Mazə maliy sləkə Hiɗi Saba səəkəta ta wə va mazə Saləmuŋ
(NəMezh 2 Veh 9.1-12)
10
Dzəghwa mbaʼ mazə maliy sləkə hiɗi ka saba favə məndiy gəzə dzəkən sənata kuma sənata mazə Saləmuŋ, sa ɓanavə Kwa sləkəpə. Dza na kəram kafəta ta wə və, ta ɗuw kwemer iyahə iyahə ni, ta sənay nda sənata kuma na kataŋ. 2 Nishə tsəhəta mbə məlmə Zheruzalem lə mbəzli diɓə diɓə ni ɗaŋ tə səəbə nzə, mbaʼ ngalubahi lə shiy tə hum shi: Kar urdi, lə mbəzə kwa shamshama ɗaŋ, mbaʼ hərezli ka dimə. Sa tsəhəta na kwa kuma mazə Saləmuŋ na, dza na mbaʼ gəzanakə kumaa niy pəhəkə na mbə nəfə tsa nzə gwanata. 3 Dzəghwa Saləmuŋ cəkeʼ zləɓanakə kumaa dzəti kwemer ɗəɗuw na və. Kuma tiɓa ghənzə niy ɗuhu va mazə, caslakəta ghənzə kala gar zləɓanakə kuma ghəciy dzətiw. 4 Mbaʼ mazə mali ka Saba va nay njasa sənata Saləmuŋ kuma təruŋ tsa nzə tsəgha ki, mbaʼ nay ghyi tsa ngati na. 5 Zhini mbaʼ nashi shi ka naa zəmə, lə ceker ka mbəzliy ghəranci sləniy hi mbə, lə njasa ka ghəshiy ghəra sləni, lə shi pa ghəshiy dzəkən ghən shi. Mbaʼ nashi njasa nza mbəzliy ɓanci shi ka naa sa. Mbaʼ nashi shi ka naa ndanta kiy ghyi tsa nzə kaa Kwa sləkəpə. Mbaʼ səəta va nava kuma. 6 Ma kə kaa mazə Saləmuŋ ki na: «Waa kataŋ na kuma favee na məndiy gəzəə dzəkən gha lə dzəkən kuma sənata gha tə hiɗee. 7 Kala sa səəkəɗee dəʼu ghən tsee mbaʼee nata kuma va lə mətsə yay, niy zləɓa kuma gəəzə məndi va yaw. Sa nighee sanay, memir shiy na shi gəzəkəra məndi va ta shi nashee ni. A kuma sənata gha lə nziy tsa gha taŋəti na favee va məndiy gəzəə dzəkən gha gwanata. 8 Vəshi na ta mbəzli gha, vəshi ta ka sləni gha, ghəshi mbəzli vəgha gha ya hum ka fa kuma sənata gha na. 9 Usa kaa Hiyala gha Kwa sləkəpə ghənzə saa fiyŋa ka ntsaa sləkə ka Izərayel. Sa nza na mbaʼ Kwa sləkəpə ɗiti ka Izərayel ta kwa ndimndim va tsəgha fiyŋa na ka mazə tsa shi ta mbə ghaa nuw kuma lə kwal tsa nzə, ka məni kuma njasa təɓə na,» kə.10 Liy hum ki na, mbaʼ mali va ɓanavə mbəzə kwa shamshama kaa Saləmuŋ taŋ kaa tunə faɗə, mbaʼ urdi ɗaŋ, mbaʼ hərezli ka dimə. Ghala fəcavay, səəkə məndiy zhiniy nata urdi tsəgha ɗaŋ tsa nzə nja sa ɓanavə na va kaa mazə Saləmuŋuw
11 Kwambəwalhi mazə Hiram va niy dzashi ta ɓə mbəzə shamshama na tə hiɗi Ufiriy, a ghəshi niy pakə shighu almug ɗaŋ, mbaʼ hərezli ka dimə diɓa. 12 Lə shighu almug va niy mənti mazə Saləmuŋ Shəlhi mbə ciki tsa Hiyala lə shəlhiy jihəti ghyi tsa mazə, mbaʼ gəzhipipir ghənghən ghənghən kaa mbəzliy ha cəm. Səəkə məndiy nashi məndi pakə shighu almug tsəghaa dzəti hiɗi ka Izərayel ghala nza məndi, paʼa ndatsəw.
13 Dzəghwa mazə Saləmuŋ kuraku ki, mbaʼ ɓanavə ya nima shi ɗi na lə shi ɗuw na kaa mazə mali ka Saba va. Zhini na diɓa mbaʼ ɓaɓanavə nihuti shi təɓə mazə ɓanci kaa ndə. Liy hum ki na, dza na ka zhataa dzəti hiɗi nzə ghəshi lə ka sləni nzə.
Bərciy niy nza mbə mazə tsa Saləmuŋ lə shiy niy nza və
(NəMezh 2 Veh1.14-17; 9.13-28)
14 Njasa səəkə piyay, taŋ tunə bakəmətsəkə mahəkanti niy ɓə məndi mbəzə kwa shamshamaa səəkə dzəmbə məlmə Zheruzalem kaa mazə Saləmuŋ. 15 Mbərəkəshi shiy niy tsəhanci mbəzliy dzaa pakə shiy tə nihuti hiɗi ta ɗel shi, lə ni tsəhanci ka zhəghə dəvə tə hiɗi ci. Mbaʼ ghən tsa tsəhanci nihuti mezhizhi tə nihuti hiɗi tə dəvə ci, lə tsa tsəhə ngumənahi tə hiɗi ci.
16 Dzəghwa mazə Saləmuŋ mbaʼ gəzanshi kaa mbəzli, mbaʼ ghəshi vasəti galhi dikə dikə ni bələku bələku bakə, tə mbəzə kwa shamshama dəʼu dəʼu na. Lə kilu tsahi mbəzə kwaŋ niy vasəti məndi gal kutiŋ. 17 Zhini na mbaʼ gəzanshi kaa mbəzli, mbaʼ ghəshi vasəti ni juw juw ni galhi bələku bələku mahəkanə tə mbəzə kwa shamshama dəʼu dəʼu na. Lə kilu tsahi mbəzə kutiŋ mbaʼ reta niy vasəti məndi gal kutiŋ. Dza mazə ki, mbaʼ dzaa fiyshi kiy ghyi tsa har məndi vaa gamba fəhi Libaŋ.
18 Dzəghwa mazə diɓa, mbaʼ gəzanshi kaa mbəzli, mbaʼ ghəshi mənti gəzli mazə dikə, mbaʼ ghəshi ghasləti lə sliʼi ciwə, mbaʼ ghəshi hwakən mbəzə kwa shamshama kama kaɓə mbə kən. 19 Ta dzəmə ta nziy kwa gəzli vay, pi nja taŋa kwaŋ ka məndiy taŋə. Dilil niy nza pi tsa ka məndiy gihə ti, mbaʼ pi tsaa fə divediver dzar tə bəlahi ci bakanashi tarkə lə tarkə, tsəgha məndi fəɗiti pa zhəlhi, mbaʼ məndi fiyshi tar nahuti bəla lə tar nahuti bəla diɓa. 20 Zhini məndi diɓa mbaʼ məndi fəɗiti nihuti pa zhəlhi məŋ lə bakə, mbaʼ məndi fəfiyshi dzəmə tə pi tsa kwaŋ tsa va nja taŋa tsa, kwaŋ tar kwa bəzəmə, kwaŋ tar kwa zleɓi. Shiy tiɓa məndiy mənti tsəgha tə nihuti hiɗi ya kutiŋəw.
21 Shiy niy sa mazə Saləmuŋ shiy kwa shiy gwanashiy, tə mbəzə kwa shamshama niy vasətishi məndi. Ya nima shi kiy ghyi tsa nə məndi va gamba Libaŋ kə məndi kaa slən tsa ci diɓay, tə mbəzə kwa shamshama kama kaɓə mbə niy məntishi məndi gwanashi. Niy nza shi mənti məndi tə tsahi gəna kiyɓa ya kutiŋəw. Sa nza nay, ghala vəghu tsa mazə Saləmuŋ na, niy nza dimə tə tsahi gənaw. 22 A kwambəwalhi niy nza va mazə Saləmuŋ, ka ghəshiy dzay, ka dzashi lə kwambəwalhi mazə Hiram dzəmbə məlmə Tarshish. Mahəkan kə ghəshi mənti piyay, mbaʼ ghəshi səəkəshi lə tsahi mbəzə kwa shamshama, mbaʼ tsahi gəna, mbaʼ sliʼi ciwəhi, mbaʼ mebibi, mbaʼ egueriy təɓə.
23 A mazə Saləmuŋ niy taŋəti nihuti mezhizhi tə hiɗi gwanashi tə shiy lə tə sənata kuma. 24 Mbəzli tə hiɗi gwanashiy, war ə niy pəla ghəshi səəkə ta nay mazə Saləmuŋ, ta mbəə favə sənata kumaa niy fambə Hiyala va mbə məhərli ci. 25 Njasa səəkə piyay, war ə niy ɓaɓanci mbəzli shiy səəkə ghənghən ghənghən. Mbə niy ɓanakə shi tə tsahi gəna, mbə niy ɓanakə shi tə tsahi mbəzə kwa shamshama, nihuti na kubeŋer, nihuti na shi mbəzə, nihuti na urdihi, nihuti na gədewesli, nihuti na alfadarihi.
26 Dzəghwa mazə Saləmuŋ mbaʼ ɓasəti mutiti gədewesli ka məndiy dza ta mbəzə li shi bələku bələku mən lə faɗə, mbaʼ gədewesli bələku bələku bələku məŋ lə bakə. Mbaʼ dzaa fəfiyi nihuti dzar mbə məlməhi niy gumati na pi ta fəshi mbə shi, ma nihuti na, mbaʼ fiyshi vəgha mbə məlmə Zheruzalem. 27 Tə mbərkə mazə Saləmuŋiy, ɗaŋ niy nza gəna mbə məlmə Zheruzalem ka taŋəti ɗaŋ tsa hərezli. Zhini ɗaŋ shighu sedər ka taŋəti gubirihiy pəpəsə dziy kwa dəɓaŋ pi. 28 Tə hiɗi ka Ezhiptə lə tə hiɗi ka Shilishi niy dza ka zhəghə dəvə Saləmuŋ ta panci gədewesli. 29 Tə gəna kwa tsahi bələku bələku kwaŋ niy pakə məndi muwta gəduw kutiŋ tə hiɗi ka Ezhiptə, ma gəduw kutiŋ na gəna kwa tsahi bələku mbaʼ cifəmətsəkə ghən kən.Tsəgha niy panshi ka zhəghə dəvə va shi va kaa mezhizhi ka Hiti lə kaa mezhizhi ka Shiri diɓa.