Mbəzli təravə Saləmuŋ ta sləkə hiɗi ta səɗa ci
4
Saləmuŋ niy məni na mazə tə hiɗi ka Izərayel gwanashi. 2 Avanashi sləneɗemer mbəzliy niy təravə na ta məni dikə ta səɗa ci, kar: Ndə ta Hiyalay, Azariyahu zəghu Saduk, 3 mbaʼ ka tsasli shiy: kar Elihuref lə Ahiya ndərazhi Shisha. Ma Yehushafat zəghu Ahilud na, ndə kwal tsa mazə tsa va. 4 Benayahu zəghu Yehuyada na, dikə tsa ka sawji. Kar Saduk lə Abiyatar na, nihuti ka ta Hiyala. 5 Azariyahu zəghu Natan na, dikə tsa ngumənahi tsava. Zavud zəghu Natan na, tsahuti ndə ta Hiyala ghəci diɓa, zhini ndə ci kuma kaa mazə ghəci. 6 Ahishar na, ntsa dikə tsa kiy ghyi tsa mazə. Mbaʼ Aduniram zəghu Avəda ka ndə nighəə dzəkən mbəzli ka məndiy ɓanavəshi sləni lə bərci ta ghəra kala kama lə ɗi tsa shi.7 Tə hiɗi ka Izərayel gwanashiy, məŋ lə bakə niy nza ngumənahi va mazə Saləmuŋ. Ghəshi niy ɓə na shi zəməə səəkə kaa mazə lə kaa mbəzli kwa dəgha ci gwanashi. Ya wa ndə mbə shiy, tir kutiŋ mbə piya niy pəla na shi zəməə səəkə. 8 Avanashi sləneɗemer mbəzli va:
Zəghu Hur, ghəci niy sləkə na hiɗi dzar mbə kəleŋer nza mbəzli mbə takə tsa Efrayim ti shi.
9 Zəghu Deker na, ka sləkə mbəzli mbə məlmə Makas lə ni mbə məlmə Shalvim mbaʼ ni mbə məlmə Bet-Shemesh, mbaʼ ni mbə məlmə Eluŋ-Betə-Hanaŋ.
10 Zəghu Hesedə na, ka sləkə məlmə Arubutə, lə hiɗi mbə məlmə Suku mbaʼ hiɗi Hefer gwanashi,
11 Zəghu Avinadavə na, ka sləkə hiɗi dzar mbə kəleŋer Dur gwanashi. Tafatə zha Saləmuŋ niy nza mali ci.
12 Baana zəghu Ahiludə na, ka sləkə məlmə Taanak lə məlmə Megidu, mbaʼ hiɗi Betə-Sheyaŋ, shi ndəku ni va lə məlmə Cartaŋ. Hiɗi vay, njasaa dzəghwa həci niy nza ghəshi va məlmə Izəreel. Kafə na mbə məlmə Betə-Shaŋ paʼa va Abel-Mehula, paʼa ka taŋəti məlmə Yukəmuwam niy nza ghəshi.
13 Zəghu Gever na, ka sləkə məlmə Ramutə tə hiɗi ka Galad. Ghəci niy sləkə na məlməhi takə tsa Yayir jijiy Manase va tə hiɗi Galad. Zhini Ghəci sləkə hiɗi Argubə tə pi tsa har məndi vaa Basan. Hiɗi Argubə vay, kwaŋ mətsəkə niy nza məlməhi dikə dikə ni dəzlay məndi lə kələm ti shi. Lə mbəzə ghəm na niy kəəli məndi gizlighizli miy dəghahi məlməhi va.
14 Ahinadavə zəghu Idu na, ka sləkə hiɗi Mahanayim.
15 Ahimas na, ka sləkə hiɗi Neftali. Ghəci kurakuy, aa niy ɓəhu Basmatə nahuti zha mazə Saləmuŋ.
16 Baana zəghu Hushay na, ka sləkə hiɗi takə tsa Asher lə məlmə Beyalutə,
17 Yehushafat zəghu Paruwah na, ka sləkə tə hiɗi takə tsa Isakar.
18 Shimey zəghu Ela na, ka sləkə hiɗi takə tsa Benzhameŋ.
19 Geber zəghu Uri na, ka sləkə hiɗi ka Galad, mbaʼ hiɗi zləghuhu məndi mbə mbəzə va Shihuŋ mazə ka Amurə, mbaʼ ni zləghu məndi va Ug mazə ka Bashaŋ.
Zhikən ni məŋ lə bakə ni vay, a tsahuti nguməna niy nza tiɓa, ghəci niy sləkə na hiɗi ka Zhuwda.
20 Nja ndarghə kwa həl niy nza ɗaŋ tsa mbəzli mbə takə tsa Zhuwda lə mbə takə tsa Izərayel. Təruŋ niy nza shi zəmə lə shi sa və shi. Lə vəshi niy nza nziy tsa shi.