Saləmuŋ ɓəghə sərndəkə tsa Kwa sləkəpə dzakə ghyi tsa nzə
(NəMezh 2 Veh 5.2-7.10)
8
Liy hum ki na, dzəghwa mazə Saləmuŋ mbaʼ ɓasəti mbəzli dikə dikə ni mbə ka Izərayel, lə mbəzliy ʼwa kwal gwanashi kaa huhuhi, mbaʼ zhəriy sləkə mbəzli njasa səvəri ghəshi kwa miy dəgha shi. Mbə məlmə Zheruzalem niy ɓasətishi na ta ɓə sərndəkə tsa Kwa sləkəpə səəkə mbə Məlmə Davitə, məlmə har məndi vaa Shiyuŋ, ta dzəmbə ciki Hiyala. 2 Dza zhər ka Izərayel gwanashi ki, mbaʼ ghəshi ɓasəshi ta məni makwaghwa vəgha mazə Saləmuŋ tə kwa mbərfaŋa tir tsa har məndi vaa Etanimə. 3 Sa ɓasəshi mbəzli dikə dikə ni mbə ka Izərayel gwanashi ki na, dza ka ta Hiyala ka ɓə sərndəkə sla kiri. 4 Laŋ ghəshi ɓəvə sərndəkə tsa Kwa sləkəpə mbaʼ gaskaa kumə lə Kwa sləkəpə, lə shi mbə gaska va gwanashi. Ka ta Hiyala lə mbəzli mbə takə tsa Levi niy ɓə na shi va. 5 Dza mazə Saləmuŋ lə ka Izərayeləə ɓasəshi gwanashi vəgha kwa kuma sərndəkə tsa va, mbaʼ ghəshi sləsliy teŋkesli mbaʼ slay ɗaŋshi, kala gar mbay məndiy mbəratishi ta sənay ɗaŋ tsa shi.6 Liy hum ki na, dza ka ta Hiyala bəm ghəshi dzəmbəə fiy sərndəkə tsa Kwa sləkəpə tə pi tsa gumati məndi ta fə ti, liy dapa mbə tsaa gura ɗewɗew va ciki. Ta bəkəbəkəhi sherubeŋhi niy fiy ghəshi. 7 Kən pi tsa gumati məndi ta fə sərndəkə tsa va niy pəlakən sherubeŋhi va bəkəbəkəhi shi, ta ndəghu kar sərndəkə tsa va lə getesliy ɓə ci. 8 Bitə bitə təruŋ niy nza getesli va. Mbə pəzli ka getesli vaa nza mbaʼ kə ndə mbə ciki tsa dikə tsa va kwa kuma ciki tsa ɗewɗew tsa va, ciki tsa ka məndi vaa ghaa kəsay məndiy dzəmbə ciki Hiyala. Ma mbaʼ kə ndə pərikə tə ngulay, ka pəzli ghəshiw. Tə pi tsa va na ghəshi paʼa ndatsə. 9 Niy nza nihuti shiy kwa sərndəkə tsa va dzəghwa kən hərezli ɓəleʼi ɓəleʼi ni va bakə ni niy faghwa Muyizə mə dəlagwa Hurebə ghalaa niy slati Kwa sləkəpə va kiri lə ka Izərayel, sa ɓəkəvərishi na mbə hiɗi ka Ezhiptəw.
10 Sa səvərishi ka ta Hiyala mbə ciki tsa ɗewɗew tsa vay, dza timbətimbə tisl təhay pi tsa kiy ghyi tsa Hiyala va. 11 Shaŋ ka ta Hiyala ta mbata ghəra sləni shi va timbətimbə va. Sa nza nay, a shəndəkə tsa Kwa sləkəpə niy təhay ghyi tsa nzə. 12 Ma kə Saləmuŋ ki na:
«A Kwa sləkəpə, a gha niy gəzəkə mbə timbətimbə tərkusl na dzee ta nziy pə gha niy ni.
13 Sanay, avanara ngatəŋa ghyi wəzə təruŋ, ghyi tsa dza ghaa nziy mbə ta kwa ndimndim,» kə.
Gəzə kuma Saləmuŋ fəca gha məndi ghəra sləni kiy ghyi tsa Kwa sləkəpə
14 Dzəghwa mazə mbaʼ zhəghata kuma ci dza kwa ka Izərayeləə ɓasəshi va gwanashi tiɓa məgarə, mbaʼ təfanatishi miy. 15 Ma kə na: «Usa nə ya kaa Kwa sləkəpə, Hiyala ka Izərayel. Aa niy gəzanakə kuma kaa dirə Davitə. Dza na mbaʼ mənti kumaa niy gəzanakə na va dəʼu ghən tsa nzə ndatsə. A kə niy niy: 16 “Ghala ɓəkəvəree hulfə mbəzlee ka Izərayel mbə hiɗi ka Ezhəpətiy, səəkee ni: mbə məlmə takə tsa tsaʼa tsa dza məndiy lara ghyi ta nziyee mbə ta nza slən tsee ti pənuw. Ta na na gha gha Davitiy, ee tivəŋa ta məni mazə dzəkən hulfə mbəzlee ka Izərayel,” kə niy ni. 17 A dirə Davitə niy tarəkə nganta ghyi kaa Kwa sləkəpə Hiyala ka Izərayel. 18 Ma kə Kwa sləkəpə kaa ngəci nanzə ki na: Wəzə na kuma gha nja na tarəkə gha ngara ghi. 19 Nanzə kiy, gha dza na ta nga ghyi tsa vaw, zəghu yakə gha dəʼu ghən tsa ghay, ghəci dza na ta ngara ghyi tsa va, kə. 20 A Kwa sləkəpə mənti kumaa niy gəzəkə na va məni: Yən mbəərə na dirə Davitə, yən na sa kwa gəzli mazə ka Izərayel njasaa niy gəzəkə Kwa sləkəpə va, avanara ngati ghyi tsa kaa Kwa sləkəpə Hiyala ka Izərayel. 21 Dzee mbaʼee gumati pi kiy ghyi tsa va ta fə sərndəkə tsa nza hərezliy ndəgha fəti ta sla kiri tsa slati Kwa sləkəpə va lə jijihimmə ka Izərayel kwa. Ghala vəghu tsaa niy ɓəshi na səvəri mbə hiɗi ka Ezhiptə niy slati na kiri tsa va li shi,» kə Saləmuŋ.
Saləmuŋ cəʼu Kwa sləkəpə Hiyala ka Izərayel
( 2 NəMezh 6.12-40)
22 Dza Saləmuŋ garə gariy kwa kuma ka Izərayel gwanashi, kwa kuma pi tsa ka məndiy vəlanta shiy ti kaa Kwa sləkəpə. Kafə kafashi divədivi ciy dzəta ghumə. 23 Ma kə na: «A Kwa sləkəpə Hiyala ka Izərayel, hiyala tiɓaa yiməva lə gha ya məɓa mə ghumə, ya tikə tə hiɗiw. Na na ghay, ka dzəghwa gha kən sla kiri tsa slati gha lə ka sləni ghaw. Kuma wəzə na ka ghaa mananshi ghəshi kəə məni kuma ɗi gha lə nəfə tsa shi kutiŋ. 24 A gha mananati kumaa niy gəzanakə gha mananci kaa ndə sləni tsa gha dirə Davitə. Kumaa niy gəzanakə gha lə miy tsa ghay, gha dəʼu ghən tsa gha mənti na ka nata məndi ndatsə. 25 Nana kiy Kwa sləkəpə Hiyala ka Izərayeliy, aa cəʼuŋee a gha mənti kumaa niy gəzanakə gha va kaa ndə sləni tsa gha dirə Davitə. A pə gha niy niy: “Mbaʼ kə ndərazhi gha dzaa məni məhərliy dzəkən nziy tsa shi lə ya, njasa mənti gha vay, Aa gəzaŋee ya humɓay, war ntsa kwa miy dəgha gha dzee ti ta məni mazə dzəkən ka Izərayel liy hum gha” pə gha niy ni. 26 Va tsəgha kiy Hiyala ka Izərayeliy, titihu əə cəʼuŋee, mənti kuma gəzanakə gha va məni kaa ndə sləni tsa gha dirə Davitə. 27 Ka nziyta Hiyala tikə tə hiɗi tepuw. Ya mə ghumə lə dikə tsa nzə gwaʼ gwaʼay, pi nziy tsa nzə tiɓaw, tərə na ghyi tsa ngatee tsa na.
28 Titihu Hiyalee Kwa sləkəpə, favə cəʼuee, lə wahee yən ndə sləni tsa gha. Favə har tsee lə cəʼuee yən ndə sləni tsa gha ndatsə. 29 A gha gəzəkəə dzəkən ghyi tsa: “kiyɓa dzee nza,” pə gha. Əə cəʼuŋee a gha fakən məhərli gha kən ghyi tsa, havəghu lə hivir. Favə cəʼuee na cəʼuŋee tərəɗə kumee dza kwa pi tsa, yən ndə sləni tsa gha. 30 Ghala vəghu tsa dzee wahəŋa wahə ghiy lə mbəzli gha ka Izərayel, tərəɗə kuma ghiy dza kwa pi tsay, fa tə gha wahə ghiy. Gha mə ghumə nza gha va lə nziy tsa ghay, faŋiy tə gha, pəlataŋiy tə gha kuma ghiy jikir na.
31 Mbaʼ kə tsahuti ndə mananati kuma jikir na kaa tsahuti, mbaʼ kə məndi ni kaa ngəci: “war ghaa zəmə fəla,” kə məndi kaa ngəci, dza na mbaʼ səəkiy dzəghwa kuma pi tsa ka məndi tsaa vəliŋa shiy ti mbə ciki tsa gha tsay, 32 na na ghay Kwa sləkəpiy, favə tə gha cəʼu ghiy mə ghumə nza gha va lə nziy tsa gha. Nəghətaa gha nziyŋa guŋaa ma, slati tə gha nguvə kwa jipə ka sləni gha va. Ɓasanakən tə gha nguvə kaa ntsa nza fəti və, kən kə kuma dzaa nza. Ntsa slar tsa na, mbaʼ məndi sənay, fəti vuw, kə məndi.
33 Mbaʼ kə mbəzli gha ka Izərayel kala dzaa mbashi ma ka mbəzə shi tə mbərkə sa məntəŋa ghəshi kuma jikir na, dza ghəshi ka tsa titihu, ka falŋa, ka cəʼuŋa, ka wahəŋa wahə mbə ciki tsay, 34 favə tə gha cəʼu shi gha məɓa mə ghumə Kwa sləkəpə. Pəlata tə gha kuma shi jikir na. Mbəzli gha na ghəshi. Zhinikəshi tə ghaa dzəti hiɗiy niy ɓanavəshi gha va kaa jijihishi.
35 Ya ə dza ghaa garəti vanə kala nzəmə ma ghəci tə mbərkə sa dza mbəzli gha vaa məntəŋa kuma jikir na, mbaʼ kə ghəshi dzaa cəʼuŋa tərəɗə kuma shi dza kwa pi tsa, ka fal slən tsa gha, mbaʼ ghəshi zlata məni kuma shi va jikir na, sa dza ghaa sanamiyshi ngəraʼuy, 36 favə tə gha cəʼushi mə ghumə Kwa sləkəpə. Pəlata tə gha kuma shi jikir na, sa nza nay, ka sləni ghaa ghəshi, zhini hulfə mbəzli gha ka Izərayel ghəshi. Canatishi tə gha tsa tiɗiɗə tsa kwal tsa dza ghəshiy dza kwa. Nzəmanshi tə gha vanə dzəti hiɗi gha va ɓanavəshi gha ka ni shi hiɗi kaa mbəzli gha va.
37 Ya ma dza naa səkwataa dzəti hiɗi ghiy, ya biyambə, ya ə dza haa hwapəta, ya ə dza naa hawəta, ya heyer dza naa səəkəshi, ya jər dza naa səəkiy, ya əə dza ka mbəzə ka Izərayel kalay məlməhi ngangaghwa ka Izərayel kwa kələm, ya tsama ngəraʼu dza naa nza, ya tsama zəlghu dza naa nzay, favə tə gha wahə ka Izərayel. 38 Ya ta nama kuma dza ghəshiy cəʼuŋa, ya ta nama kuma dza ghəshiy wahəŋa wahə. Ya ndə kutiŋ mbə mbəzli gha ka Izərayel dza naa nza, ya ghəshi gwanashi dza naa nza, mbaʼ kə jikir tsa mənti ghəshi dzaa zhanshi təruŋ mbə nefer shi, dza ghəshi ka kafə divədivi shiy dzəta ghumə tərəɗə kuma shi dza kwa ciki tsa ta cəʼuŋay, 39 favə tə gha cəʼu shi mə ghumə nza gha va lə nziy tsa gha Kwa sləkəpə. Pəlata tə gha kuma shi jikir na, kəətitishi tə gha. Ya kaa tsama ndiy, geʼi ta kuma mənti na pə gha dzaa mananci kuma njana sənay gha nəfə tsa ci. Ta na navay, war gha kutiŋa na saa sənata kuma mbə nəfə tsa ndə ngəri. 40 War tsəgha pə gha dzaa məni, nza ka Izərayel mbəə hazləni va gha ya paʼ humɓa mbə nziy tsa shi tə hiɗi ɓanavəshi gha va kaa jijihiŋiy.
41 Ya ndə səəkə səəkə, ntsaa kama mbə hulfə mbəzli gha ka Izərayeliy, ta səəkə dza na tə hiɗi kərakə ni sa dza naa favə gaka slən tsa gha. 42 Sa nza nay, ta favə dza mbəzli mbə nihuti hulfəhi: Hiyala dikə na nza gha, a bərci va gha ta məni kuma ya dza kwamaɓa, kə ghəshi. Sa dza ndə səəkə səəkə tsa vaa səəkə ta cəʼuŋa kiy ghyi tsay, 43 favə tə gha cəʼu ci mə ghumə nza gha va lə nziy tsa gha Kwa sləkəpə. Mananati tə gha kuma dza na vaa cəʼu va gha. Ta mbə hulfəhi mbəzli tə hiɗi gwanashiy sənaŋa, nza ghəshi hazləni va gha njasa hazləni hulfə mbəzli gha ka Izərayel va va gha, mbaʼ ghəshi sənay kaa ngəŋa ngatee ghyi tsa, ta fə shəndəkə dzəti gha, kə ghəshi.
44 Sa ka hulfə mbəzli gha ka Izərayel dza ta pa lə ka mbəzə shi dza kwa bəla dza ghaa ghunashi, mbaʼ kə ghəshi dzaa zhəghata kuma shi dza kwa məlmə təravə gha na mbaʼ ghyi tsa ngatee tsa ta fə shəndəkə dzəti gha, ka cəʼuŋay Kwa sləkəpiy, 45 favə tə gha cəʼushi lə wahə shi mə ghumə, kəətitishi tə gha.
46 A Kwa sləkəpə, a gha sənay ndə tiɓa kala məni kuma jikir naw. Mbaʼ kə mbəzli gha ka Izərayel dzaa məntəŋa kuma jikir na, mbaʼ nəfə tsa gha satiy dzəkən shi, dza gha mbərəkə gha zlashi ka jakahi shi ta kəəsəhushi ka mevivi dzashi li shiy dzəti hiɗi ndəku ni ya ni kərakə ni, 47 dza ghəshi tə hiɗi nza ghəshi va ka mevivi, mbaʼ ghəshi zəzəvə kuma, tapə ghəshi məshi mbə tsaŋa titihu va kuma shi va jikir na, ka wahəŋa wahə tə hiɗi mbəzliy mbashi va: “A ghiy mənti kuma jikir na, kwakwa mənti ghiyuw, va ghiy na fəti” kə ghəshi, 48 dza ghəshi tə hiɗi nza ghəshi va ka mevivi ka tsa titihu lə nəfə kutiŋ, lə məhərlishi gwanata, ka nighə pi dza kwa hiɗi shi ni ɓanavə gha kaa jijihiŋiy, mbaʼ dza kwa məlmə təravə gha na, mbaʼ ghyi tsa ngatee tsa ta fə shəndəkə dzəti gha, ka cəʼuŋay, 49 favə tə gha cəʼu shi lə wahə shi mə ghumə nza gha va lə nziy tsa gha Kwa sləkəpə. Kəətitishi tə gha. 50 Pəlata tə gha kuma dza ghəshiy məntəŋa jikir na mbə nəfə tsa gha. Ya nama kuma dza ghəshiy məntəŋa jikir na gwanatay, pəlata tə gha mbə nəfə tsa gha. Fambə tə gha zhəhur ti shi mbə nəfə tsa mbəzliy dzaa kəəsəhushi ka mevivi, nza hur tsa shi zhanshi ti shi. 51 Sa nza nay, mbəzli gha na ghəshi, ni gha mbəzli ka shi gha, mbəzli gha ɓəkəvəri gha mbə hiɗi ka Ezhiptə, ghəshi mbə sa ngəraʼu tsa təruŋ tsa. 52 Ə cəʼuŋee a gha fə ghən ta wahə wahəŋee yən ndə sləni tsa gha lə ta hawə wahəŋa mbəzli gha ka Izərayel. Ya hum dza ghəshiy wahəŋa wahiy, fə tə gha ghən ta wahə shi va. 53 Sa nza nay Hiyala Kwa sləkəpiy, gha təravəŋiy na mbə nihuti hulfəhi mbəzli tə hiɗi gwanashi, ta nza ghiy ka ni gha mbəzli ka shi gha. Njasa niy gəzəkə gha va səvəri kwa miy Muyizə ndə sləni tsa gha, ghala vəghu tsaa niy ɓə gha va jijihiŋiy səvəri mbə hiɗi ka Ezhiptə,» kə mazə Saləmuŋ kaa Kwa sləkəpə.
Mazə Saləmuŋ cəʼu Hiyala a ghənzə təfanatishi miy kaa mbəzli nzə
54 Ghala vəghu tsaa cəʼu mazə Saləmuŋ cəʼu va, ka wahanta wahə kaa Kwa sləkəpə kiy, tə shinin ci niy gələɓiy na kwa kuma sərndəkə sla kiri tsa Kwa sləkəpə, mbaʼ divədivi ci kafə kafəə dzəta ghumə. Sa kəɗanti na cəʼu ki na, mbaʼ satiy. 55 Ma ghəci mə garə ki na, dza na ka təfə miy zlaŋ zlaŋ dzəkən ka Izərayel gwanashi. Ma kə na: 56 «Usa nə ya kaa Kwa sləkəpə ghənzə saa ɓanavəshi nziy mbə zərkə kaa mbəzli nzə ka Izərayel njasa niy gəzəkə na va. Kuma wəzə naa niy gəzəkə na məni nzə gwanata kwa miy Muyizə ndə sləni tsa nziy, aa mənti. 57 Nza Hiyala ghummə Kwa sləkəpə nziyta lə ghummə njasa niy nza na va lə jijihimmə. Ka ɗi na ghənzəə zhəghavəmmə humuw, ka ɗi na ghənzəə zlammuw. 58 Nza ghənzə zhəghashi nefer ghummə dza kwa, ta mbə ghummə nuw kwal tsa nzə wəzə, ka nuw kuma gəzəkə na lə kuma pəhəti na, ka nziy njasa niy gəzəkə na kaa jijihimmə. 59 Nza Hiyala ghummə Kwa sləkəpə zəzəə dzəkən wahə wahəniy ya na sənzənva kala zama ghən ti ya həvir, ya havəghu. Ta mbə ghənzəə kəəti ndə sləni tsa nzə ghəshi lə mbəzli nzə ka Izərayel mbə ghəzliy dzaa nza kən shi njasa səəkə vici. 60 Ghalaɓay, ta sənay dza hulfəhi mbəzli tə hiɗi gwanashi, ghənzə Kwa sləkəpə kutita na Hiyala, nahuti Hiyala tiɓa dzəghwa kənuw, kə ghəshi. 61 Ghuy kuraku kiy, kaa Hiyala ghummə Kwa sləkəpə dza naa ɗi ghuy ɓanavə nefer ghuy gwanashi, nza ghuy mbəə nuw kuma pəhəti na, ka məni kuma gəzəkə na, njasa nza ghuy tsa mbə məni sana,» kə mazə Saləmuŋ.
Shi sləsləniy məndi kaa Kwa sləkəpə
( 2 NəMezh 7.4-10)
62 Liy hum ki na, dza kar mazə Saləmuŋ ghəshi lə ka Izərayel gwanashi mbaʼ ghəshi sləsləniy shiy kaa Kwa sləkəpə. 63 Ta zərkə niy sləsliy Saləmuŋ shi va kaa kwa sləkəpə. Avanashi shiy niy sləsliy na: Slay bələku bələku bələku bakəmətsəkə bakəti, mbaʼ teŋkesli bələku mbaʼ bakəmətsəkə bələku bələku bələku. Ava tsəgha niy mənti kar mazə Saləmuŋ lə ka Izərayel gwanashi makwaghwa ghuni ghyi tsa Kwa sləkəpə ta gha ghəra sləni mbə. 64 Fəcava ki na, dza mazə mbaʼ fiy ngula miy cikə tsa Kwa sləkəpə va ta ndanta shiy məndi ti, lə ta vəlanta shi zakə məndi, mbaʼ ta vəlanta gəkə shi sliy məndi ta zərkə kaa kwa sləkəpə. Sa nza nay, pi tsaa niy vasəti məndi va tə mbəzə ghəm na ta vəlanta shiy kaa Kwa sləkəpə niy nza miy cikə tsa Kwa sləkəpiy, juiy niy nza na ta ndanta shiy lə ta vəlanta shi zakə məndi, mbaʼ ta vəlanta gəkə shi sliy məndi ta zərkə.
65 Geʼi lə vəghu tsa va diɓa ki na, mbaʼ mazə Saləmuŋ mənti Makwaghwa dikə na ghəshi lə ka Izərayel. Təruŋ niy ɓasəkəvashi mbəzli tə hiɗi ka Izərayel gwanashi. Ghava na mbə məlmə Lebu-Hamat paʼa tə miy həl ka Ezhiptə. Vici mbərfəŋ niy gha ghəshiy mənti mbə makwaghwa va kwa kuma Kwa sləkəpə, zhini mbərfəŋ ghəshi zhiniy mənti vici diɓa. Vici məŋ lə faɗə niy mənti ghəshi gwanata tsa nzə mbə makwaghwa va. 66 Ma sa kərəta makwaghwa ki na, dza mazə tə kwa dəghasa vici, liy hum kwa baka lumə va, mbaʼ gəzanshi dzashiy jighi kaa mbəzli. Dzəghwa mbəzli ki mbaʼ ghəshi təfanati miy kaa mazə, ka dzashiy jighi lə vəshi, təruŋ niy nza vəshi mbə nefer shi sa nza na mbaʼ Kwa sləkəpə niy mananati wəzə təruŋ kaa ndə sləni tsa nzə Davitə, mbaʼ kaa mbəzli nzə ka Izərayel.