Saləmuŋ bəvə zha Farawaŋ mazə ka Ezhiptə ka mali ci
3
Dzəghwa saləmuŋ mbaʼ dzaa ɓəvə Zha Farawaŋ mazə ka Ezhiptə ka mali ci, mbaʼ məniy ka mashi tsa ci tsəgha. Sa ɓəvə na na, mbaʼ fiy mbə məlmə har məndi vaa Məlmə Davitə paʼa va vəghu tsa kəranti na nga ghyi mazə tsa ci lə nga ghyi tsa Kwa sləkəpə, mbaʼ nga məlmə Zheruzalem dzəghwa kələm.2 Ghala vəghu tsa vay, dzar tə pəhiy niy gugumati məndi ta ta hiyalahi niy slaslanta ka Izərayel shiy kaa Kwa sləkəpə. Sa nza nay, niy nganati ghyi məndi kaa Kwa sləkəpə diw. 3 A mazə Saləmuŋ niy ɗiti Kwa sləkəpə, ka nuw kumaa niy gəzanakə diy Davitə. Ya tsəgha nzə kiy, war dzar tə pəhiy niy gugumati məndi ta tsəfəku kwa kuma hiyalahi niy slasla na shiy kaa Kwa sləkəpə, tiɓa ghəci niy ndanta shiy zən nja urdi diɓa.
Saləmuŋ cəʼu sənata kuma va Kwa sləkəpə
(2 NəMezh 1.2-13)
4 Dza mazə tə nahuti vici mbaʼ dzay dzəmə pi tsa har məndi vaa Gabawuŋ ta vəlanta shiy kaa Hiyala. Sa nza nay pi tsa va niy nza pi tsa gura məndiy fati bama ti mbə pəhi ka məndiy slaslanta shiy ti kaa hiyalahi. Dza na mbaʼ sləsliy dəmbəkə bələku bələku məŋ tə pi tsa ka məndiy slanta shiy kaa Hiyala məɓa, mbaʼ ndantishi kaa Kwa sləkəpə gwanashi. 5 Ghəci tə pi tsa va ki na, mbaʼ Kwa sləkəpə təzlita kaa ngəci kwa shiw həvir. Ma kə kaa ngəci na: «Ɗuw shi ɗi gha, ta ndaŋashi dzee,» kə. 6 Ma kə Saləmuŋ na: «Wəzə təruŋ niy nza gha lə ndə sləni tsa gha dirə Davitə. Sa nza nay, kuma wəzə na niy məni na. Lə nəfə kutiŋ niy nuwŋa na, ka nuw kuma lə kwal tsa nzə. A gha nuwti mananci wuzə hur tsa gha va, mbaʼ gha ɓanavə zəghu ta zəmə ghyi ta mazə tsa ci va ndatsə. 7 Sanay Hiyalee Kwa sləkəpiy, gha ndara na məni mazə kwa pi tsa ndə sləni tsa gha, dirə Davitə. A na nza na kiy, zəghura nzee ta sənay njasa ka məndiy sləkə mbəzli. 8 Avee mbə sləkə hulfə mbəzli gha təravə gha. Mbəzli vay, mbəzli ɗaŋ kala garə mbəratishi məndi va ɗaŋ tsa shi, ka gəzəkə tsaʼa na na ɗaŋ tsa shi, kə məndi. 9 Va tsəgha cəʼuŋee a gha ndara sənata kuma, yən ndə sləni tsa gha, ta mbee sənay sləkə mbəzli gha, ka sənata təra na wəzə na kuma lə na jikir na. Kala tsəgha kiy, a ntsaa dzaa mbay sləkəti mbəzli gha ni ɗaŋ ni kiyaa?» kə Saləmuŋ kaa Kwa sləkəpə.
10 Dza kuma ɗuwti Saləmuŋ va mbaʼ təɓanati kaa Kwa sləkəpə. 11 Ma kə kaa ngəci na: «Njana nza na sənata kuma ta mbay sləkə mbəzlee lə kwal tsa tiɗiɗə tsa gha ɗuw, kala ɗuw ma gha ya hiŋa tə ghumə, ya mənivə shiy, ya məti ka mbəzə ghay, 12 Ta məntəŋa kuma ɗuw gha va dzee. Ta ndaŋa sənata kuma, mbaʼ məhərli dzee. Ya mbə mbəzliy niy nza kwataŋa, ya mbə ni ghula ni ta yay, ka dza ntsaa yiməva lə ghaa nza tiɓa tə sənata kuma lə məhərliw. 13 Ya nihuti shi ɗuhu ma ghay, ta ndaŋashi dzee. Ta ndaŋa məni shiy dzee, ta fati shəndəkə dzee tə gha. Mbə nziy tsa gha gwanayiy, ka dza mazə nza tiɓa nja ghaw. 14 Kama na war mbə nuw kwal tsee gha, ka ɗi fəti ta kuma pəhətee, ka məni kuma gəzəkee njasa niy nza dəŋa Davitə vay, ta mətsahata piya gha dzee tə hiɗi,» kə Kwa sləkəpə.
15 Liy hum ki na, mbaʼ Saləmuŋ fərghiy. mbaʼ sənay shiw na sava shiwtee, kə. Dza na ka zhay zhimbə məlmə Zheruzalem, mbaʼ dzaa tsəhiy kwa kuma sərndəkə sla kiri tsa Kwa sləkəpə. Dza na mbaʼ sləsliy shiy ndantishi kaa Kwa sləkəpə, mbaʼ sləsliy nihuti ta zərkə. Mbaʼ tati shi zəmə təruŋ kaa ka sləni ci gwanashi.
Saləmuŋ slati nguvə lə sənata kuma
16 Dzəghwa nihuti miʼi mbə ghyi ka ghurghur bakə, mbaʼ ghəshi səəkəə kəsay saləmuŋ tə nahuti vici, sa həərətishi kuma. 17 Ma kə nahuti mbə shi na: «Titihu fə tə gha ghən ta kuma ɗee na gəzaŋa mazə tsee: Kiy ghyi tsa kutiŋ tsa nza ghiy lə mali na. Mbaʼee yara war ghiy li kiyɓa. 18 Sa hiree bakə ghala yaree na, baw ghənzə yata tə kwa mahəkana vici kuraku. Ghiy li niy nza na kiy ghyi tsa va lə nziy tsa ghiy. War bakə bakəŋiy niy nza ghiy li kiyɓa, niy nza tsahuti ndə kiyɓaw. 19 Ma tə nahuti virɗi na, mbaʼ ghənzə hənati həni tə zəghu nzə, mbaʼ mətiy. 20 Dza na mbə yam virɗi yən tə hi yən kwa sləni gha, laŋ səəkəə ɓəhu tsee zəghu mbə huree, mbaʼ mbəriyɗa tsa nzə va mətiy. Ma tsee va zəghu na, mbaʼ dzaa hənita li mbə hur nzə. 21 Ma sa kafəree tə kəɗi pi ta sanci ʼwa kaa zəghwee na, mbəri yən nay. Sa waliy pi ki na, dzee ka vərghə zəghu va wəzə, mbaʼee sənay tsee zəghu yakee va na savaw pən,» kə.
22 Ma kə nahuti mali va ki na: «Dzərvəə sla gha, tsee zəghu na tsa tə ghumiy tsa, tsa gha tsa mətiy,» kə. «Awə dzərvəə sla gha, tsee zəghu na tsa tə ghumiy tsa, tsa gha tsa mətiy,» kə naa gha gəzə kuma va mali diɓa. war tsəgha ghəshiy ngunguliva kwa kuma mazə. 23 Dzəghwa mazə Saləmuŋ ki, mbaʼ ɓəvə gəzə kuma. Ma kə na: «Ma pə ghuy mbə gəzə kuma ghuy bakanaŋuy Sanay: “Zəghwee na tsa tə ghumiy tsa, tsa gha tsaa mətiy” kə nahuti. “Awə tsa gha zəghu na tsaa mətiy, tsee tsa tə ghumiy tsa,” kə nahuti. 24 Ghənzə tsəghay, mbalam ɓəkəram hwa,» kə. Mbaʼ məndi dzaa ɓanakə. 25 Ma kə ki na: «Slavərim tsa tə ghumiy tsa va zəghu bakə mbə a ghuy tahanavəshi kaa miʼi va. bəla kutiŋ va nana bəla kutiŋ va nana,» kə
26 Sa favə mali kwa zəghu tə ghumiy na va kuma va tsəgha ki na, ka slanta hur tsa nzə ta zəghu nzə. Ma kə kaa mazə na: «Titihu ndə sləkəra, zlatanavə tsa tə ghumiy tsa va zəghu, ka pəəsli məndi ma,» kə. Ma kə nahuti va nanzə ki na: «Ə kə məndi slavəri bətə ghiy mbə bakanaŋiy,» kə. 27 Dzəghwa mazə ki, mbaʼ ɓəvə gəzə kuma. Ma kə na: «Ka pəəsli zəghu va ghuy ma. Ɓanavəm kaa kwa taŋa mali va. Ghənzə na məmə kwa zəghu tə ghumiy tsa va,» kə.
28 Mbaʼ ka Izərayel gwanashi favə njasa slati mazə Saləmuŋ nguvə va. Təruŋ ghəshi fati shəndəkə dzəti, war ə ghəshiy haʼu ti təruŋ. Sa nza na mbaʼ ghəshi niy nay a Kwa sləkəpə ɓanavə sənata kuma ta sla nguvə lə kwal tsa nzə, kə ghəshi.