1 Mazə 14

Ahiya ndə gəzə kuma Hiyalaa gəzanta kuma kaa mali Zherubuwam

Geʼi lə vəghu tsa va ki na, mbaʼ Aviya zəghu mazə Zherubuwam təriy gurapiy. 2 Ma kə mazə kaa mali ci na: «Mbala mbarantəvaŋa, mbaʼ gha məntəvaŋa kala gar sənay məndi malee nza gha, kə məndi, nza gha dzaa dzəmbə məlmə Shilu. Mbə məlmə va na ndə gəzə kuma Hiyala tsa har məndi vaa Ahiya. Ghəci niy səəkə naa gəzara sləkə tsa sləkee tsa mbəzli ni, sa niy ghunay Kwa sləkəpə. 3 Ghaa kafiy, nza gha tivə pəŋ məŋ, mbaʼ gatu, mbaʼ mbəzəku pafə kwa hupər. Nza gha dzaa kəsay lə shi va. Sa ka gha tsəhəŋa viy, ta gəzaŋa kumaa dzaa kəsay zəghu ghum na dza na,» kə kaa ngəta. 4 Dza mali Zherubuwam mbaʼ dzaa mənti njasa gəzanakə zata va. Kaf kafəta, mbaʼ tsəhəta mbə məlmə Shilu, mbaʼ dzakətaa dzakə ghyi tsa Ahiya ndə gəzə kuma Hiyala. Ghalaɓay, a ntsa va niy haliy təruŋ, niy nay pi na ghulaw, ghargharə niy nza micici ci. 5 A Kwa sləkəpə niy gəzanci kwatsəməta: «Ava mali Zherubuwam mbə səəkə ta ɗuw kuma va ghaa dzəkən zəghu nzə sa nza na gurapiy. Sa dza naa səəkətay, njasa kama naa mali Zherubuwam dza naa mənti ghən tsa nzə. Tsəʼaa, tsəʼaa, tsəʼaa ka gha ni kaa ngəta,» kə niy ni kaa ngəci.

6 War sa favə Ahiya gaka səɗa mali va ghənzəə dzakə tə miy dəgha ki, a kə kaa ngəta na: «Sakəŋa mali Zherubuwam. Sa wa na mənti gha ghən tsa gha njasa kama ghaa mali Zherubəwam kiya? A Kwa sləkəpə ghunara va gha, ta gəzaŋa bar tsa gəmgəm tsa. 7 Mbala a gha dzaa gəzanci kaa Zhərubuwam. A kə Kwa sləkəpə Hiyala ka Izərayel, pə gha kaa ngəciy: “Yən təravəŋa na mbə mbəzli, mbaʼee pərətəŋa ka mazə tsaa sləkə mbəzlee ka Izərayel. 8 Dzee laŋee ɓəhu mazə mbə dəvə mbəzli kwa miy dəgha Davitə, mbaʼee ndaŋa. Sa dza gha na gha kiy, kala məni ma kuma gha nja ndə sləni tsee Davitə. Na na ciy, mbə nuw kuma pəhətee niy nza na, ka nura lə nəfə kutiŋ. War kumaa təɓə kwa mətsee niy məni na. 9 Gha na na gha kiy, a gha mənti kuma jikir na, tərəŋuɓa gha zhini naa mənti kuma jikir na kən mbəzliy mənəhu mazə pərɓa ghəshi kaa ngəŋa. A gha ɓakatəra nəfə tsee sa nza na mbaʼ gha ndəghantəra dzəghwa lə hum gha, mbaʼ gha mənivə nihuti hiyalahi gha, vasə gha vasəvə pa shiy ka hiyalahi gha. 10 Va tsəgha kiy, ta ɓəkə ngəraʼu dzee dzəkən mbəzli kwa miy dəgha gha. Slən zal tsa mbə takə tsa gha, lə mbə mevivi ghay, ta zantishi dzee tə hiɗi ka Izərayel. Njasa ka məndi vaa pa kwesheɓi kala tərəshi ma ya kutiŋiy, tsəgha dzee ta zanti mbəzli kwa miy dəgha gha. 11 Ya wa ntsa kwa miy dəgha gha dzaa məti mbə məlmiy, kəreketi dza naa pərə mbəri tsa ci. Tsaa dzaa məti tə gambay, zləŋiŋ dza naa tsəŋu,”. Ava tsəgha gəzəkə Kwa sləkəpə, pə gha kaa ngəci» kə Ahiya kaa Mali Zherubuwam va.

12 A kə Ahiya diɓa na: «Ta na tsa gha ghəniy, kafə mbalaa jighi. Sa dza ghaa ni məɗakə pə gha kaa səɗa gha mbə məlmiy, ta mətiy dza zəghu gha va. 13 Ta təhuniti mbəri tsa ci dza ka Izərayel gwanashi, mbaʼ ghəshi lanti. War ghəci kutiy na sa dza məndiy laghwa kwa kuli mbə mbəzli kwa miy dəgha Zherubuwam. Sa nza nay, ghəci kutiy na sa nay Kwa sləkəpə Hiyala ka Izərayel wuzə kwa mətsə nzə, mbə mbəzli kwa miy dəgha Zherubuwam. 14 Liy hum kiy, ta tivə tsahuti mazə tsa nzə dza Kwa sləkəpə, ta sləkə ka Izərayel ghəci. Cəkeʼ dza mazə tsa vaa bakwanti mbəzli kwa miy dəgha Zherubuwam. Ta məniva dza kuma va ndatsə. A shi kee maw gəzə talaa? Ta məniva dza na sana sana. 15 Ta ɓəkə ngəraʼu dza Kwa sləkəpə dzəkən Ka Izərayel. War ə dza ghəshiy gurəgurə. Njasa ka guzən tsa tə ghən yam vaa kufəghiy, war tsəgha dza nziy tsa shiy nza. Ta ɓantishi dza Kwa sləkəpə tə hiɗi wəzə ni va ɓanavə na kaa jijihishi, mbaʼ ndanivərishi dzar tə hiɗi taŋ həl Efratə pəriɓa pəriɓa. Ava kumaa dzaa kəsashi sa nza na mbaʼ ghəshi vasəvə shiy ta tsəfəku kwa kuma shi va, mbaʼ nəfə tsa Kwa sləkəpə satiy tə mbərkə kuma va. 16 Ta ndəghanti ka Izərayel dza Kwa sləkəpə tə mbərkə kuma jikir na va mənti Zherubuwam, lə na ngaɗambəshi na va mbə məni nzə,» kə Ahiya. 17 Dzəghwa mali Zherubuwam ki, kafə kafəta, ka zhataa zhimbə məlmə Tirsa. War ghənzə mbə dzakə tə miy dəghaa dzakə ghyi tsa shi na, ɓəlahə zəghu nzə va mətiy. 18 Dzəghwa mbaʼ məndi lanti. Mbaʼ ka Izərayel gwanashi təhuwananti mbəri tsa ci njasaa niy gəzəkə Kwa sləkəpə va lə miy tsa ndə sləni tsa nzə Ahiya, ndə gəzə kuma Hiyala.

19 Nahuti kumaa tərmbəə dzəkən mazə Zherubuwamiy, kwa zliya: “Kuma nənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən mbəzəhi mbəzəhu na, lə njasa mənəhu na mazə tsa ci diɓa. 20 Piya bakəmətsəkə bakəti niy mənti na mbə məni mazə dzəkən ka Izərayel, mbaʼ mətiy. Dza zəghu ci Nadab mbaʼ mbərəhu məni mazə kwa pi tsa ci.

Rubuwam mazə ka Zhuwda

(NəMezh 2  Veh 12.1-16)

21 Ghala vəghu tsa pəərə məndi Rubuwam zəghu yakə Saləmuŋ va kwa Naama zha ka Amun ta sləkə mbəzli mbə hulfə Zhuday, piya faɗəmətsəkə tanti niy nza sa ci. Piya məŋ lə mbərfəŋ niy mənti na mbə məni mazə. Mbə məlmə Zheruzalem niy nza na lə nziy tsa ci. Məlmə va na sa niy təravə Kwa sləkəpə mbə məlməhi takəhi ka Izərayel gwanashi ta ci ghən tsa nzə kaa mbəzli nzə mbə. 22 Dza ka Zhuwda mbaʼ ghəshi mənti kumaa təɓanta ma kaa Kwa sləkəpə. Kuma jikir na va mənti ghəshiy, aa niy taŋəti na niy mənəhu jijihishi va, mbaʼ ɓakati nəfə tsa Kwa sləkəpə. 23 Ghəshi kurakuy, a ghəshi niy gugumati pəhi ta ta hiyalahi dzar ti shi, mbaʼ ghəshi niy gagariy hərezli, mbaʼ shighu ta tsəfəku kwa kuma shi dzar mə hum pihi gwanashi lə dzar ta fəhi ghuvə ghuvə ni gwanashi. 24 Zhini diɓay, a miʼi lə zhər niy nza tə hiɗi shi, ta məni ghurghur ta fə shəndəkəə dzəti hiyalahi shi va. Shi gəmgəm ni va niy məməni mbəzliy niy tahanti Kwa sləkəpə va tə hiɗi va ta nziy ka Izərayel ti shiy, A ka Izərayel niy dzashiy dzəmbə məni shi va gwanashi.

25 Ma Rubuwam mbə məni kwa cafa piya ci mbə mazə na, mbaʼ Shishak mazə ka Ezhiptə səəkəə pəslambə mbə məlmə Zheruzalem. 26 Dza na meʼ meʼ panti shi wəzə ni kiy ghyi tsa Kwa sləkəpə lə shi wəzə ni kiy ghyi tsa mazə. Gwaʼa gwaʼa niy panti na shiy tə pi tsa bakə tsa va. Ya galhi niy vasəti mazə Saləmuŋ va tə tsahi mbəzə kwa shamshamay, cəkeʼ niy pahushi na. 27 Liy hum ki na, dza mazə Rubuwam mbaʼ zhiniy vasəti nihuti galhi tə mbəzə ghəm na ta dzəghwa pi tsa ni va. Mbaʼ fambəshi mbə dəvə mbəzliy sləkə ka sawjiy ndəghu miy dəgha ci. 28 Ghala vəghu tsa ka mazə dzaa dzakə ghyi tsa Kwa sləkəpə ki na, mbaʼ ka sawji va ɓəvə galhi va ghəshiy pəhə, liy hum na, mbaʼ ghəshi zhinikəshiy dzəmbə cikə tsa ka mbəzliy ndəghu dəgha mazə nza.

29 Nahuti kumaa tərmbəə dzəkən mazə Rubuwamiy, kwa zliya: “Kuma nənəhu mezhizhi ka Zhuda” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na gwanashi diɓa. 30 Zhevi niy nza mbəzə kwa jipə mbəzli mazə Rubuwam ghəshi lə mbəzli mazə Zherubuwam. 31 Sa mətiy Rubuwamiy, mbaʼ məndi dzaa lanti kwa kuli jijihiy, mbə məlmə mazə Davitə. Zha ka Amun niy nza mbəghiy, Naama, kə məndi kaa slən tsa nzə. Dzəghwa zəghu ci Abiyam mbaʼ mbərəhu məni mazə kwa pi tsa ci.