Mazə Saləmuŋ zhəghanavə hum kaa Kwa sləkəpə
(NəMezh 2  Veh 11.18–12.1)
11
Ma dza mazə Saləmuŋ ki na, mbaʼ zhiniy ɗiti nihuti miʼi ɗaŋ mbə nihuti hulfəhi zhəkən zha Farawaŋ va : Ghehi ka Muwabə, mbaʼ ghehi ka Amun, mbaʼ ghehi ka Edum, mbaʼ ghehi ka Siduŋ, mbaʼ ghehi ka hiti. 2 Miʼi vay, ghehi mbə hulfəhi mbəzliy niy nə Kwa sləkəpə va kaa ka Izərayel: «Əntaa ghuy zləɓa jakəva lə mbəzli mbə hulfəhi va ma, əntaa ghuy zləɓa ghəshiy jakəva lə ghuy ma. Mbaʼ pə ghuy dzaa zləɓay, ta ngaɗambəŋuy dza ghəshiy dzəmbə tsəfəku kwa kuma hiyalahi shi va,» kə niy ni kaa ngəshi. Ya tsəgha nzə ki na, mbaʼ mazə Saləmuŋ jakiy lə mbəzli mbə hulfəhi va sa ɗiti na ghehi shi, mbaʼ ɓəɓəvə ghehi mbə shi ka miʼi ci. 3 Miʼi bələku bələku mbərfəŋ na niy ɓəvə na miʼiy dzakə ghyi tsa ci, ma ni tar bəla na, miʼi bələku bələku mahəkanə. Dzəghwa miʼi va ki, mbaʼ ghəshi zhəghanti nəfə tsa ci. 4 Ma sa maɗi mazə Saləmuŋ haliy ki na, mbaʼ miʼi ci va zhəghəhu nəfə tsa ci dza kwa nihuti hiyalahi. kala zhini ghəciy ɗi Hiyala ci Kwa sləkəpə lə nəfə kutiŋ, njasa niy ɗiti diy Davitə va Kwa sləkəpə lə nəfə kutiŋ. 5 Dza mazə Saləmuŋ ki, mbaʼ dzay dzəmbə tsəfəku kwa kuma Astarte hiyala ka Siduŋ, mbaʼ Milkuŋ hiyala ka Amun va gəmgəm na. 6 Shiy təɓanta ma kaa Kwa sləkəpə na shi mənti na va tsəgha ni ki, kala ɗiti fəti ghəci ta kuma gəzanakə Kwa sləkəpə gwanata, njasa niy ɗiti diy Davitə va fəti və. 7 Dzəghwa mazə Saləmuŋ ki, mbaʼ dzaa ngati pi mə hum pi tsa vəgha məlmə Zheruzalem va njasaa dzəghwa ghumə kaa Kemush hiyala ka Muwabə va gəmgəm na, ta ta hiyala va məndi tə pi tsa va. Dza na diɓa mbaʼ ngati tsahuti kaa Milkuŋ, hiyala ka Amun va gəmgəm na. 8 Tsəgha tsəgha tsəgha ghəci ngangati pi kaa hiyalahi miʼi ci va kama ka Hiyala Izərayel gwanashi, nza miʼi va mbəə vəlanshi shiy kaa hiyalahi shi va tə pi tsa va, ka ndanshi shiy zən nja urdi, ka slaslanshi dəmbəkə tiɓa
9 Tə mbərkə kuma va ki na, mbaʼ nəfə tsa kwa sləkəpə satiy dzəkən mazə Saləmuŋ, sa nza na mbaʼ ghəci zhəghanavə hum kaa ngəta ghənzə Hiyala ka Izərayel. Hiyalaa niy təzlita va kaa ngəci bakə səɗa. 10 Mbaʼ niy gəzanakə kuma va: «Əntaa gha tsəfəku kwa kuma nihuti hiyalahi ma,» kə niy ni kaa ngəci. Ma mazə Saləmuŋ na ci ki na, kala ɗiti ma fəti ghəci ta kumaa niy gəzanakə kwa sləkəpə va. 11 Ma kə Kwa sləkəpə kaa ngəci ki na: «Njana mənti gha tsəgha, kala garəŋa gha tə kuma sla kiri tsa kwa jipə ghum, zhini kala nuw ma kuma pəhətəŋee ghay, ta ɓanti mazə dzee mbə dəvə gha, mbaʼee ɓanavə kaa ndə mbə ka sləni gha. 12 Ə na na nza nay, ka dzee məni kuma va gha tə ghuməŋa, tə mbərkə nziy tsa ghiy lə dəŋa Davitəw. Mbə dəvə zəghu gha dzee ta ɓanti mazə tsa va. 13 Ya tsəgha nzə diɓay, ka dzee ɓanti mazə tsa va gwanayiw. Ta zlatanavə takə dzee kutiŋ kaa zəghu gha ta sləkə ghəci, tə mbərkə nziy tsa ghiy lə Davitə ndə sləni tsee, mbaʼ tə mbərkə məlmə Zheruzalem sa nza na mbaʼee təravə,» kə Kwa sləkəpə kaa mazə Saləmuŋ.
Mbəzliy ɗima kuma mazə Saləmuŋ
14 Dzəghwa Kwa sləkəpə mbaʼ fanambə ɗima kuma mazə Saləmuŋ kaa tsahuti ndə. Hadadə, kə məndi kaa slən tsa ci. Ntsa kwa miy dəgha ka mazə mbə hulfə ka Edum niy nza na.
15 Ghala pi tsaa niy nza Davitə mazə tsa ka Izərayel, sa niy səvəriy na lə ka sawji ci ta mbəzə lə mbəzli tə hiɗi Edumiy, a məndi niy bakwanti nihuti mbə ka sawji ci, mbaʼ Zhəwabə dikə tsa ka sawji ci niy tsəhiy ta la mbəreketi ka sawji va. Sa niy dza na ki na, mbaʼ bakwanti slən zal tsa tə hiɗi ka Edum. 16 Tir kwaŋ niy mənti na ghəshi lə ka sawji ka Izərayel gwanashi mbə bəku zhər tə hiɗi ka Edum gwanashi. 17 Ma Hadadə na ci ki na, mbaʼ ghəci niy huiy lə nihuti ka sləni diy ta dzəti hiɗi ka Ezhiptə. Ghəciy zəghu niy nza na ghalaɓa. 18 Mbə məlmə Madiyaŋ niy kafə ghəshi, mbaʼ ghəshi tsəhəshi mbə məlmə Paran. Sa niy dza na na, mbaʼ zhiniy ɓasəvə mbəzli mbə məlmə Paran, mbaʼ niy dzay li shi dzəti hiɗi Farawaŋ mazə ka Ezhiptə. Sa tsəhiy na na, mbaʼ Farawaŋ ɓanavə ghyi mbaʼ veher, ka zəmanci shi zəmə. 19 Təruŋ Farawaŋ ɗiti kuma Hadad, mbaʼ ɓanavə zhambəghəta mali ci Tapənes madam ci, ta nza ghənzə ka mali ci. 20 Dzəghwa zhambəghəta Tapenes va mbaʼ yanakə zəghu kaa Hadad, Genuvatə, kə məndi kaa slən tsa ci. Dzəghwa mali Farawaŋ va mbaʼ ɓəhu zəghu vaa dzakə ghyi tsa Farawaŋ, ka kəli ghəci kwasəbə ndərazhi Farawaŋ ki.
21 Ma Hadad tə hiɗi ka Ezhiptə ghulay ki na, mbaʼ favə: «A mazə Davitə mətiy, mbaʼ Zhəwabə dikə tsa ka Sawji tsa ci va mətiy kuraku,» kə məndi. Ma kə kaa Farawaŋ ki na: «Ndara kwal ee zharaa dzəti hiɗee,» kə. 22 Ma kə Farawaŋ kaa ngəci na: «A shi ɗi gha kala kumavəshi gha tikə vəghee, ɗi gha dzaŋaa dzəti hiɗi gha war vətəghə tsəghaa?» Kə kaa ngəci. «Ya waɓaw, ndara kwal ee dzara gwaʼa tsəgha na gha,» kə Hadadə.
 
23 Zhəghwa Hiyala diɓa mbaʼ fanambə ɗima kuma mazə Saləmuŋ kaa tsahuti ndə, Rezuŋ, kə məndi kaa slən tsa ci, zəghu Eliyada niy nza na. Kaa Hadadazer mazə ka Shuva niy ghəra na sləni, mbaʼ niy huy va mazə tsa va. 24 Ghala vəghu tsaa niy bakwanti mazə Davitə va ka sawji mazə Hadadazeriy, mbaʼ Rezuŋ niy ɓasəvə mbəzli tə səəbə ci, mbaʼ məniy ka mazə tsa shi. Dza na ki, mbaʼ dzaa nziyiy mbə məlmə Damasə, ka məni mazə dzəkən mbəzli mbəɓa. 25 Mbaʼ məniy ka ndə mbəzə tsa ka Izərayel ghala vəghu tsaa nza Saləmuŋ mbə mazə gwanay. Njasa niy ɗima Hadad va kuma ka Izərayeliy, war tsəgha niy ɗima Rezuŋ kuma ka Izərayel liy hum sa niy məniy na ka mazə ka Shiri.
Zherubuwam zhəghiy ka ntsaa ɗima kuma mazə Saləmuŋ
(NəMezh 2  Veh 9.29-31)
26 A tsahuti ndə niy nza tiɓa diɓa Zherubuwam, kə məndi kaa slən tsa ci, zəghu Nevat niy nza na, ntsa mbə takə tsa Efrayim, mbə məlmə Shereda niy nza na. Seruya, kə məndi niy ni kaa slən tsa mbəghiy, mbaʼ zata niy mətiy. Zhuerubəwam tsa vay ndə sləni tsa mazə Saləmuŋ niy nza na, dza na mbaʼ zhəghiy ka ndə mbəzə tsa mazə saləmuŋ. 27 Avanay njasa zhəghiy na ka ndə mbəzə tsa saləmuŋ:
Ghala vəghu tsaa niy nga mazə Saləmuŋ va zlara har məndi vaa Milu, zhini ka guma kələm tsa ghyi tsa diy Davitə va ghəciy, 28 məgəla lə bərci və, gar mənti ya nama kuma niy nza Zherubuwam tsa va. Mbaʼ mazə Saləmuŋ niy nay njasa məni na sləni wəzə tsa nzə. Dza na ki mbaʼ tivə ta nza ghəci ka ntsaa nighəə dzəkən sləni məni mbəzliy səvəri kwa miy dəgha Zhuzefə gwanata. 29 Ma tə nahuti vici na, mbaʼ Zherubuwam səvəriy mbə məlmə Zheruzalem. Mbaʼ ghəshi kumay ghəshi lə ndə Hiyala Ahiya tsa mbə məlmə Shilu va bakə bakəshi. Lə yəwun kubaŋ niy nza Ahiya kən ghən ci. 30 Dza na kuratə səranti kubaŋ tsa va kən ghən ci, mba slikuvəri məŋə lə bakə mbə. 31 Ma kə kaa Zherubuwam na: «Tivə bəla məŋ mbə bəlahi kubaŋ tsa va. Sa nza nay, Avanta kuma gəzəkə Kwa sləkəpə Hiyala ka Izərayel: “Ta ɓanti hiɗi ka Izərayel dzee mbə dəvə Saləmuŋ, mbaʼee ndaŋa sləkə takə məŋ. 32 Kutiŋiy dzee zlatanavə takə ta sləkə ghəci tə mbərkə ndə sləni tsee Davitə, mbaʼ tə mbərkə Zheruzalem sa nza na ghənzə məlmə təravee tə hiɗi ka Izərayel. 33 Sa wa na dzee ta mənti tsəghay: Sa nza na mbaʼ ka Izərayel zhəghavəra hum, mbaʼ ghəshi dzashi ta tsəfəku kwa kuma Astarte hiyala ka Siduŋ, mbaʼ Kemush hiyala ka muwabə, mbaʼ Milkuŋ hiyala ndərazhi Amun. Mbaʼ ghəshi zlay nuw kwal tsee, kala məni ma kuma tiɗiɗə na kwa kumee, njasa pəhanatishee ta məni ghəshi, kala nziy ma ghəshi njasa ɗee. Niy məni gəla shi məni ghəshi va mazə Davitə diy Saləmuŋ na ci kiw. 34 Ə na na nza nay, ka dzee ɓə mazə tsa va mbə dəvə saləmuŋuw. Sa nza nay ta paʼ va məti ci fiy ya ka mazə, tə mbərkə ndə sləni tsee Davitə tsa tivee va, mbaʼ nuti kuma pəhətee lə kuma gəzancee məni nzə. 35 Sa ka zəghu ci mbərəhu maziy, va zəghu ci dzee ta ɓə mazə, mbaʼee ndaŋa sləkə takə məŋ. 36 Ma kaa zəghu ciy, nzee zlatanavə sləkə takə kutiŋ ta mbə ndəə nza mbə mazə kwa miy dəgha ndə sləni tsee Davitə mbə məlmə Zheruzalem. Məlmə va na sa təravee ta ci ghən tsee kaa ngəŋuy mbə. 37 A na gha gha zherubuwamiy, ee təravəŋa ta sləkə mbəzli ya dza kwamaɓa ɗi gha. Gha dza naa sləkə takəhi ka Izərayel məŋ. 38 Kama na war mbə ɗi fəti gha dzaa nza ta kuma dzee gəzəkəŋa gwanata, ka nuw kwal tsee, ka məni kumaa təɓə kwa mətsee, ka fə ghən ta nuw kuma pəhətee lə kuma gəzəkee məni nzə, njasa niy məni ndə sləni tsee Davitə vay, kwasəbə gha dzee nza. Ta məni mazə dza mbəzli kwa miy dəgha gha ya paʼ humɓa nja mbəzli kwa miy dəgha Davitə. Gha dza naa məni mazə dzəkən takəhi ka Izərayel məŋ. 39 Ghalaɓa kiy, ta panakənshi haʼu dzee kaa mbəzli kwa miy dəgha Davitə. Nanzə kiy ka dzee panakənshi haʼu ta kwa ndimndimuw” kə Kwa sləkəpə,» kə ndə Hiyala Ahiya kaa Zherubuwam.
40 Liy hum kuma va, sa fəti mazə Saləmuŋ ghən ki na dza na ka pəla kwal tsaa pəsli Zherubuwam. Dza Zherubuwam mbaʼ huy dzəti hiɗi ka Ezhiptə mbaʼ dzaa mbiy vəgha Shishak mazə tsa tə hiɗi va, paʼ va vəghu tsa mətiy mazə Saləmuŋ.
 
41 Nahuti kumaa tərmbə dzəkən mazə Saləmuŋiy, kwa zliya: “Kuma mənəhu mazə Saləmuŋ” tsaslaghwa məndi. Kwa zliya va tsasliti məndi kumaa dzəkən shi mənəhu na gwanashi, lə sənata kumaa niy sənata na diɓa. 42 Piya faɗəmətsəkə niy mənti Saləmuŋ mbə məni mazə dzəkən hulfə ka Izərayel gwanata mbə məlmə Zheruzalem. 43 Liy hum ki na, mbaʼ mətiy, mbaʼ məndi lanti vəgha diy mbə məlmə Davitə, mbaʼ zəghu ci Rubuwam mbərəhu mazə tsa ci.