16
Dzəghwa Kwa sləkəpə tə nahuti vici, mbaʼ gəzanci kuma kaa ndə gəzə kuma Hiyala tsa har məndiy Zhehu, zəghu Hanani, a ghəci dza ta gəzanci kaa mazə Basha. Ma kə kaa ngəci na: «Ma kə Kwa sləkəpə pə gha kaa ngəciy: 2 “Ndə gəmiy tsəgha niy nza gha. Mbaʼee ɓəvəŋaa məntəŋa ka mazə tsaa sləkə mbəzlee ka Izərayel. Sa dza ghay, mbaʼ gha dzaŋaa dzəmbə məni kumaa niy məni Zherubuwam va, mbaʼ gha fambə mbəzlee ka Izərayel dzəmbə məni kuma jikir na va. Təruŋ nəfə tsee satiy va kuma jikir na va məni ghəshi. 3 Va tsəgha kiy, ta zantəŋuy dzee ghuy lə mbəzli kwa miy dəgha gha. Njasa məntee va lə mbəzli kwa miy dəgha Zherubuwam zəghu Nabatiy, tsəgha dzee ta mənti lə mbəzli kwa miy dəgha gha. 4 Ya wa ntsa kwa miy dəgha gha dzaa məti mbə məlmiy, kireketi dza na ta pərə mbəri tsa ci. Tsaa dzaa məti tə gambay, zliŋiŋ dza naa tsəŋu tsava,” kə Kwa sləkəpə, pə gha kaa ngəci,» Kə kwa sləkəpə kaa Zhehu.5 Nahuti kumaa tərmbəə dzəkən mazə Bashay, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən zal tsa mənəhu na, lə nihuti shi mənəhu na diɓa. 6 Ma sa mətiy na na, laʼa məndi lanti mbə məlmə Tirsa, mbaʼ məndi pəərəti zəghu ci Ela kwa pi tsa ci.
7 Kumaa niy ghunay Kwa sləkəpə va ndə gəzə kuma Hiyala tsa har məndi vaa Zhehu zəghu Hanani ta gəzə kaa Mazə Basha lə mbəzli kwa miy dəgha ciy, tə mbərkə fəti bakə niy nza na: Kwa taŋay, sa nza na mbaʼ kar Basha lə mbəzli kwa miy dəgha ci niy mənti kuma jikir na kaa Kwa sləkəpə dəʼu ghən tsa nzə lə kumaa niy mənti ghəshi va njasa niy mənti kar Zherubuwam va lə mbəzli kwa miy dəgha ci. Kwa bakay, sa nza na mbaʼ Basha niy bakwanti mbəzli kwa miy dəgha Zherubuwam.
Ela məni mazə dzəkən ka Izərayel
8 Ma Aza mbə məni kwa bakəmətsəkə kwaŋti piya ci mbə mazə dzəkən ka Zhuda na, mbaʼ məndi pəərəti Ela zəghu Basha ka mazə tsaa sləkə ka Izərayel. Dza na mbaʼ mənti piya bakə mbə mazə, mbə məlmə Tirsa 9 Dzəghwa Zəmri tsahuti ndə sləni tsa ci, ntsaa sləkə nahuti bəla kutiŋ mbə mutiti gədewesli ka məndiy dza ta mbəzə li shi sa təhəvərishi məndi bakə mbə, mbaʼ pəhəti kuma lə nihuti mbəzli ta pəəsli ci. Mbə məlmə Tirsa kiy ghyi tsa Arsa, ntsaa sləkə pi tsa kiy ghyi tsa mazə niy nza mazə Ela mbə sa shiy, mbaʼ ghiy. 10 Ghəci kiyɓa ki na, mbaʼ Zimri səəkəə dzakiy, mbaʼ paslanti. Ghalaɓay, Aza mbə məni kwa bakəmətsəkə mbərfəŋti piya ci niy nza na mbə məni mazə dzəkən mbəzli ka Zhuda. Dzəghwa Zimri ki, mbaʼ ɓəhu mazə tsa Ela. 11 War sa pəərəti məndi, mbaʼ nziyiy kwa gəzli mazə ci na, dza na cəkeʼ bakwanti mbəzli kwa miy dəgha Basha gwanashi. Niy tərmbiy zal na ya kutiŋ mbə shi, ya mbə manhiy, ya mbə mbəzliy niy nza na li shiw. 12 Ava tsəgha bakwanti Zimri mbəzli kwa miy dəgha Basha gwanashi, njasaa niy gəzəkə Kwa sləkəpə va səvəri kwa miy tsa Zhehu ndə gəzə kuma Hiyala kaa Basha. 13 Shiy mənishi va gwanashiy, tə mbərkə kuma jikir na va mənti kar Basha lə zəghu ci Ela, mbaʼ ghəshi fambə ka Izərayel mbə məni kuma jikir na va na. Lə tsəfəku kwa kuma hiyahiy kama vaa hiyalahi kataŋ ni tsəgha ki na, mbaʼ ghəshi ɓakati nəfə tsa kwa sləkəpə Hiyala ka Izərayel.
14 Nahuti kumaa tərmbəə dzəkən mazə Elay, kwa zliya: “Kuma mənəhu mezhizhi ka Izərayel,” tsaslaghwa məndi. Kwa zliya va tsasliti məndi kumaa dzəkən nihuti shi mənəhu na gwanashi diɓa.
Zimriy məni mazə dzəkən ka Izərayel
15 Ma Aza mbə məni kwa bakəmətsəkə mbərəfəŋti piya ci mbə mazə dzəkən ka Zhuda na, mbaʼ Zimri məniy ka mazə ka Izərayel. Vici mbərfəŋ niy mənti na mbə mazə mbə məlmə Tirsa. Ghala vəghu tsa vay, a ka sawji ka Izərayel niy ɓasəshi vəgha məlmə Gibetuŋ ta zləghu va ka Filisteŋ, sa niy nza na mbə dəvə shi. 16 Ma sa favə ka sawji va: «A Zimri pəhanti kuma ta mazə, mbaʼ paslanti» kə məndi na, dza ghəshi gwanashi tiɓata tə pi tsa ɓasəshi ghəshi va, mbaʼ ghəshi pəərəti Uməri dikə tsa ka sawji ka mazə tsaa sləkə ka Izərayel. 17 Dza kar Uməri lə ka sawji va gwanashi ki, mbaʼ ghəshi kafəshi, mbərəkə ghəshi zlata məlmə Gibetuŋ, mbaʼ ghəshi səəkəə pəslambə mbə məlmə Tirsa. 18 Ma sa nighəti Zimri məndi ɓəhu məlmə va na, dza na, mbaʼ dzay dzəmbə tsahuti ciki kiy ghyi mazə tsa nza na va kiy, bizl tsəʼuti ghu ta ciki tsa va, mbaʼ ndiy mbəɓa. 19 Shiy mənishi va tsəgha gwanashiy, tə mbərkə sa niy mənti Zimri kuma jikir na kwa kuma Kwa sləkəpə na, mbaʼ niy məni shiy njasa niy mənishi Zherubuwam va, ka məni kumaa niy məni na va jikir na, mbaʼ niy fambə ka Izərayel dzəmbə məni kuma jikir na nja Zherubəwam.
20 Nahuti kumaa tərmbəə dzəkən mazə Zimriy, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən kumaa niy pəhəti na va ta pəəsli Ela.
21 Liy hum sa mətiy Zimri ki na, mbaʼ takəhi məŋ ni va har məndiy ka Izərayel təhəvərivashi bakə mbə. Nahuti bəla mbəzliy, Tibni zəghu Ginatə niy ɗi ghəshi pəərə ka mazə tsa shi, ma nahuti bəla na Umri ni va niy ɗi pəərə. 22 Dzəghwa ki, təruŋɓa mbəzliy niy ɗi Uməri va kumavə bərci kaa mbəzli dza kwa bəla Tibni zəghu Ginatə va. Mbaʼ Tibni mətiy, mbaʼ Umri məniy ka mazə.
Umriy məni mazə dzəkən ka Izərayel
23 Ma Aza mbə məni kwa mahəkanəmətsəkə tanti piya ci mbə məni mazə dzəkən ka Zhuda na, mbaʼ məndi pəərəti Umri ka mazə ka Izərayel. Piya məŋ lə bakə niy mənti na mbə mazə. Piya kwaŋ niy mənti na lə nziy tsa ci mbə mazə mbə məlmə Tirsa. 24 Zhini na, mbaʼ dzaa pahu diŋə va ntsa har məndiy Shemer. Tə gəna kwa tsahi bələku bələku kwaŋəmətsəkə niy pahu na pi tsa va. Dza na laʼ lati məlmə mə diŋə va, mbaʼ fanati slən Samari kaa məlmə va. Səvəri mbə slən tsa Shemer ntsa pavə na va diŋə va və niy ɓəkəvəri na slən tsa məlmə va. 25 Mbə nziy tsa ciy, kumaa təɓə ma kwa kuma kwa sləkəpə niy məni Umri. Tərəŋuɓa ghəci niy məni na kuma jikir na kaa mbəzliy mənəhu mazə pərɓa ghəshi kən gwanashi. 26 Shiy niy məni Zherubuwam zəghu Nabat vay, war tsəgha niy mənishi na gwanashi, mbaʼ fambə ka Izərayel dzəmbə kuma jikir na njasa niy fambəshi Zherubuwam va. Lə tsəfəku kwa kuma hiyahiy kama vaa hiyalahi kataŋ ni tsəgha ki na, mbaʼ ghəshi ɓakati nəfə tsa kwa sləkəpə Hiyala ka Izərayel.
27 Nahuti kumaa tərmbəə dzəkən mazə Zimriy, kwa zliya: “Kuma mənəhu mezhizhi ka Izərayel” tsaslaghwa məndi. Kwa zliya va tsasliti məndi kumaa dzəkən zal tsa mənəhu na, lə nihuti shi mənəhu na diɓa. 28 Ma sa mətiy na na, laʼa məndi lanti mbə məlmə Samari, mbaʼ məndi pəərəti zəghu ci Akab kwa pi tsa ci.
Akab məni mazə dzəkən ka Izərayel
29 Ma Aza mbə məni kwa mahəkanəmətsəkə dəghəsti piya ci mbə mazə dzəkən ka Zhuda na, mbaʼ məndi pəərəti Akab zəghu Uməri ka mazə ka Izərayel. Piya bakəmətsəkə bakəti niy mənti na mbə mazə. Mbə məlmə Samari niy nza na lə nziy tsa ci. 30 Kumaa təɓə ma niy məni na kwa kuma kwa sləkəpə. Tərəŋuɓa ghəci niy məni na kuma jikir na kaa mbəzliy mənəhu mazə pərɓa ghəshi kaa ngəci gwanashi. 31 Njasa niy məni Zherubəwam zəghu Nabat va kuma jikir nay, tsəgha niy məni na. Zhini na mbaʼ təɗakən kən nava, mbaʼ zhaa ɓəvə Zhezabel zha Etəbal mazə ka Siduŋ. Dza na mbaʼ məniy ka ndə nuw hiyala har məndi vaa Baal, ka tsəfəku kwa kuma nzə. 32 Dza na nga nganati ciki kaa Baal va mbə məlmə Samari, mbaʼ ngati pi mbəɓa ta vəlanta shiy ti 33 Dza na mbaʼ gariy tsəm ta nza slən tsa hiyala har məndi vaa Akera ti. War shiy gar sati nəfə tsa Kwa sləkəpə Hiyala ka Izərayel və shi na shiy niy məni na ya mbə nama kuma ka naa məni. Tərəŋuɓa ghəci niy məni na kuma jikir na kaa mbəzliy mənəhu mazə pərɓa ghəshi ka ngəci gwanashi.
34 Ma Akab mbə məni mazə ki na, dzəghwa tsahuti ndə ka Getel, Hiyel, kə məndi kaa slən tsa ci, mbaʼ zhiniy ngaghwa məlmə Zheriku kwa kələm. Ghala pi tsa la məndi kəʼu ta fə səɗa kələm tsa vay, mbaʼ Abiram kwa taŋa zəghu ci mətiy tə mbərkə sləni va. Ma məndi mbə fə gəzli kwa miy dəghaa dzəmbə məlmə va na, ɓəlahə Seguv, tsa ju tsa zəghu ci mətiy tə mbərkə sləni va diɓa. Kumaa mənita vay, tsəgha niy gəzəkə Zhuzəwe zəghu Nun sa niy gəzanci Kwa sləkəpə gəzə nzəª.