Kwa sləkəpə zhiniy cinti ghən tsa nzə kaa mazə Saləmuŋ
(NəMezh 2 Veh 7.11-22)
9
Dzəghwa ki, cəkeʼ Mazə Saləmuŋ kəɗanti nganta ghyi kaa Kwa sləkəpə, mbaʼ nga tsa ci ghyi mazə tsa dza na ta nziy mbə, mbaʼ nga nga nihuti shiy niy tarəkə na nga mbə nəfə tsa ci. 2 liy hum ki na, mbaʼ Kwa sləkəpə zhiniy təzlita kaa ngəci kwa baka səɗa, njasa niy təzlita na va kaa ngəci mə pi tsa har məndi vaa Gabawuŋ. 3 Ma kə kaa ngəci na: «Ee favə cəʼu gha va lə kuma wahəkəra gha va. Ghi tsa ngatəra gha vay, ee fiy ka see, ta nza slən tsee ti, ta kwa ndimndim. Ti dza mətsee nza, kən dza məhərlee nza ya paʼa humɓa. 4 Dza kwa na gha bəlay, avanta kuma tiɓa: Mbaʼ pə gha dzaa nziy lə ya nja dəŋa Davitə lə nəfə tsa wəzə tsa, ka nuw kuma lə kwal tsa nzə, ka məni kuma gəzəkəŋee va gwanata, ka nuw kuma pəhətee, ka nziy njasa ɗi yay, 5 Ta fiy mbəzli kwa miy dəgha gha dzee ka mbəzliy dzaa məni mazə dzəkən ka Izərayel ya paʼa humɓa, njasa niy gəzancee va kaa dəŋa Davitə: “War ntsa kwa miy dəgha gha dza naa məni mazə dzəkən ka Izərayel ya humɓa,” pən niy ni kaa ngəci. 6 Ma mbaʼ pə gha ghuy lə mbəzli sləkə gha, mbaʼ ndərazhi ghuy dzaa zhəghavəra hum, ka dzaŋuy ta nuw nihuti hiyalahi, ka tsəfəku kwa kuma shi, mbərəkə ghuy zlata nuw kuma pəhətee ta nuw ghuy, lə kuma gəzaŋuy ya məni nziy, 7 ta ɓantəŋuy dzee ghuy ka Izərayel tə hiɗi ndaŋuy ya ni. Ghi tsa fiy ya tsa ka see, mbaʼee fati slən tsee tiy, dzar kwa dzee nza ghulaw. Sa dzee mənti tsəgha kiy, ta ushi dza hulfə mbəzli gwanashiy dzəkən ka Izərayel, ka sawashi. 8 Ghi tsa dikə tsa tsay, ngazla ngazla dza naa nza. Sa dza mbəzliy nay ghəshi mbə dzar vəghay, nja maɗaŋa dza ghəshiy nata nava kuma. Ma kə ghəshi dzaa ni na: “A shiy mənishi mənti Kwa sləkəpə gəla nini shiy lə hiɗi ni mbaʼ ghyi tsaa?” dza ghəshiy ni. 9 Ma kə məndi dzaa ni kaa ngəshi na: Sa nza na mbaʼ ghəshi zhəghanavə hum kaa Hiyala shi Kwa sləkəpə, Hyalaa niy ɓəkəvəri jijihishi va mbə hiɗi ka Ezhiptə, mbaʼ ghəshi dzashiy dzəmbə nuw nihuti hiyalahi, ka tsəfəku kwa kuma shi, va tsəgha ɓəkə Kwa sləkəpə ngəreʼuerhi va gwanashiy dzəkən shi, kə məndiy dzaa ni,» kə Kwa sləkəpə kaa Mazə Saləmuŋ.Nihuti shi mənəhu mazə Saləmuŋ
10 Mbə piyaa niy mənti Saləmuŋ va bakəmətsəkə na mbə nganta ghyi kaa Kwa sləkəpə lə mbə nga tsa ci ghiy, 11 Hiram mazə ka Tirə niy kəslanavə na shighu sedər, mbaʼ shighu zhenevəriye, zhini ghəci niy ɓanavə mbəzə kwa shamshama njasa niy ɗi na ta sləni ci. Va tsəgha ki na, mbaʼ mazə Saləmuŋ niy ɓanavə məlməhi bakəmətsəkə tə hiɗi Galile. 12 Dzəghwa Hiram mbaʼ səəkiy tə hiɗi Tir ta nighə məlməhi va. Sa nighətishi na na, kala təɓanci ma ghəshi. 13 Ma kə kaa Saləmuŋ na: «Məlməhi mbə ni ndara gha ni məlməhi kiw zəmərə Saləmuŋuw,» kə. Va tsəgha ka məndiy har hiɗi va paʼa ndatsə “hiɗi kavul” kə məndi. Ɗi naa gəziy: hiɗi kama bama ti shi. 14 Mbəzə kwa shamshama tunə mahəkanə mbaʼ reta niy ɓanakə Hiram kaa mazə Saləmuŋ.
15 Lə bərci niy ʼyapambə mazə Saləmuŋ mbəzli dzəmbə ghəra sləni nga ghyi tsa Kwa sləkəpə, mbaʼ nga tsa ci ghi, mbaʼ zlara har məndi vaa Milu, mbaʼ kələm tsaa dəzlay məlmə Zheruzalem, mbaʼ məlmə Hasur, mbaʼ məlmə Megidu, mbaʼ məlmə Gezer. 16 Məlmə Gezer vay, Farawaŋ mazə ka Ezhiptə niy ɓanavə na kaa zha ci, ghala vəghu tsaa niy pəhanavə na kaa mazə Saləmuŋ ta nza ghənzə ka mali ci. Məlmə ka Kanana niy nza na. Sa niy səvəriy na ta mbəzə li shiy, mbaʼ zləghuhu, mbaʼ bakwanti mbəzli mbəɓa, mbaʼ ndanti. 17 Va tsəgha niy zhini mazə Saləmuŋ gha nga məlmə Gezer va ki. Mbaʼ niy zhiniy ngati məlmə Bet-Harum-lə-Bas, 18 mbaʼ məlmə Balatə, mbaʼ məlmə Tamar tə gamba tə hiɗi va. 19 Dza mazə Saləmuŋ diɓa mbaʼ nganti məlməhi ka naa fə shi zəmə ci mbə shi, mbaʼ ni ka naa fə mutiti ka naa dza ta mbəzə li shi lə ni ka naa fə gədewesli ci mbə shi. Ya nima shiy niy ɗi mazə Saləmuŋ nga, ya mbə məlmə Zheruzalemiy, cəkeʼi niy ngantishi na, tsəgha mə dəlagwa Liban, zhini tsəgha dzar tə hiɗiy niy nza tə dəvə ci gwanashi. 20 A mbəzli mbə nihuti hulfəhi niy tərə tə hiɗi sləkə Saləmuŋ kala kama ghəshiy ka Izərayel: Ka Amur, mbaʼ ka Hiti, mbaʼ ka Perizhi, mbaʼ ka Hivi, mbaʼ ka Zhebuzi. 21 Ndərazhi mbə huləfəhi mbəzli vay, a ghəshi niy tərəmbə dzar tə hiɗi va sa niy bakwantishi ma ka Izərayel gwanashi. Mevivi niy nza ghəshi, ghəshi niy ghəra na sləni kwa bərci. Ya paʼa ndatsiy, mevivi ghəshi. 22 A na ka Izərayeliy, niy fambəshi Saləmuŋ mbə sləni kwa bərciw. Ka sawji niy nza ghəshi, ka sləkə ka sawji bələku nihuti mbə shi, nihuti niy gura dikə dikə mbə ka sawji nihuti, ka sawjiy ɓə shi mbəzə mbəzli dikə dikə ni mbə ka sawji nihuti, ka sawjiy zlərə gədewesli nihuti, niy zlərə mutiti gədewesli nihuti. 23 Mbəzli bələku bələku cifə mbaʼ cifəmətsəkə ghən kən shi niy tivə mazə Saləmuŋ mbəzli dikə dikə ni ta nighəə dzəkən mbəzliy ghəra sləni kwa bərci va.
24 Liy hum sa təɗanti zha farawaŋ ghyi tsa nzə mbə məlmə mazə Davitə mbaʼ dzata dzakə tsa nzə va ghyi tsa nganati Saləmuŋ ki na, mbaʼ Saləmuŋ ngati zlara har məndi vaa Milu. 25 Njasa səəkə piyay, mahəkanə səɗa niy ndanta Saləmuŋ shiy kaa Kwa sləkəpə, tsəgha ghəci slaslanta shiy ta zərkə tə pi tsaa niy ngati na va ta vəlanta shiy. Ka naa dza diɓay, ka ndanta shiy zən nja ʼurdi tə tsa ngati na va piy ta vəlanta shiy miy ciki tsaa gura ɗewɗew va. Ava tsəgha niy ghərava sləni kiy ghyi tsa Kwa sləkəpə, njasa təɓəta na.
26 Dzəghwa mazə Saləmuŋ diɓa mbaʼ dəʼuti kwambəwalhi mbə məlmə Eshiyuŋ-Gever vəgha pi tsa har məndi va Ela, dziy vəgha həl ghuvəl, tə hiɗi Eduŋ. 27 Dzəghwa mazə Hiram mbaʼ ghunanakə mbəzliy kurahəhu kuma kwambəwal mbə mbəzli ci ta nza ghəshi kwasəbə mbəzli mazə Saləmuŋ va. 28 Dzəghwa ka ghəra sləni lə kwambəwal va gwanashi ki, ka dzashiy dzəti hiɗi Ufir mbaʼ ghəshi dzaa ɓanakə mbəzə kwa shamshama taŋ tunə məŋ lə faɗə kaa mazə Saləmuŋ.