Davitəə wahə zəghu ci
19
Sa favə mazə tsəgha ki na, yeŋiɗ her ci dzashi. Dza na mbaʼ dzay dzəmə ciki tsa ngati məndi tə ghən miy dəghaa dzəmbə məlmə va, dza na ka wahə. Ma kə mbə wahə na: «Aya zəghuee Abəsaluŋ, aya zəghue Abəsaluŋ, aya zəghue Abəsaluŋ, wəzəɓa yən niy mətira na mbaʼŋa gha ki zəghue. Ayiya Abəsaluŋ, Ayiya zəghue na,» kə.2 Dzəghwa mbaʼ məndi dzaa gəzanci kaa Zhəwabə: «Ava mazə mbə wahə, ka təhuni mbəri tsa zəghu ci,» kə məndi kaa ngəci. 3 Fəcava ki na, mbaʼ ha waza mbərəta ka təhuni mbəri va ka sawji gwanashi, sa nza na mbaʼ ghəshi niy favə fəcava: «A məti zəghu ci vaa zhanci tərəŋu kaa mazə,» kə məndi. 4 Fəcavay, ghəli ghəli niy ghəliva ka sawjiy dzəmbə məlmə, njasa ka ka sawji vaa ghəlivaa dzəmbə məlmə va haʼu sa ka məndiy mbashi mbə mbəzə. 5 Na na mazə na ci kiy, aa niy pəlambə shiy mbə kuma ci njasa ka məndi vaa təhuni mbəri, war ə ghəciy wahə zlaŋ zlaŋ: «Aya zəghue Abəsaluŋ, aya Abəsaluŋ, a zəghue, a zəghue,» ghəci.
6 Dzəghwa Zhəwabə ki, mbaʼ səəkəə kəsay mazə. Ma kə kaa ngəci na: «Gəla shi məni gha ni sanay maziy, haʼu na sava pa ghaa dzəkən ka sawji gha ni mbəlantəŋa piy tsa gha, ghuy lə ndərazhi gha, mbaʼ miʼi gha gwanashi. 7 Ɗi naa gəziy, mbəzliy ɗi ma kuma gha na ni ɗi gha, ma mbəzliy ɗi kuma gha na, kala ɗi ni va gha. A gha cikəvəri ndatsə, ya mbəzliy sləkə ka sawji gha, ya ka sawji ghay, nashi gha ka mbəzliw, pə gha. Ndatsiy, ee favə, ghiy kə niy bəkuŋiy gwanaŋiy, mbaʼ Abəsaluŋ tə ghumiy nzay, wəzə niy dza ghaa favə vəgha gha nza. 8 Mbaʼ pə ghaa ɗi kumay, ə pə ghaa sati a gha dza ta gəzanshi kumaa mətsahanshi bərci kaa ka sawji gha. Kala tsəghay, ee zəməkəŋa fəla lə slən tsa Kwa sləkəpə ndə kə dzaa tərə ya kutiŋ kwasəbə gha ka pi wali. Ghalaɓa dza tsa kataŋ tsa ngəraʼu ta dzəkən gha, ka taŋəti ngəraʼuhiy sahu gha ghala məni gha məgəla tsa gha, paʼ ndatsə,» kə. 9 Sa gəzanakə Zhəwabə tsəgha kaa mazə ki na, dza na mbaʼ dzaa nziyiy vəgha miy dəghaa dzəmbə məlmə. Mbaʼ məndi gəzanshi kaa ka sawji, mbaʼ ghəshi ɓasəkəvashi gwanashi dzəghwa kuma ci.
Davitə mbə pəhəva ta zhəghəvaa dzəmbə məlmə Zheruzalem
Dza ka sawji Abəsaluŋ ki, mbaʼ ghəshi huhushi, ya wa ndə na, mbaʼ dzay dzakə ghyi tsa ci 10 Liy hum shi va ki na, war ə mbəzli mbə takəhi ka Izərayel gwanashiy gəgəzə kuma gwanashi. Ma kə ghəshi na: «Mazə Davitə niy mbəlantəmmə na mbə dəvə ka mbəzə ghummə, ghəci niy mbəlantəmmə na ya mbə dəvə ka Filisteŋ. Sanay, mbaʼ huy tə hiɗi ci va Abəsaluŋ. 11 Avanay a Abəsaluŋ tsaa niy pəərəti ghummə tsa ka mazə tsa ghummə mətiy mbə mbəzə. A shi ndəghə ghummə ta zhanambə mazə Davitəə zhimbə mazə tsa cia?» kə ghəshi. 12 Dza mazə Davitə kuraku ki, mbaʼ ghunashi mbəzli ta gəzanshi kaa kar Saduk lə Abiyatar ka ta Hiyala, ta dza ghəshiy gəzə kaa mbəzli dikə dikə ni mbə ka zhuda. Ma kə ghəshi dzaa ni na: «A mazə favə kuma gəzə nihuti ka Izərayel gwanashi ni, pərɓa ghuy kə dzaa pəməkə mazə dzakə ghyi tsa ci. 13 A ghuy sənay ngwardiy mazə nza ghuy, manhiy ndəku ndəku, wəzəɓa dza ghuy pəməkə mazə pərɓa ghuy na,» kə ghəshi dzaa ni. 14 Mbaʼ zhiniy ghunashi va Amasa. Ma kə ghəshi dzaa ni kaa ngəci na: «A kə maziy: “A gha sənay manɗa nza gha. Nza Hiyala ɓasakənɗa nguvə təruŋ na yən kala dzaa ndaŋa sləkə ka sawjee ta kwa ndimndim kwa pi tsa Zhəwabə,” kə,» kə ghəshi dzaa ni. 15 Dzəghwa Davitə lə kuma gəzəkə na va tsəgha na ki, mbaʼ zhəghəhu nəfə tsa ka Zhuda gwanashi dza kwa bəla ci. Mbaʼ ghəshi ghunəghə miy ta gəzanci kaa mazə Davitə a ghəci zhikiy lə ka sləni ci gwanashi. 16 Sa gəzəkə ghəshi tsəgha ki na, mbaʼ mazə dzay dzəti kwal ta zhighəva, mbaʼ tsəhiy miy hel Zhurdeŋ.
Davitə zlay Shimey, kala mananci ma kuma
Ghalaɓa kiy, a ka Zhuda niy səəkəshiy dzəti pi tsa har məndi vaa Gilgal, ta dza ta kumə lə mazə, ta kəəti lə taŋə həl Zhurdeŋ. 17 Dzəghwa Shimey ndə ka Bahurim, zəghu Gera, mbə takə tsa Beŋzhameŋ, mbaʼ dikəvay dzay dzəmbəshi ta dza ta kumə lə mazə. 18 Lə mbəzli mbə takə tsa Benzhameŋ bələku bələku məŋ niy nza na tə səəbə ci, mbaʼ Shiva ntsaa ghəra sləni kaa mbəzli kiy ghyi tsa Sawul lə ndərazhiy zhər ci va məŋ lə cifə ni, mbaʼ ka sləni ci va bakəmətsəkə ni. Ta dzaa dzəghwa həl Zhurdeŋ ta kumə lə mazə niy dikəvashi ghəshi. 19 Dzəghwa ki, mbaʼ məndi ɓəkə kwambəwal ta taŋə həl kaa kar mazə lə mbəzli kiy ghyi tsa ci, njasa dza naa ɗi.
Sa taŋəti mazə həl Zhurdeŋ ki na, dzəghwa Shimey zəghu Gera giripə ndəghatəvay dzəti hiɗi kwa kuma ci. 20 Ma kə kaa ngəci na: «A mazə, ka nighə kuma məntee va jikir na gha ma. Zanti ghən ta kuma jikir na va niy məntee yən ndə sləni tsa gha, ghala vəghu tsaa niy səvəri gha va gha mazə ndə sləkəra mbə məlmə Zheruzalem. Ka kəsəra gha mbə nəfə ma. 21 Ee sənay, ee mənti kuma jikir na, yən ndə sləni tsa gha. Va tsəgha səəkəree ndatsə pərɓa yən kaa nihuti ka Izərayel mbə takə tsa Zhuzefə, ta kaʼwəŋa mazə ndə sləkəra,» kə. 22 Ma kə Avishay zəghu mali har məndi vaa Seruya kaa mazə na: «Na dza məndiy zlay Shimey kala pəəsli ma na? Gar pəəsli na, sa tsəərəti na va ntsa təravə Kwa sləkəpə mbaʼ shəkambə in dzəghwa mbə ghən ci,» kə. 23 Ma kə Davitə kaa kar Avishay lə Zhəwabə zəmbəghiy na: «A kuma ghuy mbə kumee ghuy ndərazhi Seruya ni tay? Tawa məni ghuy kuma ndatsə nja ka mbəzə yaa? Tawa ɗi ghuy dzəghwa kən kuma zəzəti yaa? Vici kwa pəəsli ndə ti tə hiɗi ka Izərayel na sa ndatsə naw. Ndatsiy, ee sənay lə kataŋ yən məni na mazə dzəkən ka Izərayel pən,» kə. 24 Ma kə mazə kaa Shimey ki na: «Avee zəməkəŋa Fəla, ka pəəsliŋa məndiw,» kə.
Kar Davitə lə Mefibushetə sləkashi
25 A Mefibushet jijiy Sawul niy səəkiy ta kaʼwə mazə kuraku. Ghala kafə mazə ta dzay mbə Zheruzalem paʼa fəca vici səəkə na va ti lə kuriŋiy, niy slənəhu guzem ci Mefibushetəw. Niy yaɓəhu na ya shiɗəshiɗə ci, ya kubeŋer ciw. 26 Sa tsəhiy na kwa kuma mazə ki, ma kə mazə kaa ngəci na: «Sa wa na niy dza ma gha kwasəbee shəkaa Mefibushetə?» kə. 27 Ma kə kaa mazə na: «A mazə ndə sləkəra, ndə sləni tsee dakətəra na. Ee niy zəzəti yən ndə sləni tsa gha: “Njana nzee vidiriy, ee dzaa fati ləferəw dzəti hum kwantəmcee nzee nuw mazə mə,” pən niy ni. 28 Sa dza ndə sləni tsee kiy, mbaʼ dzaa sləsliyŋa dzərvəə dzəkənee. A na na gha, gha mazə ndə sləkəray, nja ndə kwal tsa Hiyala nza gha. Naa təɓətəŋa kuma pə ghaa məni. 29 Ta na navay mazə ndə sləkəray, mbəzli gar bəku niy nza mbəzliy səvəri kwa miy dəgha jijira gwanashi va gha. Ya tsəgha nzə kiy, dza gha mbaʼ gha zləɓavəra yən ndə sləni tsa gha ta nza mbə mbəzliy zəmə shiy lə gha. Əə nza shiy tiɓa lə kwal tsaa ɗuwshi viya diɓa na. A shi dzee vaa zhiniy ɗuw va gha kiya mazə?» kə. 30 Ma kə mazə kaa ngəci na : «Tawa zhini ghaa gəgəzə kumaa? Avee gəzəkə ghuy lə Shiba dza naa təhə vəher Sawul pən ɓasa,» kə 31 Ma kə Mefibusetə kaa mazə na: «Ya əə ɓəshi Shiba gwanashiy, kuma tiɓaa shashara njana səəkiy mazə ndə sləkəra kuriŋuw,» kə.
Davitə mananati wəzə kaa Barzilay
32 A Barzilay ndə ka Galad niy səəkiy mbə məlmə Rugwelim kuraku, mbaʼ taŋəhu həl Zhurdeŋ kwasəbə mazə, ta səvəri ta gəzanci nza gha nza kaa mazə pərikə pərikə. 33 Barzilay tsa vay, pəhal zal niy nza na, dəghəsəmətsəkə niy nza piya ci. Ndə lə shiy və niy nza na. Ghala pi tsaa niy nza mazə va mbə məlmə Mahanayimiy, ghəci niy səva naa dzəkən mazə, ya nima shiy niy ghəzliy na ti shi. 34 Ma kə mazə kaa ngəci ki na: «Barzilay, dzammə dzəmbə məlmə Zheruzalem, yən dza naa nighəə dzəkən gha,» kə. 35 Ma kə ntsa va na: «Ya gar dzee kwasəbə ghaa dzəmbə məlmə Zheruzalem kiy maziy, gwaʼa halantəvaree, tərə piyee ɗaŋ tə ghumuw. 36 Dəghəsəmətsəkə na piyee sana, ka mbay təra ghalee dzəghwa ni gəmgəm ni shiy lə ni wəzə ni ghulaw. Ya shiy zəmə yay, war ə kee zəməshi tsəgha, sənayee nda wəzə ghəshi, nda gəmgəm ghəshiw, ya shiy sa yay, war tsəgha diɓa. Ya zhər ha na cəm, ya miʼi ha nay, ka təraghwa ghalee kwa məli shi ghulaw. Tawa dzee zhiniy fambəŋa mbə səəvaa dzəkənee yən ndə sləni tsa gha kiyaa mazə ndə sləkəra? 37 War səəkə mee pəhaŋa mbə taŋə həl Zhurdeŋ na kumaa niy ɗee gwaʼa tsəgha. Kuma nzee yən ndə sləni tsa gha gar mənɗa gəla tsava wəzə gha kiyaa mazə? 38 Zlara yən ndə sləni tsa gha ee zhəghəvaa zhimbə məlmee, ee dza ta məti mbəɓa, vəgha kuli kar dirə lə mərə. Avanay zəghuee Kimham, ghəci dza naa dza kwasəbə gha mazə ndə sləkəra. Nza gha mananci kumaa dzaa təɓaŋa,» kə. 39 «Tsəgha na, dzaŋiy ghiy lə Kimham tsa va, kuma ɗi gha dzee ta mananci. Ya a shi dza ghaa ɗi yən məntəŋay, ta məntəŋashi dzee,» kə mazə.
40 Sa taŋanti kar mazə lə mbəzli gwanashi həl Zhurdeŋ ki na, dza mazə mbaʼ hutəməvə Barzilay, mbaʼ təfanati miy. Dza ntsa va ki, mbaʼ zhəghətəvay jighi. 41 Dza mazə ka dzay dzəmbə məlmə Gilgal. Kwasəbə niy nza Kimham.
Mbəzli mbə takə tsa Zhuda həərəshi lə ni gwanashi ni ka Izərayel
Mbəzli ka Zhuwda gwanashi mbaʼ reta ka Izərayel niy nza na mbə pəhə mazə ghala vəghu tsaa taŋə na həl Zhurdeŋ. 42 Liy hum ki na, dza ka Izərayel gwanashi mbaʼ ghəshi kətəghəvashiy dzəvəgha mazə. Ma kə ghəshi kaa ngəci na: «Ya sa nza na tiɓa ka sawji gha kwasəbə gha kiy maziy, Tawa kahu ngwardəhimmə ka Zhuda pəhəŋuy lə mbəzli kiy ghyi tsa gha mbə taŋə həl Zhurdeŋaa?» kə ghəshi. 43 Ma kə mbəzli mbə takə tsa Zhuda gwanashi kaa ka Izərayel na: «Sa nza na ndəkuɓa mani ghiy li mənti ghiy tsəgha. Kuma gar sati nəfə tsa ghuy və na sava na? Əə ngavəŋiy mazə shi zəmə shəkənaa, naa əə tahavəŋiy na shiy na?» kə ghəshi. 44 Ma kə Ka Izərayel kaa ka Zhuda na: «Ya əə ɓəlam takəhi kwasəbə mazə sanay, takə kutiŋiy nza ghuy, ghiy na na ghiy kiy, takə məŋ nza ghiy kwasəbə, ya tsəgha na Davitəə manŋuy ndəku ndəku. Tawa ɓətəŋiy ghuy njasa kama ghiy mbəzli mazə kiyaa? A ghuy sənay pərɓa ghiy niy gəzəkə na dza ta zhini mazə tsa ghumməə zhikə kən ghuy,» kə ghəshi. Ya tsəgha nzə kiy, war ghyanakəɓa kumaa səkwa mbə miy mbəzli mbə takə tsa Zhuda niy nza na kən na gəzə ka Izərayel.