Ɓasəva tsa ka Izərayel mbə məlmə Shishem
(NəMezh 2 Veh 10.1-15)
12
Liy hum ki na, mbaʼ Rubuwam dzay dzəmbə məlmə Shishem. Sa nza nay dzəmbə məlmə va niy ɓasəkəvashi ka Izərayel gwanashi ta pəərə ci ka mazə. 2 Ghala vəghu tsa vay, ghulay niy nza Zherubuwam zəghu Nebat tə hiɗi ka Ezhiptə lə nziy tsa ci, sa niy huy na va mazə Saləmuŋ. Ma sa favə na kuma ɓasəva tsa va na, kafə na tə hiɗi ka Ezhiptəw. 3 Ya tsəgha nzə ki na, mbaʼ məndi ghunashi mbəzli ta dza ta har, mbaʼ səəkiy. Dzəghwa ma kə kar Zherubuwam lə ka Izərayel gwanashi kaa Rubuwam ki na: 4 «Təruŋuy niy ʼyapəŋiy dəŋa. Mbaʼ pə ghaa ɗi sləkəŋiyiy, ə pə gha tanti ngəraʼu tsa təruŋ tsa va niy saŋiy dəŋa, mbaʼ gha zlaŋiy fee. Ghalaɓay ta zləɓa dza ghiy ghaa sləkəŋiy,» kə ghəshi kaa ngəci. 5 Ma kə kaa ngəshi na: «Mbalam jighi ee zəzəvə kuma, nza ghuy zhikə həzlimədzə,» kə. Dza mbəzli mbaʼ ghəshi dzashi ki.6 Liy hum ki na, dza mazə Rubuwam ka ɗuw kuma va mbəzli dikə dikə ni niy niy ci kuma kaa diy, ghala vəghu tsaa niy nza na tə ghumiy. Ma kə kaa ngəshi na: «Njaa na na ghuy zəzə kuma cira ghuy ta zləɓanshee kaa mbəzli vaa?» Kə. 7 Ma kə ghəshi kaa ngəci na: «War dzəghwa gha sana, mbaʼ gha məntəvaŋa ka ntsaa mananshi sləniy təɓanshi kaa mbəzli va, mbaʼ gha zləɓavə mananshi kuma ɗuw ghəshi va, ka gəzanshi kuma lə ghani wəzə nay, gha dza naa sləkəshi ya paʼa humɓa,» kə ghəshi.
8 Ma Rubuwam na ci ki na, kala nighəti kuma canci mətikukuir va va ghəci nja kuma, dza na ka dzay ta ɗuw kuma ci va gulaa niy kəli ghəshi li, shiy niy nza dzar vəgha. 9 Ma kə kaa ngəshi na: « “Ə pə gha tanti ngəraʼu tsaa niy saŋiy dəŋa kən ghiy” kə mbəzli ghummə ni kaa ngəra. Njaa na na ghuy zəzə kuma cira ghuy ta zləɓanshee na ghuya?» kə kaa ngəshi. 10 Ma kə gulaa va kaa ngəci na: «“Təruŋuy niy saŋiy dəŋa ngəraʼu, ə pə gha tanti ngəraʼu tsa va kən ghiy” kə mbəzli va kaa kuma ɗuw ghəshi va gha. Ma pə gha kaa ngəshiy: “Zəghu dəvee na juw tsay, bəvəɓa ghəci na kaa dəvə dirə. 11 Njana nza na Shəndəkəta ghuy niy favə kumaa niy məniŋuy diriy, Ə dzee mətsahata məniŋuy kuma ka favə ghuy shəndəkəɓa ghənzə kaa na dirə va. Lə ghuɗa niy dəʼuŋuy dirə ghuy kə təvəti kuma, ta na tsee ghəniy, lə kurəpə tsa nza kuzhizhi ti dzee dəʼuŋuy,” pə gha dzaa ni kaa ngəshi,» kə ghəshi kaa Zherubuwam.
12 Ma həzlimədzə ki na, mbaʼ kar Zherubuwam lə ka Izərayel gwanashi səəkəə kəsay Rubuwam njasa niy gəzanshi na va. 13 Dzəghwa Mazə Rubuwam mbərəkə zlata naa niy gəzanci mətikukuir va kuma, mbaʼ zləɓanakəshi kuma ghiyanakəta kaa ka Izərayel. 14 Dza na mbaʼ zləɓanakəshi kuma njasa niy canati gula va. Ma kə kaa ngəshi na: «Shəndəkəta niy nza kumaa niy məniŋuy dirə va ghuy, na neyiy, ta mətsahata məniŋuy kuma dzee ka favə ghuy shəndəkəɓa ghənzə kaa na dirə va. Lə ghuɗa niy dəʼuŋuy dirə ghuy kə təvəti kuma, na neyiy lə kurəpə tsa nza kuzhizhi ti dzee dəʼuŋuy,» kə. 15 Lə gəla gəzə kuma va kiy, niy faghwa kuma mazə kwa naa ni ɗi mbəzli va kiw. Kwal na sa va tsəgha niy pəlavə Kwa sləkəpə, ta mbə kumaa niy ghunay na va ndə Hiyala Ahiya, ntsa mbə məlmə Shilu, ta gəzanci kaa Zherubuwam zəghu Nevatə məniva. 16 Ma sa nighəti ka Izərayel dza kwa bəlaa dzəghwa muw gwanashi, kala zləɓa ma kuma shi va mazə ki, ma kə ghəshi gwanashi na:
«Ghiy mbə kuma mbəzli kwa miy dəgha Davituw.
Shiy tiɓaa jakətəŋiy lə zəghu Zhese vaw.
Dzammə ghumməə jighi ka Izərayel,
Kwataka mbəzli kwa miy dəgha ghuy pə ghaa nighə dzəkən shi jijiy Davitə,» kə ghəshi.
Ya wa ndə ki na, mbaʼ dzay jighi. 17 Kəray ka Izərayeləə niy nza tə hiɗi takə tsa Zhuda na shiy niy zlaɓavə Rubuwam sləkəshi ki. 18 Ya tsəgha nzə ki na, dza Mazə Rubuwam mbaʼ ghunay Aduram ntsaa nighəə dzəkən sləni ka məndiy ʼyapambə mbəzli mbə kala kama lə ɗi shi, ta dza ghəciy va nihuti ka Izərayələə dzashi va. Dzəghwa mbəzli va mbaʼ ghəshi pəʼuanti lə herezli ka mbəri. Ya mazə Rubuwam dəʼu ghən tsa ciy, ʼiyahə ʼiyahə mbəlavə na dzəmə muwta gəduw ci ta huy dzəmbə məlmə Zheruzalem 19 Ava tsəgha zhananati takəhi ka Izərayel tə hiɗi njasaa dzati muw ghən kaa mbəzli kwa miy dəgha Davitə, ta sləkəshi ghəshi, ya paʼ ndatsə.
20 Ma sa favə ka Izərayel tə hiɗi njasaa dzati muw va gwanashi: A Zherubuwam zhəghəkəvay tə hiɗi ka Ezhiptə, kə məndi na, mbaʼ ghəshi ɓasətəvashi. Mbaʼ məndi dzaa harəkə. Sa səəkiy na na, mbaʼ ghəshi pəərəti ka mazə tsaa sləkə niy tərə ka Izərayel gwanashi. Kwataka ka Izərayel mbə takə tsa Zhuda na shiy niy tərə kwasəbə mbəzli kwa miy dəgha Davitə.
21 Ma sa tsəhiy Rubuwam mbə məlmə Zheruzalem ki na, dza na mbaʼ ɓasəti ka sawjiy mbashi hə shiy mbə takə tsa Zhuda lə ni mbə takə tsa Bəŋzhameŋ. Zhər bələku bələku bələku mbaʼ dəghəsəmətsə ghən kən, ta dza ta mbəzə lə nihuti ka Izərayel va, ta mbəə zhananavə mazə kaa ngəci, ghəci Rubuwam zəghu Saləmuŋ. 22 Ma dza Hiyala ki na, mbaʼ gəzanci kuma kaa Shemaya ndə gəzə kuma Hiyala ta dza ta gəzanci. 23 Ma kə kaa ngəci na: «Mbala gəzanci kaa Rubuwam zəghu Saləmuŋ mazə ka Zhuda, ghəshi lə mbəzli mbə takə tsa Zhuda gwanashi, mbaʼ mbəzli mbə takə tsa Bəŋzhameŋ, mbaʼ kaa nihuti mbəzliy tərə kwasəbəshi. 24 “Ma kə Kwa sləkəpiy: Ka dza ghuy ta mbəzə lə ngardəhiŋuy nihuti ka Izərayel ma. Ya wa ndiy, ə kəə zhay jighi. Kuma nata ghuy va mənitay, yən tarəkə na məni nzə tsəgha, kə Kwa sləkəpə” pə gha kaa ngəshi,» kə kwa sləkəpə kaa ngəci. Ma sa dza ndə gəzə kuma Hiyala tsa vaa gəzanshi kuma va tsəgha na, mbaʼ ghəshi zləɓavə, ka zhashiy jighi njasa gəzanakəshi Kwa sləkəpə va.
25 Liy hum ki na, dzəghwa Zherubuwam, mbaʼ dəzlay məlmə Shishem lə kələm. Dzar mbə kəleŋer tə hiɗi ka Efrayim niy nza məlmə va, mbaʼ lati ghyi tsa ci mbəɓa. Zhini na diɓa, mbaʼ səvəriy mbə nava məlmə, mbaʼ dzaa dəzlay məlmə Penuwel lə kələm diɓa.
Zherubuwam mənti kuma jikir na
26 Dzəghwa Zherubuwam ka zəzə kuma. Ma kə mbə ghən ci na : «Yən nighə kuma tiɓa Sanay, ka dza mbəzli sləkee niy bashi zhashi va mbəzli kwa miy dəgha Davitəw. 27 Kama na war mbə dzəmə kə mbəzlee niy dzəmə məlmə Zheruzalem ta dza ta vəlanta shiy kaa Kwa sləkəpiy, ta zhini dza ghəshiy ɓanavə nefer shi kaa Rubuwam mazə ka Zhuda tsaa niy sləkəshi va kwataŋa. Ka gha nighiy, məndi pəəslitəra mbaʼ ghəshi zhashi va Rubuwam mazə ka Zhuda,» kə mbə zəzə kuma ci. 28 Liy hum sa ɗuwata na kumaa dzəkən zəzə kuma ci va na, dza na, mbaʼ gəzanshi kaa mbəzli, mbaʼ məndi vasanati shiy nja pa məceri bakə, tə tsahi mbəzə kwa shamshama. Ma kə kaa mbəzli sləkə na va ki na: «A ka Izərayel, war dzəmə məlmə Zheruzalem ka ghuy dza ta vəlanta shiy kaa Hiyala ghuy. Nanay, avanta hiyala ghuy va ɓəkəvəriŋuy mbə hiɗi ka Ezhiptə,» kə. 29 Dza mazə Zherubuwam ki, mbaʼ dzaa gariy nihuti shi nja pa məceri ni va vasətim tə mbəzə kwa shamshama kutiŋ mbə məlmə Betel, ma nihuti na, mbə məlmə Daŋ. 30 Ava tiɓa mənti Zherubuwam kuma jikir na ki. Dza mbəzli ɗaŋ mbaʼ ghəshi nuwəghə nihuti shi nja məceri ni va paʼa mbə məlmə Daŋ.
31 Dza Zherubuwam ngaʼa ngangati ceker kaa hiyalahi va dzar tə pi tsaa niy gumati məndi va ta ta shi, mbaʼ titivə ka ta hiyalahi mbə mbəzli gəmshi ni kala kama mbə takə tsa Levi. 32 Dzəghwa na, mbaʼ fiy kwa dəghasa tir, tə kwa məŋ lə cafa vici ci, ka vici makwaghwa. Gəla makwaghwaa niy məni məndi va tə hiɗi ka Zhuwda niy məni məndi fəcava. Dza na dəʼu ghən tsa ci mbaʼ sləsliy shiy tə pi tsa ka məndiy slasla shiy kaa hiyalahi va. Tsəgha niy mənti na mbə məlmə Betel, mbaʼ sləsləniy shiy kaa shi nja məceri ni va vasəvə na. Ma mbə Betel va ki na, mbaʼ fambə ka ta hiyalahi tivə na va mbə sləni shi, ta ta hiyala ghəshi dzar tə pi tsa titivə na va.
Kumaa dzəkən pi ta hiyala tsa mbə məlmə Betel
33 Ma tə kwa məŋ lə cafa vici tə kwa dəghasa tir, vəghu tsaa tivə na va ki na, mbaʼ Zherubuwam mənti makwaghwa kaa ka Izərayel mbə məlmə Betel. Dza na mbə makwaghwa va mbaʼ dzəmiy dzəmə pi tsaa niy ngati na va ta vəlanta shiy kaa hiyala. Dza na ka ndi shiy zən nja urdi məɓa.