Kuma kərni Davitə gəzə kuma ci li
23
Avanata kuma kərni Davitə gəzə kuma ci li:Favəm kuma gəzə Davitə zəghu Zhese.
Favəm kuma gəzə ntsa dikə tsa,
ntsa təravə Hiyala Zhakubə mbaʼ shəkambə in dzəghwa mbə ghən ci,
ntsa vəshi ka Izərayel ta fal kwa cəm. Ma kiy:
2 Safə tsa Kwa sləkəpə gəzə na kuma səvəri mbə ya.
Ghənzə fambə na kuma nzə mbə miy tsee.
3 A Hiyala ka Izərayel gəzəkə.
Ma kə Hiyalaa ndəghu ka Izərayel kaa ngəray:
«Mazə tsaa sləkə mbəzli lə kwal
ka sləkəshi lə hazləni Hiyalay,
4 ghala mbə lə waŋ pi tsaa nza va mekishi viciy səmə,
kala kuleɓi kwa ghumuw.
Ghala mbə lə viciy mbərə va liy hum vanə,
guzən mbə pəsə səvəri mbə hiɗiw,» kə.
5 Ava tsəgha mənti Hiyala lə mbəzli kwa miy dəghee:
Aa slati kiri lə ya ta kwa ndimndim,
sla kiri tsa vay, lə kuma dza məndiy dzəghwa ma kən na tiɓa. Kuma va ndəghu na sla kiri tsa va.
Ya mbə nama kumay, mbə kətira ka naa nza ta mbatee,
Ya a kuma ɗi yay, mbə mənira ka naa nza.
6 Ma na mbəzli gəmgəm ni gwanashiy,
nja tekesli ndəghanti məndi na ghəshi,
ka ɓəshi məndi lə dəvuw.
7 Ya wa na ntsaa ɗi ɓəshiy, lə gətaa kəslaʼu shiy kwa tsahi, aw na lə gəta gwapa ka naa ɓəshi,
ka na dza na, mbaʼ ndantishi gwanashi tiɓata.
Ka sawjiy guraa kurahəhu mbəzə mbə ka sawji Davitə
(1 Ch 11.10-41)
8 Avanashi sləneɗemer ka sawjiy guraa kurahəhu mbəzə mbə ka sawji Davitə: Kwataŋa ndiy, «Ishəbushetə» mbə takə tsa ka Hakəmun na. Ghəci niy nza naa dikə tsa mbəzli mahəkanə. Aa niy bəkuy mbəzli diwi diwi dəghəsə lə gwapa ci mbə vici kutiŋ mbə mbəzə.
9 Kwa bakay, Eliyazar zəghu Dudu. Jijiy ndə ka Ahuhi niy nza na. Mbə ka sawji mahəkanə ni va niy nza kwasəbə Davitə niy nza na, ghala vəghu tsaa niy mbashi ghəshi va ka sawji ka Filisteŋ, sa niy ɓasəshi ghəshi ta mbəzə. Ghalaɓay ə niy zhəkiy ka sawji ka Izərayel liy hum liy hum mbə mbəzə tsa va. 10 Ma Eliyazar na ci ki na, mbaʼ gariy kwa zal kwa zal. Mbaʼ bəkuvə ka Filisteŋ, paʼa ka mbaŋəta dəvə ci tə kafaʼi va dali. Fəca vay, a Kwa sləkəpə kəətiti ka Izərayel ta mbashi ka mbəzə shi ghəshi təruŋ. Kwataka ta ɓasə shi tə vəgha mbəzli bəkuy na niy zhəghəva ka sawjiy ka Izərayel dzəvəgha Eliyazar gwaʼa tsəgha. 11 Kwa mahəkana ntsaa guraa kurahəhu mbəziy, Shama zəghu Age ndə ka Harar na. Tə nahuti vici sa ɓasəshi ka sawji ka Filisteŋ mbə məlmə Lehiy, a za shi har məndiy lantiyə niy nza tə pi tsa va. Dzəghwa ka Izərayel ka huhushi va ka Filisteŋ. 12 Ma dza Shama na ci ki na, gar gariy tə jipə jipə za va mbaʼ zləghuti za va, mbaʼ bəkuy ka Filisteŋ. Mbaʼ Kwa sləkəpə kəətiti ka Izəryel ta mbashi ka mbəzə shi ghəshi təruŋ tsəgha.
13 Tə nahuti vici ghala ka məndi vaa məni shiy səəkə kwamtiy, a ka sawji ka Filisteŋ niy ɓasəshi dziy kwa teʼu pi tsa har məndi vaa teʼu pi tsa ka Refay. Dza nihuti mahəkanə mbə ka sawjiy ndəghu Davitə va mahəkanəmətsəkə ni guraa kurahəhu mbəzə mbaʼ ghəshi səəkəə kəsay Davitə mbə ləgu Adulam. 14 Tə pi tsa nza dzəti iyahə iyahə niy mbiy Davitə. Ghala vəghu tsa vay, a ka sawji ka Filisteŋ niy səəkəə nziyshi mbə məlmə Betəlehem. 15 Dza Davitə tsəgha ka gəzə kuma mawti na, ma kə na: «A ntsaa dzaa tikəra yam kwa yam miy dəghaa dzəmbə məlmə Betəlehem va ta sashee tay?» kə. 16 Dzəghwa ka sawjiy kurahəhu mbəzə va mahəkanə ni mbaʼ ghəshi dzəmbəshi lə bərciy dzəmbə ka sawji ka Filisteŋ va, ga ghəshi gavə yam kwa yam vəgha miy dəghaa dzəmbə məlmə Betəlehem va mbaʼ ghəshi ɓanakəshi kaa Davitə. Ma Davitə na ci ki na, kala zləɓa ma sa yam va ghəci. Dza na mbaʼ vəlanati vəli li shi kaa Kwa sləkəpə, naʼi shəkanatishi dzəti hiɗi. 17 Ma kə na: «Ka dzee savə yam va tepuw Kwa sləkəpuw. Yam vay, nja miymiy mbəzliy tikəshi va na ghəshi, sa nza nay, a ghəshi zləɓavə ya məti niy nza na mbə dza ta tishi,» kə. Kala zləɓa ma sa yam va ghəci.
Ava tsəgha na kuma mənti ka sawji mahəkanə ni va.
18 Tsahuti ndə sawji tsaa guraa kurahəhu mbəziy, Avishay zəmbəghiy Zhəwabə, zəghu Seruya niy nza na. Dikə tsa ka sawjiy ndəghu Davitə va mahəkanəmətsəkə ni guraa kurahəhu mbəzə niy nza na. Tə nahuti viciy, aa niy bakwanti mbəzli diwi diwi mahəkanə lə gwapa ci. Va tsəgha ki na, mbaʼ slən tsa ci dzantəvay kwasəbə mbəzli mahəkanə ni va. 19 Ghəci niy gura məndiy sənay mbə mbəzli mahəkənəmətsəkə ni va. Ghəci niy nza mazə tsa shi. Ya tsəgha nzə kiy, niy nuwvə səbə mbəzli mahəkanə ni va naw.
20 A tsahuti ndə niy nza tiɓa Benayahu kə məndi kaa slən tsa ci, zəghu Yuyada mbə məlmə Kavəsel, jijiy tsahuti ntsaa kurahəhu mbəzə. Benayahu tsa vay, aa niy mənəhu kuma təruŋ, ghəci niy bakwanti na mbəzliy guranti tə mbəzə bakə mbə ka Muwabə. Tə nahuti vici sa niy səkwata timbətimbiy, ghəci niy dzəghwa naa paslanti zhəl kwa yam diɓa. 21 Ghəci niy pəsliti na tsahuti ndə ka Ezhiptə, ndə lə vəgha və mbaʼ gwapa ta dəvə ci. War kwataka gəta gwaʼa tsəgha na saa niy nza ta dəvə ci dza na ta kumə lə ntsa va, dza na kwakwatsə zləghuhu gwapa ta dəvə ntsa va mbaʼ paslanti li. 22 Ava kuma mənuhu Benayahu zəghu Yehuyada. Mbaʼ slən tsa ci dzanətəvay nja sa mbəzli mahəkanə ni va. 23 Təruŋɓa ghəci niy nza na mbə ka sawji mahəkanə mətsəkə ni va. Nanzə kiy, niy nuvə səəbə mbəzli mahəkanə ni va naw. Dzəghwa Davitə mbaʼ fiy ka dikə tsa ka sawjiy ndəghu.
24 Mbə ka sawji mahəkanəmətsəkə ni va niy nza kar Asahel zəmbəghiy Zhəwabə, mbaʼ Elanan zəghu Dudu ndə ka Betəlehem, 25 mbaʼ Shama ndə ka Harudə, mbaʼ Elika tsahuti ndə ka Harudə, 26 mbaʼ Helesə ndə ka Palti, mbaʼ Ira zəghu Ikeshə ndə ka Tekuwa, 27 mbaʼ Aviyezer ndə ka Anatutə, mbaʼ Mevunay ndə ka Husha, 28 mbaʼ Saləmuŋ ndə ka Ahushə, mbaʼ Mahəray ndə ka Netufa, 29 mbaʼ Helevə zəghu Baana ndə ka Netufa, mbaʼ Itay zəghu Rivay ndə ka Giveya tə hiɗi Benzhameŋ, 30 mbaʼ Benayahu ndə ka Piriyatun, mbaʼ Hiday ntsaa səəkə dziy kwa teʼu pi tsa har məndi Gaashə, 31 mbaʼ Avi-Alvuŋ ndə ka Arva, mbaʼ Azəmavetə ndə ka Barhum, 32 mbaʼ Eliyahəba ndə ka Shalvun. Mbaʼ ndərazhi Yashen: kar Yunathan, 33 lə Shama ndə ka Harar, mbaʼ Ahiyam zəghu Sharar ndə ka Harar, 34 mbaʼ Elifeletə zəghu Ahasbay jijiy ndə ka Maaka, mbaʼ Eliyam zəghu Ahitufel ndə ka Gilu, 35 mbaʼ Hesəray ndə ka Karmel, mbaʼ Paaray ndə ka Arab, 36 mbaʼ Yiguwel zəghu Natanə ndə ka Suva, mbaʼ Bani ndə ka Gad, 37 mbaʼ Celekə ndə ka Amun, mbaʼ Nahəray ndə ka Berut, ntsaa ɓə shi mbəzə Zhəwabə zəghu Seruya, 38 mbaʼ Ira ndə ka Yitəri, mbaʼ Garebə tsahuti ndə ka Yitəri, 39 mbaʼ Uri ndə ka Hitit. Gwanashi tsa ka sawji Davitə guraa kurahəhu mbəziy, mahəkanəmətsəkə mbərfəŋti niy nza ghəshi.