13
War Zherubuwam mə pi tsa ka məndi vaa vəli shiy kaa hiyala mbə ndi shiy zən nja urdi ki na, wəɗ tsahuti ndə gəzə kuma Hiyala tsahuy. Hiyala niy ghunikə na ntsa va səəkə tə hiɗi ka Zhuda, dzəmbə məlmə Betel.2 Dza na ka gəzə kuma gəzanakə Kwa sləkəpə zlaŋ zlaŋ dzəkən pi tsa vəlanta məndi va shiy kaa hiyala mə. Ma kə na: «Pətsa, pi tsa vəli məndi tsa shiy kaa hiyala ti, avanata kuma gəzəkə Kwa sləkəpəə dzəkən gha: “Ta yakə zəghu zal dza məndi mbə takə tsa Davitə, Zhuziyasə dza slən tsa ciy nza. Tə gha dza na ta slasla ghən tə ka ta hiyalahi tivə məndi va ta ndi shiy zən nja urdi tə gha. Ta ndəhu esler ke ngəri, dza məndi tə gha,” kə Kwa sləkəpə,» kə.3 Ma kə ndə gəzə kuma Hiyala tsa va diɓa na: «Pətsa ghuy tsa vəlanta ghuy shiy ti kaa hiyalay, ta pəslivərivay dza na bakə mbə. Dzar tə hiɗi dza ghuy nay ma pəsər tsa nza gəkə va mbə məɓa ti. Ti dza ghuy sənay Kwa sləkəpə gəzəkə na kuma va kataŋ, pə ghuy,» kə.
4 Sa favə mazə Zhərubuwam kuma gəzəkə ndə gəzə kuma Hiyala vaa dzəkən pi vəli shiy kaa hiyala tsa mbə məlmə Betel va na, dza na ka ci ntsa va lə dəvə səəkə məɓa. Ma kə zlaŋ zlaŋ na: «Kəsəm ntsa va,» kə. Dza dəvə ci na va ndə gəzə kuma Hiyala li hiyaŋ ghulita, kala zhiniva maa zhakar. 5 Dza pi tsa ka məndi vaa vəli shiy ti kaa hiyala pəsli pəslivərivay, mbaʼ pəsər tsa ti shəkiy dzəti hiɗi, njasa gəzəkə ndə gəzə kuma Hiyala va, sa niy gəzanci Kwa sləkəpə tsəgha. 6 Ma kə mazə kaa ndə gəzə kuma Hiyala tsa va na: «Titihu, mbəəzli miy kaa Hiyala Kwa sləkəpə gha va a dəvee na zhakarəta,» kə. Dza ndə gəzə kuma Hiyala tsa va cəʼu cəʼuti Kwa sləkəpə. Dzəghwa dəvə mazə va mbaʼ zhakarəta, mbaʼ mənita njasa niy nza na kwataŋa. 7 Ma kə mazə kaa ndə gəzə kuma Hiyala tsa va na: «Dzam dzakə ghyi a gha zəməvə shiy. Liy hum na, nzee vəlitəŋa vəli,» kə. 8 Ma kə ndə gəzə kuma Hiyala tsa va kaa mazə na: «Ya bakə mbə təhəvəri gha shi kiy ghyi tsa gha, mbaʼ gha ndara bəla kutiŋiy, ka dzakə ghyi tsa gha yaw. Kama na tikiy, ya shi zəmə, ya yam ka dzəghwa miy tsee ghəshiw. 9 Sa nza nay, A kə Kwa sləkəpə gəzəkəra: “Əntaa gha zəmə shiy ma, əntaa gha sa yam ma. Əntaa gha zhəghəvaa jighi kwa kwal tsa dza gha vaa dzəmbə məlmə Betel ma.” kə,» kə ndə gəzə kuma Hiyala tsa va. 10 Dza na mbaʼ ɓəvə tsahuti kwal zhəghətəvay dzay kala kama kwa kwal tsa səəkə na vaa dzəmbə məlmə Betel.
Ndə gəzə kuma Hiyala dzəghway kən kuma Kwa sləkəpə
11 Ghala vəghu tsa vay, a tsahuti pəhal ndə gəzə kuma Hiyala niy nza tiɓa mbə məlmə Betel lə nziy tsa ci. Dza ndərazhi ci cəkeʼ ghəshi səəkəə slanakə shi mənti ndə gəzə kuma Hiyala va, mbaʼ kuma gəzanakə na va kaa mazə mbə məlmə Betel fəcava. 12 Ma kə dəshi tsa va kaa ngəshi na: «Kwa tsama kwal zhəghəva na ta dzaya?» kə. Dza ndərazhi ci va mbaʼ ghəshi dzaa ɗuyti nda kwa tsama kwal zhəghəva ndə gəzə kuma Hiyala tsaa səəkə va tə hiɗi ka Zhuwda ta dzay, mbaʼ ghəshi səəkəə gəzanci. 13 Ma kə kaa ngəshi na: «Pəhatəram leferuw tə hum kwantəmcee,» kə. Dza ndərazhi ci va mbaʼ ghəshi pəhanati, ɗal dzəmiy. 14 Dza na ki, ka nuw ndə gəzə kuma Hiyala tsa va, mbaʼ dzaa kəsay ghəci mbə dəkəva ta fə dikə na. Ma kə kaa ngəci na: «Gha na ndə gəzə kuma Hiyala tsaa səəkə va tə hiɗi ka Zhuwda na?» kə. «Yə, yən na» kə ntsa va. 15 Ma kə pəhal tsa va kaa ngəci na: «Zhəghəva dzam dzakə ghyi tsee a gha dzaa zəməvə shiy,» kə. 16 Ma kə ndə gəzə kuma Hiyala tsa va kaa ngəci na: «Awə, ka zhəghəvee kwa səəbə ghaw, ka dzakə ghyi tsa gha yaw. Ya yam, ya shi zəmiy, ka dzəghwa miy tsee ghəshi kama na tə hiɗi niw. 17 Sa nza nay, avanata kuma gəzəkəra Kwa sləkəpə: “Əntaa gha zəmə shiy ma, əntaa gha sa ya yam tə hiɗi va ma. Əntaa gha zhəghəvaa jighi kwa kwal tsa dza gha vaa dzəmbə məlmə Betel ma.” kə kaa ngəra,» kə. 18 Dza pəhal tsa va ka mbaɗə. Ma kə ngəci na: «Yən kurakuy, ndə gəzə kuma Hiyala nzee nja gha. Kwa sləkəpə ghunay na ndə kwal tsa nzə vəya: “Mbala zhəghəkəə dzakə ghyi tsa gha, a ghəci zəmə shiy, ka sa yam,” kə kaa ngəra,» kə. Kuma gəzə na va tsəgha nay, dzərvə niy sla sla na. 19 Sa gəzəkə na tsəgha ki na, dza ndə gəzə kuma Hiyala tsaa səəkə va tə hiɗi ka Zhuwda mbaʼ zhəghətəvay kwa səəbə. Dza na ka zəmə shi zəmə, kaa sa yam kiy ghyi tsa ntsa va.
Zhəl paslanti ndə gəzə kuma Hiyala
20 Ma ghəshi mbə zəmə shiy ki na, mbaʼ Kwa sləkəpə gəzanakə kuma kaa pəhal ndə gəzə kuma Hiyala tsaa zhighəkə tsahuti vaa dzakə ghyi tsa ci. 21 Ma kə zlaŋ zlaŋ kaa ndə gəzə kuma Hiyala tsaa səəkə va tə hiɗi kaa Zhuda na: «A kə Kwa sləkəpiy: “A gha dzəghwaŋa kən kuma gəzəkəŋee, mənti kumaa niy gəzəkəŋee yən Hiyala gha Kwa sləkəpə ghaw, 22 a gha zhəghəkəvaŋa zhəti səəbə, mbaʼ gha zəməhu shiy, saʼ kaa yam, tə pi tsaa niy makətəŋee va. Mbaʼee niy makətəŋa va məni tsəgha ngar ki. Sa mənti gha va tsəgha kiy, ka dzəghway mbəri tsa ghaa dzəghwa kuli jijihiŋaw,” kə Kwa sləkəpə,» kə pəhal tsa va kaa ngəci.
23 Liy hum sa zəməhu ndə gəzə kuma Hiyala tsa va shi zəmə va, mbaʼ sahu shi sa va ki na, dza pəhal ndə gəzə kuma Hiyala tsa va mbaʼ pəhanamə leferuw mə kwantəmca kaa ndə gəzə kuma Hiyala tsaa səəkə va tə hiɗi ka Zhuda. 24 Taram ntsa va dzəmiy, ka dzay. Ma ghəci mbə kwal na, mbaʼ kumay lə zhəl. Dza zhəl tsa va mbaʼ zlatəvay dzəti mbaʼ paslanti. Zlaŋ mbəri tsa ntsa va tiɓa kwa kwal, garə garə kar kwantəmca va lə zhəl tsa va garəshi tiɓa vəgha mbəri tsa va. 25 Səəkə mbəzliy dza kwa kwal tsa va na, mbaʼ ghəshi nay mbəri tsa va kwa kwal mbaʼ zhəl tsa va vəgha. Dza mbəzli va mbaʼ ghəshi dzaa gəziy kuma va mbə məlmə niy nza pəhal ndə gəzə kuma Hiyala va mbə. 26 Mbaʼ pəhal ndə gəzə kuma Hiyala tsaa niy zhəghəkə ntsa va vaa dzəmbə məlmə Betel favə kuma va. Ma kə na: «Waa ndə gəzə kuma Hiyala tsaa səəkə va mbə məlmə Zhuwda na. Ghəci dzəghway na kən kuma gəzanakə Kwa sləkəpə, va tsəgha ghunay Kwa sləkəpə zhəl, mbaʼ səəkəə ɓəlivəriy paslanti. Tsəgha niy gəzanakə Kwa sləkəpə,» kə. 27 Ma kə kaa ndərazhi ci ki na: «Pəhatəram ləferuw dzəti kwantəmcee,» kə. Mbaʼ ndərazhi va pəhati.
28 Sa pəhati ghəshi na, dza pəhal ndə gəzə kuma Hiyala tsa va ka dzay ta nighə. Dza na kataŋ na, mbəri tsa va kwa kwal, mbaʼ kar kwantəmca va lə zhəl garə vəgha. Zhəl tsa vay, niy pərəhu mbəri tsa va naw, ya kwantəmca va na niy dapata naw. 29 Dza ntsa va ki, kafə kafakati mbəri tsa ntsa Hiyala va, bəm fati tə kwantəmca. Mbaʼ zhinikəə zhimbə məlmə Betel ta təhuni ci lə ta la ci. 30 A kuli pəhal tsa va niy nza tiɓa, dza na mbaʼ laghwa kwa kuli va. Mbaʼ məndi təhwananti. Ma kə məndi mbə təhuni ci na: «Wayaw, wayaw, a zəmərə mətiy!» kə məndi.
31 Liy hum sa lanti məndi mbəri ki, ma kə pəhal ndə gəzə kuma Hiyala tsa va kaa ndərazhi ci na: «Sa kee mətiray, dzəghwa kuli laghwa məndi na ndə gəzə kuma Hiyala tsa pə ghuy dzaa laghwara. Vəgha mbəri tsa ci pə ghuy dzaa fə mbəri tsee. 32 Ta na kuma gəzəkə na vaa dzəkən pi tsa ka məndiy vəli shiy kaa hiyala ti mbə məlmə Betel, lə dzəkən ceker ngangati məndi va gwanashi dzar tə pəhi gugumati məndi va ta ta hiyalahi tə hiɗi ka Samariy, Kwa sləkəpə ghunay na ta gəzə nzə. Ta məniva dza kuma va,» kə.
33 Ya tsəgha niy ghunikə Kwa sləkəpə ndə gəzə kuma nzə ta gəzə kuma kaa mazə Zherubuwam kiy, niy bashanti məni kuma ci va gəmgəm naw. War ə niy titi na mbəzli papama tsa shi, kala kama mbə takə tsa Levi, ta ta Hiyala dzar tə pəhiy niy gugumati məndi va ta ta hiyalahi. Ya wa ntsaa niy ɗi nza ka ndə ta Hiyala dzar mbə ceker vay, war ə niy fə naa dzəmbə sləni va. 34 Ava ghənzə na kumaa niy mənti mbəzli kwa miy dəgha Zherubuwam jikir na. Tə mbərkə kuma va zantishi Kwa sləkəpə, kala tərə ma ndə tə hiɗi mbə shi ya kutiŋ.