Davitə mbərati ka Izərayel lə ka Zhuda
(1 Ch 21.1-6)
24
Geʼi lə tsahuti vəghu ki na, mbaʼ nəfə tsa Kwa sləkəpə zhiniy satiy dzəkən ka Izərayel. Dza na mbaʼ fambə Davitə mbə məni kumaa dzaa ɓanakəshi kumaa dzaa dzava ma ti shi. Ma kə kaa ngəci na: «Mbala mbərati ka Izərayel lə ka Zhəwda,» kə. 2 Dzəghwa ma kə mazə Davitə kaa Zhəwabə dikə tsa ka sawji tsaa niy nza kwasəbə ki na: «Mbala dzar mbə takəhi ka Izərayel gwanashi, kafə na mbə məlmə Daŋ paʼ mbə məlmə Ber-sheva, a ghuy dzaa mbərati mbəzli. Ee ɗi sənashi mbəzli njasa nza ghəshi ɗaŋ tsa shi,» kə. 3 Ma kə Zhəwabə kaa ngəci na: «A mazə tsaa sləkəra, bələku səɗa kə Hiyala gha Kwa sləkəpə mətsəhəti ɗaŋ tsa mbəzli, ka nashi məcici gha. Tawa ɗi gha məni gəla shi tsəgha ni va kiya mazə tsaa sləkəra?»ª kə. 4 Ya tsəgha nzə ki na, mbaʼ mazə gariy tə kuma gəzanakə na va kaa kar Zhəwabə lə mbəzliy sləkə ka sawji. Dza ghəshi mbaʼ ghəshi dzashi ta ɓəla ka Izərayel. 5 Dza ghəshi taŋ ghəshi taŋəti həl Zhurdeŋ, ka gha ɓəla mbəzli mbə məlmə Arwer lə ni mbə məlməə kərkə va dziy kwa teʼu pi. Dza ghəshi ka dzar tə hiɗi ka Gad njasaa dzəmbə məlmə Yazer. 6 Sa kafə ghəshi tiɓa na, ka dzəti hiɗi ka Galad, ka dzəmbə məlmə Kadeshə tə hiɗi ka Hiti. Dza ghəshi mbaʼ ghəshi tsəhəshi mbə məlmə Daŋ Yaan lə mbə məlməhiy dzar vəgha, mbaʼ ghəshi taŋəshi dzəti hiɗi ka Siduŋ. 7 Sa kafə ghəshi tiɓa na, ka dzəmbə Tir məlmə ndəghu məndi, ka dzəmbə məlməhiy niy nzaa məlməhi ka Hivi lə ka Kanan gwanashi. Liy hum na, ka dzashiy dzəmbə məlmə Ber-sheva, njasaa dzəghwa həci, tə hiɗi ka Zhəwda. 8 Tir məsliɗə mbaʼ vici bakəmətsəkə niy mənti ghəshi mbə dza dzar tə hiɗi va gwanashi mbə ɓəla mbəzli. Sa kərəshi ghəshi na, mbaʼ ghəshi zhəghəkəvashiy dzəmbə məlmə Zheruzalem. 9 Dzəghwa Zhəwabə mbaʼ gəzanci kaa mazə njasa nza mbəzli ɗaŋ tsa shi. Mbə takə tsa Izərayeliy, zhər diwi diwi diwi diwi dəghəsəmətsəkə niy nza zhər gar dza ta mbəzə ni. Mbə takə tsa ka Zhəwda na, zhər diwi diwi diwi diwi cifəmətsəkə.Hiyala ɓəkə biyambə dzəmbə ka Izərayel
(Voir 1 Chron 21.7-17)
10 Liy hum sa ɓəlanti mbəzli Davitə ka Izərayel ki na, War ə her ciy dza təruŋ təruŋ. Ma kə kaa Kwa sləkəpə na: «Kuma jikir təruŋ na sa məntee va, Əə cəʼuŋee, titihu pəlatara kumee jikir na yən ndə sləni tsa gha. Nja ntsa kama məhərli və məntee shiy,» kə. 11-12 Dzəghwa ki mbaʼ Kwa sləkəpə gəzanci kuma kaa Gad ndə gəzə kuma Hiyala, ntsaa ci kuma kaa Davitə. Ma kə na: «Mbala kəsay Davitə, ma pə gha kaa ngəciy: Avanta kuma gəzəkə Kwa sləkəpə: “ngəreʼuer mahəkanə fiy ya kwa kuma gha, tsa dza ghaa tivə mbə shiy, ghəci dzee ta samiyŋa” Kə Kwa sləkəpə, pə gha kaa ngəci,» kə.
Ma tə həzlimə mekishi sa fərəghiy Davitə ki na, 13 Mbaʼ Gad dzaa kəsay, mbaʼ gəzanci kuma gəzanakə Kwa sləkəpə va. Ma kə kaa ngəci na: «Tsama ngəraʼu na sa ɗi ghaa? Ma na sa ɗi gha ghənzəə səkwataa dzəti hiɗi gha piya mbərfəŋ shəkənaa, naa tir mahəkanə ɗi gha mənti mbə huhu va ka mbəzə gha sa ka ghəshi titihəŋa shəkənaa, naa biyambə na sa ɗi gha ghəci səəkiy dzəmbə mbəzli tə hiɗi gha ta vici mahəkanə na? Zəzəvə kuma wuzə a gha gəzara kuma dzee dza ta zhananci kaa ntsaa ghunara,» kə. 14 Ma kə Davitə kaa ngəci na: «Təruŋ dzashi heree. wəzəɓa dzəmbə dəvə kwa sləkəpə ɗee tərə kən dzəmbə dəvə ke ngəri. Sa nza nay, təruŋ na zhəhur və,» kə.
15 Dza Kwa sləkəpə fəcavata mbaʼ ɓəkə biyambə dzəti hiɗi ka Izərayel. Ghava na tə mekəshi va paʼa va vəghu tsa slati na va. Mbəzli diwi diwi diwi mbərfəŋəmətsəkə niy bəkushi na va biyambə tsa va kafə na mbə məlmə Daŋ paʼa mbə məlmə Ber-sheva. 16 Dza ndə kwal tsa Kwa sləkəpə kafə kafata dəvə ci dza kwa məlmə Zheruzalem ta zanti, kala nay ma ngəraʼu tsa va Kwa sləkəpə wəzə tsəgha, mbaʼ bashanti. Ma kə kaa ndə kwal Hiyala tsa va na: «Məkə na tsəgha, ɓanti dəvə gha,» kə.
Ghalaɓay, vəgha lani ka Aruna ndə ka Zhebushi vaa dəʼu alkamari ci niy nza ndə kwal tsa Kwa sləkəpə va. 17 Sa nay Davitə Ndə kwal tsa Kwa sləkəpə va bəku mbəzli ki, ma kə kaa Kwa sləkəpə na: «Yən na ntsa nza fəti və, yən yən mazə na saa mənti kuma jikir na. Ta na mbəzli sləkee ni kiy, a shi mənti ghəshi kiya? Dzəkənee lə mbəzli kiy ghyi tsee pə ghaa ɓasə nguvə,» kə.
Davitə nga pi tsaa ɓanta shiy kaa Kwa sləkəpə
(Voir 1 Chron 21.18-26)
18 Dzəghwa Gad fəcavata mbaʼ dzaa kəsay mazə Davitə. Ma kə kaa ngəci na: «Mbalaa dzəmə lani Aruna ndə ka Zhebushi a gha nganati pi tsaa ɓanta shiy kaa Kwa sləkəpə kwa lani va,» kə. 19 Dza Davitə mbaʼ dzəmiy dzəmə ɗal tsa va njasa gəzanakə Kwa sləkəpə va, səvəri kwa miy tsa Gad. 20 Sa nə Aruna nighə kə na, mazə mbə dzəməə dzəvəgha lə mbəzli kwa dəgha ci. Dza na kafə kafiy ka dza ta kumə li shi. Səəkə na gələɓə gələɓiy kwa kuma ci, gaʼa kuma mbə hiɗi. 21 Ma kə na: «A shiy ɓəkə mazə ndə sləkəra vəya yən ndə sləni tsa ci kiya?» kə. Ma kə mazə na: «Ta pa lani gha na ɗee ta nganta pi tsaa ɓanta shiy kaa Kwa sləkəpə. Ta mbə ngəraʼu tsa kən mbəzli tə hiɗi ghummə niy kiriy,» kə. 22 Ma kə Aruna kaa ngəci na: «Ə kə mazə tsaa sləkəra ɓə shi ɗi na va ta nga pi tsaa ndanta shiy kaa Hiyala. Ava slayee va, kəəsəshi ta ndantashi kaa Kwa sləkəpə. Kar dimbəhi lə shighu pəhati məndi slay tishiy, ta pəhə ghu. 23 Gwanashi tsa shi vay, ee ndaŋashi mazə. Nza Hiyala gha Kwa sləkəpə zləɓavə shi vəlanta gha,» kə. 24 Ma kə mazə kaa ngəci na: «Tiɓa tepuw, war papa ɗee pa shi va. Njasa ka məndiy pashiy, tsəgha dzee ta pa shi. Ka ndi shi ndara məndi tə gəmee kaa Hiyalee Kwa sləkəpuw,» kə.
Dzəghwa Davitə ki, mbaʼ pahu kar lani va lə slay va tə gəna kwa tsahi cifəmətsəkə. 25 Dza na, tə pi tsa va ki, ngaʼ nganati pi tsaa ɓanta shiy ti kaa Kwa sləkəpə. Dzəghwa na mbaʼ sləsliy shiy kaa Kwa sləkəpə ta zərkə, mbaʼ ndananti ni ndi ndi ni. Dza Kwa sləkəpə ki mbaʼ mananatishi wəzə hur kaa tə kaa ka Izərayel. Mbaʼ ɓanti ngəraʼu tsaa niy nza va kən shi.