Eli ndə gəzə kuma Hiyalaa gəzə ghuli təruŋ na dza ta məniva
17
A tsahuti ndə gəzə kuma Hiyala niy nza tiɓa mbə məlmə Tishəbe tə hiɗi ka Galad, Eli, kə məndi kaa slən tsa ci. Dza na tə nahuti vici mbaʼ dzaa kəsay mazə Akab. Ma kə kaa ngəci na: «Ava Kwa sləkəpə Hiyala ka Izərayel ghərantee va sləni tiɓa ka favə. Kama na mbə piyahiy sar niy, ya mini, ya van ka dza naa nza tiɓa, kala war fəca dzee ɗuwkuw,» kəEli ndə gəzə kuma Hiyala dzaa mbiy miy həl Kerit
2 Liy hum ki, ma kə Kwa sləkəpə kaa Eli na: 3 «Ɓarvaŋa tikə a gha dzaŋa njasaa dzəghwa ghumə, nza gha dzaa mbəŋa kwa Keritə, həl tsa juw tsa va njasaa dzəghwa ghumə va həl Zhurdeŋ. 4 Nza gha sa yam kwa həl tsa juw tsa va, ta ghunashi ghaməkəhi dzee nza ghəshi ɓəŋa shi dza ghaa zəmə,» kə. 5 Dza Eli ki, mbaʼ dzaa nziyiy kwa həl Kerit njasaa dzəghwa ghumə va həl Zhurdeŋ, njasa gəzanakə kwa sləkəpə va. 6 Njasa səəkə viciy, war mbə ɓanci peŋ mbaʼ sliw niy nza ghaməkəhi, mekishi lə hetihuer. Mbaʼ kə ndir ghəranci na, ka sa yam ghəci kwa həl tsa juw tsa va.
Eli kiy ghyi tsa mali mbəri mbə məlmə Sarepəta
7 Ma geʼi lə tsahuti vəghu sa hishi məndi ki na, mbaʼ yam mbasəshi kwa həl tsa juw tsa va sa niy nzəmə ma van tə hiɗi va. 8 Ma kə Kwa sləkəpə kaa Eli diɓa ki na: 9 «Kafə mbalaa dzəmbə məlmə Sarepəta tə hiɗi ka Shiduŋ, nza gha dzaa nziyŋa mbəɓa. Ee gəzanta kaa nahuti mali mbəri mbəɓa ta ɓəŋa shi zəmə ghənzə,» kə.
10 Dza Eli ki, mbaʼ kafiy, ka dzay dzəmbə məlmə Sarepəta. Ma ghəciy dza ta dzəmbə məlmə va na, mbaʼ nata nahuti mali mbə pa shighu, mali mbəri niy nza sa va. Dza na daʼ harata. Ma kə kaa ngəta sa səəkəta na na: «Titihu mbala tikəra yam jiwu kwa ghulpə ta sashi shi,» kə. 11 Dza mali va ka dza ta tanci yam va, ma ghənzə mbə dza na, mbaʼ zhəghəti. Ma kə kaa ngəta diɓa na: «Titihu ɓəkəvəra tə gha ghəni pən ta dəvə gha, ghaa səəkə diɓa shi,» kə. 12 Ma kə mali va kaa ngəci na: «Ava Hiyala gha Kwa sləkəpə tiɓa ka favə, peŋ viya ya kutiŋəw. Kwataka ghupə dərəkə dəvə na saa tərə viya kwa dəghu, mbaʼ in jiwu kwa hupər. Ee iməvə shighu jiwu, nzee jighi ta dza ta tahu shi va kaa ngəŋiy lə zəghuee, sa ka ghiy zəməhushi na, nza ghiy ndəghə məti ghiy nə ya sana,» kə. 13 Ma kə Eli kaa ngəta na: «Ka dza her gha ma. Mbalaa jighi a gha dzaa mənti njasa gəzəkə gha va. Ə na na nza nay pərɓa kaa ngəra pə gha dzaa takə peŋ jiwu lə shi va gha va. Sa ka gha takəra tseyiy, nza gha dza ta ta tsa ghuy lə zəghu gha. 14 Sa nza nay, avanta kuma gəzəkə Kwa sləkəpə Hiyala ka Izərayel: “Ka dza ghupəə kərə kwa dəghuw tsa vaw, ka dza in bashi nza kwa hupər tsa vaw. War tsəgha dza shivaa nza kwaɓa paʼ fəca dzee yən Kwa sləkəpəə nzəməkə van dzəti hiɗi,” kə,» kə Eli.
15 Sa gəzanakə Eli tsəgha ki na, mbaʼ mali va dzaa mənti kuma va, njasa gəzanakə na va. War lə shiy niy nza na və shi ta zəməshi ghəshi lə zəghu nzə, mbaʼ Eli ndə gəzə kuma Hiyala mbə vəghu ɗaŋ. 16 Ya humɓay, war lə ghupə niy nza na kwa dəghu tsa shi, tsəgha in kwa hupər tsa shi diɓa, njasa niy gəzəkə Kwa sləkəpə va səvəri kwa miy tsa Eli ndə gəzə kuma Hiyala.
Eli zhanambə piy mbə zəghu mali mbəri
17 Liy hum nava kumay, avanta nahuti kumaa zhiniy mənita: Dzəghwa zəghu mali kwa ghiy kaʼuti ndə Hiyala Eli va kiy ghyi tsa nzə mbaʼ təriy gurapiy. Tərəŋuy zəlghu tsa va ʼyapəvə, mbaʼ mətiy. 18 Ma kə mali va kaa Eli na: «Na ka waa na məntəra gha na kuma kiya ndə gəzə kuma Hiyala? Ta vaɗikəvəri kuma məntee jikir na, mbaʼ ta mətiy zəghuee səəkəŋa ghaa dzakə ghyi tsee shəkəna?» kə. 19 «Ndara zəghu gha va,» kə Eli kaa ngəta. Mbə dəvə mali va niy nza zəghu va, dza Eli laŋ ɓəvə, mbaʼ dzay liy dzəmə ciki tsa ngati məndi mə ghən tsahuti, sa nza na məɓa mali va niy ɓanavə ciki ka məlmə ta hi ghəci mbə. Dzəmə na bəm fiy mə həni tə pi tsa ka naa həni. 20 Dza na ki, ka cəʼu Kwa sləkəpə, Ma kə na: «A Hiyalee Kwa sləkəpə, a gha nay mali na kaʼutəra na kiy ghyi tsa nzə.Tawa ɗi gha paslanti zəghu nzə ta nza ghənzə tə ngəraʼu lə ghənzəta kiya?» kə.
21 Dza Eli mbaʼ hənakənvay mahəkanə səɗa ci kən zəghu va, ka cəʼu Kwa sləkəpə, ma kə na: «A Hiyalee Kwa sləkəpə, əə cəʼuŋee a gha zhanambə piy mbə zəghu na,» kə. 22 Dza Kwa sləkəpə mbaʼ zləɓavə cəʼu Eli va, mbaʼ zhananavə piy tsa zəghu va, ka piy ghəci. 23 Dza na mbaʼ ɓəvə zəghu va, mbaʼ səkway li səəkə mə tsa mə ghən va cikiy dzəghwa tsa takə takə va. Mbaʼ zhananavə kaa mbəghiy, ma kə kaa ngəta na: «Nay zəghu gha gha tə ghumiy sa?» kə. 24 Ma kə mali va kaa ngəci na: «Nana maɗee sənay, ndə gəzə kuma Hiyala nza gha kataŋ pən. Kumaa səəkə va kwa sləkəpə na sa ka ghaa gəzə kataŋ kataŋ,» kə