5
Ghala vəghu tsa vay, ghava na tə həl Əfəratə, paʼ tə hiɗi ka Filisteŋ, paʼ tə ghala lə hiɗi ka Ezhipətiy, mazə Saləmuŋ niy sləkə na Hiɗi ju ju ni va dzar tə pi tsa va gwanashi. Tə dəvə ci niy nza mezhizhiy sləkə hiɗi va gwanashi, ka tsəhanci ghən, mbə nziy tsa shi ya humɓa.2 Njasa səəkə viciy, Avanashi shiy niy ɗi Saləmuŋ ta nza geʼi geʼi kaa ngəci lə kaa mbəzliy ghəranci sləni: Tunə məsliɗə ghupə həti məndi nja ghupə gwanata na, tunə məŋ lə dəghəs na masəti məndi məɗəməɗə na, 3 mbaʼ slay kəliti məndi kəli kəli ni kiy ghyi məŋ, mbaʼ ni kəəsəvə məndi mbə slay gwanashi ni bakəmətsəkə, mbaʼ tiŋkekesli bələku, mbaʼ maŋgulməhi, mbaʼ kiməhi, mbaʼ lekwer, mbaʼ nihuti shi kəli məndi kiy ghyi nja kukuirª.
4 Saləmuŋ niy sləkə na hiɗi dza kwa bəla njasaa dzəghwa mirkwi va həl Əfəratə, ghava na mbə məlmə Tifəsa paʼ mbə məlmə Gaza. Tə dəvə ci niy nza mezhizhiy sləkə hiɗi va gwanashi. Lə zərkə niy nza na kwa jipə tsa shi lə ka ghalahiy gwanashi. 5 Sa nza na va tsəgha kiy, lə zərkə niy nza na tə hiɗi ka Izərayel lə tə hiɗi ka Zhuda ghava na mbə məlmə daŋ paʼa mbə məlmə Ber-sheba ghala vəghu tsaa niy məni Saləmuŋ va mazə. Ya wa ndiy, ə niy guma na za fəhi ci. Fəhi ka məndiy ta tay tə ya shi, ka guma duŋ bezhekiki ci lə məhərli. 6 Bələku bələku məŋ lə bakə bələku niy nza ka zlərə gədewesli va mazə Saləmuŋ, mbaʼ ceker ka gədewesliy mbahə muwtahi gəduw va nza mbə shi bələku bələbu faɗəmətsəkə bələku. 7 Ya wa ndə mbə ngumənahi məŋ lə bakə ni va niy tivə Saləmuŋiy, tir kutiŋ niy nza tsa ci vəghu ta ɓə shi zəməə səəkə kaa kar saləmuŋ lə mbəzli ka naa zəmə shiy li shi gwanashi. Niy ɗi məndi kala cesl shi ɗuti məndi tiɓa gwanashiw. 8 Ngumənahi va diɓay, ghəshi ka naa ɓə shi har məndiy ʼurzhə, mbaʼ guzən kaa gədewesliy mbahə mutiti, lə ni ka məndiy zlərə. Dzəti pi tsa nza mazə va niy ɓəshi ghəshiy səəkə, geʼi geʼi njasa niy ɗutishi mazə.
Saləmuŋ taŋanti mbəzliy sənata kuma gwanashi tə sənata kuma
9 Dzəghwa Hiyala ki, mbaʼ ɓanavə sənata kuma kaa mazə Saləmuŋ, mbaʼ məhərli tərəŋw ta fə ghən ta kuma, mbaʼ məhərliy zəzəə dzəkən shiy ghənghən ghənghən dalala kala gar pəghəvama. 10 Tərəŋuɓa Saləmuŋ niy sənata na kuma kaa mbəzliy sənata kuma tə hiɗi kwa ghumə lə ni tə hiɗi ka Ezhiptə gwanashi. 11 Ndə tiɓa kalaa niy taŋəti ghəci tə sənata kumaw. Tərəŋuɓa ghəci niy sənata na kuma ya kaa mbəzli ka məndi vaa ɓəla tə sənata kuma nja kar Etan ndə ka Ezərayi, mbaʼ kar Heman lə Kalkul mbaʼ Darda ndərazhi Mahul. Gwaʼa gwaʼa niy dzantəvay slən tsa ci dzar mbə mbəzli ndəku ni lə hiɗi ci. 12 kuma gar ci kuma kaa ndə bələku bələku mahəkanəmətsə niy gəzəkə na, mbaʼ ghakəvəri cemer bələku bələku məŋ mbaʼ cifə ghən kən shi. 13 Aa gəzəhu kumaa dzəkən fəhi lə dzəkən guzən. Ghava na tə fə kwa bərci har məndi vaa sedər ka Liban paʼ tə Hisupə, guzən tsaa pəsə va dzar vəgha kələm. Aa gəzəhu kumaa dzəkən saa dza lə səɗa faɗə, lə dzəkən ʼeguer, lə dzəkən saa dza lə hur, mbaʼ dzəkən kirpi. 14 Slən mezhizhi tə hiɗi, shiy niy favəə dzəkən sənata kuma Saləmuŋiy, war ə niy ghughuni ghəshi mbəzli mbə hulfəshi ta səəkə ghəshi ta favə kuma sənata na va.
Saləmuŋ dzəkuva ta nga ghyi tsa Hiyala
( 2 NəMezh 2.2-15)
15 Ndimndim tsa Hiram mazə ka Tiriy, madiga niy nza ghəshi lə mazə Davitə. Ma sa favə na: «A məndi shəkambə in dzəghwa mbə ghən Saləmuŋ mbaʼ məndi pəərəti ka mazə kwa səɗa diy,» kə məndi ki na, mbaʼ ghunashi ka sləni ci ta dza ta səku Saləmuŋ. 16 Dzəghwa Saləmuŋ kuraku ki, mbaʼ ghunashi ni ci ka sləni ta gəzanci. Ma kə ghəshi dzaa ni kaa ngəci na: 17 «Ma kə mazə Saləmuŋiy: “War mbə mbəzə niy nza dirə Davitə lə mbəzli tə hiɗi dzar vəgha. Niy mbay naa nganati ghyi kaa Hiyala ci Kwa sləkəpə va kuma vaw. Sa dza Kwa sləkəpə ki na, mbaʼ ɓanavə bərci ta mbashi, mbaʼ ghəshi zhəghəshi ka mbəzli tə dəvə ci. 18 Sana sənzənvay, a Hiyalee Kwa sləkəpə ndara dəkəva ya dza kwa nama bəla. Ka dza heree ya va ka mbəzə, ya va nahuti kuma gəmgəm na ghulaw. 19 Nana kiy, ee ɗi nganta ghyi kaa Hiyalee Kwa sləkəpə. Sa nzanay, tsəgha niy gəzəkə na kaa dirə Davitə: Tsa dzee tivə mbə ndərazhi gha ta mbərə nziy ghəci kwa gəzli mazə ghay, ghəci dza na ta ngara ghyi tsa dza məndiy səəkə ta tsəfəku kwa kumee mbə, kə niy ni kaa ngəci. 20 Va tsəgha cəʼwee va gha, a gha ghunashi mbəzli nza ghəshi dzaa kəslikəra shighu seedər mə dəlagwa Libaŋ. Kwasəbəshi dza ka slənee nza mbə sləni va. Ta wavəŋa zhəmə sləni dza ka sləni ghaa ghərahu dzee njasa dza ghaa gəzəkə. A gha sənay ka mbay məni sləni shighu ni ghiy mbəzli nja ka Shiduŋuw” kə Mazə tsa ghiy,» kə mbəzli ghunashi Saləmuŋ va dzaa ni. 21 War sa favə Hiram kuma ghunikə Saləmuŋ va mbəzli ta gəzanci na, mbaʼ vəshiy təruŋ. Ma kə na: «ʼWəsa nə ya kaa Kwa sləkəpə sa nza na mbaʼ ɓanavə zəghu ka sənata kuma ta sləkə mbəzli ɗaŋ nini kaa Davitə,» kə. 22 Mbaʼ ghunashi mbəzli ta dza ghəshiy gəzanci kaa Saləmuŋ: «A kuma ghunashi gha va mbəzli ta gəzəra tsəhəta kwa sləmee. Ta kəslavəŋa shighu sedər lə shighu zhenevəriye dzee njasa dza ghaa ɗi shi. 23 Ka slənee dza na ta pakəghwashi səəkə mə dəlagwa Libaŋ paʼa miy həl. Nza ghəshi pəpəhətishi. Nza məndi mbahəghəŋashi dziy tə yam pa tə pi tsa dza ghaa ɗi məndiy fəŋashi, nza məndi papalantishi tiɓa ki, ma nza mbəzli gha kaʼushi tiɓa. Dza kwa na gha bəlay, shi zəmə na shi dzee ɗi gha kumavəra kaa mbəzli kiy ghyi tsee,» kə.
24 Dza Hiram ki mbaʼ kəslanavə shighu sedər lə shighu zhenevəriye kaa saləmuŋ njasa niy ɗishi na. 25 Ma Saləmuŋ kuraku ki na, ka ɓanci Alkamari tunə bələku bələku kwaŋəmətsəkə, mbaʼ in ʼulivə tsaa guranti litər bələku bələku dəghəsəmətsəkə njasa səəkə piya, ta zəmə shiy kaa mbəzli kiy ghyi tsa ci.
26 A Kwa sləkəpə niy ɓanavə sənata kuma kaa Saləmuŋ njasa niy gəzanakə na va. Lə zərkə niy nza na kwa jipə Hiram ghəshi li, mbaʼ ghəshi pəhay kuma shi kutiŋ.
Saləmuŋ ɓanavə sləni kaa mbəzli ta nga ciki Hiyala
(2 NəMezh 1.18; 2.1,16-17)
27 Dzəghwa mazə Saləmuŋ mbaʼ təravə mbəzli bələku bələku bələku mahəkanə tə hiɗi ka Izərayel gwanashi, mbaʼ fambəshi mbə ghəra sləni lə bərci kala kama lə ɗi tsa shi. 28 Njasa səəkə tiriy, mbəzli bələku bələku bələku niy ghuni məndiy mbə shiy dzəmə dəlagwa Libaŋ ta sləni. Sa ka ghəshi mənti tirə məɓay, nza nihuti dzəmə ta mbərə sləni və shi, mbaʼ ghəshi səəkəshi dzakə ghyi tsa shi ta tir bakə. Aduniram niy sləkə na ka sləni va. 29 Zhini diɓay, bələku bələku bələku mbərfəŋ niy nza ka ɓə shiy, Bələku bələku bələku dəghəsə niy nza ka yimə hərezli va Saləmuŋ dzar mbə dəlagwa. 30 A ngumənahi Saləmuŋ niy təravə mbəzli bələku bələku mahəkanəmətsəkə mahəkanti ta nighəə dzəkən slənihi va diɓa, ghəshi niy sləkə na ka sləni ɗaŋ ni va. 31 Hərezli dikə dikə ni niy pəleɗi ghəshi, ka yiməshi wəzə, ta fə səɗa ghyi tsa Hiyala li shi. Mazə Saləmuŋ niy gəzanshi na məni tsəgha. 32 Dzəghwa ka sləni Saləmuŋ lə shi Hiram, mbaʼ mbəzli mbə məlmə Gebal ka kəsli shighu, ka pəpəlaɗi hərezli, ka yiməshi ta nga ghyi tsa Hiyala ki.