1 Mazə 15

Abiyam məni mazə dzəkən ka Zhuda

(NəMezh 2  Vəh 13.1-3,22-23)

Ma Zherubuwam zəghu Nebat mbə məni kwa məŋ lə dəghasa piya ci mbə mazə dzəkən ka Izərayel na, mbaʼ məndi pəərəti Abiyam ka mazə tsa ka Zhuda. 2 Piya mahəkanə niy mənti na mbə məni mazə. Mbə məlmə Zheruzalem niy nza na lə nziy tsa ci. Maaka niy nza slən tsa mbəghiy, zha Abəsalum niy nza na. 3 Kuma jikir na va niy mənəhu diy ghəci mbə maziy, war tsəgha niy məni na gwanata kuraku. Niy ɓanavə nefə tsa ci na gwanay kaa Hiyala ci Kwa sləkəpə njasa niy ɓanavə jijiy Davitə va nəfə tsa ci gwanay kaa Kwa sləkəpuw. 4 Ya tsəgha nzə kiy, a Kwa sləkəpə niy ɓanavə zəghu ta məni mazə ghəci kwa pi tsa ci mbə məlmə Zheruzalem, nza Zheruzalem mbəə nza ghulata ka məlmə təravə Kwa sləkəpə. Tə mbərkə Davitə niy mənti na kuma va tsəgha. 5 Sa nza nay, kuma tiɗiɗə na niy məni Davitə kwa kuma Kwa sləkəpə. Niy dzəghway na kən kumaa niy gəzanci na ya kutiŋ mbə nziy tsa ci gwanayiw. War kumaa niy mənti na va kaa Uri ndə ka Hitə na kumaa niy mənti na jikir na gwaʼa tsəgha.

6 Zhevi niy nza mbəzə kwa jipə mbəzli mazə Rubuwam ghəshi lə mbəzli mazə Zherubuwam.

7 Nahuti kumaa tərmbəə dzəkən mazə Abiyamiy, kwa zliya: “Kuma mənəhu mezhizhi ka Zhuda” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na gwanashi diɓa. Ya ghəciy, war mbə mbəzə niy nza na ghəshi lə Zherubuwam. 8 Ma sa mətiy na na, mbaʼ məndi dzaa lanti mbə məlmə mazə Davitə. Mbaʼ zəghu ci Aza mbərəhu məni mazə kwa pi tsa ci.

Azaa məni mazə dzəkən ka Zhuda

(NəMezh 2  Veh 14.1-2; 15.16-19; 16.1-6,11-14)

9 Ma Zherubuwam mbə məni kwa bakəmətsəkə piya ci mbə mazə dzəkən ka Izərayel ki na, mbaʼ məndi pəərəti Aza ta nza ghəci ka mazə ka Zhuda. 10 Piya faɗəmətsəkə tanti niy mənti na mbə məni mazə. Mbə məlmə Zheruzalem niy nza na lə nziy tsa ci. Maaka niy nza slən tsa kəhiy, zha Abəsaluŋ niy nza na. 11 Ta na Azay, kuma tiɗiɗə na niy məni na kwa kuma Kwa sləkəpə, njasa niy məni jijiy Davitə va. 12 Sa dza nay, mbaʼ tahanti mbəzliy niy məni ghurghur va kaa hiyalahi tə hiɗi ci, mbaʼ ɓaɓanti hiyalahiy niy məmənti jijihiy va gwanashi. 13 Ya Maaka kəhiy vay, aa niy ɓanti mbə dikə tsa nza na ka mbəghiy mazə, sa nza nay, aa niy mənti pa shiy ka məjəʼa hiyala gəmgəm na va har məndiy Akera. Dza Aza mbaʼ baʼwanti hiyala va, mbaʼ dzaa ndanti dziy kwa teʼu pi tsa har məndi vaa Sedəruŋ. 14 Ə na na nza nay, ghulashi niy zlashi na pihiy niy gugumati məndi va ta ta hiyalahi va ti shi. Ya tsəgha niy ɓanavə na nəfə tsa ci gwanay kaa Kwa sləkəpə. 15 Dza na mbaʼ ɓəvə shiy niy vəlanati diy lə ni vəlanati na dəʼu ghən tsa ci kaa Kwa sləkəpə, mbaʼ dzaa fiyshi kiy ghyi tsa nzə. Shi vay: gəna, mbaʼ tsahi mbəzə kwa shamshama, mbaʼ nihuti shiy ghənghən ghənghən niy nza ghəshi.

16 Zhevi niy nza mbəzə kwa jipə mbəzli mazə Aza ghəshi lə mbəzli Basha mazə ka Izərayel. 17 Dzəghwa mazə Basha tsa va tə nahuti vici mbaʼ səvəriy ta dza ta mbəzə lə ka Zhuda, dza na mbaʼ zləghuhu məlmə Rama, ngaʼ ngaghwa kwa kələm ta mbəə makəti kar mazə Aza lə mbəzli ka Zhuda va taŋə dza kwa nava bəla. 18 Sa nighəti Aza tsəgha na, dza na ɓasə ɓasəvə kar gəna lə mbəzə kwa shamshamaa niy tərmbə gwanashi tə pi tsa ka məndiy fə shiy kiy ghyi tsa Kwa sləkəpə. Zhini tsəgha ghəci ɓasəhushi tə pi tsa ka məndiy fə shiy kiy ghyi tsa mazə. Dza na mbaʼ ɓanavəshi kaa ka sləni ci a ghəshi ɓəghəshi kaa Ben-hadad mazə ka Shiri. Tavərimuŋ niy nza diy mazə tsa va, jijiy na, Heziyuŋ. Mbə məlmə Damasə niy nza na lə nziy tsa ci. Ma kə Aza kaa mbəzli ci va ki na: 19 «Ma pə ghuy dzaa ni kaa ngəciy: “Slati kiri ghum kwa jipə tsa ghum njasa niy slati kar dirə va lə dəŋa. Ɓə gəna na lə tsahi mbəzə ni tə gəm. Səvəriŋa mbə kuma sla kiri tsa kwa jipi ghuy lə Basha mazə ka Izərayel, nza ghəci mbəə bashanti dza ta mbəzə lə ya,” kə mazə Aza, pə ghuy kaa ngəci,» kə. 20 Sa dza ghəshiy gəzanci kuma va tsəgha kaa Bən-Hadadə ki na, mbaʼ zləɓavə. Dza na mbaʼ ghunashi mbəzliy sləkə ka sawji ci, ta dza ta pəsli ta ka Izərayel. Mbaʼ ghəshi zləghuhu məlmə Iyuŋ, mbaʼ məlmə Daŋ, mbaʼ məlmə Avel-Bet-maka, mbaʼ hiɗi Kinerutə gwanashi, mbaʼ hiɗi nza mbəzli mbə takə tsa Neftali ti shi gwanashi. 21 Ma sa dza məndiy gəzanci kuma va kaa mazə Basha na, mbaʼ garəti nga məlmə Rama dzəghwa kələm, mbaʼ zhaa nziyiy mbə məlmə Tirsa. 22 Dzəghwa mazə Aza ki, mbaʼ ɓasəti mbəzli ka Zhuda gwanashi kala tərə ma ndə ya kutiŋ. Mbaʼ ghəshi dzaa pakə hərezli, mbaʼ shighuu niy nga Basha va kələm tsa dəzli na va məlmə Rama li shi. Dza mazə Aza mbaʼ ngaghwa məlmə Geva tə hiɗi mbəzli mbə takə tsa Beŋzhameŋ, mbaʼ məlmə Misəpa kwa kələm li shi

23 Nahuti kumaa tərmbəə dzəkən mazə Aza gwanatay, kwa zliya: “Kuma mənəhu mezhizhi ka Zhuda” tsaslaghwa məndi. Kwa zliya va tsasliti məndi kumaa dzəkən zal tsa mənəhu na, lə nihuti shi mənəhu na gwanashi, mbaʼ məlməhi lahu na. Sa niy haliy nay, a zəlghu tsa shi mbə shiɗəshiɗi niy kəsəvə. 24 Liy hum ki na, mbaʼ mazə Aza mətiy, mbaʼ məndi lanti kwa kuli jijihiy mbə məlmə mazə Davitə. Dzəghwa zəghu ci Zhuzafat mbaʼ mbərəhu məni mazə kwa pi tsa ci.

Nadab məni mazə dzəkən ka Izərayel

25 Ma Aza mbə məni kwa baka piya ci mbə mazə dzəkən ka Zhuda ki na, mbaʼ məndi pəərəti Nadab Zəghu Zherubəwam ka mazə tsaa sləkə ka Izərayel. Piya bakə niy mənti na mbə sləkə ka Izərayel 26 Shi gəmgəm ni niy məni na kwa Kwa kuma Kwa sləkəpə. Njasa niy məni diy va shi gəmgəm niy, tsəgha niy mənishi na. Dza na mbaʼ fambə ka Izərayel dzəmbə kuma jikir na njasa niy fambəshi diy va. 27 Dzəghwa Basha zəghu Ahiya mbə takə tsa Isakar, mbaʼ pəhəti kuma ghəshi lə mbəzli ta pəəsli mazə Nadab. Ma sa səvərishi kar Nadab lə ka sawji ka Izərayel gwanashi, mbaʼ ghəshi pəslambə mbə mbəzli mbə məlmə Gibətuŋ ta zləghuhu mbə dəvə ka Filisteŋ na, mbaʼ Basha tsa va paslanti mazə Nadab. 28 Aza mbə məni kwa mahəkana piya ci mbə mazə tə hiɗi ka Zhuda niy məniva shi va. Dza Basha sa pəəsliti na Nadab ki, mbaʼ ɓəhu mazə. 29 war sa dzay naa dzəmbə mazə na, mbaʼ bakwanti mbəzli kwa miy dəgha Zherubuwam gwanashi, niy tərmbiy ndə na ya kutiŋəw. Ghalaɓa ki na, mbaʼ kumaa niy gəzəkə Kwa sləkəpə va lə miy tsa ndə sləni tsa nzə Ahiya ndə ka Shilu dzəghwata kwa. 30 Tə mbərkə kumaa niy mənti Zherubuwam va jikir na, mbaʼ niy fambə ka Izərayel dzəmbə məni kuma jikir nay, a nəfə tsa Kwa sləkəpə niy satiy təruŋ, va tsəgha niy mənita kuma va tsəgha.

31 Nahuti kumaa tərmbəə dzəkən mazə Nadabiy, kwa zliya: “Kuma nənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na gwanashi diɓa.

32 Zhevi niy nza mbəzə kwa jipə mbəzli mazə Aza ghəshi lə mbəzli Basha mazə ka Izərayel.

Bashaa məni mazə dzəkən ka Izərayel.

33 Ma Aza mbə məni kwa mahəkana piya ci mbə mazə dzəkən ka Zhuda na, mbaʼ məndi pəərəti Basha ka mazə tsaa sləkə ka Izərayel. Piya bakəmətsəkə faɗəti niy mənti na mbə məni mazə mbə məlmə Tirsa. 34 Kuma jikir na niy məni na kwa kuma Kwa sləkəpə. Njasaa niy məni Zherubuwam va kuma jikir nay, tsəgha niy məni na kuraku, mbaʼ niy fambə ka Izərayel mbə kuma jikir na va njasa niy fambəshi Zherubuwam va.