwaŋa gha kən kumaa niy gəzaŋee vaa?» kə mazə kaa Shimey. 44 Zhini ma kə kaa ngəci diɓa na: «A gha sənata kumaa niy manati gha kaa dirə Davitə gəmgəm tsa nzə gwanata dəʼu ghən tsa gha ya kala zhiniŋa məndi ɓay? Ta ɓasakənəŋa nguvə dza Kwa sləkəpə tə mbərkə kuma mənti gha va jikir na. 45 A na nee yən mazə Saləmuŋiy, ta təfətəra miy dza Kwa sləkəpə, mbaʼ ɓanavə bərci kaa məni mazə tsa mbəzli kwa miy dəgha Davitə ya paʼa humɓa,» kə. 46 Dza mazə mbaʼ gəzanci kaa Benayahu zəghu Yehuyada, mbaʼ Benayahu səvəriy kiy ghyi tsa mazə lə Shimey, mbaʼ dzaa paslanti.

Liy hum ki na, mbaʼ mazə tsa Saləmuŋ kumavə bərci.