Mbəzli Davitə mbashi mbəzli Abəsaluŋ
18
Dzəghwa Davitə ki, mbaʼ ɓəlati mbəzliy niy nza kwasəbə, mbaʼ təravə mbəzli mbə shi ta sləkə mbəzli bələku, mbaʼ nihuti ta sləkə mbəzli bələku məŋ. 2 Dza na təhə təhəvəri mbəzli va mahəkanə mbə, ta dza ghəshi ta mbəzə. Kwa taŋa mbəzli na, mbaʼ fambəshi mbə dəvə Zhəwabə, kwa baka na, mbə dəvə Avishay zəmbəghiy Zhəwabə zəghu Seruya, kwa mahəkana na mbə dəvə Itay ndə ka Gatə. «Ya yən dəʼu ghən tseyiy, ta dza dzee ta mbəzə kwasəbə ghuy,» kə mazə. 3 Ma kə mbəzli kaa ngəci na: «Tiɓaw, ka dza ghaa dzavə dza kwasəbə ghiyuw. Ta na na ghiy ya ə dza ghiy hu sa dza məndiy mbaŋəyiy, ka dza mbəzli mbəzə ghiy li shiy nata nja kumaw. Ya əə bəkuvə ghəshi reta mbəzli mbə ghiyiy, ka dza ghəshiy nata nja kumaw. A na na gha mbaʼ kə ghəshi pəəslitəŋay, njasa bəkuvə ghəshi ka sawji bələku bələku bələku mbə ghiy dza ghəshiy favə. Va tsəgha nə ghiy, wəzəɓa nziyŋa gha mbə məlmə, nza gha kəətiŋiy gha mbəɓa, pə ghiy,» kə ghəshi. 4 Ma kə mazə kaa ngəshi na: «Tsəgha na, kumaa təɓaŋuy dzee məni,» kə.Dza mazə ki, mbaʼ dzaa nziyiy vəgha miy dəghaa dzəmbə məlmə, ka səvəri mbəzli gwanashi ta mbəzə. Bələku bələku kwa zəərə shi, zhini bələku məŋ bələku məŋ kwa zəərə shi. 5 Ma kə mazə kaa kar Zhəwabə ghəshi lə Avishay, mbaʼ Itay na: «Titihum, əntaa ghuy məni kuma kaa zəghuee Abəsaluŋ ma,» kə. Mbaʼ ka sawji gwanashi favə njasa gəzə mazə kuma vaa dzəkən Abəsaluŋ kaa mbəzliy sləkəshi gwanashi.
6 Dza ka sawji Davitə ka dzashi ta mbəzə lə ka sawji Abəsaluŋ ki, mbaʼ ghəshi kuməshi ta mbəzə mbə gamba Efrayim. 7 Dzəghwa mbaʼ ka sawji Davitə mbashi mbəzli Abəsaluŋ. Təruŋ niy irətishi ghəshi fəcava. Bələku bələku bələku bakə mətsəkə niy bəkuvə ghəshi mbəzli. 8 A ka sawji niy ndanambəvashi dzar mbə gamba tə hiɗi va gwanata mbə mbəzə tsa va. Fəcavay ɗaŋəɓa mbəzliy bəbəkushi kutishi dzar mbə gamba zhəghu na niy nza na kaa ni bakwanti məndi mbə mbəzə.
Zhəwabə pəsliti Abəsaluŋ
9 War məndi mbə mbəzə tsa va tsəgha ki na, vətəgh Abəsaluŋ kumiy lə ka sawji Davitə. Mə kwantəmca nja gəduw na niy nza na. Dza kwantəmca va ka dzar ta fə dikə na, nza divədivi nzə haha təruŋ. Ghənzə mbə dzar taɓa ki na, mbaʼ didivi fə va tsakəɗəhu shiti mbə ghən Abəsaluŋ, war ə alfadari ci vaa dzata, ma ghəci na ci ki na, zheŋə ghəci ta ghumə. 10 Dzəghwa mbaʼ tsahuti ndə sawji nay, mbaʼ dzaa gəzanci kaa Zhəwabə. Ma kə na: «Ee nay Abəsaluŋ zaŋə mə fə,» kə. 11 Ma kə Zhəwabə kaa ngəci na: «A shiy pə ghaa? əə nay ghaa? Tawa pəsliti ma gha tiɓataa? Mbala a gha pəsliti nzay, ta ndaŋa gəna kwa tsahi məŋ mbaʼ kanda niy dzee nza,» kə. 12 Ma kə ndə sawji tsa va kaa Zhəwabə na ci ki na: «Ya gəna kwa tsahi bələku bələku məŋ ɓəlatəra gha tə dəvee sanay, ka dapə dəvee dzəti zəghu mazuw. Sa nza nay, A ghiy favə dəʼu ghən tsa ghiy gwanaŋiy mazə gəzə kaa ngəŋa lə kaa Avishay mbaʼ Itay: “Nəghətaa ghuy pəlatanavə kwal kaa ndə ta mananci kuma gəmgəm na kaa Abəsaluŋ məgəla tsa va ma” kə. 13 Talay, mbaʼ pən niy mənti njasa niy favə mee kuma gəzəkə mazə va, mbaʼee pəslitiy, ta sənata dzərvee va dza na. Sa nza nay, cəkeʼ sənashi na shiy. Ya ghay, niy dza ghaa yəpə tə yaw,» kə. 14 Ma kə Zhəwabə na: «Tawa kəslimbee ghən lə gha bay tay?» kə. Dza na mbaʼ ɓəvə getesli kiɗəku kiɗəku ni mahəkanə, mbaʼ dzaa ʼyaʼyambəshi mbə nəfə tsa Abəsaluŋ ghəci zaŋə tə divədivi fə, ghulay mbə piy. 15 Dza ka sawjiy ɓə shi mbəzə Zhəwabə məŋ dəzlətsəɓə ghəshi dəzlay Abəsaluŋ mbaʼ ghəshi kərnanti. 16 Dzəghwa Zhəwabə ki, mbaʼ viyata təliməə garə mbəzə. Sa favə məndi na, mbaʼ ka sawji Davitə zlay nuw ka sawji Abəsaluŋ. Sa nza na mbaʼ Zhəwabə makətishi. 17 Laŋ məndi ɓəvə mbəri tsa Abəsaluŋ, mbaʼ məndi ndəghaghwa kwa kəʼu tsa təɗəm tsa mbə gamba zhəghu na va. Ndəɗim məndi ɓasakən hərezli kən. Ghala vəghu tsa vay, Cəkeʼ niy huhushi ka sawji Abəsaluŋ. Ya wa ndə na, mbaʼ dzay dzakə ghyi tsa ci.
18 Ghala vəghu tsaa niy nza Abəsaluŋ ghulay tə ghumiy, aa niy iy haku dziy kwa teʼu pi tsa har məndi vaa teʼu pi tsa mazə, ta zəzə məndi ti. Niy təkəti nay: «Nza məndi zəzə slən tsee tə haku tsa va, njana kama zəghu viya ta zəzə slən tsee məndi ti» niy nə na. Dza na ki mbaʼ fanati slən tsa ci kaa haku tsa va. Paʼ ndatsiy, «Haku tsaa fə shəndəkəə dzəti slən tsa Abəsaluŋ» ka məndiy har.
Məndi ɓanakə bar tsa məti Abəsaluŋ kaa Davitə
19 Liy hum ki, ma kə Ahimas zəghu Saduk kaa Zhəwabə na: «Ndara kwal ee dza ta gəzanci nuwer tsa wəzə tsa tsa kaa Mazə lə bali. Sa nza nay, a Kwa sləkəpə slanati nguvə lə kwal tsa nzə, mbaʼ mbəlanti mbə dəvə ka mbəzə ci,» kə. 20 Ma kə Zhəwabə kaa ngəci na: «Ka dza gha ma, ndə vəli nuwur tsa wəzə tsa dza ghaa nza mbə na ndatsə na kumaw. Fəcahuti ka gha dza ta vəli nuwur tsa wəzə tsa, a na ndatsiy ka dza nuwur tsa ghaa nza ka sa wəzə tsaw, sa nza nay, zəghu mazə na saa mətiy,» kə. 21 Ma kə Zhəwabə kaa ndə ka Etiyupiy tiɓa ki na: «Mbala a gha dzaa gəzanci kuma nata gha kaa mazə,» kə kaa ngəci. Dza ntsa va tsəfəku tsəfəkuy kwa kuma Zhəwabə, mbaʼ satiy ka dzay lə bali ta vəli nuwur tsa va. 22 Ya tsəgha nzə ki na, war ə Ahimas zəghu Saduk mbaɗə Zhəwabə. Ma kə kaa ngəci na: «Ya a kumaa dzaa mənivay, ee zləɓavə. Ndara kwal ee dza lə bali kwasəbə ndə ka Etiyupiy tsa va,» kə. Ma kə Zhəwabə kaa ngəci na: «Tawa dza ghaa dza lə ghaŋay ta kiya zəghuee. Gəla tsatsa nuwuriy, shiy tiɓa gha dzaa kumavə mbə vəli ciw,» kə. 23 «Ya kala dzee kumavə shiyiy, ee ɗi dza,» kə Ahimasə. «Ghənzə tsəghay, mbala shi,» kə Zhəwabə. Dza Ahimas mbaʼ kafiy lə bali ka nu tsaa dziy va tə ngula tə ngula kwal, dziy vəgha həl Zhurdeŋ, mbaʼ taŋanti ndə ka Etiyupiy tsa va.
24 Ghala vəghu tsa va kiy kwa jipə kar na pərikə miy dəghaa dzəmbə məlmə lə na mbəɓa niy nziyiy Davitə. Dza ndə ndəghu məlmə mbaʼ dzəmiy mə ghən pi tsa mənti məndi va nja bela dzar tə ghən miy pi, tə kələm tsa məlmə va. Sa nə na nighə kə na, mbaʼ nay ndə mbə səəkə lə bali kutiy. 25 Dza na ka gəzanci shi nashi na kaa mazə zlaŋ zlaŋ. Ma kə mazə kaa ngəci na: «Mbaʼ kə ntsa va kutiyiy, nuwur tsa wəzə tsa na sa ɓəkə na,» kə. War ə ntsa vaa kəətivaa səəkə. 26 Nighə ndə ndəghu məlmə tsa va ɓa na, tsahuti ndə mbə zhiniy səəkə lə bali. Dza na ka zlapanci kuma kaa ntsa kwa miy dəgha «Ava tsahuti ndə mbə zhikə lə bali kutiy ɓa,» kə. «Ya ghəciy nuwur tsa wəzə tsaa ɓə naa səəkə,» kə mazə. 27 Ma kə ndə ndəghu məlmə tsa va diɓa na: «Ya tə kəsli bali ciy, ee sənay tsa tə kuma va, Ahimas zəghu Saduk na,» kə. «Ta na tsava ndiy, zal wəzə na. Nəwər tsa wəzə tsa na sa səəkə na li,» kə mazə.
28 Ma sa tsəhiy Ahimas ki, ma kə kaa mazə zlaŋ zlaŋ na: «Wəzə dzava kuma gwanata,» kə. Dza na tsəfəku tsəfəkuy kwa kuma ci, gaʼa kuma ci mbə hiɗi. Ma kə na: «Usa pə ghum kaa Hiyala gha Kwa sləkəpə. Aa fambəŋa mbəzliy niy ɗi məniŋa kuma gəmgəm na va mbə dəvə gha mazə ndə sləkəra,» kə. 29 «Ya Abəsaluŋ məgəla tsa va na, kuma tar sa?,» kə mazə. Ma kə Ahimas na: «Ghala pi tsa ghuniŋiy Zhəwabə va ghiy lə tsahuti ndə sləni tsa ghay, ee niy nashi mbəzli mbə səva təruŋ, sənaye nda a shiy niy mənishiw,» kə. 30 Ma kə mazə kaa ngəci na: «Katantəvaŋa tiɓa, a gha nziyŋa vəgha bəla na gha ki,» kə. Dzəghwa Ahimas mbaʼ ɓarvay kwa kuma mazə, mbaʼ nziyiy tiɓa vəgha bəla.
31 Dza ndə ka Etiyupiy tsa va ki, mbaʼ tsəhiy. Ma kə kaa mazə na: «Nəwər tsa wəzə tsaa ɓəkee kaa ngəŋa mazə ndə sləkəra. Ndatsiy a Kwa sləkəpə slatəŋa nguvə gha lə kwal tsa nzə, mbaʼ mbəlantəŋa mbə dəvə ka mbəzə gha gwanashi,» kə. 32 Ma kə mazə kaa ntsa va na: «Ya Abəsaluŋ məgəla tsa va na, kuma tar sa?» kə. Ma kə ntsa va na: «Kumaa kəsay məgəla tsa va vay, tsəgha ɗi na ghənzəə kəsashi ka mbəzə gha, lə mbəzliy ɗi məniŋa kuma gəmgəm na gwanashi mazə tsee sləkəra,» kə.