2 Samuwel 21

Kumaa dzəkən Ka Gabawuŋ lə mbəzli kwa miy dəgha Sawul

Ghala vəghu tsaa niy məni Davitə va maziy, a ma niy səkwata, piya mahəkanə niy mənti ma va. Dza Davitə mbaʼ tsəhiy va Kwa sləkəpə ta ɗuw nda sa wa na səkwata ma va. Ma kə kaa ngəci na: «Tə mbərkə sa nza kar Sawul lə mbəzli kwa miy dəgha ciy ka bəku mbəzli səkwata ma va, sa nza na mbaʼ Sawul niy bakwanti ka Gabawuŋ» kə.

2 Ka Gabawuŋ vay, hulfə ka Izərayel niy nza ghəshiw, mbəzliy niy tərmbə mbə ka Amur niy nza ghəshi, mbaʼ ka Izərayel niy gəzanakəshi: «Ka dza ghiy bəkuŋuyəw,» kə ghəshi niy ni kaa ngəshi, zəməʼ kaa fəla. Ya tsəgha nzə, sa niy nza pərəslə va Sawul ta hulfə ka Izərayel lə hulfə ka Zhuda ki na, mbaʼ niy pəla zanti ka Amun. Dzəghwa mazə Davitə ki, mbaʼ ɓasəti niy tərə ka Gabawuŋ ta gəzanshi kuma. 3 Ma kə kaa ngəshi na: «A kuma ɗi ghuy yən məntəŋuyaa? Njaa dzee kəsliti kərhi ta kuma məntəŋuy Sawul va, ta mbə ghuy təfanatishi miy kaa hulfə mbəzli Kwa sləkəpaa?» kə. 4 Ma kə ka Gabawuŋ kaa ngəci na: «Kuma kwa jipə tsa ghiy lə mbəzli kwa miy dəgha Sawuliy, ka dza naa gumata lə gəna, ya lə tsahi mbəzə kwa shamshamaw. Ka mbay ghiy paslanti ndə mbə ka Izərayeluw,» kə ghəshi. «Ya a kuma ɗuw ghuyiy, ta məntəŋuy dzee,» kə Davitə kaa ngəshi. 5 Ma kə ghəshi kaa ngəci ki na: «Ə niy ɗi Sawul kərkanti kuma kən ghiy, ka zantəŋiy kərəp tə hiɗi ka Izərayel gwanashi. 6 Njana nza na tsəgha ghəci niy tarəkə lə ghiyiy, kasavəŋəyim mbəzli mbərəfəŋ mbə mbəzli kwa miy dəgha ci a ghiy dzaa ɓərtantishi kwa kuma Kwa sləkəpə mbə məlmə Gibeya, məlmə niy nza Sawul ntsa təravə Kwa sləkəpə va mbə,» kə ghəshi. «Tsəgha na, ta kasavəŋuyshi dzee,» kə mazə kaa ngəshi.

7 Dza na mbərəkə zlay Mefibushet jijiy Sawul, sa nza naa zəghu Zhunataŋ, tə mbərkə sla kiri tsaa niy slati ghəshi va, mbaʼ ghəshi zəməkə fəlaa kwa kuma Kwa sləkəpə ghəshi lə Zhunataŋ zəghu Sawul. 8 Mbaʼ ghunashi mbəzli ta dza ghəshiy kasanakə kar Arəmuni lə Tsahuti Mefibuset, ndərazhiy niy yanakə Risəpa zha Aya va kaa Sawul, mbaʼ ndərazhi Mikal zha Sawul va cifə ni niy yanakə na kaa Adərəyel zəghu Barzilay ndə ka Mehula. 9 Dza na mbaʼ fambəshi mbə dəvə ka Gabawuŋ. Dza mbəzli va mbaʼ ghəshi dzaa ɓərtantishi mə hum pi, kwa kuma Kwa sləkəpə. Gurəm niy bakwantishi ghəshi gwanashi. Məndiy gha məni shi ka məndi vaa har Urzhə səəkə kwa məti niy bəkushi ghəshi, fəca kwa taŋa vici gha məndi məni shi va səəkə kwa məti.

10 Dzəghwa Risəpa zha Aya, kuratə sərəvə shiy niy pakən na ta təhuni mbəri, mbaʼ dzaa pəlatishi tə kəlɓa. Dza na mbaʼ nziyta tiɓa ka ndəghu mbəreketi mbəzli va. Sa ka eguer səəkə ta tsəŋu mbəreketi va havəhgu na, ka tihəshi ghənzə, ma hivir na ka ndəghushi va shi mbə gamba, ʼwava na fəca gha məndi va məni Urgə səəkə kwa məti paʼa fəca gha van nzəməə dzəkən shi. 11 Mbaʼ məndi dzaa gəzanci kuma məni Risəpa zha Aya va kaa Davitə. Mali vəgha bəla niy nza na va Sawul. 12 Dza Davitə ki mbaʼ dzaa zhinikə esler kar Sawul lə zəghu ci Zhunataŋ va mbəzli dikə dikə ni mbə məlmə Yabesh tə hiɗi ka Galad. Ghala vəghu tsaa niy mbay ka Filisteŋ va Sawul mə dəlagwa Gilbuwa, mbaʼ ghəshi pəəsliti ghəshi lə zəghu ci Zhunataŋiy, a ghəshi niy səsəriy mbəreketə shi vəgha kələm tsa məlmə Bet- sheyan, mbaʼ mbəzli mbə Yavesh niy səəkəə ɓəhushi lə ghəli, ta lashi. 13 Sa zhinikə na esler va ki na, mbaʼ məndi dzaa ɓasəvə esler mbəzli mbəfəŋ ni va ɓərtanti məndi, 14 laʼ məndi dzaa lantishi kwasəbə esler kar Sawul lə zəghu ci Zhunataŋ mbə məlmə Shela tə hiɗi Benzhameŋ, kwa kuli Kish diy Sawul. Njasa niy gəzəkə maziy, war tsəgha niy mənti məndi.

Sa mənti məndi tsəgha ki na, mbaʼ Kwa sləkəpə mananatishi wəzə hur kaa mbəzli tə hiɗi ka Izərayel.

Ka Izərayel mbəzə lə ka Filisteŋ

15 Dzəghwa, mbaʼ mbəzə zhiniy ghay kwa jipə ka Filisteŋ lə ka Izərayel. Dza kar Davitə ghəshi lə mbəzli ci, mbaʼ ghəshi səvərishi ta mbəzə lə ka Filisteŋ. Ghəshi mbə mbəzə tsa va na, kup Davitə dalantəvay. 16 Dza Ishəbi-be-Nuvə ntsaa səvəri kwa miy dəgha Harafa, mbaʼ pəhəti dza ta pəəsli Davitə. Ntsa vay, lə yəwun kafaʼi niy nza na mbə hur ci, mbaʼ gwapa və, tsahi tə miy gwapa vay, tə mbəzə ghəm na niy məntishi məndi, taŋ kiluw mahəkanə niy nza shəndəkə tsa shi. 17 Ma dza Avishay zəghu mali har məndi vaa Seruya ki na, mbaʼ yəpəti yipə ta Davitə, mbəh paslanti ndə ka Filisteŋ tsa va. Sa nata ka sawji Davitə kuma va tsəgha ki, ma kə ghəshi kaa ngəci na: «Ndatsə kəray ghaa səvəri kwasəbə ghiy ta mbəzə. Nja waŋ pi tsaa ciŋiy kwal nza gha mbə ghiy ghiy ka Izərayel, ka ɗi ghiy waŋ pi tsa vaa shirkuyəw,» kə ghəshi kaa ngəci, mbaʼ ghəshi zəmanakə fəla.

18 Liy hum diɓa ki na, mbaʼ mbəzə zhiniy məniy kwa jipə ka Izərayel lə ka Filisteŋ tə pi tsa har məndi vaa Guvə. Mbaʼ Shibekay ndə ka Husha paslanti tsahuti ntsaa səvəri kwa miy dəgha Harafa mbə mbəzə tsa va, Safə kə məndi kaa slən tsa ci. 19 Zhini tsahuti mbəzə diɓa mbaʼ zhiniy məniy kwa jipə ka Izərayel lə ka Filisteŋ tə pi tsa har məndi vaa Guvə diɓa. Dzəghwa Elanan zəghu Yaare-Uregum, ndə ka Betəlehem mbaʼ paslanti Guliyatə ndə ka Gad, Guliyatə tsaa niy nza bəvə tsa gəta gwapa ci va yim yim lə bəvə tsa gəta ka məndiy tsa məgapa li. 20 Zhəghwa diɓa, mbaʼ tsahuti mbəzə zhiniy məniy kwa jipə ka Izərayel lə ka Filisteŋ mbə məlmə Gatə. Mbaʼ tsahuti ntsaa guranti tə mbəzə niy nza mbə ka Filisteŋ. Ntsa vay kwaŋ kwaŋ niy nza ndərazhi divədivi ti, tsəgha ndərazhi shiɗəshiɗi, bakəmətsə faɗəti niy nza shi va ti gwanashi tsa shi. Ntsaa səvəri kwa miy dəgha Harafa niy nza na kuraku. 21 Dza na ka tsəərə ka Izərayel, dzəghwa Zhunataŋ zəghu Shimeya zəmbəghiy Davitə, mbaʼ paslanti.

22 Ka sawji ka Filisteŋ pəəsliti məndi va faɗanashiy, kwa miy dəgha Harafa ndə ka Gatə niy səvəri ghəshi. Kar Davitə lə ka Sawji ci niy bakwantishi na.