Saləmuŋ nga ghyi kaa Kwa sləkəpə
(2 NəMezh 3.1-14)
6
Liy hum Piya bələku bələku faɗə mbaʼ dəghəsəmətsəkə ghən kən ghala səvərishi ka Izərayel mbə hiɗi ka Ezhiptə ki na, mbaʼ Saləmuŋ ghati nga ghyi tsa Kwa sləkəpə. Kwa faɗa piya ci niy nza na mbə məni mazə dzəkən ka Izərayel ghalaɓa. Tə kwa baka tir, sa har məndiy tir Ziw niy ghava sləni va. 2 Ciki tsa ngati Saləmuŋ va kaa Kwa sləkəpə kwa ghyi tsa vay, basa məŋ lə cifə niy nza bitə tsa ci dzati dzati, basa cifə bəŋw tsa ci dzar dzar, ma bitə tsa ciy dzəta ghumə na, basa mbərfəŋ mbaʼ bazli kutiŋ. 3 Dza kwa miy pi tsaa dzəmbə ciki tsa vay, a məndi niy ngati tsahuti pi ta dzəmbə kwa, basa cifə buŋ tsa ci nja ghyi tsa Kwa sləkəpə va, ma bitə tsa ci dzati dzati na, basa bakə mbaʼ bazli kutiŋ. 4 Dza mbaʼ məndi ngati mergihi dzar tə ciki tsa va, mbaʼ məndi kalayshi lə shiy nja gəriyazhə. 5 Dza məndi diɓa dəzlətsəɓə məndi ngavəgha tsahuti ciki, tsəŋəzlə ceker mə ghən ci bakə, nahə dzar vəgha ciki tsa dikə tsa va lə tsaa kərkə va liy dapa ciki, pəri na pərikə bəla shi. 6 Basa bakə mbaʼ vəli dəvə kutiŋ niy nza buŋ tsa tsa takə takə va ciki. Tsa mbə jipə na, basa mahəkanə. Ma tsa mə ghən na, basa mahəkanə mbaʼ vəli dəvə kutiŋ. Ta na kələm tsa nihuti cekeriy dəzlay ghyi tsa va va pərikə tə ngulay, buŋ ta mətsəni, ka kərkəva slehə məkə tə ghən niy nza na. Va nəghətaa shighu dəʼuti məndi va li tsəhəshi paʼa mbə cikə Hiyala tsa mbəɓa mbəɓa niy mənti məndi tsəgha. 7 Hərezli nga məndi va ghyi tsa Hiyala va li shiy, war njasa niy pakəshi məndi tə pi tsa yiməshi məndi niy nga məndi shiy li shi. Va tsəgha kiy, niy favə ndə ya gaka baʼu haku lə ndəvəli, ya gaka nihuti shi ka məndiy fəɗi hərezli li shi, ya gaka nima tsahi ka məndiy ghəra sləni hərezli li shiw 8 Gəzliy dzəmbə tsa mbə jipə va cikə mbə ceker tsəŋəzli tsəŋəzli ni vay, dza kwa bəla njasaa dzəghwa həci niy nza na va ciki tsa Hiyala va. Tə shiy nja taŋa niy dzəmə məndi, njasa dəzli məndi ta dzəmbə. Ya tsa mə ghən va cikiy, war tsəgha niy dzəmə məndi. 9 Tə kwa kərni, mə ghən ciki tsa vay, mbaʼ məndi mənti shiy nja bela tə shighu sedər 10 Tsahuti ciki tsaa niy ngavəgha məndi va tsəŋəzli tsəŋəzli tsa, dəzlətsəɓə dzar vəgha tsa mbəɓa mbəɓa vay, bazli bakə mbaʼ vəli dəvə kutiŋ niy nza bitə tsa ciki kutiŋ dzəta ghumə. Lə shighu sedər niy jakayshi məndi lə tsa mbəɓa mbəɓa va ciki.11 Liy hum ki, ma kə Kwa sləkəpə kaa Saləmuŋ na: 12 «Avanaŋa mbə ngara ghi. Mbaʼ pə gha dzaa nuw kuma pəhətee, ka nziy njasa gəzəkee, ka fə ghən ta kuma gəzəkəŋee məni nzə, ka məni gwanatay, ta mənti kumaa niy gəzəkee va məni lə gha dzee, kumaa niy gəzanakee va kaa dəŋa Davitə. 13 Mbə ka Izərayel dzee nza lə nziy tsee, ka dzee zlashi hulfə mbəzlee ka Izərayeluw,» kə Kwa sləkəpə.
Njasa ghasləti məndi ciki tsa Kwa sləkəpə
14 Dza Saləmuŋ ka nuw lə nga ghyi tsa Kwa sləkəpə ta kəranti ki. 15 Dza məndi mbaʼ məndi dəʼwavəgha shighu sedər dzar vəgha ciki tsa Kwa sləkəpə mbəɓa mbəɓa, kafə na ta mətsəni paʼa mə ghən, ma dzar tə hiɗi na, mbaʼ məndi məniy shighu zhenevəriye. 16 Dza məndi diɓa mbaʼ məndi dəʼwavəgha shighu sedər dzar vəgha tsa liy dapa va ciki, kafə na ta mətsəni paʼa mə ghən. Basa cifə niy nza bitə tsa shighu va. Mbaʼ məndi gumanti pi tsa mbəɓa wəzə wəzə ta nza ka pi tsa Kwa sləkəpə, nza ghəci nza ka pi tsaa guranti ɗewɗew. 17 Tsa dikə tsa va ciki tsa nza cikə tsaa gura ɗewɗew va mbiy, basa məŋ niy nza buŋ tsa ci. 18 Dzar vəgha shighu vəgha ciki tsa va va mbəɓa mbəɓay, a məndi niy dədəʼwavəgha shi ghaslə fəɗiti məndi tə shighu, nja ya fəhi nihuti, nja mbərə ghuu pəlivərivata nihuti. Lə shighu sedər niy dəʼwanti məndi pi tsa mbəɓa gwanay, niy pəzli herezli ya jiwuw. 19 Dza məndi mbaʼ məndi gumati pi tsa mbə ciki tsa liy dapa va wəzə wəzə ta nza ka pi tsa Kwa sləkəpə, ta fə sərndəkə sla kiri tsa nzə mbəɓa. 20 Dapa vay, basa cifə cifə niy nza bəlahi nzə faɗanashi, tsəgha bitə tsa nzəə dzəta ghumə diɓa, mbaʼ məndi hway lə tsahi mbəzə kwa shamshama riŋriŋ na. Kwa kuma dapa va na, mbaʼ məndi dəʼuti pi tsaa ɓanta shiy kaa Kwa sləkəpə tə shighu sedər, huʼ kaa tsahi mbəzə kwa shamshama kən shi. 21 Dza məndi diɓa, mbaʼ məndi hway tsa dikə tsa va ciki mbəɓa mbəɓa lə tsahi mbəzə kwa shamshama riŋriŋ na. Dza məndi diɓa, mbaʼ məndi məniy celel tsa mənti məndi tə tsahi mbəzə shamshama na miy dapa va. 22 Lə mbəzə kwa shamshama niy hway məndi ciki tsa va gwanay tsa ci, tsəgha məndi hway pi tsa dəʼuti məndi va ta ɓanta shiy kaa Kwa sləkəpə ti, miy ciki tsa nza sərndəkə sla kiri va mbə.
23 Dza məndi fəɗi məndi fəɗiti sherubeŋhi bakə tə shighu ʼulivə, mbaʼ məndi fiyshi mbə ciki tsaa gura ɗewɗew va. Basa bakə mbaʼ bazli kutiŋ niy nza bitə tsa shi. 24 Basa kutiŋ mbaʼ vəli dəvə kutiŋ niy nza bitə tsa bəkəbəkə kutiŋ va kwa taŋa sherubeŋ tsa va. Kafə tə miy nahuti bəkə bəkə pa tə miy nahuti kiy, basa bakə mbaʼ bazli kutiŋ niy nza bitə tsa bəkəbəkəhi va. 25 Zhini tsəgha bitə tsa ni kwa baka sherubeŋ tsa va. Yimyim niy nza biti tsa shi lə pa shi bakanashi. 26 Basa bakə mbaʼ bazli kutiŋ niy nza bitə tsa kwa taŋa sherubeŋ tsa va, tsəgha kwa baka tsa va kuraku. 27 Tə jipə jipə ciki tsa liy dapa va niy fiy məndi Sherubeŋhi va. Pəli pəli niy nza bəkəbəkəhi shi. Nahuti bəkəbəkə kwa taŋa sherubeŋ tsa vay, ka ndəŋu baŋwa ciki tar nahuti bəla, bəkəbəkə tsahuti tsa va diɓa na ka ndəŋu nahuti bəla baŋwa ciki tsa va. Ma niy sar dzəti jipi ciki bəkəbəkəhi shi na, ka dapəva niva. 28 Dza məndi mbaʼ məndi hwakən tsahi mbəzə kwa shamshama kən sherubeŋhi va.
29 Dzar vəgha baŋwahi ceker va bakanashi mbəɓa mbəɓa lə dzar vəgha hum shi pərikə pərikiy, mbaʼ məndi dadaŋavəgha shi ghaslə fəɗiti məndi tə shighu, nja sherubeŋhi nihuti, nja kəslifə slərpə nihuti, nja mbərə ghuu pəlivərivata nihuti. 30 Dza tsə məndi tsəti pi tsa mbə ceker va bakanashi lə mbəzə shamshama na.
31 Gəzli miy ciki tsaa gura ɗewɗew vay, tə shighu ʼulivə niy mənti məndi, bakə mbə niy nza na, ka kəli səəkə tarkə, ka kəəli səəkə tarkə. Pətsaa dzar tə ghən nzə lə pi tsa vəgha slərpəhi nziy, bitə tsa bəla kutiŋ mbə bəla baŋwa va məndi kə təhəvəri cifə mbə niy nza na. 32 Dza məndi dzar tə gəzli va bakanata mbaʼ məndi dadaŋavəgha shi ghaslə fəɗiti məndi tə shighu. Nja sherubeŋhi nihuti, nja kəslifə slərpə nihuti, nja mbərə ghuu pəlivərivata nihuti, mbaʼ məndi hwayshi lə mbəzə kwa shamshama. Mbaʼ məndi zhiniy masliti kar shi nja sherubeŋhi ni va lə shi nja kəslifə slərpə ni va lə mbəzə kwa shamshama. 33 Dza mbaʼ məndi manamiy gəzli ka kəli səəkə tarkə ka kəəli səəkə tarkə dzəmiy tsa dikə tsa va ciki diɓa. Pətsa mənti məndi va dzati vəgha slərpə nava gəzli tə shighu ʼuliviy, bitə tsa bəla kutiŋ mbə bəla baŋwa va məndi kə təhəvəri faɗə mbə niy nza na. 34 Tə shighu zhenevriye niy mənti məndi gəzli va. Mbaʼ məndi manati pəlpəlihi bakə bakə tə gəzli gəzli va bakanashi. 35 Dza məndi dzar vəgha shi mbaʼ məndi dadaŋavəgha shi ghaslə fəɗiti məndi tə shighu. Nja sherubeŋhi nihuti, nja kəslifə slərpə nihuti, nja mbərə ghuu pəlivərivata nihuti, mbaʼ məndi hwayshi lə mbəzə kwa shamshama.
36 Dza məndi diɓa, mbaʼ məndi ngaghwa tipə kwaɓa kwaɓa dəzlətsəɓə lə hərezli biti biti ni tsəŋəzli mahəkanə, mbaʼ shighu sedər dəzli kutiŋ.
37 Saləmuŋ mbə məni kwa faɗa piya ci mbə mazə, tə tir Ziw niy gha məndi fə səɗa ghyi tsa Kwa sləkəpə va. 38 Ma ghəci mbə məni kwa məŋ lə tan piya ci mbə mazə, tə kwa dəghasa tir tsa har məndiy tir Bul ki na, mbaʼ nga ghyi tsa Kwa sləkəpə kiriy gwanay, njasaa niy tarəkə məndi nga ci. Piya mbərfəŋ niy mənti Saləmuŋ mbə nga ci.