2 Samuwel 17

Hushay ɓəkə na ci zəzə kuma ghənghən lə Ahitufel

Liy hum juw ki, ma kə Ahitufel kaa Abəsaluŋ na: «Ndara kwal ee təravə ka mbəzə bələku bələku bələku məŋ lə bakə, a ghiy dza ta tiku səbə Davitə həvir na. 2 War vətəghə dzee ta kəsay, ghəci dali dali, ghəci zhəghiy kushayə. Kee dzay, mbaʼee dzanti her ci, nza mbəzli kwasəbə huhushi gwanashi, ma nzee pəəsliti ghəci kutiy. 3 Sa kee pəəsliti ki na, nzee ɓasəkəŋa mbəzli ci va gwanashi. A gha sənay mbaʼ kə ntsa pəla gha va pəəsli ci mətiyiy, ta zhəghəkəvashi dza mbəzli gwanashi dzəvəgha gha, nza ghəshi nziy lə zərkə,» kə.

4 Dzəghwa mbaʼ kuma ci va təɓanati kaa Abəsaluŋ lə kaa mbəzli dikə dikə ni mbə ka Izərayel. 5 Ya tsəgha nzə ki, ma kə Abəsaluŋ na: «Harayim Hushay ndə ka Arəki, a ghəci gəzammə na ci kuma zəzə naa dzəkən kuma va kuraku,» kə. 6 Sa səəkiy Hushay ki na, mbaʼ Abəsaluŋ gəzanci kuma zəzəti Ahitufel va. Ma kə kaa ngəci diɓa na: «A ghummə məni njasa gəzəkə na va Shəkənaa, naa nahuti zəzə kuma va gha?» kə. 7 Ma kə Hushay kaa ngəci na: «Nana ɓashiy, wəzə na zəzə kuma ɓəkə Ahitufel naw. 8 Ya ghay, a gha sənashi kar dəŋa lə mbəzli ci wəzə wəzə. Ka mbəzə ghyanakə ni na ghəshi. Njasa ka nəfə tsa dəghwava vaa satiy sa pahu məndi ndərazhi ci mbə gambay, tsəgha satiy nəfə tsa shi. Ntsaa kurahəhu kuma kən mbəzə na dəŋa. Ka dza naa hi tə pi kutiŋ lə mbəzliw. 9 Ya njaaɓa sanay, aa mbiy ya mbə ləgu, ya tə tsahuti pi. Sa dza ghummə kuməmmə li shi, war mbaʼ kə məndi dzaa bəkuy pərɓa mbəzli mbə mbəzli ghummiy, ta gəzə dza məndi: “A məndi bəkuvə mbəzli mbə mbəzli Abəsaluŋ,” kə məndi. 10 Ya mbəzliy gura tə mbəzə, nza nəfə və shi nja nəfə tsa zhəliy, kushey dza vəgha shiy nza. Sa nza nay, A ka Izərayel gwanashi sənay ntsaa kurahəhu mbəzə na dəŋa, zhini təruŋ ka sawji kwasəbə va mbay mbəzə, kə ghəshi. 11 Va tsəgha kiy, Avanta nee kuma zəzətee: Ə pə gha gəzanshi kaa mbəzli a məndi dzaa ɓasəkə ka sawji ka Izərayel gwanashi dzəvəgha gha, ɗaŋ təruŋ nja ndarəghə kwa həl, ghava na tə hiɗi Daŋ paʼa mbə məlmə Ber-Sheva. Nza gha dza ta mbəzə kwasəbəshi dəʼu ghən tsa gha. 12 Ya dzəghwa tima na Davitiy, ta dza dza ghumməə kəsay, mbaʼ ghummə dzammə dzəkən njasa ka mini vaa səəmətaa dzəti hiɗi. Ka ghummə dzay kərəp ghummə bakwantishi, kala tərə ma ndə mbə shi ya kutiŋ, ya ghəci, ya mbəzli kwasəbə va. 13 Mbaʼ kə dzaa huy dzəmbə məlmiy, ta dza dza ka sawji ka Izərayel gwanashiy ɓəkə zhiʼuʼu, mbaʼ ghummə mbahaghwa slən shi mbə nava məlmə gwanashi dzəghwa həl tsa nza na va vəgha, kala tərə ma ya haku mbəɓa.

14 Sa favə kar Abəsaluŋ lə ka Izərayel kuma gəzə Hushay va ki, ma kə ghəshi gwanashi na: «Wəzəɓa zəzə kuma Hushay ndə ka Arki va na kən na Ahitufel,» kə ghəshi. Mbalaa Kwa sləkəpə tarəkə na ndəghanti məndi na Ahitufel va zəzə kuma ta mbəə ɓəkə bəzəə dzəkən Abəsaluŋ, ya tsəgha niy nza na wəzəɓa ghənzə.

Davitə taŋiy dzəvəri na pəriɓa bəla həl Zhurdeŋ ta mbəliy va Abəsaluŋ

15 Liy hum ki na, mbaʼ Hushay dzaa kəsashi kar Saduk lə Abiyatar, ka ta Hiyala, mbaʼ gəzanshi zəzə kumaa niy ɓanakəshi Ahitufel va kaa kar Abəsaluŋ lə mbəzli dikə dikə ni mbə ka Izərayel, mbaʼ zhiniy gəzanshi na ci va zəzə kuma ɓanakəshi na. 16 Ma kə kaa ngəshi diɓa na: «Nana kiy, ghunashim mbəzli kiyaŋukiyaŋu kaa Davitə a ghəshi dzaa gəzanci. Ma kə ghəshi dzaa ni kaa ngəciy: “Əntaa gha hi dzar tə ngulu mbə gamba dziy vəgha həl Zhurdeŋ va ma. Taŋanti tə gha həl tsa vaa dzəvəri kwa kuma. Kala tsəghay, ta bakwantəŋuy dza məndi, ghuy lə mbəzli kwasəbə gha” kə ghəshi dzaa ni kaa ngəci,» kə.

17 Kar Zhunataŋ zəghu Abiyatar ghəshi lə Ahimas zəghu Saduk va na shi kiy, tə pi tsa har məndi vaa Ayin-Rugel niy nziyshi ghəshi. Mali kwa sləni niy ghunata məndi ta dza ta gəzanshi kuma va, nza ghəshi dza ta zhananci dəʼu ghən tsa shi kaa mazə Davitə. Va nəghətaa məndi fəti ghən ti shi niy nziyshi ghəshi tə pi tsa va kala dza maa dzəmbə məlmə. 18 Mbalaa a tsahuti məgəla nashi, mbaʼ dzaa gəzanci kaa Abəsaluŋ. Dza kar Zhunataŋ lə Ahimas, mbaʼ ghəshi dzashi kiyaŋu kiyaŋu dzakə ghyi tsa tsahuti ndə mbə məlmə Bahurim. Sa niy nza wawrə kwa tipə ntsa va na, mbaʼ ghəshi dzashiy dzəghwa wawərə va. 19 Dza mali kiyɓa mbaʼ ɓəvə shiy pəlakənshi kən wawərə va, mbaʼ pəlati shi ndəkuti na ta ghulishi tə shi va, ta mbəə mbəliy mbəzli va. 20 Liy hum ki na, mbaʼ mbəzli tsəhəshi kiy mali va sa ghunashi Abəsaluŋ. Ma kə ghəshi kaa ngəta na: «Kuma na kar Ahimas lə Zhunataŋaa?» kə ghəshi. «A ghəshi taŋəti həl dzəvərishi,» kə mali va. Dza mbəzli va ka palashi, shaŋ ghəshi ta nashi, mbaʼ ghəshi zhəghətəvashiy zhimbə məlmə Zheruzalem.

21 Ma sa dzashi mbəzli va ki na, mbaʼ kar Ahimas lə Zhunataŋ zhikəməshi kwa wawərə va, mbaʼ ghəshi dzaa gəzanci kumaa mənita kaa mazə Davitə. Mbaʼ ghəshi zhananavə kuma zəzəti Ahitufel va məni nzə ta pəəsli ci. Ma kə ghəshi kaa ngəci ki na: «Divam a ghuy taŋanti həl,» kə ghəshi. 22 Dza kar Davitə lə mbəzli kwasəbə va ki, mbaʼ ghəshi kafəshi, mbaʼ ghəshi taŋəshi dzəvəri tə həl Zhurdeŋ. Gha piy kəɗi ki na, ghəshi taŋəshi gwanashi kala tərə ma ndə ya kutiŋ.

23 Ma sa nighəti Ahitufel məndi kala zləɓa ma na ci va zəzə kuma ɓəkə na ki na, dza na ɓiyakə pəhati liferuw tə kwantəmca ci, ɗal dzəmiy ka dzay dzəmbə məlmə ci. Sa tsəhiy na kiy ghyi na, mbaʼ gəzanshi kwa kərni kuma ci kaa mbəzli kiy ghyi tsa ci, mbaʼ dzaa ɓərtanti ghən tsa ci. Sa mətiy na na, mbaʼ məndi dzaa lanti kwa kuli diy.

Davitə tsəhiy mbə məlmə Mahanayim

24 Liy hum ki na, mbaʼ kar Davitə tsəhəshi mbə məmə Mahanayim. Ghəshi mbəɓa na, ka taŋə kar Abəsaluŋ lə ka Izərayel gwanashi dzəvəri tə həl Zhurdeŋ. 25 Amasa niy nza slən tsa ntsaa niy tivə Abəsaluŋ ta nza ghəci ka dikə tsa ka sawji kwa pi tsa Zhəwabə. Amasa tsa vay, zəghu Yitəra ndə ka Izərayel niy nza na. Abigayel niy nza mali Yitəra tsa va, zha Nahashə zhambəghəta Seruya mbəghiy Zhəwabə. 26 Dzəghwa kar Abəsaluŋ lə ka Izərayel ki mbaʼ ghəshi dzaa nziyshi tə hiɗi ka Galad. 27 Ma sa tsəhiy Davitə mbə məlmə Mahanayim ki na, dzəghwa kar Shuvi zəghu Nahash ndə ka Raba, məlmə ka Amun, ghəshi lə Makir zəghu Amiyel ndə ka Ludevar, mbaʼ Barzilay ndə ka Regulim tə hiɗi Galad səəkəə kəsay. 28 Mbaʼ ghəshi ɓanavə shiy həni, mbaʼ ceʼuwer, mbaʼ shekiki rikiɗi, mbaʼ alkamari, mbaʼ urzhə, mbaʼ ghupə, mbaʼ shi səli səli ni, mbaʼ cikizli, mbaʼ nihuti shiy nja cikizli, 29 mbaʼ mbəzəku, mbaʼ uwa pəsli pəsli na, mbaʼ mereʼuwen tsa slay lə sa təŋkesli. Kaa kar Davitə lə mbəzli kwasəbə va niy ɓəkə ghəshi shi va. «A mbəzli va dzaa dalishi tərəŋu, mbə ghəranshi dza maa nza lə ndir dzar mbə gamba va,» niy təkəti mbəzli va, va tsəgha niy ɓanakəshi ghəshi shi va.