Sheva zhəghiy ka ndə mbəzə tsa Davitə.
20
A tsahuti ndə niy nza tiɓa mbə məlmə Gilgal, Sheva kə məndi kaa slən tsa ci, zəghu Bikiri mbə takə tsa Benzhameŋ niy nza na, ndə gəmgəm ghəci. Dza na tsəgha ki mbaʼ viyata təlimə ka zlapə. Ma kə na:«Dzar mbə kuma Davitə nza ghummuw.
Shiy tiɓaa jikətəmmə lə zəghu Jese vaw,
Slən ndə ka Izərayeliy, ə kə dzay jighi» kə.
2 Sa favə ka Izərayel tsəgha ki na, mbaʼ ghəshi zlay nuw Davitə gwanashi, ka dzashi kwasəbə Sheva zəghu Bikiri. Ma na ka Zhəwda na shi ki na, mbaʼ ghəshi nziyshi kwasəbə mazə tsa shi. Pəhə ghəshi pəhay kafə na kwa həl Zhurdeŋ paʼa mbə məlmə Zheruzalem.
3 Sa tsəhiy Davitə kiy ghyi tsa ci mbə məlmə Zheruzalem ki na, mbaʼ harashi miʼi ci va tar bəla məŋ ni niy zlashi na ta ndəghu ghi. Dza na mbaʼ fiyshi kiy ghyi ka ndəghu məndi wəzə. Dza na ka nighəə dzəkən shi. Ə na na nza nay, niy həni na li shi ghulaw. Paʼa va məti shiy, war kəəli kəəli niy nza ghəshi. Ya tsəgha niy nza zashi tə ghumiy na, nja miʼi mbəreketi niy nza ghəshi.
Zhəwabə pəsliti Amasa
4 Ma kə mazə Davitə kaa Amasa ki na: « Vici mahəkanə ndaŋee a gha dza ta ɓasəkəra ka sawji ka Zhəwda, nza gha səəkə tikə li shi,» kə. 5 Dza Amasa ki ka dzay ta ɓasə ka sawji ka Zhəwda. Səəkə na na, vici sləniy mazə va taŋəta. 6 Ma kə mazə kaa Avishay na: «Yən nighə sanay, təruŋuɓa Sheva zəghu Bikiri dza na ta mənimmə kuma jikir na kən Abəsaluŋ. Mbalam ghuy lə ka sawjiy ndəghura a gha nuw, nəghətaa ghəci mbəliy ɓəhu məlməhi nza dzəmbəshi ʼyahəʼyahə, kala dza ghum mbay ghula,» kə.
7 Dza Avishay ki, mbaʼ kafiy lə ka sawji sləkə Zhəwabə, mbaʼ ka Kəretə lə ka Peletəə ndəghu mazə va, mbaʼ ka sawjiy kurahəhu kuma mbəzə gwanashi. Mbaʼ ghəshi səvərishi mbə məlmə Zheruzalem ka nuw Sheva zəghu Bikiri. 8 Sa tsəhəshi ghəshi vəgha haku tsa dikə tsa va mbə məlmə Gabawuŋ na, mbaʼ Amasa səəkəə kəsashi. Lə kubeŋer mbəzə ci niy nza Zhəwabə kən ghən ci, mbaʼ kanda dzar mbə hur ci, lə hwa ci mbə kuɓəkə tə kanda va. Zhəwabə mbə kətivaa dzəvəha na, ɓəlaʼ hwa va tərəta. 9 Ma kə Zhəwabə kaa Amasa na: «Njaa nza ghaa zəmə?» kə. Dza na lə dəvə kwa bəzəmə ci mbaʼ kəsəvə guzhem Amasa ta hutəmə. 10 Niy fəti ghən na ta hwa va njasa ɓə Zhəwabə lə dəvə kwa zleɓi ci kiw. Dza Zhəwabə gəp ʼyanti mbə hur ci, nguy her Amasa tə hiɗi, ɓəlahə mətiy, kala ʼyanavə kwa baka Zhəwabə.
Məndi paslanti Sheva
Liy hum ki na, tap kar Zhəwabə ghəshi lə Avishay zəmbəghiy ta nuw Sheva zəghu Bikiri. 11 Dzəghwa tsahuti kutiŋ mbə ka sawji Zhəwabə mbaʼ nziyiy tiɓa vəgha mbəri tsa Amasa. Ma kəə ni sa ka mbəzliy səəkəshi na: «Ya wa ntsa dza kwa bəla Zhəwabə, lə ntsaa ni, kwasəbə Davitə nzee kiy, ə kəə nuw Zhəwabə,» kəə ni. 12 Ya tsəgha nzə, səəkə ma ndəə nay Amasa japə mbə miymiy ci tə jipə kwal ki na, garə ghəciy gariy. Ma sa nighəti ndə sawji tsa va tsəgha na, dza na mbahə mbahanti mbəri tsa va kwa kwal dzəmbə gamba, mbaʼ ndəghakən kubaŋ tsa dikə tsa kən. 13 Ma sa mbahanti na ki na, kala garə ma mbəzli ghula, war ə ghəshiy nuw Zhəwabə ta dza ta nuw Sheva zəghu Bikiri. 14 Dzəghwa kar Zhəwabə ka dzar tə hiɗi takəhi ka Izərayel gwanashi, paʼa njasaa dzəmbə məlmə Abel-Bet-Maka. Mbaʼ ka Beritə gwanashi ɓasəshi ka nuw Zhəwabə kuraku. 15 Dza kar Zhəwabə lə mbəzli kwasəbə va ki, mbaʼ ghəshi tsəhəshi vəgha məlmə Avel- Bet- Maka, mbaʼ ghəshi dəzlay sa nza Sheva mbəɓa. Dza ghəshi ɓasə ɓasə ghəshi ɓasəti hiɗi dzar ta kwa taŋa kələm tsaa dəzlay məlmə va paʼa ta ghən ci. Dza mbəzli kwasəbə Zhəwabə gwanashi ki, ka gha ngazla kələm tsa va.
16 Dzəghwa nahuti maliy tsəhulita ka zlapanshi kuma səəkə mbə məlmə va. Ma kə na: «Way pə ghuy mbəzli ni, way pə ghuy mbəzli ni, mbalam harayɗam Zhəwabə a ghəci səəkə tikə, ee ɗi gəzanci kuma,» kə. 17 Sa dza məndiy gəzanci kaa Zhəwabə ki na, mbaʼ kətəghəvay dzəvəgha mali va. Ma kə kaa ngəci na: «Gha na Zhəwabə tsa va na?» kə. «Yən na,» kə Zhəwabə. «Əə cəʼuŋee a gha favə kuma ɗee na gəzəŋa,» kə kaa ngəci. «Tsəgha na, gəzə, mbə faŋa nzee» kə Zhəwabə.
18 Ma kə mali va ki na: «Kar məndiy gəzə ndimndim: “Mbalam ɗuwtim kuma zəzəti mbəzli mbə məlmə Abel-Bet-maka, ta ɓəkə zəzə kuma dza ghəshi gar gumati kuma na” kə məndiy ni. 19 Mbəzli kama kuma gəmgəm na və shi, sayə nziy tsa shi nza ghiy mbə mbəzli ka Izərayel. Mbə məlməhiy guranti dikə dikə tə hiɗi ka Izərayel na məlmə ghiy na. Sa dza gha na gha kiy, ka ɗi zanti mbəzli mbəɓa. Sa Kwa sləkəpə na məlmə va, tawa ɗi gha zanti kiyaa?» kə. 20 Ma kə Zhəwabə na: «Tiɓa tepuw, zəzəhuee ya bəku mbəzli mbə məlmə va, ya za nzuw. 21 Nava kuma na sa ɗi yaw. Tsahuti ndə na sava səəkiy na dzar mbə kəleŋer tə hiɗi ka Efrayim, Sheva, kə məndi kaa slən tsa ci, zəghu Bikiri ghəci, mbaʼ məniy ka ndə mbəzə tsa mazə Davitə. Ghəci na sa ɗee ghuy kəsavəra kutiy, ee gəzanshi kaa mbəzli a ghəshi ɓarvashi vəgha məlmə ghuy,» kə. Ma kə mali va kaa Zhəwabə ki na: «Kadiw a məndi dzaa slanti ghən ti, nza məndi ndəghavəŋa ghən tsa ci dzəghwa tə kələm» kə. 22 Dza na mbaʼ dzaa kəsashi mbəzli mbə məlmə nzə gwanashi, mbaʼ gəzanshi zəzə kuma nzə va wəzə na. Mbaʼ ghəshi zləɓavə kuma nzə va, mbaʼ ghəshi dzaa kəsəvə Sheva zəghu Bikiri, piyəŋ ghəshi slanti ghən ti, mbaʼ ghəshi ndəghanavə ghən tsa ci kaa Zhəwabə. Dza na ki mbaʼ viyata təliməə garə mbəzə. Sa favə mbəzli na, mbaʼ ghəshi ɓarvashi vəgha məlmə ka dzashiy jighi. Ma Zhəwabə kuraku ki na, ka dzay dzəmbə məlmə Zheruzaləm dzəvəgha mazə.
Sləneɗemer mbəzliy ghəranci sləni kaa Davitə
23 Ghala vəghu tsaa niy məni Davitə va maziy, Zhəwabə niy sləkə na ka sawji ka Izərayel gwanashi. Ma Benayahu zəghu Yehuyada na, ka sləkə ka Kəretə lə ka Peletəə niy ndəghu mazə va. 24 Ahudam niy nza ntsaa nighəə dzəkən sləni ka məndiy ghəra lə bərci. Yehushafat zəghu Ahilud na, ndə kwal tsa mazə. 25 Mbaʼ Sheva ka ndə tsasli shiy. Ma kar Tsaduk lə Abiyatar na, ka ta Hiyala ni va. 26 A tsahuti ndə ta Hiyala niy nza va Davitə ɗiɓa, Ira kə məndi kaa slən tsa ci. Mbə takə tsa Yayir niy nza na.