Saləmuŋ ngati ghyi mazə kaa ghən tsa ci
7
Liy hum ki na, dza Saləmuŋ mbaʼ ngavə tsa ci ghi. Piya məŋ lə mahəkanə niy mənti məndi mbə ga ci gwanay tsa ci. 2 Dza na diɓa mbaʼ ngati tsahuti ghi, “Gamba fəhi Libaŋ” kə kaa har slən tsa ghyi tsa va. Basa bakəmətsəkə cifəti niy nza bitə tsa ci dzati dzati, basa məŋ lə bakə mbaʼ bazli kutiŋ buŋ tsa ci, ma biti tsa ciy dzəta ghumə na, basa mbərfəŋ mbaʼ bazli kutiŋ. Shəlhi sləka məndi shighu dzəvəritishi ta məni shiy nja bela na, zərə faɗə. shighu va gwanashi na, shighu Sedər kəslikə məndi mə dəlagwa Libaŋ. 3 Dzar tə ghən ciki tsa va na, shighu sedər niy sləkati məndi dzar tə zlaŋlihi, zlaŋlihi va na dzəvəri tə shəlhi niy sləkatishi məndi. Faɗəmətsəkə cifəti niy nza zlanlihi va. Məŋ lə cifə kwa zərə kutiŋ, zərə mahəkanə niy nza ghəshi. 4 Ya dza kwa namaɓa bəla ciki tsa vay, mahəkanə niy nza mergihi ti. Mergi kutiŋiy, ka pəzli səvəri kwa tsahuti. 5 Gwanashi tsa gizləgilzləhi ciki tsa va lə mergihi ciy, fəhu fəhu niy nza ghəshi. Mergi kutiŋiy ka pəzli səvəri kwa tsahuti niy nza mergihi va mahəkanashi.6 Dza məndi mbaʼ məndi ngati ciki lə shəlhi. Bitə tsa ciki tsa vay, basa məŋ lə bakə mbaʼ bazli kutiŋ. Buŋ tsa ci na, basa mbərfəŋ mbaʼ bazli kutiŋ. A məndi niy lamiy gərka miy ciki tsa va. Lə shəlhi niy nza na mbə gaska va.
7 Dza məndi diɓa mbaʼ məndi ngati tsahuti ciki. “Ciki gəzli mazə” kə məndi kaa slən tsa ci. “Ciki sla nguvə” niy har məndi ciki tsa va diɓa, sa nza nay, mbə ciki tsa va niy sla Saləmuŋ nguvə. Kafə na tə hiɗi paʼ ta ghən cikiy, lə shighu sedər niy mənti məndi.
8 Tsəgha niy ngati məndi ciki tsaa niy nza Saləmuŋ mbə kuraku. Tə tsahuti pi niy nza na, kala kama tə pi tsa nza ghyi tsa har məndi vaa “gamba fəhi Libaŋ”.
Dzəghwa Saləmuŋ mbaʼ nganati ciki tsəgha kuraku kaa zha Farawaŋ vaa niy ɓəhu na ka mali ci.
9 Lə hərezli baʼu baʼu ni mbaʼ məndi gumantishi, yimə məndi yimantishi, slaʼ slaʼ məndi sla slantishi pərikə pərikə lə mbəɓa mbəɓa lə hwa kwa sliʼi niy ngati məndi ceker va gwanashi, kafə na tə fə səɗa ciki paʼa va kwa kərni haku. Tsəgha kələm tsaa dəzlay ngula pərikə pərikə. 10 Lə hərezli təra təra ni dikə dikə ni, niy fə məndi səɗahi. Bitə tsa nihuti na, basa bakə, nihuti na basa bakə mbaʼ bazli kutiŋ. 11 Dzəkən shiy, hərezli baʼu baʼu ni, yimə yimə ni mbaʼ shighu sedər niy zhini məndi fə. 12 Ngula buŋ na vay, lə hərezli yimə yimə ni tsəŋzli mahəkanə mbaʼ zərə shighu sedər kutiŋ niy dəzlay məndi pi tsa va njasaa nza tipə kwa hur ghyi tsa Kwa sləkəpə lə ciki tsa ka məndi vaa ghaa kəsay məndiy dzəmbə ciki tsa Kwa sləkəpə.
Məndi ɓanavə sləni vasə shiy dzəmbə ciki tsa Kwa sləkəpə kaa Hiram
13 Dza mazə Saləmuŋ mbaʼ ghunay ndəə dzəmbə məlmə Tir ta har ndə sləni. Hiram kə məndi kaa slən tsa ci. 14 Ntsa vay, mali mbə takə tsa Neftali niy yakə na, mbaʼ zata niy mətiy, ndə ka tir niy nza diy. Ndə vas mbəzə ghəmə na niy nza Hiram tsa va. Təruŋ niy mbata na sləni, mbaʼ sənashi məni shiy, lə məcaŋa və təruŋ ta məni ya nima shiy lə mbəzə ghəm na. Dza na mbaʼ səəkiy dzakə mazə Saləmuŋ ta mananci shi ɗi na gwanashi.
Shəlhi mənti məndi tə mbəzə ghəm na
( 2 NəMezh 3.15-17)
15 Dza Hiram ki, mbaʼ vasəti shəlhi bakə tə mbəzə ghəm na. Basa faɗə mbaʼ bazli kutiŋ niy nza bitə tsa shi, ta tsəɓayshi na ghuir basa mahəkanə. 16 Dza na mbaʼ vasəti shiy bakə tə mbəzə ghəm na, ta sərəshiy dzəghwa ghən shəlhi va. Bazli bakə mbaʼ vəli dəvə kutiŋ niy nza bitə tsa kwa taŋa shi va, tsəgha kwa baka va diɓa. 17 Dza na mbaʼ ghasləti shi kwa ghən shəlhi va va, lə shiy mbərə mbərə nja zəʼu, mbaʼ shiy nja məkirshi. Mbərfəŋ niy manati na shi va tə kwa taŋa shi va, tsəgha tə kwa baka va diɓa. 18 Dza na dzar tə shi mbərə mbərə ni va nja zəʼu ni tə shi kwa ghən shəlhi va, mbaʼ mamanati shiy nja ya fə gərenadə. Zərə bakə bakə niy manatishi na. 19 Zhini na diɓa, mbaʼ mamanaghwa kwa baka shiy dzəghwa ghən shəlhi va nja mbərə ghu shi har məndiy lisə, basa kutiŋ bitə tsa shi va. 20 Bələku bələku bakə, dəzlətsəɓə tə shiy kutiŋ niy manati na shi nja ya fə gərənadə ni va tə shi bakə ni va kwa ghən shəlhi bakə ni va. Tə miy shi kwa ghən shəlhi va ki na, mbaʼ manati nihuti shiy diŋədiliŋə diŋədiliŋə, dikəɓa ghəshi kaa shi nja mekirshi ni va lə shi nja mbərə ghu ni va. 21 Dza Hiram ki, mbaʼ liy shəlhi bakə ni va miy kwa taŋa ciki tsaa dzəmbə cikə Hiyala. Tsahuti kutiŋ na, tar bəla kwa bəzəmə, “Yakiŋ” kə məndi kaa tsava. Ɗi naa gəziy: “A Hiyalaa ɓəpə berci”. Ma tsahuti kutiŋ na, tar kwa zleɓi “Buwaz” kə məndi kaa slən tsa tsava. Ɗi naa gəziy: “Mbə Hiyala na bərci”. 22 Dzar tə ghən shəlhi bakə ni vay, a shiy niy nza mə ghən shi nja mbərə ghu shi har məndiy liy. Ava tsəgha kəɗanti Hiram məni shəlhi va.
Ceʼuer dikə dikə ni bakə
( 2 NəMezh 4.2-5)
23 Zhəghwa Hiram diɓa, mbaʼ vasəti tsəʼu dikə dilil ghəci, tə mbəzə ghəm na. Bazli cifə niy nza buŋ tsa ci, kafə tə tsahuti miy tsa ci paʼ tar tsahuti. Biti tsa ciy dzəta ghumə na basa bakə mbaʼ vəli dəvə kutiŋ. Mbaʼ kə məndiy dəzli lə ghuriy, basa mbərfəŋ mbaʼ bazli kutiŋ dza ghuir nza wakə. 24 Dza na dəzlətsəbə ghaslanti tsəʼu tsa va dzar tə miy ci lə shiy nja ya fə har məndiy kulukintə. Tə bərkə basa kutiŋiy, faɗəmətsəkə niy vasatishi na, zərə bakə. Yəm ka shiy kutiŋ niy vasati na shi ghaslə vaa dzəti tsəʼu tsa va. 25 Dza na diɓa, mbaʼ vasəti shiy nja pa slay məŋ lə bakə, bəm fati tsəʼu tsa va tə mətsənihi shi. Slay vay, njasaa dzati muw niy nza kuma nihuti mahəkanə, nihuti mahəkanə na, njasaa dzəvəri mirkwi kuma shi, nihuti mahəkanə diɓa na, njasaa dzəghwa həci na shi kuma, ma nihiti mahəkanə na njasaa dzəghwa ghumə. Mətsənihi shi gwanashi ki na, ka jikəva. Mbaʼ ghəshi zhəghati mətsənihi shi gwanashi tə jipi, tasə tsəʼu tsa va ti shi. 26 Bəʼi tsa tsəʼu tsa vay, nja ɓəlaʼi dəvə kutiŋ niy nza na, dzar tə miy tsa ci na, nja pəhər sa shiy tsa ghasləti məndi lə mbərə ghu shi har məndiy liy məndi mənti. Yam gar litər bələku bələku dəghəsə dəghəsəmətsəkə niy dzəghwa naa dzəghwa tsəʼu tsa va.
Mutiti gəduw mənti məndi tə tsahi mbəzə
27 Zhini Hiram diɓa, mbaʼ vəsəti mutiti gədewesli məŋ tə mbəzə ghəm na. Bitə tsa nzə kutiŋ dzati dzatiy, basa kutiŋ niy nza na, buŋ tsa nzə dzar dzar na, basa kutiŋ diɓa, ma bitə tsa nzəə dzəta ghumə na, bazli kutiŋ mbaʼ vəli dəvə. 28 Avanay njasa niy vasəti na mutiti va: Sa dza nay, mbaʼ vasəti Tsahi mbəzə ghəm na slehə sləhə sləhə, mbaʼ mənti kadər li shi, zhini na tsəgha ghəci mənti nihuti, mbaʼ zlazlaŋəlati nihuti dzar tə nihuti. 29 Mbaʼ vasati shi ghaslə tə tsahi kadər tsa va, nja pa zhəl nihuti, nja pa kəɓə məcar nihuti, nja pa sherubeŋ nihuti. Tsəgha tə ni dzəmə vəgha slərpə nzə diɓa. Dza na dzar ta mətsəni shi nja pa zhəl ni va, lə shi nja pa kəɓəhi ni va, mbaʼ vasəti shiy zəghə zəghə nja mbərə ghu. 30 Səɗa faɗə faɗə niy vasati məndi lə mbəzə ghəm na dzar tə mutiti va. Tsahi ighə məndi dzar mbə shiɗeshiɗer mutiti va diɓay, tə mbəzə ghəm na niy məntishi na, lə nihuti tsahi niy kəsəti na ni dzar səɗa muwta va mbə shi dza kwa bəla faɗə. Yəm kutiŋ niy mənti na tsahi va lə kadər tsa mutiti va. Bitə bitəɓa ghəshi niy nza na kaa shi nja mbərə ghu ni va. 31 Ka səməkə tə ghən mutiti vay, dilil dilil niy manati na kwal, taŋə vəli dəvə juw niy nza biti tsa ciy dzəta ghumə. Tə kweler va niy fə məndi kwekwer. Kwal tsa tə muwta kutiŋiy, vəli dəvə kutiŋ mbaʼ reta niy nza buŋ tsa miy tsa ci. Naa niy taŋəti kadər va bəlay, dilil niy nza naw, yəmyəm niy nza bəla nzə faɗanata. Mbaʼ niy lalati keʼwer dzar ti ta ghaslə nzə. 32 Shiɗeshiɗer faɗə faɗə ni va tə mutiti vay, dzar ta mətsənihi miy tsa kadərhi va niy fiyshi na, ma tsahi ighə məndi va dzar mbə shishiɗer mutiti va na, ka dzəvəri mbə muwta va. Shishiɗer mutiti vay, vəli dəvə kutiŋ mbaʼ reta niy nza buŋ tsa kwa hur shi. 33 Njasa ka məndi vaa mənti shishiɗer mutiti gədewesli ka məndiy dza ta mbəzə li shiy, war tsəgha niy məntishi na. Gətaa dzəvəri mbə shishiɗer shi, mbaʼ garagara shi, mbaʼ rəyuŋhi shi, mbaʼ fukəhi shiy, tə mbəzə ghəm na niy məntishi na gwanashi. 34 Aa niy vasati nihuti shiy dzar tə pi tsa jajakəva kadərhi va faɗanashi ta ɓanshi bərci. Shi vay, jakə ka vəgha kutiŋ niy nza ghəshi lə kadərhi va. 35 Mə ghən mutiti va, dzar tə miy tsa shiy, aa niy ghaslantishi lə shiy dilil dilil nja daghuba mazə dəzlətsəɓə. Shi ghaslə vay, reta vəli dəvə niy nza bitə tsa shi. Dzar tə pi tsa mə ghən va diɓay, aa niy manati pəhiy kəsə ti, mbaʼ nihuti shiy ɓəlaʼi ɓəlaʼi, yəm ka shiy kutiŋ niy nza shi bakə ni va lə muwta va gwanata. 36 Dza Hiram diɓa ki, mbaʼ ghasləti pəhiy kəsə shiy va, mbaʼ ni ɓəlaʼi ɓəlaʼi ni va shiy sa niy kama ghəshi ghaslə ghaslə. Lə pa shiy nja sherubeŋhi , mbaʼ pa shiy nja zhəl, mbaʼ pa shiy nja divədivi fə slərpə niy ghaslətishi na, dəzlətsəɓə niy dəzlayshi na lə pa shiy nja mbərə ghu. 37 Shi kutiŋ ni niy mənti na mutiti gədewesli məŋ ni va. Lə tsahi kutiŋ ni, yimyim dikə tsa shi, yim pashi niy nza ghəshi gwanashi.
38 Dzəghwa Hiram diɓa, mbaʼ vasəti tseʼuer məŋ tə mbəzə ghəm na, bəm bəm fafaghwashi kwa mutiti məŋ ni va. Basa kutiŋ niy nza bitə tsa tsəʼu kutiŋ, Yam gar litər bələku məŋ lə kwaŋ niy dzəghwa naa dzəghwa tsəʼu kutiŋ. 39 Dza na mbaʼ fiy mutiti va cifə, lə tsəʼu lə tsəʼu kwa shi tar bəla kwa bəzəmə cikə Hiyala, nihuti cifə na, tar bəla Kwa zleɓi ci. Ma tsa dikə tsa va tsəʼu ki na, bəm ghəci fiy dza kwa bəla kwa bəzəmə cikə Hiyala, njasaa dzəghwa həci dza kwa ghumə.
Shi mənti məndi tə tsahi mbəzə ta fəshi mbə cikə Hiyala
40 Sa vasanti Hiram tseʼuer lə shiy hənzə shiy mbaʼ hupehuper dza məndiy ti shiy kwa shi ta məsə shiy kiy, niy tərə məni nihuti shiy niy ɗi mazə ghəci mananci ta dzəmbə ciki Hiyala ghula kiw. Avanashi shi vasəti na va:
41 Shəlhi bakə,
mbaʼ shiy sərəə dzəghwa ghən shəlhi dilil dilil bakə,
mbaʼ shiy mbərə mbərə nja zəʼu bakə ta sərəshiy dzəghwa ghən shi sərəghə məndi va dilil dilil bakə dzəghwa ghən shəlhi va,
42 mbaʼ shiy nja ya fə har məndiy grənadə bələku bələku faɗə, ta səsərəshi dzar tə shi nja mbərə zəʼuhi ni va bakə ni, zərə bakə bakə niy nza ghəshi dzar tə shi nja zəʼuhi ni va kən shi kwa ghən shəlhi va.
43 mbaʼ mutiti gədewesli məŋ
mbaʼ tseʼuer məŋ ni va faghwa məndi kwa mutiti va
44 mbaʼ tsəʼu tsa dikə tsa, dilil ghəci,
mbaʼ kəɓəhi məŋ lə bakə ni va nza tsəʼu tsa va mə shi.
45 mbaʼ kuekuer ta kaʼu pəsər, mbaʼ shiy hənzə shiy, mbaʼ hupehuper ta shikə shiy məsə shiy dzəghwa shi. Tsəgha niy nza ghəshi.
Shi mənti Hiram va gwanashiy, mazə Saləmuŋ niy gəzanci na mənishi tsəgha ta fəshi mbə ciki tsa Kwa sləkəpə. Tə mbəzə ghəm na niy vasətishi na, mbaʼ nditishi mbə ghu. 46 Sa niy gəzanci maziy, mbə rəkiɗə niy vasəkəvəri Hiram shi va, dziy kwa teʼu pi Zhurdeŋ, kwa jipə məlmə Sukutə lə Sartan. 47 Liy hum ki na, mbaʼ mazə Saləmuŋ dzaa fəfiy shiva tə pi tsa dza ghəshiy nza, mbə ciki Hiyala. Ɗanshi niy nza ghəshi kala gar mbay ndəə sənay nda kiluw hum niy nza shəndəkə tsa mbəzə ghəm na yiɗəhu məndi ta məni shi va li shi.
48 Dzəghwa Saləmuŋ diɓa mbaʼ gəzanshi kaa mbəzli, mbaʼ ghəshi vasəti shiy niy ɗi na tə mbəzə kwa shamshama gwanashi ta dzəmbə ciki tsa Kwa sləkəpə. Avanashi shi va:
Pətsa ka məndiy ndi shiy zən nja ʼurdi ti,
mbaʼ tabəl tsa ka məndiy fə peŋ tsa vəlanta məndi kaa Kwa sləkəpə ti,
49 mbaʼ shi ka məndiy fə gərkuwa ti shi miy tsaa gura ɗewɗew va ciki. Cifə tar bəla kwa bəzəmə ciki tsa va, cifə tar bəla kwa zleɓi ci, tə mbəzə kwa shamshama riŋriŋ na,
mbaʼ shi ghaslə mənti məndi nja mbərə ghu shiy, mbaʼ gərkuwahi, mbaʼ shiy kəlaʼu shiy, ta kəlaʼu shi nza gərkuwa va ti shi li shi,
50 mbaʼ nihuti tseʼuer, mbaʼ hweshiɗiɗi ta slasla ghuir ka məndiy tsə gərkuwa li shi, mbaʼ nihuti hupehuperiy ti shi dza məndiy məsə shiy dzəghwa shi, mbaʼ hupehuperiy sa shiy, mbaʼ shi dza məndiy ndi ʼurdi ti shi, tə mbəzə riŋriŋ na,
mbaʼ pəlpəli gəzli tə gəzli miy ciki tsaa gura ɗewɗew va, mbaʼ ni tə gəzli miy tsa dikə tsa va ciki.
51 Ma sa kəɗanti mazə Saləmuŋ məni sləni dza kwa ciki tsa Kwa sləkəpə gwanata ki na, mbaʼ dzaa ɓasəkə shiy niy vəlanati diy Davitə kaa Kwa sləkəpə. Kar gəna, mbaʼ mbəzə kwa shamshama, mbaʼ nihuti shiy ghənghən ghənghən. Dza na mbaʼ fiy shi va gwanashi mbə ciki tsa ka məndiy fə shi nza bama ti shi kiy ghyi tsa Kwa sləkəpə.