Davitə fal Kwa sləkəpə kwa cəm
22
Ma sa mbəlanti Kwa sləkəpə Davitə mbə dəvə ka mbəzə ci gwanashi lə mbə dəvə Sawul ki na, dza na ka fal Kwa sləkəpə kwa cəm.2 Ma kə na: Kwa sləkəpə na nee kəlɓa garəɗee ti,
ghənzə na nee bərci,
ghənzə na kwa mbəlira.
3 Hiyala na haku tsa mbəree ti,
ghənzə na gal tsee,
ghənzə na ni ya shi mbəzəə ushantəra ka mbəzee,
ghənzə na pi tsa səəkə bərcee ti,
ghənzə na ləguee,
ghənzə na kwa mbəlira,
ghənzə mbəlantəra na va ka gulaŋ.
4 Usa nə ya kaa Kwa sləkəpə,
Ee harata ta kəətira,
mbaʼee ushanti ka mbəzee.
5 A məti niy dzəkukəvata ta ɓəra
njasa ka yam vaa vəɗəmə ta ɓə ndə.
A heree niy dzashi və təruŋ,
njasa ka her ndə vaa dzashi va ghərakuli.
6 A məti niy pəhantəra ta ɓəraa dzəti pi tsa nza mbəreketi,
Ndal niy təree ta ngəzlaa dzəti kəlaŋa nzuw.
7 Sa niy nzee mbə ngəraʼuy, ee niy harata Kwa sləkəpə ta kəətira.
Ee harata Hiyalee
Mbaʼ favə har tsee va mbə ciki tsa nzə,
Mbaʼ wahee tsəhəta kwa sləmə nzə.
8 Sa satiy nəfə tsa nzə ki na,
mbaʼ hiɗi gərəgərəshi, ka səəva mbəzli ti shi,
mbaʼ pi tsaa jihəti ghumə kufəghiy,
mbaʼ shi məɓa səəshi va nəfə tsa nzə va satiy.
9 War ə inəghu siy mbə kəshən tsa nzə,
Ka səvəri ghu təruŋ kwa miy nzə,
ngaɗə ngaɗə ngaɗə laɗi ta ghu va.
10 Dza na, mbaʼ vərəŋwata ghumə,
mbaʼ səkwata lə kuleɓi zhəmbəlmbəl ta shiɗəshiɗə nzə.
11 Mə Sherubəŋ niy nza na ɗalə,
War ə ghənzəə zli dziy mbə safə,
12 Mbaʼ parayvata lə kusli,
Zhəmbəlmbəl kuleɓi kən, lə yam mbə kuleɓi va.
13 Lə waŋ pi niy nza na kwa kuma nzə təruŋ,
war ə laɗi ghuu ngaɗəngaɗi səəkə mbə waŋ pi tsa va.
14 A Kwa sləkəpə dərazlikə kuma səəkə mə ghumə,
A məli Hiyala kərakə na gakata.
15 Dza na mbaʼ hashi hevivi, mbaʼ ndanivəri ka mbəzee,
wampiɗ manay pi, mbaʼ dzanti her shi.
16 Sa dərazlata Kwa sləkəpə kuma,
mbaʼ viykə safə siy mbə kəshən nzə lə nəfə lə nəfə ki na,
ray, hiɗi ta hur kufa tə ngula, ka pəəzli pi tsa fəva səɗa hiɗi ti.
17 Dza Kwa sləkəpə səəkə məɓa mə ghumə ki, vəli vəlikəra dəvə nzə.
Mbaʼ ɓəkəməra mbə yam təɗəm ni.
18 Aa mbəlantəra mbə dəvə ndə jaka tsee nza bərci və tərəŋu,
Ghənzə mbəlantəra na mbə dəvə mbəzli mbəzee li shi, təruŋɓa və shi bərci kaa ngəra.
19 Fəcaa niy takəra yay a ghəshi niy kafəshi ta pəsli tə ya,
dzəghwa Kwa sləkəpə mbaʼ mənta ka tsee ntsa jihətəvaree ti.
20 Dza na mbaʼ ɓəkəvəriɗa mbə kumaa niy nza kənee, ka gura ghən tseyee.
Aa mbəlantəra sa ɗi na kumee.
21 Sa nza na lə kwal tsa nzee nuw kuma, va tsəgha mənɗa Kwa sləkəpə tsəgha.
Sa nza na kala tsəhə ma dəvee dzəmbə kuma jikir na va tsəgha ngavəra na zhəmee.
22 Ee nuti kwal tsa Kwa sləkəpə,
zhəghanavə humee kaa Hiyala yaw.
23 Ya nama kuma nzə pəhəti na ta nuwiy, ee nuwti
Kuma gəzəkə na məni nziy, karee zlata məni nzuw.
24 Fəti vəya kwa kuma nzuw.
Ee ndəghuti ghən tsee va məni kuma jikir na.
25 Dza Kwa sləkəpə ki mbaʼ ngavəra zhəmee tə sa nuwtee kuma lə kwal tsa nzə,
mbaʼ sa nay na nəfə tsee ɗewɗew dəʼu ghən tsa nzə.
26 A Kwa sləkəpə, mbaʼ kə ndə kala zhəghəŋa humiy, kar ghaa zhəghanci hum kurakuw.
Ntsa kama fəti viy, kar ghaa ɓanci fətiw.
27 Ntsa nza nəfə tsa ci ɗewɗewiy, kuma ɗewɗew na ka ghaa mananci.
Ma ntsaa dzadzar mbə kumay, kar ghaa canati tsəhuli gha.
28 Mbəzli tə ngəraʼuy, kar ghaa mbəlantishi,
Ma na mbəzliy kəli ghən tsa shiy, kar ghaa nighə nashi kuma nja kumaw.
29 Gha na nee gərkuwa Kwa sləkəpə.
Gha ka naa mbərəkə waŋ piy dzəkənee yən kə mbə kusli.
30 Mbaʼ pən lə ghay, ə kee diva ta pəsli ta ka mbəzee ya njaa na ghəshi ɗaŋ tsa shiª.
Kama gha kwasəbə yay Hiyala yay, ta dzəghwaɗa dzee kən kələm tsaa dəzlay məlmə.
31 Kwal tsa kama kuma gəmgəm na kwa ya juw na kwal tsa Kwa sləkəpə.
A kuma Kwa sləkəpə cikəvəri kataŋ tsa məni na.
Ya wa ntsaa dzay dzəmbə hur tsa Kwa sləkəpiy, Gal tsa tsava ndə ka naa nza.
32 Aa nahuti Hiyala dzəghwakən Kwa sləkəpə kiyaa?
A ntsa nja kəlɓa tsa tə ghummə kala war Hiyala ghummə kiyaa?
33 Ghənzə na ndə bərci tsaa ndəghura.
Ghənzə gumatəra na kwal tsa wuzə tsa ta dzee kwa.
34 Ghənzə fambə na bali mbə shiɗshiɗee nja sa mbə shiɗəshiɗə kimə.
Ghənzə ndara na bərci ta garə mə pi tsa ɗal tsa.
35 Ghənzə ɓanavəra na mbəzə,
Ghənzə ndara na bərci ta hə shiy lə rəgi tsa shəndəkə tsa mənti məndi tə mbəzə ghəm na.
36 A Kwa sləkəpə, nja gal tsa kənee ka ghaa nza va tsəgha kee mbəlira.
Sa ka gha vaa zləɓa cəʼu yay, ka dza heree va kumaw.
37 Gha ka naa kəətitəra kee mbata bali təruŋ kala dali ma shiɗshiɗee.
38 Sa kee dza kiy, ka nuw ka mbəzee, mbaʼee dzaa bakwantishi.
Karee zhəghəva kala kərəp yən zantishiw.
39 War ə kee irəshi, ka tsətsəʼushi
Kar ghəshiy zhakatishi ghulaw.
Zananakə nakə nakə ka gha nashi ma dzar tə hiɗi ka dzee ti shi.
40 Kar ghaa ndara bərciy mbəzə.
Mbəzliy pəla miy tə yay, kar ghaa zhəghətishi ka ka tsəfəku kwa kumee.
41 A gha zəmanavəshi bali kaa ka mbəzee.
Kərəp yən zanti mbəzli mbəzee li shi.
42 Ka wahə ghəshi na, ndə tiɓa ta kətishiw.
Ka har Kwa sləkəpə ghəshi na, ka zləɓanshi kuma naw.
43 Ee həvərishi mbaʼee zhəghəvərishi nja kurbi.
Ka dza dza dzar ti shi nja nzaɓə tsa kwa kwal.
44 A mbəzli mbə hulfee niy Zhəghətəvashi tə ya,
mbaʼ gha mbəlantəra və shi.
Dza gha mbaʼ gha fiyra ka mazə tsaa sləkə nihuti hulfəhi mbəzli.
Mbəzli mbə hulfəhi niy sənashi meyey, vəya fa ghəshi kuma.
45 Mbəzliy kama mbə hulfə yay, ə ka ghəshiy səəkə lə kuma ghenikə na ta nza ghiy wəzə li shi.
War gəzəkə mee kumay, ə ka ghəshiy fəə dzəghwa.
46 A her shi dzashi, takul shigə ka ghəshiy səvəri tə pi tsaa niy mbəshi ghəshi.
47 Mbə piy na Kwa sləkəpə ya humɓa,
Usa pən kaa ngəta ghənzə saa mənita nja kəlɓee.
Ə kə mbəzli fə dikiy dzəti Hiyala. Ghənzə na kəlɓa garəɗee ti ta mbashi mbəzli.
48 Ghənzə ɓəra na bərci ta wa shiya tə mbəzli.
Ghənzə Fambə na hulfə mbəzli ghənghən ghənghən mbə dəvee ta sləkəshee
49 A Kwa sləkəpə, gha mbəlantəra na mbə dəvə ka mbəzee,
gha məntəra na ka miydalaa dzəkən mbəzliy pəla miy tə ya.
Gha mbəlantəra na mbə dəvə ka gulaŋ
50 Va tsəgha məniŋee usa dzar mbə hulfəhi mbəzli,
ka falŋa kwa cəm.
51 Mbaʼ kə Hiyala tivə mazə ta sləkə mbəzliy,
kar naa ɓanavə bərci ta mbashi mbəzli təruŋ.
Kar naa mananci wəzə hur kaa tsa nzə ntsa təravə na
mbaʼ shəkambə in dzəghwa mbə ghən ci.
Tsəgha mənti na kaa Davitə ghəshi lə mbəzliy dzaa səvəri kwa miy dəgha ci paʼa kwa ndimndim.